Unit 8: Day 1

Marcos 4–5

Pasiuna

Si Jesus nagtudlo gamit ang mga sambingay diha sa kabaybayunan sa Dagat sa Galilea. Samtang diha sa dagat, ang Manluluwas mipakalma sa unos, ug ang Iyang mga tinun-an natingala sa Iyang gahum ibabaw sa mga elemento. Mipakita si Jesus sa Iyang pagkagamhanan ibabaw sa mga yawa pinaagi sa pagpapahawa kanila diha sa usa ka tawo. Samtang nangalagad diha sa Capernaum, giayo Niya ang usa ka babaye nga gitalinug-an [issue of blood] ug gibuhi pagbalik ang anak nga babaye ni Jairo.

Marcos 4

Si Jesus nagtudlo mahitungod sa gingharian sa Dios gamit ang mga sambingay ug nagkalma sa usa ka unos

Ikonsiderar ang kinangil-aran nga unos nga imong nasinati. Pamalandonga kon unsaon nimo paghulagway ang imong kasinatian ngadto sa usa ka tawo kinsa wala diha atol sa unos.

Sa unsa nga paagi nga ang piho nga mga hagit ug mga kalisdanan sa kinabuhi sama sa usa ka unos?

1. Kopyaha ang mosunod nga tsart diha sa imong scripture study journal. Dayon, diha sa luna sa ubos sa matag kategoriya, pagsulat og mga ehemplo sa pisikal, espirituhanon, mental, ug sosyal nga mga unos nga mahimong masinati sa mga batan-on.

Pisikal	Espirituhanon	Mental	Sosyal

Samtang ikaw nagtuon sa Marcos 4–5, pangita sa mga baruganan nga makatabang nimo kon imong masinati ang mga unos sa kinabuhi.

Sa Marcos 4:1–34 atong mabasa nga samtang diha sa kabaybayunan sa Dagat sa Galilea, si Jesukristo mitudlo og daghan nga mga sambingay ngadto sa pundok sa katawhan. (Kini nga leksyon dili maglakip niini nga mga bersikulo tungod kay imo nang natun-an kini nga mga sambingay diha sa Mateo 13.)

Basaha ang Marcos 4:35–38, nga mangita kon unsa nga problema ang mitumaw samtang ang Manluluwas ug ang Iyang mga tinun-an mitabok sa Dagat sa Galilea.

Ang Dagat sa Galilea nahimutang 700 ka pye ubos sa lebel sa dagat ug gilibutan sa bukid ang tulo ka mga kilid niini. May mga panahon, ang hangin mohapak sa kilid sa bukid ug makamugna og kalit, grabe nga unos uban sa dagkong balud diha niining gamay nga katiguman sa tubig. Ang uban sa mga tinun-an mga anad nga mga mangingisda, apan tungod sa unos, nga mikusukuso sa sakayan, “napuno sila sa kahadlok ug sila diha sa katalagman” (Joseph Smith Translation Luke 8:23).

Kon ikaw didto pa sa sakayan uban ni Jesus ug sa mga tinun-an dinhi niini nga mga kahimtang, unsa kaha ang imong mga hunahuna ug mga pagbati sa dihang milingi ka ngadto sa Manluluwas ug imong nakita Siya nga natulog?

Basaha ang Marcos 4:39–40, nga mangita sa tubag sa Manluluwas ngadto sa nagpakitabang nga mga tinun-an. Mahimo nimong markahan ang mga pulong “Hilum! Hunong” ug “miabut ang dakong kalinaw”(Marcos 4:39) diha sa imong mga kasulatan. Mahimo usab nga imong isulat ang mosunod nga baruganan diha sa imong kasulatan o scripture study journal: Kon atong tinguhaon ang tabang sa Manluluwas sa mga panahon sa kasamok o kahadlok, Siya makahatag kanato og kalinaw.

Pamalandonga sulod sa usa ka gutlo unsay gipasabut sa pagtinguha sa tabang sa Manluluwas sa mga panahon sa kasamok ug kahadlok. Ikonsiderar ang uban nga mga paagi nga mahimo nato kining buhaton.

Basaha ang Marcos 4:41, nga mangita kon unsay gipangutana sa mga tinun-an mahitungod kang Jesus. Ikonsiderar ang pag-highlight sa pangutana diha sa imong mga kasulatan.

Kon ikaw didto pa aron tubagon ang pangutana sa mga tinun-an, unsa kaha ang imong isulti ngadto kanila mahitungod ni Jesukristo ug sa Iyang gahum?

Sa unsang paagi nga ang paghinumdom nga si Jesukristo adunay gahum sa pagpakalma sa unos ug paghatag og kalinaw makaapekto sa imong hugot nga pagtuo sa mga panahon sa kasamok?

2. Basaha ang mga pulong o paminaw sa himno “Master, the Tempest Is Raging” (Hymns, no. 105), ug pamalandonga ang mensahe. Paghunahuna og usa ka panahon sa dihang ikaw o ang usa ka tawo nga imong kaila midangop ngadto sa Manluluwas atol sa unos sa kinabuhi. Sa unsa nga mga paagi nga ang Manluluwas mitabang sa pagpakalma sa unos o mihatag og kalinaw? Sa imong scripture study journal, isulat unsa ang imong mabuhat aron sa pagtinguha sa tabang sa Manluluwas atol sa mahagiton nga mga panahon sa imong kinabuhi.

Marcos 5:1–20

Giayo ni Jesus ang usa ka lalaki pinaagi sa pagpapahawa sa mga yawa diha sa lalaki

Ang Marcos 5:1–18 nagrekord nga giayo ni Jesus ang usa ka lalaki nga napuno sa “mahugaw,” o dautan, nga mga espiritu. Human kining mahugaw nga mga espiritu gipapahawa gikan sa usa ka lalaki, misulod kini ngadto sa pundok sa mga baboy, nga bayulenting nanagan paingon sa pangpang nga nangahulog ngadto sa dagat. Human siya naayo, ang lalaki gusto nga magpabilin uban ni Jesus.

Basaha ang Marcos 5:19–20, nga mangita kon unsay gitudlo ni Jesus sa lalaki nga buhaton.

Usa ka baruganan nga atong makat-unan gikan niini nga istorya mao nga kon kita makasinati sa gahum sa Manluluwas diha sa atong mga kinabuhi, kita makapamatuod ngadto sa uban sa Iyang mga panalangin ug kapuangod. Apan, kon ang usa ka kasinatian hilabihan ka sagrado, dili gayud nimo kini ipakigbahin gawas kon giaghat sa Espiritu Santo sa pagpakigbahin niini.

Pamalandonga unsaon o kang kinsa ka mahimong mopamatuod sa mga panalangin ug kapuangod sa Manluluwas diha sa imong kinabuhi.

Marcos 5:21–43

Giayo ni Jesus ang babaye nga natalinug-an ug gibangon ang anak nga babaye ni Jairo gikan sa patay

Si Elder Shayne M. Bowen sa Seventy misulti sa usa ka masakit nga kasinatian sa kinabuhi sa iyang pamilya:

“Pagka-Pebrero 4 sa 1990, ang among ikatulo nga lalaki ug ikaunom nga bata natawo. Ginganlan namo siya og Tyson. …

“Dihang si Tyson walo na ka bulan, nakatulon siya og chalk nga iyang nakit-an sa carpet. Ang chalk mibara sa tutunlan ni Tyson, ug wala na siya kaginhawa. Ang iyang magulang nga lalaki midala ni Tyson sa taas, nagdali-dali sa pagpanawag, ‘Ang bata dili makaginhawa. Ang bata dili makaginhawa.’ Among gisugdan sa pag-CPR ug mitawag sa 911.

“Ang mga paramedic miabut ug gidala og dali si Tyson sa ospital. Sa hulatanan nga lawak padayon kami sa pag-ampo samtang nangamuyo kami sa Dios og milagro. Human sa daw walay katapusang pagpaabut, ang doktor misulod sa lawak ug miingon, ‘Pasensya kaayo. Wala na gyud kami mahimo. Buhata unsay inyong gusto dinhi, ayaw kabalaka sa oras.’ Milakaw dayon siya” (“Tungod kay Ako Buhi, Kamo Usab Mabuhi,” Ensign o Liahona, Nob. 2012, 16).

Kon si Tyson imong igsoon, unsa kaha ang imong hunahuna o bation nianang mga tungora?

Sa unsa nga paagi nga ang sama niini nga kasinatian mosulay sa hugot nga pagtuo sa usa ka tawo?

Basaha ang Marcos 5:21–24, nga mangita kon giunsa sa usa ka Judeo nga punoan nga ginganlan og Jairo sa pag-atubang sa susama nga hagit nga mahimong misulay sa iyang hugot nga pagtuo.

Basaha ang Marcos 5:25–26, nga mangita kon kinsa diha sa panon sa katawhan ang misunod ni Jesus padulong sa panimalay ni Jairo.

Bisan og ang mga istorya sa Bag-ong Tugon wala maghulagway sa eksakto nga kahimtang sa “talinugo” sa babaye (Marcos 5:25), o hemorrhage, kita nasayud nga kini personal nga nakahasol kaniya. Dugang pa, ubos sa balaod ni Moises, ang usa ka tawo nga may talinugo giisip sa ritwal nga paagi nga hugaw (tan-awa sa Levitico 15:19–33). Kini murag nagpasabut nga gisalikway ug gilikayan kini nga babaye sulod sa 12 ka tuig sa iyang balatian. Ang kagul-anan nga iyang gibati mahitungod sa iyang kahimtang makita kaayo diha sa kamatuoran nga ang “tanan niyang katigayunan nahurot na niyag gasto.”(Marcos 5:26) sa pagpangita og kaayohan gikan sa mga mananambal.

Basaha ang Macos 5:27–34, nga mangita kon unsay gibuhat niining babaye aron makadawat og tabang sa Manluluwas. Ang mga pulong “miduol siya sa iyang luyo” (Marcos 5:27) nagpasabut sa iyang pagpaningkamot nga makasuot ngadto sa panon sa katawhan aron siya makahikap sa sinina (o robe) ni Jesus. Ang pulong hiyas diha sa bersikulo 30 nagpasabut og “gahum” o “kusog.”

Gikan sa istorya niining kasinatian sa babaye, makakat-on kita nga kon kita mopakita sa atong hugot nga pagtuo diha ni Jesukristo pinaagi sa atong mga paningkamot sa pagduol diha Kaniya, Siya makaayo kanato.

Pagmatinud-anon ngadto sa Imong Hugot nga Pagtuo

Ikonsiderar unsa ang gisugyot ni Elder Jeffrey R. Holland sa Korum sa Napulog Duha ka mga Apostoles mahitungod kon unsaon pagdala ang lisud nga mga problema ug mga pangutana nga mahimong motunga sa atong kinabuhi:

“Kon moabut ang problema ug mga pangutana, ayaw sugdi ang inyong pagpangita sa pagtuo pinaagi sa pagsulti kon unsay wala ninyo naangkon, mosangpot lang kini sa inyong ‘pagkawalay pagtuo.’ … Wala ko magsulti ninyo nga magpakaaron-ingnon nga dunay pagtuo nga wala kaninyo. Naghangyo ko ninyo nga magmatinud-anon sa pagtuo nga anaa na kaninyo. …

“… Kini usa ka balaan nga buhat nga anaa sa proseso, uban sa mga panalangin nga makita sa matag direksyon, busa palihug ayaw kaayo kabalaka kon sa matag karon ug unya dunay problema nga kinahanglang sutaon, sabton ug sulbaron. Mahitabo gayud kana. Niini nga Simbahan, ang atong nahibaloan mas molabaw kanunay sa wala nato mahibaloi. Ug hinumdumi, niini nga kalibutan, ang tanan kinahanglang magalakaw pinaagi sa pagtuo” (“Nagatuo Ako” Ensign o Liahona, Mayo 2013, 94).

Kini importanting hinumduman nga ang atong pagkaayo gikan sa bisan unsa nga balatian pinaagi sa pagtuo ni Jesukristo wala lamang mag-agad sa atong mga paningkamot sa pagduol ngadto Kaniya apan diha usab sa tukma nga panahon ug kabubut-on sa Dios, sama sa babaye kinsa mihikap sa sinina ni Jesus.

Ikonsiderar nga samtang mihunong si Jesus aron sa pagtabang sa babaye nga may talinugo, si Jairo tingali mahinangpon nga naghulat sa Manluluwas nga mouban kaniya ug tabangan ang iyang anak nga babaye.

Basaha ang Marcos 5:35, nga mangita sa mensahe nga gihatud ngadto kang Jairo samtang si Jesus mihunong aron sa pagtabang sa babaye.

Kon ikaw anaa sa kahimtang ni Jairo, unsa kaha nga mga hunahuna o mga pagbati ang anaa kanimo niana nga higayon?

Basaha ang Marcos 5:36, nga mangita kon unsay gisulti sa Manluluwas aron sa pagpalig-on sa pagtuo ni Jairo. Mahimo nimong markahan unsa ang imong nakit-an.

Gikan niini nga istorya atong makat-unan nga ang paggamit sa hugot nga pagtuo diha ni Jesukristo nagkinahanglan nga magpadayon kita sa pagtuo diha Kaniya bisan sa mga panahon nga walay kasigurohan.

Pamalandonga ang mosunod nga mga pangutana: Unsa ang pipila ka mga pamaagi nga mahimo natong gamiton kini nga baruganan diha sa atong mga kinabuhi? Ngano sa imong hunahuna sulayan sa Dios ang atong hugot nga pagtuo og panagsa?

Basaha ang Marcos 5:37–43, nga mangita kon unsay nahitabo ngadto sa anak ni Jairo nga babaye. Hinumdumi nga kadtong “nanagpangatawa ni [Jesus]” (Marcos 5:40) “ang mga magtutokar sa plawta ug ang pundok sa mga tawo nga nanagkaguliyang” (tan-awa sa Mateo 9:23–24), dili si Pedro, Santiago, Juan, o ang mga ginikanan sa batang babaye.

Gibuhi pagbalik ni Jesus ang anak nga babaye ni Jairo

Usahay ang Manluluwas nagpakalma sa mga unos sa atong mga kinabuhi pinaagi sa pagtangtang sa kalisdanan o kahadlok nga atong masinati. Sa ubang mga panahon tingali dili Niya tangtangon ang atong mga pagsulay, sama sa gihulagway diha sa istorya ni Elder Bowen sa pagkamatay sa iyang anak nga lalaki. Hinoon, sa atong pagpadayon sa paggamit sa atong hugot nga pagtuo diha ni Jesukristo, bisan sa mga panahon sa kawalay kasigurohan, Siya mohatag kanato og kalinaw sa panahon sa atong mga hagit.

Basaha ang mosunod nga pagpamatuod nga gipakigbahin ni Elder Bowen, ug hunahunaa unsaon nato sa pagpatunhay sa atong hugot nga pagtuo nga walay pagsapayan sa mga sangputanan sa atong mga pagsulay:

“Sa dihang gibati nako ang pagmahay, kasuko, ug kalooy sa kaugalingon nga misanap kanako, nag-ampo ko nga mausab ang akong kasingkasing. Pinaagi sa personal kaayo nga sagradong kasinatian, ang Ginoo mihatag kanako og bag-ong kasingkasing, ug bisan kon subo ug sakit kini, nausab ang akong panglantaw. Akong nasayran nga wala ko hikawi apan adunay dakong panalangin nga naghulat kanako kon ako magmatinud-anon. …

“Ako mopamatuod nga, sama sa gipahayag sa Isangyaw ang Akong Ebanghelyo, ‘samtang kita mosalig sa Pag-ula ni Jesukristo, Siya makatabang kanato nga makalahutay sa atong mga pagsulay, mga sakit-sakit, ug mga kasakit. Mahimong mapuno kita sa tumang kalipay, kalinaw, ug kahupayan. Ang tanang dili makiangayon kabahin sa kinabuhi mahimong mahusto pinaagi sa Pag-ula ni Jesukristo’ [Isangyaw ang Akong Ebanhelyo: Isangyaw ang Akong Ebanghelyo (2004), 55]” (“Tungod kay Ako Buhi, Kamo usab Mabuhi,” 15).

3. Tubaga ang mosunod nga mga pangutana diha sa imong scripture study journal:

   1. Kanus-a ikaw o ang usa ka tawo nga imong kaila nagpatunhay sa hugot nga pagtuo diha kang Jesukristo atol sa usa ka panahon sa pagsulay ug kawalay kasigurohan?

   2. Unsa nga mga panalangin ang miabut agig resulta sa pagpabilin nga matinud-anon? (Mahimo nimong balikon ang tsart nga imong gidrowing diha sa imong scripture study journal sa pagsugod niining leksyon ug isulat ang pipila ka mga pulong nga naghulagway kon giunsa sa pagtabang sa Manluluwas kanimo atol sa mga pagsulay nga may kalabutan sa matag kategoriya—pisikal, espiritwal, mental, ug sosyal.)

4. Isulat ang mosunod diha ubos sa mga assignment karon sa imong scripture study journal:

   Akong natun-an ang Marcos 4–5 ug nakompleto kini nga leksyon sa (petsa).

   Dugang nga mga pangutana, hunahuna, o mga panlantaw nga gusto nakong ipakigbahin sa akong magtutudlo: