Unit 24: Day 4

Mga Taga-Efeso 1

Pasiuna

Si Apostol Pablo misulat ngadto sa mga Santos sa Efeso bahin sa ilang pagka-inordinahan nang daan nga makadawat sa ebanghelyo. Misulat siya bahin sa katapusang dispensasyon—ang dispensasyon diin kita nagpuyo karon—diin ang Dios “[maghiusa] diha kang Kristo sa tanang mga butang” (Mga Taga-Efeso 1:10). Gitudlo ni Pablo nga makaila kita sa Langitnong Amahan ug ni Jesukristo pinaagi sa pagpadayag.

Mga Taga-Efeso 1:1–8

Nagtudlo si Pablo sa mga Santos nga sila gi-orden nang daan nga makadawat sa ebanghelyo

Hunahunaa ang usa ka higayon sa imong kinabuhi sa dihang miuyon ka nga modawat og importante nga responsibilidad . Sa dihang nagkaanam kalisud ang buluhaton, sa unsang paagi ka napatunhay tungod sa pagkasayud nga miuyon ka sa buluhaton ug nga dunay tawo nga misalig nimo nga matuman kini? Sa unsang paagi ka napanalanginan o nagantihan tungod sa pagtuman sa imong responsibilidad?

Si Apostol Pablo napaubos sa house arrest didto sa Roma.

Dinhi nga epistola si Apostol Pablo nagtinguha nga lig-unon kadtong namiyembro na sa Simbahan ug tabangan ang bag-ong mga kinabig nga molambo sa ilang espirituhanong kahibalo ug magpabiling matinud-anon sa ilang mga pakigsaad.

Basaha ang Mga Taga-Efeso 1:3–8, nga mangita sa mga kamatuoran nga gitudlo ni Pablo sa mga Santos aron sa pagtabang nila nga magpabiling matinud-anon sa ilang mga pakigsaad.

1. Tubaga ang mosunod nga mga pangutana diha sa imong scripture study journal:

   1. Unsa ang duha o tulo ka sukaranan nga mga doktrina nga imong itudlo nga makatabang sa usa ka miyembro sa Simbahan nga magpabiling matinud-anon sa iyang mga pakigsaad ug magpabiling aktibo sa Simbahan?

   2. Sa unsang paagi nga ang pagsabut niadtong mga kamatuoran makatabang sa usa ka tawo nga magpabiling matinud-anon?

Pagkat-on sa Sukaranan nga mga Doktrina

Sa pagsugod nimo niini nga leksyon, hunahunaa nga dunay lista sa Sukaranan nga mga Doktrina nga makita diha sa pasiuna nga materyal niini nga manwal. Ang Pagkat-on sa Sukaranan nga mga Doktrina makatabang nimo nga masunod ang ebanghelyo ug mapalambo ang imong abilidad sa pagtudlo niining importante nga mga kamatuoran ngadto sa uban. Pangita og dugang nga panabut sa pipila niining mga doktrina samtang magtuon ka sa Mga Taga-Efeso 1.

Ang mga pulong nga “sa wala pa matukod ang kalibutan” diha sa Mga Taga-Efeso 1:4 nagpasabut sa kinabuhi sa wala pa dinhi sa yuta, ug ang mga pulong nga “mga anak nga sinagop pinaagi kang Jesukristo” ug ang pulong nga gipili nang daan diha sa Mga Taga-Efeso 1:5 nagpasabut niadtong gipili o gi-orden nang daan didto nga makadawat sa ebanghelyo panahon sa mortalidad. Usa ka kamatuoran nga atong makat-unan gikan niini nga mga bersikulo mao nga ang mga anak sa Dios gi-orden nang daan nga makadawat sa mga panalangin sa ebanghelyo. Ang pagdawat niini nga mga panalangin magdepende sa atong pagkamatinud-anon niini nga kinabuhi.

Samtang magbasa ka sa mosunod nga pamahayag gikan sa Matinud-anon sa Tinuhoan, hunahunaa kon sa unsang paagi nga ang pagsabut sa doktrina sa pagka-inordinahan nang daan makatabang sa usa ka tawo nga mopili nga magpabiling matinuoron sa iyang mga pakigsaad ug mahimong aktibo sa Simbahan:

“Sa kalibutan sa wala pa dinhi sa yuta, ang Dios mitudlo og pihong mga espiritu sa pagtuman sa tino nga mga misyon sa panahon sa ilang mortal nga mga kinabuhi. Gitawag kini og pagka-inordinahan nang daan.

“Ang pagka-inordinahan nang daan wala mogarantiya nga ang mga indibidwal makadawat sa pihong mga calling o mga responsibilidad. Ang maong mga oportunidad moabut niining kinabuhia isip resulta sa matarung nga paggamit sa kabubut-on, sama nga ang pagka-inordinahan nang daan miabut isip resulta sa pagkamatarung didto sa kinabuhi sa wala pa dinhi sa yuta. …

“Ang doktrina kabahin sa pagka-inordinahan nang daan magamit ngadto sa tanang mga miyembro sa Simbahan, dili lamang ngadto sa Manluluwas ug sa Iyang mga propeta. Sa wala pa ang paglalang sa yuta, matinud-anong mga babaye gihatagan og pihong mga responsibilidad ug matinud-anong mga lalaki gi-ordinahan nang daan sa pihong mga katungdanan sa priesthood. Bisan tuod nga wala ka mahinumdom nianang panahona, sigurado kang miuyon sa pagtuman sa mahinungdanong mga buluhaton sa pagserbisyo sa imong Amahan. Samtang magpakita ka sa imong kaugalingon nga takus, hatagan ka og mga oportunidad sa pagtuman sa mga buluhaton nga nianang higayuna imong nadawat” (Matinud-anon sa Tinuhoan: Usa ka Pakisayran sa Ebanghelyo [2004], 137–38).

Sa unsang paagi nga ang pagsabut nga kita gi-orden nang daan nga makadawat sa ebanghelyo ug sa daghang mga panalangin niini aron matuman ang mga buluhaton dinhi sa mortalidad makatabang nato nga magpabiling matinud-anon sa atong mga pakigsaad?

Mga Taga-Efeso 1:9–12

Naghisgot si Pablo bahin sa dispensasyon sa kahingpitan sa mga panahon

Pangitaa ang kahulugan sa mga dispensasyon diha sa seksyon sa Sukaranan nga mga Doktrina sa sinugdanan niini nga manwal. Basaha ang mga paragraph nga nagpasabut kon unsa ang usa ka dispensasyon. Samtang magbasa ka, pangitaa kon unsa nga dispensasyon ang atong gipuy-an.

Gikan sa imong nabasahan, kanus-a man nagsugod ang dispensasyon nga atong gipuy-an?

Basaha ang Mga Taga-Efeso 1:9–10, nga mangita sa unsay gisulat ni Pablo nga mahitabo sa atong dispensasyon, ang “dispensasyon sa kahingpitan sa mga panahon.” (Ang mga pulong nga “tinago mahitungod sa iyang kabubut-on” nagpasabut sa mga plano ug mga katuyoan sa Dios.)

Sa dihang gisulat ni Pablo nga ang “tanang mga butang [diha kang Kristo],” didto sa langit ug dinhi sa yuta, pagapundukon “sa paghiusa” (Mga Taga-Efeso 1:10), nagpasabut siya sa Pagpahiuli ug sa pagpundok sa tanang mga yawe, mga gahum, ug mga saad nga gipadayag sa Dios ngadto sa Iyang mga anak sukad sa sinugdanan sa kalibutan, ingon man usab sa ubang kahibalo nga wala pa gayud sukad mapadayag (tan-awa sa D&P 128:18).

Gikan sa Mga Taga-Efeso 1:10, atong makat-unan ang mosunod nga kamatuoran: Atol sa dispensasyon sa kahingpitan sa mga panahon, ang tanang mga butang gikan sa miaging mga dispensasyon mapahiuli.

Gipasabut ni Elder B. H. Roberts sa Seventy kon sa unsang paagi nga ang milabayng dispensasyon dunay kalabutan sa dispensasyon sa kahingpitan sa mga panahon: “Kini ang dispensasyon sa kahingpitan sa mga panahon, ug atong makita nga midagayday ngadto niini, sama sa dagkong mga sapa ngadto sa kadagatan, ang tanang miaging mga dispensasyon, nga misumpay nato ngadto kanila, nga misumpay nila ngari kanato; ug atong makita nga ang Dios dunay usa ka mahinungdanong katuyoan gikan sa sinugdanan, ug kana mao ang kaluwasan sa Iyang mga anak. Ug karon miabut ang katapusang adlaw, ang katapusang dispensasyon, diin ang kamatuoran ug kahayag ug pagkamatarung kinahanglang molukop gayud sa yuta” (sa Conference Report, Okt. 1904, 73).

2. Gitudlo ni Elder Roberts nga ang kamatuoran, kahayag ug pagkamatarung kinahanglang molukop gayud sa yuta sa katapusang dispensasyon. Diha sa imong scripture study journal, ilista ang lima o dugang pa sa mga kamatuoran, mga kasulatan, mga pakigsaad, ug mga gahum gikan sa miaging mga dispensasyon nga gipahiuli o gipagawas diha sa dispensasyon sa kahingpitan sa mga panahon. (Kon nagkinahanglan ka og tabang, tan-awa sa “Pagpahiuli sa Ebanghelyo” sa Matinud-anon sa Tinuhoan: Usa ka Pakisayran sa Ebanghelyo [2004], 159–63.)

3. Kompletuha ang usa o duha sa mosunod:

   1. Tubaga ang mosunod nga mga pangutana diha sa imong scripture study journal: Sa unsang paagi nga ang pagpuyo sa dispensasyon sa kahingpitan sa mga panahon nahimong usa ka panalangin alang kanimo? Unsa nga mga kapanguhaan sa atong dispensasyon ang makapahimo sa kamatuoran ug kahayag sa ebanghelyo nga molukop sa yuta?

   2. Sa usa ka website sa social media nga duna kay access, i-post ang pagpasabut bahin sa mga dispensasyon ug kon nganong mapasalamaton ka nga nakapuyo niini nga dispensasyon. Kon mahuman na ka, isulat sa imong scripture study journal kon unsay imong gibati bahin sa pag-post sa imong mensahe.

Si Elder David A. Bednar sa Korum sa Napulog Duha ka mga Apostoles miingon: “Akong mga kaigsoonan, unsay nakab-ot na niini nga dispensasyon sa pagpahayag sa mga mensahe sa ebanghelyo pinaagi sa mga social media channel usa ka maayo nga sinugdanan—apan usa lamang ka hinay nga dagayday. Ako karon modapit kaninyo sa pagtabang sa pag-usab sa dagayday ngadto sa usa ka baha. … Ako moawhag kaninyo sa paglukop sa yuta sa mga mensahe nga puno sa pagkamatarung ug kamatuoran—mga mensahe nga tinuod, makapalig-on, ug dalaygon—ug tinuod nga molukop sa yuta sama sa usa ka lunop” (“To Sweep the Earth as with a Flood” [debosyonal sa Brigham Young University Campus Education Week, Ago. 19, 2014], LDS.org).

Unsay imong gibuhat aron sa pagtabang nga ipakatap sa yuta ang mga mensahe nga puno sa pagkamatarung ug kamatuoran? Ikonsiderar kon unsaon nimo sa pagpakigbahin sa makahuluganong mga kamatuoran nga gipahiuli niining dispensasyon niadtong anaa sa duol nimo ug niadtong nagpuyo sa layo.

Diha sa Mga Taga-Efeso 1:11–12 gitudlo ni Pablo nga pinaagi ni Jesukristo naangkon sa mga Santos ang usa ka kabilin didto sa gingharian sa Dios.

Mga Taga-Efeso 1:13–23

Nagtudlo si Pablo bahin sa Balaan nga Espiritu sa Saad

Basaha ang Mga Taga-Efeso 1:13–14, nga mangita sa usa ka panalangin nga nadawat sa mga Santos tungod sa ilang pagkamatinud-anon ug sa ilang pagsalig ug pagtuo diha ni Jesukristo.

Ang “nabugkos [pinaagi sa] balaan nga Espiritu sa saad” nagpasabut nga ang Espiritu Santo “mosaksi ngadto sa Amahan nga ang mga ordinansa sa pagluwas gipahigayon sa matarung nga paagi ug nga ang mga pakigsaad nga nauban kanila giampingan” (Giya ngadto sa mga Kasulatan, “Balaan nga Espiritu sa Saad,” scriptures.lds.org). Ang mga pulong nga “patinga sa atong panulundon [kabilin]” diha sa Mga Taga-Efeso 1:14 nagpasabut nga kon ang matinud-anong mga Santos mabugkos pinaagi sa Balaan nga Espiritu sa Saad, makadawat sila og personal nga kasiguroan nga sila sa katapusan makapanunod sa celestial nga gingharian. (Alang sa dugang nga impormasyon bahin sa tawag ug pagpili, basaha ang 2 Pedro 1 ug ang komentaryo nga gihatag alang niana nga kapitulo diha sa Unit 30: Day 1 lesson.)

Sama sa narekord diha sa Mga Taga-Efeso 1:15–16, gisultihan ni Pablo ang mga Santos nga padayon siya nga nagpasalamat sa Dios tungod sa ilang pagkamatinud-anon. Basaha ang Mga Taga-Efeso 1:17–18, nga mangita sa unsay giampo ni Pablo nga ihatag sa Dios ngadto sa mga Santos.

Hunahunaa kon unsay gitudlo niining mga bersikulo ngari kanato kon unsaon aron makaila kita sa Langitnong Amahan.

Usa ka kamatuoran nga atong makat-unan gikan niini nga mga bersikulo mao nga makaila kita sa Langitnong Amahan pinaagi sa espiritu sa pagpadayag.

Samtang magbasa ka sa mosunod nga pamahayag ni Elder David A. Bednar, markahi kon unsay iyang gitudlo bahin sa espiritu sa pagpadayag:

“Ang pagpadayag mao ang usa ka komunikasyon gikan sa Dios ngadto sa Iyang mga anak dinhi sa yuta ug usa sa dako nga mga panalangin nga inubanan sa gasa ug kanunay nga pakig-uban sa Espiritu Santo. Si Propeta Joseph Smith mitudlo, ‘Ang Espiritu Santo usa ka tigpadayag,’ ug “walay tawo nga makadawat sa Espiritu Santo nga dili makadawat og mga pagpadayag” (Mga Pagtulun-an sa mga Presidente sa Simbahan: Joseph Smith [2007], 155).

“Ang espiritu sa pagpadayag anaa sa matag tawo kinsa nagdawat pinaagi sa tukma nga awtoridad sa priesthood sa makaluwas nga mga ordinansa sa bunyag pinaagi sa pagpaunlod alang sa kapasayloan sa mga sala ug sa pagpandong sa mga kamot alang sa gasa sa Espiritu Santo—ug kinsa naglihok diha sa hugot nga pagtuo sa pagtuman sa priesthood nga sugo sa ‘pagdawat sa Espiritu Santo.’ Kini nga panalangin dili ra kutob sa kapangulohan nga mga awtoridad sa Simbahan; hinoon, kini gipanag-iya ug kinahanglan nga maglihok diha sa kinabuhi sa matag lalaki, babaye, ug bata kinsa moabut sa panuigon sa pagkamay-tulubagon ug mosulod ngadto sa sagrado nga mga pakigsaad. Ang sinsero nga tinguha ug pagkatakus nagdapit sa espiritu sa pagpadayag nganhi sa atong mga kinabuhi” (“Ang Espiritu sa Pagpadayag,” Ensign o Liahona, Mayo 2011, 87–88).

Hunahunaa kon sa unsang paagi nga ang pagpadayag pinaagi sa Espiritu Santo makatabang nato aron mas makaila pa sa Langitnong Amahan.

4. Diha sa imong scripture study journal, isulat kon sa unsang paagi nga ang pagpadayag pinaagi sa Espiritu Santo nakatabang nimo o sa usa ka tawo nga imong nailhan aron mas makaila pa sa Langitnong Amahan.

Ang pagpakabuhi nga takus sa pakig-uban sa Espiritu Santo makatabang nimo aron mas makaila pa sa Langitnong Amahan.

Diha sa Mga Taga-Efeso 1:19–23 nagpadayon si Pablo sa pagtudlo bahin sa kabilin sa mga Santos ug sa katungdanan ni Jesukristo isip pangulo sa Simbahan.

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Mga Taga-Efeso 1 ug nahuman kini nga leksyon sa (petsa).

   Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: