Mga Taga-Efeso 4–6

Pasiuna

Sa iyang sulat ngadto sa mga Santos nga taga-Efeso, gitudlo ni Apostol Pablo nga giestablisar sa Ginoo ang Iyang Simbahan ug mitawag og mga lider aron sa paghingpit ug paghiusa sa mga Santos. Giawhag usab niya ang mga miyembro sa Simbahan nga biyaan ang ilang kanhi nga kinabuhi ug magsugod og bag-ong kinabuhi isip mga sumusunod ni Kristo. Gitudloan dayon ni Pablo ang mga Santos kon unsaon sa paglig-on ang ilang mga relasyon sa pamilya ug giawhag sila nga “isul-ob ang tibuok hinagiban sa Dios” (Mga Taga-Efeso 6:11) aron makabatok sa mga tintasyon ni Satanas.

Mga Taga-Efeso 4:1–16

Nagtudlo si Pablo sa kaimportante sa Simbahan ni Jesukristo

Ikonsiderar ang mosunod nga duha ka sitwasyon:

Sa eskwelahan gihangyo sa inyong magtutudlo ang klase nga mopahayag sa ilang mga panglantaw bahin sa usa ka kontrobersyal nga hilisgutan. Samtang mipakigbahin ang mga estudyante sa ilang mga opinyon, naamguhan nimo nga kasagaran nila misuporta og posisyon nga lahi sa mga pagtulun-an sa Simbahan.
Gikonsiderar sa mga magbabalaod sa inyong nasud ang paghimong legal sa kinaiya nga gitudlo sa mga lider sa Simbahan nga kini sayop.

Nganong ang mga sitwasyon nga sama niini mahimong lisud alang sa usa ka miyembro sa Simbahan?

Samtang magtuon ka sa Mga Taga-Efeso 4:1–16, pangitaa ang kamatuoran kon unsaon nimo aron masayud sa unsay husto ug unsay sayop sa usa ka kalibutan nga nagkausab ang mga mithi ug mga gituohan.

Basaha ang Mga Taga-Efeso 4:1–6, nga mangita sa unsay gitudlo ni Apostol Pablo bahin sa Simbahan ug sa doktrina niini.

Sa imong hunahuna unsa kaha ang gipasabut ni Pablo nga dunay “usa ka Ginoo, usa ka pagtuo, [ug] usa ka bautismo” (Mga Taga-Efeso 4:5)?

Sa panahon ni Pablo, sama sa atong panahon, dunay usa lamang ka tinuod nga Simbahan ni Jesukristo dinhi sa yuta (tan-awa sa D&P 1:30).

Sama sa narekord diha sa Mga Taga-Efeso 4:7–10, gitudlo ni Pablo nga pinaagi sa Pag-ula ni Jesukristo, nahatagan kitang tanan og oportunidad nga makadawat sa gasa sa grasya sa Dios (ang Iyang gahum nga makahimo sa pagluwas kanato). Nagtudlo usab siya nga mihatag si Kristo og ubang mga gasa ngadto sa katawhan.

Basaha ang Mga Taga-Efeso 4:11, nga mangita sa mga katungdanan nga gihatag sa Ginoo, o giestablisar, diha sa Iyang Simbahan. (Ang Mga Taga-Efeso 4:11–14 usa ka scripture mastery passage. Mahimo nimo kining markahan sa usa ka talagsaong paagi aron matultulan nimo kini sa umaabut.)

Ang mga ngalan sa mga katungdanan sa priesthood diha sa Simbahan ni Jesukristo karon mahimong dili na mao ang sama nga mga ngalan nga gigamit sa panahon ni Pablo, ug ang unang Simbahan ni Jesukristo mahimong wala sa tanang calling nga anaa sa Simbahan karon. Pananglitan, nagtudlo si Propeta Joseph Smith nga ang “usa ka ebanghelista usa ka Patriarch” (Mga Pagtulun-an sa mga Presidente sa Simbahan: Joseph Smith [2007], 164). Usab, ang pastor usa ka magbalantay, o usa ka tawo nga naggiya sa usa ka panon—usa ka haum nga paghulagway sa moderno nga mga bishop, mga branch president, mga stake president, ug mga district president. Mahimo nimong isulat diha sa imong mga kasulatan ang moderno nga katugbang niining mga termino.

Isulat ang mosunod nga dili kompleto nga kamatuoran diha sa imong scripture study journal: Ang Ginoo mitawag og mga apostoles, mga propeta, ug uban pang mga lider sa Simbahan sa pagtabang … (Dugangan nimo kini nga pamahayag.)

Basaha ang Mga Taga-Efeso 4:12–13, nga mangita sa unsay gitudlo ni Pablo bahin kon nganong mihatag ang Ginoo og mga apostoles, mga propeta, ug uban pang mga lider.

Hibaloi nga ang Ginoo mihatag sa mga miyembro sa Iyang Simbahan og mga apostoles, mga propeta, ug uban pang mga lider sa Simbahan sa pagtabang nga mahingpit ang mga Santos. Idugang kini nga pulong ngadto sa dili kompleto nga kamatuoran nga imong gisulat diha sa imong scripture study journal. Isulat usab diha sa imong scripture study journal ang pipila ka mga paagi diin ang mga apostoles, mga propeta, ug uban pang mga lider sa Simbahan makatabang sa paghingpit kanato.

Basaha ang Mga Taga-Efeso 4:14, nga mangita sa laing rason nganong gihatagan sa Ginoo ang Iyang Simbahan og mga apostoles, mga propeta, ug uban pang mga lider.

Gikan niini nga bersikulo atong makat-unan nga gihatagan usab sa Ginoo ang mga Santos niining mga lider aron mapanalipdan sila gikan sa sayop nga doktrina. Idugang kini nga pulong ngadto sa pamahayag nga imong gisulat diha sa imong scripture study journal.

Gikan sa Mga Taga-Efeso 4:11–14 atong makat-unan ang mosunod nga kamatuoran: Ang Ginoo mitawag og mga apostoles, mga propeta, ug uban pang mga lider sa Simbahan sa pagtabang nga mahingpit ang mga Santos ug mapanalipdan sila gikan sa sayop nga doktrina.

Hunahunaa kon unsay mahitabo sa usa ka sakayan nga ginatuya-tuya diha sa tubig atol sa usa ka mapintas nga unos.

Basaha pag-usab ang duha ka sitwasyon gikan sa sinugdanan niini nga leksyon. Dayon tubaga ang mosunod nga mga pangutana diha sa imong scripture study journal:
1. Sa unsang paagi nga ang usa ka sakayan nga ginatuya-tuya diha sa grabe nga katubigan ug pinaagi sa mapintas nga mga hangin mapahisama sa usa ka tawo kinsa “igatuya-tuya” (Mga Taga-Efeso 4:14) pinaagi sa nag-usab-usab nga mga hangin sa sayop nga mga pagtulun-an ug mga opinyon sa kadaghanan?
2. Sa unsang paagi nga ang mga pagtulun-an sa mga apostoles, mga propeta, ug uban pang mga lider sa Simbahan makatabang sa mga sumusunod sa Dios sa paglawig niining grabe nga katubigan ug mobalik nga luwas ngadto sa Langitnong Amahan?
Diha sa imong scripture study journal, isulat kon sa unsang paagi nga ang usa ka apostol, propeta, patriarch, bishop, o magtutudlo nakatabang nimo nga molambo o motubo sa espirituhanong paagi o nakatabang sa pagpanalipod nimo gikan sa sayop nga doktrina ug pagpanglingla. Kon ang tawo nga imong gipili usa ka lokal nga lider, ikonsiderar nga sulatan kining tawhana og usa ka sulat sa pasalamat nga naghulagway kon sa unsang paagi siya nakatabang nimo.

Basaha ang Mga Taga-Efeso 4:15–16, nga mangita sa paagi diin ang atong mga lider sa Simbahan angayang motudlo kanato sa mga kamatuoran sa ebanghelyo.

Scripture Mastery—Mga Taga-Efeso 4:11–14

Aron matabangan ka nga makapraktis sa pagpasabut sa doktrina nga gitudlo diha sa Mga Taga-Efeso 4:11–14, tudloi ang usa ka sakop sa pamilya o usa ka higala nganong giestablisar sa Ginoo ang iyang Simbahan ug mitawag og mga lider aron moserbisyo diha niini. Siguroa nga mogamit sa mga pagtulun-an ni Pablo diha sa Mga Taga-Efeso 4:11–14 isip kabahin sa imong pagtudlo. Kon mahuman na ka og tudlo, hangyoa ang tawo nga imong gitudloan sa pagpirma sa imong scripture study journal.

Mga Taga-Efeso 4:17–32

Giawhag ni Pablo ang mga Santos sa pagsalikway sa pagkadautan ug magbag-o pinaagi ni Jesukristo

Daghan sa mga tawo nga gisulatan ni Pablo didto sa Efeso mahimong bag-o pa lang nga mga kinabig sa Simbahan. Samtang magtuon ka sa Mga Taga-Efeso 4:17–32, pangitaa ang gitudlo ni Pablo niining mga miyembro sa Simbahan nga kinahanglan nilang buhaton isip mga disipulo ni Jesukristo.

Basaha ang Mga Taga-Efeso 4:17–20, nga mangita sa mga pulong nga naghulagway sa kahimtang sa mga Hentil nga wala mopasakop sa Simbahan. Hibaloi kon unsay gisulti ni Pablo nga mao ang rason nga ang ubang mga Hentil anaa niining espirituhanong kahimtang.

Basaha ang Mga Taga-Efeso 4:21–24, nga mangita kon unsay nakatabang sa mga miyembro sa Simbahan nga mahimong lahi sa ubang mga tawo. Ikonsiderar ang pagmarka o pagsulat sa unsay imong makit-an diha sa imong mga kasulatan.

Unsa may gisulti ni Pablo nga kinahanglang “[hukason]” sa usa ka indibidwal nga natudloan sa kamatuoran (Mga Taga-Efeso 4:22)?

Atong “isul-ob ang bag-ong pagkatawo” (Mga Taga-Efeso 4:24) kon makugihon kitang magsunod sa ebanghelyo ni Jesukristo sa matag adlaw pinaagi sa pagpalambo sa pagtuo diha ni Kristo, paghinulsol sa mga sala, pagdawat sa makaluwas nga mga ordinansa, ug sa pagtuman sa mga sugo. Gikan sa mga pagtulun-an ni Pablo atong mahibaloan ang mosunod nga kamatuoran: Ang mga disipulo ni Jesukristo mohukas sa ilang karaan, makasasala nga mga paagi ug mosul-ob sa bag-o, matarung nga mga paagi.

Basaha ang Mga Taga-Efeso 4:25–32, nga mangita sa mga butang nga kinahanglang “[hukason]” sa mga disipulo ni Kristo (bersikulo 22) o “isalikway” (bersikulo 31) ug sa mga butang nga kinahanglang “isul-ob” sa mga disipulo ni Kristo (bersikulo 24). Mahimo nimong markahan o sulatan ang imong mga kasulatan sa unsay imong makit-an. Hinumdumi nga ang Hubad ni Joseph Smith sa Mga Taga-Efeso 4:26 nagsugod sa “Mahimo ba kamong masuko, ug dili makasala?” (diha sa Ang Giya ngadto sa mga Kasulatan, scriptures.lds.org ).

Diha sa imong scripture study journal, pagdrowing og hulagway o ihulagway ang usa ka sitwasyon nga nagpakita sa posible nga kinaiya sa usa ka tawo nga nagkinahanglan nga mohukas sa iyang makasasala nga kinaiya sa usa sa mga butang nga gihulagway ni Pablo. Pagdrowing usab og usa ka hulagway o ihulagway ang usa ka sitwasyon nga nagpakita kon sa unsang paagi nga kanang susama nga indibidwal mahimong molihok kon moduol siya kang Kristo ug mahimong usa ka bag-ong tawo. Mahimo kang mokuha gikan sa imong kaugalingong kasinatian o sa mga kasinatian sa uban samtang kompletuhon nimo kini nga buluhaton.

Hinumdumi nga ang paghukas sa atong karaang mga paagi ug hingpit nga mosunod kang Jesukristo usa ka padayon nga proseso ug dili usa ra ka higayon nga panghitabo.

Mga Taga-Efeso 5–6

Gitambagan ni Pablo ang mga Santos kalabut sa ilang mga relasyon ug sa “pagsul-ob sa tibuok hinagiban sa Dios”

Atong mabasa diha sa Mga Taga-Efeso 5 nga gitudloan ni Apostol Pablo ang mga miyembro sa Simbahan nga kinahanglan nilang gamiton ang relasyon sa Manluluwas ngadto sa Simbahan isip usa ka giya diha sa ilang mga relasyon sa pamilya ug sa uban. Ang mga pulong nga “magpinasakopay kamo nga masinugtanon ang usa sa usa” diha sa Mga Taga-Efeso 5:21 nagpasabut nga mobutang og una sa uban kay sa atong kaugalingon, ug ang mga pulong nga “pagkataha sa Dios” nagpasabut sa atong gugma ug pagtahud sa Dios.

Basaha ang Mga Taga-Efeso 6:1–4, nga mangita sa tambag ni Pablo ngadto sa mga anak bahin sa ilang relasyon ngadto sa ilang mga ginikanan.

Pamalandungi kon sa unsang paagi nga ang mga relasyon sa imong pamilya malig-on pinaagi sa pagsunod niini nga tambag.

Human sa pag-awhag sa mga miyembro sa Simbahan nga “isul-ob ang bag-ong pagkatawo” (Mga Taga-Efeso 4:24) aron mahimong matarung ug balaan, gitambagan sila ni Pablo nga isul-ob ang uban pang mga butang alang sa panalipod.

Basaha ang Mga Taga-Efeso 6:11–13, nga mangita sa unsay gitudlo ni Pablo nga angayang isul-ob sa mga Santos sa Dios.

Unsa man ang mga rason nga gihatag ni Pablo nganong kinahanglan natong “isul-ob ang tibuok hinagiban sa Dios” (Mga Taga-Efeso 6:11)? Mahimo nimong imarka o isulat kining mga rason diha sa imong mga kasulatan.

Basaha ang Mga Taga-Efeso 6:14–17, nga mangita sa lain-laing mga piraso sa espirituhanong hinagiban nga gisulti ni Pablo nga maoy molangkob sa tibuok hinagiban sa Dios.

Sa unsang paagi nga ang pagsul-ob niining mga piraso sa hinagiban makatabang kanato nga malikayan ang sala? Unsay imong mahimo aron masul-ob ang tibuok hinagiban sa Dios?

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Mga Taga-Efeso 4–6 ug nahuman kini nga leksyon sa (petsa).

Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: