Unit 31: Day 1
Pinadayag 1–3
Pasiuna
Samtang didto sa isla sa Patmos, si Apostol Juan misulat og usa ka sulat sa pagdasig ngadto sa pito ka mga kongregasyon sa Simbahan. Iyang gihulagway dinhi ang mga pagpadayag nga iyang nadawat. Si Juan mipamatuod bahin sa unsay gihatud kaniya gikan sa usa ka anghel ug gikan ni Jesukristo. Gipahibalo usab niya ang mga pulong sa Ginoo sa pagdayeg, pagkorihir, ug pagpasidaan sa mga Santos.
Pinadayag 1:1–11
Si Juan nagpamatuod sa iyang panan-awon
Butangi og tsek diha sa matag usa sa mosunod nga mga panghitabo nga gusto nimong dugang pa nga masayran:
____ Kinabuhi sa wala pa dinhi sa yuta
____ Ang katapusang mga adlaw
____ Ang Ikaduhang Pag-anhi ni Jesukristo
____ Ang Milenyum
____ Ang Katapusang Paghukom
Ang basahon sa Pinadayag “mao usab ang nailhan nga Apokalipsis, usa ka Gresyanhon nga pulong nga nagpasabut nga gipadayag o gibutyag” (Giya ngadto sa mga Kasulatan, scriptures.lds.org, “Pinadayag ni Juan”). Niini nga basahon si Apostol Juan mirekord og mga kamatuoran nga gipadayag ngadto kaniya kabahin sa kinabuhi sa wala pa dinhi sa yuta, ni Jesukristo ug sa Iyang tahas sa plano sa Langitnong Amahan sa kaluwasan, ang mga panghitabo nga nagpadulong ngadto sa Ikaduhang Pag-anhi, ang Milenyum, ug ang Katapusang Paghukom.
Pangita og mga kamatuoran mahitungod niini nga mga hilisgutan samtang magtuon ka sa basahon sa Pinadayag.
Basaha ang Hubad ni Joseph Smith, Pinadayag 1:1–3 (sa Giya ngadto sa mga Kasulatan, scriptures.lds.org), nga mangita kon unsay gitudlo ni Juan mahitungod sa pinadayag nga iyang nadawat. Mahimo nimong markahan o timan-an kon unsay gusto ni Juan nga buhaton sa mga Santos.
Si Apostol Juan mihisgut niadtong mobasa sa iyang mga pulong ug niadtong maminaw sa iyang mga pulong. Sa kapanahunan ni Juan daghang mga Santos ang dili makahibalong mobasa, mao nga nasayud sila sa unsay iyang gisulat diha sa basahon sa Pinadayag pinaagi sa pagpaminaw sa uban nga mobasa niini og kusog.
Base sa mga pagtulun-an ni Juan diha sa Pinadayag 1:3, atong makat-unan ang mosunod nga baruganan: Samtang kita magbasa, magtinguha sa pagsabut, ug mosunod sa mga pulong sa Ginoo, kita mapanalanginan. Usa ka panalangin nga gitudlo ni Juan nga atong madawat mao ang pagkahimong andam alang sa Ikaduhang Pag-anhi ni Jesukristo.
Ang Hubad ni Joseph Smith nagklaro nga gitumong ni Juan ang iyang sulat “ngadto sa pito ka mga sulugoon kinsa anaa na sa pito ka mga simbahan diha sa Asia” (Hubad ni Joseph Smith, Pinadayag 1:4 [sa Giya ngadto sa mga Kasulatan, scriptures.lds.org]). Kini makatabang nato nga makasabut nga “ang pito ka mga simbahan diha sa Asia” nagpasabut sa pito ka mga kongregasyon sa Simbahan, sama sa mga ward ug branch karon, nga nahimutang diha sa kasadpan nga dapit sa moderno nga Turkey karon.
Basaha ang Pinadayag 1:5–8, nga mangita kon unsay gusto ni Juan nga mahibaloan sa pito ka mga kongregasyon mahitungod ni Jesukristo.
Timan-i nga si Juan mipasabut nga kita mahimong “[ma]tangtang … gikan sa atong mga sala” ug mamahimong limpyo pinaagi sa dugo, o Pag-ula, ni Jesukristo ug mahimong “usa ka gingharian [mga hari], mga sacerdote [mga pari] ngadto sa Dios” (Pinadayag 1:5–6).
-
Tubaga ang mosunod nga mga pangutana sa imong scripture study journal: Unsa nga mga pulong mahitungod sa Manluluwas diha sa Pinadayag 1:5–8 ang makahuluganon kaayo kanimo? Ngano man?
Basaha ang Pinadayag 1:9–11, nga mangita kon asa si Juan sa dihang iyang nadawat kini nga pagpadayag ug asa nahimutang ang pito ka mga simbahan. Timan-i kon asa ang pipila niini nga mga dakbayan diha sa kauban nga mapa.
Si Juan nakadawat niini nga pagpadayag atol sa usa ka lisud nga panahon alang sa mga miyembro sa Simbahan. Dihay grabe nga pagpanglutos ngadto sa mga Santos, lakip sa pagpatay sa pipila kanila, ingon man usab sa apostasiya ug pagkabahinbahin tali sa mga miyembro sa Simbahan. Dugang pa, ang tanang mga Apostoles gawas ni Juan gipangpatay. Ang basahon sa Pinadayag tingali gisulat atol sa paghari sa Romano nga emperor nga si Domitian (A.D. 81–96), kinsa gipasiugdahan og balik ang pagsimba sa emperor sa tibuok Kagamhanan sa Roma ug gipalayas o gipapatay kadtong dili mosimba sa mga dios-dios nga giaprubahan sa gobyerno sa Roma. Daghang mga tawo nagtuo nga si Juan gipalayas ngadto sa isla sa Patmos tungod niana nga rason.
Si Juan nakadawat og panan-awon sa dihang anaa siya sa isla sa Patmos.
Atong nakat-unan gikan sa Basahon ni Mormon nga si Nephi adunay panan-awon nga sama sa panan-awon ni Juan. Si Nephi nakakita sa mga panghitabo sa katapusang mga adlaw (lakip ang Ikaduhang Pag-anhi ni Jesukristo, ang Milenyum, ug ang pagkakompleto sa buhat sa Dios dinhi sa yuta), apan siya gisugo sa dili pagsulat niini tungod kay si Juan giorden nang daan sa pagbuhat sa ingon (tan-awa sa 1 Nephi 14:24–29). Ikonsiderar ang importansya nga gihatag sa Ginoo sa rekord ni Juan. Samtang mopadayon ka sa pagtuon sa mga pulong ni Juan diha sa Pinadayag, pangita og mga kamatuoran kabahin sa katapusang mga adlaw, sa Ikaduhang Pag-anhi, sa Milenyum, ug sa pagkakompleto sa buhat sa Dios dinhi sa yuta.
Pinadayag 1:12–20
Si Juan nakakita ni Jesukristo diha sa usa ka panan-awon
Paghunahuna og tulo ka mga kompaniya nga pamilyar ka. Aduna bay gigamit nga logo ang bisan asa ani nga mga kompaniya aron sa pagpaila sa kaugalingon niini?
Ngano kaha nga mogamit og mga logo ang mga kompaniya?
Diha sa basahon sa Pinadayag si Apostol Juan migamit og mga simbolo ug mga imahe sa pagtudlo sa importanting mga mensahe kabahin sa ebanghelyo. Ang mga simbolo mahimong gamhanan nga himan sa pagtudlo tungod kay kini makatudlo og mga baruganan sa mga tawo sa lain-laing mga henerasyon ug mga kultura ug sa daghang mga kahimtang. Makatudlo usab kini sa pipila ka nagkalain-laing mga mensahe.
Basaha ang Pinadayag 1:12–18, nga mangita sa mga simbolo nga nakita ni Juan ug gigamit sa paghulagway sa iyang pagpadayag. Mahimo nimong markahan o timan-an ang unsay imong makit-an.
-
|
Simbolo |
Posibleng kahulugan |
|---|---|
|
|
|
|
|
|
|
|
|
|
Base sa mensahe nga gipadayag sa Ginoo ngadto sa Iyang mga Santos pinaagi ni Juan, usa ka kamatuoran nga atong makat-unan mao nga si Jesukristo nagbantay ug nagpakabana sa Iyang matinud-anong mga sumusunod.
-
-
Ngano kaha nga importante man alang sa mga miyembro sa Simbahan sa kapanahunan ni Juan nga masayud nga si Jesukristo padayon nga nagbantay ug nagpakabana kanila?
-
Nganong importante man alang kanato nga mohinumdom niining sama nga kamatuoran?
-
Paghunahuna og higayon diin imong gibati nga ang Dios nagbantay ug nagpakabana kanimo. Ikonsiderar kon sa unsang paagi kana nga kasinatian nakapanalangin kanimo.
Timan-i sa Pinadayag 1:17–18 nga ang Manluluwas misulti kang Juan nga Siya naghupot sa mga yawe sa impyerno ug kamatayon. Gikan niini nga mga bersikulo atong makat-unan nga si Jesukristo usa ka nahimaya nga nabanhaw nga binuhat nga adunay gahum batok sa kamatayon ug impyerno.
Ikonsiderar kon unsa ang gitudlo niini nga doktrina kabahin sa umaabut nga resulta sa gubat tali sa maayo ug dautan nga anaa sa tibuok yuta.
Pamalandungi kon sa unsang paagi ang mosunod nga pamahayag dunay kalabutan sa gahum ni Jesukristo batok sa kamatayon ug impyerno: “Ang mensahe sa Pinadayag susama ra sa tanang kasulatan; adunay kadaugan sa katapusan dinhi sa yuta sa Dios batok sa yawa; usa ka permanente nga kadaugan sa maayo batok sa dautan, sa mga Santos batok sa ilang mga tiglutos, sa gingharian sa Dios batok sa mga gingharian sa tawo ug ni Satanas” (Bible Dictionary, “Revelation of John”).
Tungod kay kita nasayud nga ang maayo sa katapusan magmadaugon batok sa dautan, depende na kanato kon asa nga habig kita modapig—ni Satanas o sa Dios.
Si Presidente Ezra Taft Benson miingon: “Matag adlaw ang mga pwersa sa dautan ug ang mga pwersa sa maayo makaangkon og bag-o nga mga sumusunod. Matag adlaw personal kita nga mohimo og daghan nga mga desisyon nga nagpakita kon hain ang atong gisuportahan. Ang katapusang resulta sigurado—ang mga pwersa sa pagkamatarung sa katapusan magmadaugon. Atong ipakita karon kon asa nga habig kita sa personal nga paagi, karon ug sa umaabut, modapig niini nga away—ug unsa ka lig-on ang atong pagdapig. Magmatinuoron ba kita sa atong gi-orden nang daan nga misyon sa ulahing mga adlaw?” (“In His Steps” [Brigham Young University fireside, Mar. 4, 1979], 1, speeches.byu.edu).
Ikonsiderar ang unsay imong mabuhat aron mas hingpit nga mopili diha sa habig sa Dios. Lihoka ang bisan unsa nga mga impresyon nga posible nimong madawat.
Pinadayag 2–3
Si Juan nagsulat sa mga pulong ni Jesukristo ngadto sa mga lider sa pito ka mga simbahan
Ang Pinadayag 2:1–3:13 naglakip sa mensahe sa Ginoo ngadto sa piho nga mga simbahan sa Asia Minor. Basaha kini nga mga bersikulo, nga mangita sa tambag ug mga saad nga gihatag sa Ginoo ngadto niini nga mga miyembro sa Simbahan.
Asa niadto nga mga saad ang ganahan nimong madawat?
Basaha ang Pinadayag 3:14–17, nga mangita sa usa ka kahimtang nga kinahanglang mabuntog sa mga miyembro sa Simbahan sa Laodicea aron makadawat og kahimayaan. Sa bersikulo 14, “ang Amen” nagpasabut ni Jesukristo.
-
-
Unsa kaha ang ipasabut nga kining mga miyembro sa Simbahan “dili mabugnaw ug dili usab mainit” (Pinadayag 3:15) apan dagaang lamang nga mga disipulo ni Jesukristo?
-
Sa imong opinyon, unsa ang pipila ka mga butang nga mahimong buhaton ug dili buhaton sa dagaang nga mga disipulo ni Jesukristo?
-
Hunahunaa unsay imong nahimo sa pagsunod ni Jesukristo sulod sa milabay nga pipila ka adlaw ug kon ikaw init, bugnaw, o dagaang ba nga disipulo ni Jesukristo.
Basaha ang Pinadayag 3:19, nga mangita kon nganong miingon ang Ginoo nga Iyang gikorihian ang mga Santos sa Laodicea. Mahimo nimong markahan o timan-an ang unsay imong makit-an.
Basaha ang unang hugpong sa mga pulong sa Pinadayag 3:20, nga mangita kon unsay gisulti sa Manluluwas nga Iyang gibuhat.
Unsay pipila sa lain-laing mga paagi nga mahimong buhaton sa mga tawo kon ilang maamguhan nga ang Manluluwas nanuktok sa pultahan sa ilang mga panimalay?
Hunahunaa ang posible nimong mga pagbati kon makadungog ka og tuktok sa pultahan sa imong panimalay ug makaamgo nga ang Manluluwas kini. Imo ba nga ablihan ang pultahan?
Basaha og tiwas ang Pinadayag 3:20, nga mangita sa panalangin nga gitanyag sa Ginoo ngadto sa mga Santos sa Laodicea ug unsay angay nilang buhaton aron makabaton niini.
Base sa mensahe sa Ginoo ngadto sa mga Santos sa Laodicea, atong makat-unan ang mosunod nga baruganan: Kon atong ablihan ang pultahan ngadto sa Manluluwas, Siya mosulod ngadto kanato ug mokaon uban kanato.
Sa karaang kultura sa Duol nga Silangan [Near East], ang pakigdungan og kaon uban sa usa ka tawo usa ka timailhan sa pagpakigdait. Kini nagpakita nga ang usa ka higut sa panaghigalaay ug kalinaw anaa o gitanyag.
Unsa kaha ang girepresentahan sa pultahan nga gihisgutan diha sa Pinadayag 3:20?
Hunahunaa kon unsa kaha ang girepresentahan sa pultahan samtang imong basahon ang mosunod nga istorya ni Presidente Spencer W. Kimball:
“Usa ka adlaw [usa ka artist nga ginganlan og Holman Hunt] nagpakita sa iyang hulagway nga ‘Si Kristo Nanuktok sa Pultahan’ ngadto sa usa ka higala sa diha nga ang higala kalit nga misulti: ‘Dunay usa ka sayop kining imong hulagway.’
“‘Unsa man ni?’ nangutana ang artist.
“‘Ang pultahan nga gituktok ni Jesus walay gunitanan,’ mitubag ang iyang higala.
“‘Aw,’ mitubag si Mr. Hunt, ‘dili kana sayop. Abi nimo, kini mao ang pultahan ngadto sa kasingkasing sa tawo. Kini maabli lamang gikan sa sulod.’
“Ug tinuod kana. Si Jesus mahimong nagbarug ug nanuktok, apan ang matag usa kanato ang maghukom kon mangabli ba” (The Miracle of Forgiveness [1969], 212).
Ikonsiderar unsay imong mabuhat aron sa pag-abli sa imong kasingkasing ngadto sa Manluluwas.
Basaha ang Pinadayag 3:21–22, nga mangita sa saad ug tambag sa Manluluwas ngadto sa Iyang mga Santos.
Sumala sa bersikulo 22, unsa ang tambag nga gihatag sa Ginoo?
Paningkamot nga “magpatalinghug sa sulti sa espiritu” (Pinadayag 3:22) pinaagi sa pagpamalandong sa unsay imong nakat-unan niini nga leksyon. Buhata ang bisan unsa nga mga impresyon nga mahimo nimong madawat.
-
Akong natun-an ang Pinadayag 1–3 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: