Unit 26: Day 1

Mga Taga-Colosas

Pasiuna

Nagtudlo si Apostol Pablo bahin sa kahalangdon ni Jesukristo (pagkalabaw, kabantugan, o kahamili) ug mipasidaan batok sa sayop nga doktrina. Giawhag niya ang mga Santos nga taga-Colosas nga itumong ang ilang mga hunahuna diha sa langitnong mga butang ug palambuon ang mga kinaiya ni Kristo. Gimanduan usab sila ni Pablo nga magmabination ug magmaalamon sa ilang mga inter-aksyon ngadto sa uban.

Mga Taga-Colosas 1–2

Nagtudlo si Pablo bahin sa kahalangdon ni Jesukristo ug mipasidaan batok sa sayop nga doktrina

Hunahunaa ang duha ka kahoy nga pareha og gidak-on—ang usa mabaw ra og mga gamut ug ang usa lawom og mga gamut. Kon dunay grabe nga unos nga moabut, hain niadtong mga kahoy ang posible nga matumba? Ngano man?

Basaha ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles, nga mangita sa matang sa mga alimpulos nga kinahanglan natong mahibaloan: “Dugang pa sa mga gipanagna nga mga linog ug mga gubat mao ang espirituhanong mga alimpulos nga makaibut kaninyo gikan sa inyong espirituhanon nga pundasyon ug mopadpad sa inyong espiritu ngadto sa mga dapit nga wala ninyo dahuma, usahay dili kaayo ninyo mamatngunan nga naalsa na kamo” (“Espirituhanong mga Alimpulos,” Ensign o Liahona, Mayo 2014, 18).

Unsa ang pipila ka mga ehemplo sa espirituhanong mga alimpulos nga makadaut o makapabulag nato gikan sa atong hugot nga pagtuo diha ni Jesukristo?

Ngano man nga kining espirituhanong mga alimpulos mas makapabalaka kay sa pisikal nga mga hagit, sama sa mga linog o mga gubat?

Pamalandungi sa makadiyot kon unsa nga espirituhanong mga alimpulos ang posible nga makaapekto nimo.

Misulat si Apostol Pablo og usa ka epistola ngadto sa mga miyembro sa Simbahan didto sa Colosas human makahibalo bahin sa mga impluwensya ug sayop nga mga pagtulun-an didto nga mihulga sa pagdaut kanila gikan sa ilang hugot nga pagtuo diha ni Jesukristo. Samtang magtuon ka sa Mga Taga-Colosas, pangitaa kon giunsa ni Pablo sa pagtinguha sa paglig-on sa pagtuo sa mga miyembro diha ni Kristo ug alang sa mga panalangin nga makabaton og pagtuo nga lig-ong natukod diha ni Kristo.

Ang Colosas usa ka dapit sa moderno nga Turkey karon. Tan-awa sa Mga Mapa sa Biblia, nu. 13, “Ang Misyonaryo nga mga Panaw ni Apostol Pablo,” ug pangitaa ang siyudad sa Laodicea diha sa mapa. Ang Colosas gibana-bana nga mga 11 ka milya (17.7 ka kilometro) sa habagatang-silangan sa Laodicea.

Pagkat-on sa Heyograpikanhong Kahimtang

Ang pagpangita sa heyograpikanhong mga kahimtang sa mga istorya sa kasulatan diha sa mapa makatabang nimo nga mas masabtan ang kinatibuk-ang kahulugan ug sulod sa mga kasulatan. Ang mga mapa makatabang nga imong masabtan ang relasyon tali sa nagkadaiyang mga lokasyon.

Sama sa narekord diha sa Mga Taga-Colosas 1:1–11, gipangumusta ni Pablo ang mga Santos didto sa Colosas ug giila ang ilang pagkamatinud-anon. Iyang gipasabut nga ang ebanghelyo nagdala og bunga, o mga panalangin, diha sa kinabuhi niadtong modawat ug mosunod niini. Gitudloan dayon ni Pablo ang mga Santos bahin ni Jesukristo.

Basaha ang Mga Taga-Colosas 1:12–19, nga mangita sa mga kamatuoran nga gitudlo ni Pablo bahin ni Jesukristo. Mahimo nimong markahan o sulatan ang imong mga kasulatan sa unsay imong makit-an. Ang mga pulong nga “naglalin kanato” diha sa bersikulo 13 nagpasabut og “miusab kanato”; ang pulong nga invisible diha sa bersikulo 15 nagpasabut og “dili makita.”

Ang Mga Taga-Colosas 1:12–19 nagtudlo sa mosunod nga kamatuoran bahin ni Jesukristo: Si Jesukristo mao ang Manunubos, ang unang natawo sa espiritu nga mga anak sa Langitnong Amahan, ang Tiglalang sa tanang mga butang, ang pangulo sa Simbahan, ug ang unang nabanhaw.

1. Tubaga ang mosunod nga mga pangutana diha sa imong scripture study journal:

   1. Sa imong hunahuna nganong importante man alang kanato nga masayud ug motuo niining mga kamatuoran bahin ni Jesukristo?

   2. Sa unsang paagi nga ang masayud ug motuo niining mga kamatuoran makapalig-on sa atong pagtuo diha Kaniya?

Nagtudlo si Pablo nga si Jesukristo mao ang atong Manunubos (tan-awa sa Mga Taga-Colosas 1:14). Basaha ang Mga Taga-Colosas 1:20–22, nga mangita sa gitudlo ni Pablo sa mga Santos sa Colosas bahin sa ilang panginahanglan sa usa ka Manunubos.

Sumala sa bersikulo 21, sa unsang paagi nga ang usa ka tawo mahimutang sa halayo, o mahibulag, gikan sa Dios?

Ang pulong nga pagpasig-uli (tan-awa sa Mga Taga-Colosas 1:20–21) nagpasabut nga magkasinabut o magkauyon. Sumala sa Mga Taga-Colosas 1:20–22, sa unsang paagi kita gipasig-uli ni Jesukristo ngadto sa Dios? (Ang mga pulong nga “naghimo sa kadaitan pinaagi sa iyang dugo diha sa krus” [bersikulo 20] nagpasabut sa Pag-ula ni Jesukristo.)

Ang panalangin nga mapasig-uli ngadto sa Dios dunay kondisyon. Basaha ang Mga Taga-Colosas 1:23, nga mangita kon unsay gikinahanglan aron mapasig-uli ngadto sa Dios.

Ang “magpadayon gayud sa pagtuo nga dili matarug ug malig-on” (Mga Taga-Colosas 1:23) nagpasabut nga magpabiling makanunayon sa atong pagtuo diha ni Jesukristo pinaagi sa pagtuman sa Iyang mga sugo ug sa paghinulsol sa atong mga sala. Gikan sa Mga Taga-Colosas 1:20–23 atong makat-unan ang mosunod nga kamatuoran: Kita mahimong mapasig-uli ngadto sa Dios pinaagi sa Pag-ula ni Jesukristo kon magpadayon kita nga dili matarug ug malig-on diha sa atong pagtuo.

2. Hinumdumi ang kondisyon sa duha ka kahoy gikan sa sayong bahin niini nga leksyon. Dayon tubaga ang mosunod nga mga pangutana diha sa imong scripture study journal:

   1. Kinsa man ang imong nailhan nga sama sa kahoy nga dunay lawom nga mga gamut—nga dili matarug ug malig-on sa iyang pagtuo diha ni Kristo?

   2. Sa unsang paagi nga ang iyang ehemplo nahimong usa ka panalangin nganha kanimo?

Hinumdumi ang alimpulos nga mihaguros og maayo aron madaut kadtong duha ka kahoy. Basaha ang Mga Taga-Colosas 2:4, 8, nga mangita sa espirituhanong mga alimpulos nga mihulga sa pagdaut sa mga Santos nga taga-Colosas.

Nianang higayuna dunay pipila ka mga pilosopiya ug mga tradisyon nga gitudlo sa pipila ka mga tawo nga misulay sa pagpaminos sa kaimportante ni Jesukristo. Ang ubang sayop nga relihiyosong mga pilosopiya nga nahimong popular mao nga ang mga anghel mga tigpataliwala alang sa Dios nga kinahanglang simbahon ug ang ideya nga ang lawas dautan (tan-awa sa Mga Taga-Colosas 2:16–23).

Nganong ang pagtuo sa sayop nga mga pagtulun-an, lakip na sa mga pagtulun-an nga mopaminos sa kaimportante ni Jesukristo, makapasayon man sa usa ka tawo nga madaut sa espirituhanong paagi?

Basaha ang Mga Taga-Colosas 2:6–7, nga mangita sa tambag nga gihatag ni Pablo aron matabangan ang mga Santos nga makalikay nga mahisalaag pinaagi sa kalibutanong mga pilosopiya ug mga tradisyon.

Gikan niini nga mga bersikulo atong makat-unan ang mosunod nga kamatuoran: Pinaagi sa lig-on nga pagkatukod diha ni Jesukristo, makalikay kita nga mahisalaag pinaagi sa kalibutanong mga pilosopiya ug mga tradisyon.

3. Tubaga ang mosunod nga mga pangutana diha sa imong scripture study journal:

   1. Unsa ang imong gituohan nga usa sa labing importanting mga butang nga atong mabuhat aron lig-ong matukod diha ni Jesukristo?

   2. Nganong mituo man ka nga kanang piho nga butang importante kaayo?

Ikonsiderar ang mosunod nga pamahayag ni Elder Andersen samtang mipadayon siya sa iyang pakigpulong bahin sa espirituhanong mga alimpulos:

“Ang labing kuyaw nga mga alimpulos mao ang mga tintasyon sa kaaway. Ang sala kanunay nga usa ka bahin sa kalibutan, apan lisud kaayong likayan, ibaliwala, ug dili dawaton. Siyempre, dunay gamhanang pwersa nga mobuntog sa mga alimpulos sa pagpakasala. Gitawag kini og paghinulsol.

“Dili tanang alimpulos sa kinabuhi inyong kaugalingong minugna. Ang uban moabut tungod sa sayop nga mga pagpili sa uban, ug ang uban moabut lang tungod kay kini ang mortalidad. …

“Unsaon ninyo pagpangandam sa inyong mga alimpulos? ‘Hinumdumi … kini diha sa lig-on nga sukaranan sa atong Manunubos, kinsa mao si Kristo, ang Anak sa Dios, nga kamo kinahanglan gayud nga motukod sa inyong tukuranan; nga sa panahon nga ang yawa mopadala sa iyang mapintas nga mga hangin, … ang iyang mga pana diha sa alimpulos, … sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahum … sa pagbitad kaninyo … tungod sa lig-on nga sukaranan diin kamo natukod’ [Helaman 5:12]. Kini ang inyong tagoanan gikan sa alimpulos” (“Espirituhanong mga Alimpulos,” 18–19).

4. Hinumdumi kadtong personal nga espirituhanong mga alimpulos nga imong nahunahunaan sa pagsugod niini nga leksyon. Diha sa imong scripture study journal, irekord ang unsay imong buhaton aron magpabilin nga lig-ong natukod diha ni Jesukristo ug aron makalikay nga madaut pinaagi sa espirituhanong mga alimpulos.

Mga Taga-Colosas 3–4

Giawhag ni Pablo ang mga taga-Colosas nga itumong ang ilang mga hunahuna diha sa langitnong mga butang ug magmaalamon

Sama sa narekord diha sa Mga Taga-Colosas 3–4, giawhag ni Apostol Pablo ang mga Santos nga taga-Colosas nga hunungon ang ilang pagkadili matarung ug palambuon ang mga kinaiya ni Jesukristo. Giawhag usab niya nga magmainampuon ug magmaalamon sila, ilabi na diha sa ilang mga inter-aksyon niadtong dili mga Kristiyano. Iya dayong gipahayag ang mga pangumusta sa pipila sa iyang mga isigka-sulugoon, lakip na ni Lucas.

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Mga Taga-Colosas ug nahuman kini nga leksyon sa (petsa).

   Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: