Unit 10: Day 1

Lucas 5

Pasiuna

Sila si Pedro, Santiago, ug Juan mga mangingisda, apan human nga milagrong nakakuha og daghang pundok sa isda uban sa tabang sa Manluluwas, ilang gibiyaan ang tanan aron mosunod sa Manluluwas ug nahimong mga mangingisda og mga tawo. Si Jesus miayo sa usa ka sanlahon ug sa usa ka tawo nga paralitiko. Gitawag Niya si Mateo aron mahimong usa ka disipulo ug gitudloan nga mianhi Siya aron sa pag-awhag sa mga makasasala sa paghinulsol. Gitudlo usab ni Jesus ang sambingay mahitungod sa pagbutang og bag-ong bino diha sa daan nga mga botelya.

Lucas 5:1–11

Sila si Pedro, Santiago, ug Juan gitawag sa Ginoo nga mahimong mangingisda og mga tawo

Palandonga ang mosunod nga mga pangutana: Kanus-a ka gihangyo sa pagbuhat og usa ka butang nga wala masayud sa tanang mga rason sa pagbuhat niini? Nganong malisud ang pagsunod sa mga panudlo nga walay pagsabut sa mga rason alang niini?

Unsa ang tambag gikan sa mga lider sa Simbahan o mga kasugoan sa Ginoo nga tingali maglisud ang kabatan-onan sa pagsunod kon wala nila masabti sa hingpit ang mga rason alang niini?

Samtang ikaw magtuon sa Lucas 5:1–11, pangitaa ang mga baruganan nga makatabang kanimo kon wala nimo masabti sa hingpit kon nganong kinahanglan nimong sundon ang mga tambag sa mga lider sa Simbahan o ang sugo sa Ginoo.

Basaha ang Lucas 5:1–5, nga mangita sa unsay gihangyo sa Manluluwas ngadto ni Pedro (kinsa gitawag dinhi og Simon; tan-awa sa Lucas 5:8) nga buhaton human sa Iyang pagsangyaw. Ang “lanaw sa Genesaret” (Lucas 5:1) mao ang Dagat sa Galilea, ug ang mga pulong “itaktak didto ang inyong mga pukot aron makakuha kamo” sa bersikulo 4 nagpasabut sa pag-ariya sa ilang mga pukot aron makakuha og isda. Ikonsiderar ang pagmarka sa bersikulo 5 kon sa unsa nga paagi gitubag ni Pedro ang hangyo sa Manluluwas.

Unsa kahay kaugalingong kasinatian ni Pedro sa pagpangisda nga nakapahunahuna kaniya sa dihang ang Manluluwas misugo kaniya sa pagtaktak og usab sa mga pukot?

Basaha ang Lucas 5:6–9, nga mangita kon unsay nahitabo sa dihang gibuhat ni Pedro unsay gisugo sa Manluluwas. Ikonsiderar ang pagmarka sa mga pulong nga nagpakita nganong kinahanglan natong buhaton unsay gisugo sa Manluluwas kanato, bisan kon kita wala makasabut kon ngano.

Usa ka baruganan nga atong makat-unan niini nga istorya mao nga kon kita mobuhat unsay gipabuhat sa Ginoo bisan kita wala makasabut kon ngano, Siya makahatag og mas dako nga mga panalangin kay sa atong gipaabut. Ikonsiderar ang pagsulat niini nga baruganan sa imong mga kasulatan tupad sa Lucas 5:3–9.

Sa unsa nga paagi nga ang pagsunod niini nga baruganan nagkinahanglan kanato sa pagsalig diha ni Jesukristo?

Si Elder Richard G. Scott sa Korum sa Napulog Duha ka mga Apostoles miingon:

“Kini nga kinabuhi maoy usa ka kasinatian sa lawom nga pagsalig—pagsalig diha ni Jesukristo, pagsalig sa Iyang mga pagtulun-an, pagsalig sa atong kapasidad ingon nga giniyahan pinaagi sa Espiritu Santo sa pagsunod niadtong mga pagtulun-an alang sa kalipay karon ug alang sa usa ka mapuslanon, kinatas-ang kalipay sa mahangturon nga pagpuyo. Ang pagsalig nagpasabut nga andam nga mosunod nga walay kasayuran sa katapusan gikan sa sinugdanan (tan-awa sa Prob. 3:5–7). Aron makahatag og bunga, ang imong pagsalig sa Ginoo kinahanglan gayud nga mas gamhanan ug malungtaron kay sa imong pagsalig sa imong kaugalingong personal nga mga pagbati ug kasinatian.

“Ang paggamit sa hugot nga pagtuo mao ang pagsalig nga ang Ginoo nasayud unsa ang Iyang gihimo diha kanimo ug nga Iyang matuman kini alang sa imong mahangturon nga kaayohan bisan og dili nimo kini masabtan kon sa unsang paagi posible Niyang mahimo kini” (“Trust in the Lord,” Ensign, Nob. 1995, 17).

1. Tubaga ang mosunod nga mga pangutana diha sa imong scripture study journal:

   1. Sa unsa nga paagi ikaw makapalambo sa matang sa pagsalig diha ni Jesukristo nga gihulagway ni Elder Scott?

   2. Sa unsa nga paagi ikaw o ang imong pamilya nakadawat og mas dakong mga panalangin kay sa imong gipaabut pinaagi sa pagsunod sa mga direksyon sa Ginoo bisan kon wala masabti sa hingpit ang mga rason?

Sa usa ka papel, isulat ang tambag o mga sugo gikan sa Ginoo nga ikaw mas matinud-anon nga makasunod bisan og wala nimo masabti sa hingpit ang mga rason alang sa pagbuhat sa ingon. (Kon aduna kay access sa Alang sa Kalig-on sa mga Kabatan-onan [booklet, 2011], makatan-aw ka niini og mga ideya.) Ibutang ang papel sa usa ka dapit nga motabang kanimo sa paghinumdom sa imong tumong nga buhaton sa unsay gipabuhat sa Ginoo.

Sa Lucas 5:10–11 atong mabasa nga sila si Pedro, Santiago, ug Juan mibiya sa ilang pangisdaan nga sakayan aron mosunod ni Jesus.

Lucas 5:12–26

Si Jesus nag-ayo sa usa ka tawo nga adunay sanla ug usa ka tawo nga may paralisis

Unsa ang pipila ka mga butang nga mahimong gamiton sa pagtabang o sa pag-ayo sa usa ka tawo nga may balatian o samad.

Gawas sa pisikal nga balatian o kadaot, unsa pa kaha ang lain nga gikinahanglan sa usa ka tawo nga mamaayo?

Samtang ikaw magtuon sa Lucas 5:12–25, pangitaa ang mga baruganan nga nagtudlo kon unsay imong mabuhat nga matabangan ang imong kaugalingon ug ang uban nga madawat ang gikinahanglan nga pagkaayo.

Pangita og mga Pagtandi ug Pagkalahi diha sa mga Kasulatan

Ang mga kasulatan kanunay nga nagtandi o naglahi og mga ideya, mga panghitabo, ug mga tawo. Kini nga mga pagtandi ug pagkalahi nagtabang sa pagpakita ug paghatag og gibug-aton sa mga baruganan sa ebanghelyo. Pangita og mga pagtandi ug mga pagkalahi sa tinagsa nga mga bersikulo, sa mga kapitulo, ug sa tanan nga mga kapitulo ug mga basahon. Sama pananglit, samtang imong gibasa ang mahitungod sa Manluluwas nga nag-ayo sa duha ka lalaki diha sa Lucas 5:12–25, timan-i ang mga pagkasama ug ang mga pagkalahi tali sa mga pagpang-ayo.

2. Diha sa Lucas 5:12–25 atong mabasa ang mahitungod sa Manluluwas nga nag-ayo sa duha ka mga lalaki. Usa sa mga lalaki adunay sanla, ug ang laing lalaki adunay paralisis, nagpasabut nga siya paralisado. Basaha ang Lucas 5:12–15 ug Lucas 5:17–25, ug itandi ang duha ka mga istorya. Sa imong scripture study journal, paghimo og usa ka tsart sama sa usa nga anaa sa ubos, ug irekord kon sa unsa nga paagi nga ang duha ka pagpang-ayo managsama ug sa unsang paagi kini managlahi.

Mga Pagkasama	Mga Kalainan

Palandonga ang tahas sa hugot nga pagtuo sa matag istorya. Ikonsiderar ang pagmarka sa mga pulong “sa pagkakita niya sa ilang pagsalig” diha sa Lucas 5:20. Ang Manluluwas miila sa hugot nga pagtuo niadtong midala sa tawo nga may paralisis ngadto Kaniya.

Ang Hubad ni Joseph Smith nagtabang kanato nga mas masabtan ang pangutana nga gipangutana ni Jesus diha sa Lucas 5:23: “Nagkinahanglan ba kini og mas dakong gahum sa pagpasaylo sa mga sala kay sa paghimo sa masakiton sa pagbangon ug paglakaw?” (Hubad ni Joseph Smith Luke 5:23). Pinaagi sa pagpangutana niini si Jesukristo nagtudlo nga Siya adunay gahum sa pag-ayo sa pisikal ug espirituhanon nga paagi.

Unsay imong makat-unan gikan niini nga mga istorya mahitungod sa unsa nga paagi nga kita mamaayo ug unsay atong mahimo aron matabangan ang uban nga mamaayo?

Gikan niini nga mga istorya atong makat-unan nga samtang mogamit kita sa hugot nga pagtuo ug moduol ngadto sa Manluluwas, Siya makaayo kanato ug nga kita makatabang sa uban nga moduol ngadto sa Manluluwas aron sila mamaayo. Ikonsiderar ang pagsulat niini nga mga baruganan diha sa imong mga kasulatan tupad sa Lucas 5:12–25.

Ang pagkaayo tingali dili kinahanglan magpasabut nga ang Manluluwas motangtang sa atong mga balatian gikan kanato. Ang pagkaayo mahimo usab nga magpasabut nga Siya mohatag kanato og kaisug, hugot nga pagtuo, kahupay, ug kalinaw nga atong gikinahanglan sa paglahutay o pagbuntog sa atong mga balatian.

Ikonsiderar ang mosunod nga mga tambag gikan ni Elder David A. Bednar sa Korum sa Napulog Duha ka mga Apostoles:

“Ang pagkamatarung ug hugot nga pagtuo sa tinuod mao ang instrumento sa pagpalihok sa bukid—kon ang pagpalihok sa bukid magtuman sa mga katuyoan sa Dios ug pinasubay sa Iyang kabubut-on. Ang pagkamatarung ug ang hugot nga pagtuo sa tinuod instrumento sa pag-ayo sa masakiton, bungol, o bakol—kon ang ingon nga pag-ayo nagtuman sa mga katuyoan sa Dios ug pinasubay sa Iyang kabubut-on. Busa, bisan adunay hugot nga pagtuo, daghang mga bukid ang dili mabalhin. Ug dili tanan nga masakiton ang mamaayo. Kon ang tanang oposisyon gipugngan, kon ang tanang balatian gikuha, niana ang unang mga katuyoan sa plano sa Amahan mapakyas.

“Kadaghanan sa mga leksyon nga kita gikinahanglan nga mokat-on sa mortalidad madawat lamang pinaagi sa mga butang nga kita nagsinati ug usahay nag-antus. Ug ang Dios nagpaabut ug nagsalig kanato nga moatubang sa temporaryong mortal nga kalisdanan uban sa Iyang tabang aron kita makakat-on kon unsay atong kinahanglang makat-unan ug sa katapusan mahimong unsay mahimo kanato sa kahangturan.” (“That We Might ‘Not … Shrink’ [D&P 19:18]” [CES devotional for young adults, Mar. 3, 2013], lds.org/broadcasts).

3. Ikonsiderar ang mga balatian nga tingali gikinahanglan sa tawo nga mamaayo. Sa inyong scripture study journal, tubaga ang usa o mas daghan pa sa mosunod nga mga pangutana:

   1. Unsa ang imong mahimo aron makatabang sa pagdala og mga tawo ngadto sa Manluluwas aron madawat ang Iyang makaayo nga gahum?

   2. Kanus-a ikaw o ang usa ka tawo nga imong kaila naayo pinaagi sa paggamit og hugot nga pagtuo diha sa Manluluwas?

   3. Kanus-a ka nakakita og usa ka tawo nga nagdala og laing tawo ngadto sa Ginoo aron madawat ang makaayo nga gahum sa Manluluwas?

Palandonga kon unsay imong buhaton nga magamit ang mas dakong pagtuo diha ni Jesukristo aron mamaayo, mapasaylo, o mahupay. Paghunahuna usab og mga paagi nga mahimo nimong dad-on ang usa ka higala o lain pang tawo ngadto sa Manluluwas.

Lucas 5:27–35

Ang mga Escriba ug mga Pariseo nangutana kon ngano si Jesus nakigsalo sa mga maniningil sa buhis ug sa mga makasasala

Basaha ang Lucas 5:27–28, ug pangitaa ang pagdapit sa Manluluwas ngadto ni Mateo (kinsa gitawag og Levi dinhi; tan-awa sa Mateo 9:9).

Unsa ang nakapadani kanimo mahitungod sa unsa nga paagi mitubag si Mateo ngadto sa pagdapit sa Manluluwas?

Si Mateo usa ka maniningil og buhis, nagpasabut nga siya ang maniningil og buhis gikan sa isig ka Judeo alang sa panggobyerno nga Romano. Ang mga Judeo sa kinatibuk-an nagdumot sa mga maniningil og buhis ug gitan-aw sila isip mga sinalikway ug mga makasasala. Diha sa Lucas 5:29–35 atong mabasa nga samtang si Jesus nakigsalo ni Mateo ug sa uban, ang mga escriba ug mga Pariseo misaway Kaniya tungod sa pagkigsalo sa mga makasasala. Si Jesus mitudlo nga Siya mianhi aron pagtawag sa mga makasasala sa paghinulsol.

Ikonsiderar kon sa unsa nga paagi ang Manluluwas motagad niadtong anaa sa imong eskwelahan karon kinsa nag-inusara ug mibati nga sinalikway. Palandonga kon sa unsa nga paagi ikaw , sama sa gibuhat ni Jesus, mahimong mopaapil niadtong kinsa nag-inusara ug mibati nga sinalikway o kinsa gikonsiderar nga dili kaayo ilado nga dili ipaubos ang imong mga sumbanan.

Lucas 5:36–39

Si Jesus naghatag sa sambingay mahitungod sa bag-ong bino diha sa karaan nga mga botelya

Ang Manluluwas migamit og usa ka sambingay aron sa pagtudlo sa mga escriba ug sa mga Pariseo. Basaha ang Lucas 5:36–39, nga mangita kon unsa nga mga butang ang gigamit sa Manluluwas sa pagtudlo sa Iyang sambingay. Ikonsiderar ang pagmarka niini diha sa imong mga kasulatan.

Paghunahuna og usa ka buslot o gisi sa usa ka daan nga panapton nga gitapakan og usa ka piraso nga bag-ong panapton. Ang estilo sa bag-ong panapton tingali dili angay nianang daan nga panapton, o ang piraso sa bag-ong panapton mahimong mokulo kon kini malabhan ug mohimo sa buslot o gisi nga mas grabe pa kay sa una. Sa samang paagi, ang ebanghelyo ni Jesukristo dili lamang pangtapak sa daan nga mga pagtuo ug mga gawi apan hingpit nga pagpahiuli sa kamatuoran.

Ang pulong mga botelya diha sa Lucas 5:37 nagpasabut sa mga panit nga mga bag nga sudlanan sa bino o mga sudlanan sa bino nga panit.” Ang bag-ong panit humok ug mainat-inat, samtang ang daan nga panit mahimong mokaging ug mogabok.

Mga sudlanan sa bino nga panit

Samtang ang bag-ong bino gibuot [fermented], ang alkohol magkadaghan sa sulod ug moinat ang panit nga bag. Kini nga pag-inat makapadaan, makapagabok sa mga sudlanan sa bino nga panit nga mobuto. Sa sambingay, ang bag-ong bino nagrepresentar sa mga pagtulun-an ug ebanghelyo sa Manluluwas, ug ang daan nga bino nagrepresentar sa mga gawi, mga tradisyon, ug mga tinuohan sa mga Pariseo ubos sa balaod ni Moises.

Sa unsa nga paagi nga ang “daan nga mga botelya” nagrepresentar sa mga escriba ug sa mga Pariseo nga gitudloan ni Jesus?

Ikonsiderar kon sa unsa nga paagi nga ang “bag-ong mga botelya” magrepresentar niadtong mga tawo kinsa mapainubsanon ug andam sa pag-usab aron sa pagdawat sa Manluluwas ug sa Iyang mga pagtulun-an. Usa ka baruganan nga atong makat-unan gikan sa sambingay sa Manluluwas mao nga ang pagdawat sa Manluluwas ug sa Iyang ebanghelyo, kita kinahanglan gayud mapainubsanon ug andam sa pag-usab.

4. Aron matabangan ka nga mas makasabut niini nga baruganan, ribyuha ang Lucas 5. Pangita og mga pananglitan sa mosunod nga mga matang sa tawo, ug isulat unsa ang imong nakaplagan diha sa imong scripture study journal:

   1. Mga indibidwal kinsa nagmagahi ug dili monunot ang ilang kinaiya ngadto sa Manluluwas ug sa Iyang mga pagtulun-an.

   2. Mga indibidwal kinsa mapainubsanon ug andam sa pag-usab ug paglambo samtang sila misunod sa Manluluwas.

5. Isulat ang mosunod diha sa ubos sa mga assignment karong adlawa sa imong scripture study journal:

   Akong natun-an ang Lucas 5 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: