Unit 2: Day 2
Mateo 3
Pasiuna
Si Juan Bautista nagsangyaw ug namunyag diha sa Judea. Mibiyahe si Jesukristo gikan sa Galilea ngadto sa Suba sa Jordan, diin gibunyagan Siya ni Juan. Mipamatuod ang Dios Amahan nga si Jesus mao ang Iyang Hinigugmang Anak.
Mateo 3:1–12
Si Juan Bautista nagsangyaw diha sa Judea
Hunahunaa nga ikaw naglingkod sa klase ug usa ka kauban nga estudyante nanguha og butang nimo (sama sa ballpen libro, o jacket). Nangayo siya og pasaylo sa pagkuha sa butang apan nagpadayon sa pagpanguha og mga butang gikan sa ubang mga estudyante. Mangayo siyag pasaylo sa kada higayon apan nagpadayon sa pagpanguha og mga butang nga dili iya. Unsa ang imong mahunahuna mahitungod niining mga pagpangayo sa estudyante og pasaylo?
Sa unsa kaha nga paagi nga kining mga lihok sa estudyante susama sa pagpaningkamot sa paghinulsol nga walay sinserong tinguha?
Samtang imong tun-an ang Mateo 3, pangita og mga kamatuoran nga nagtabang kanato sa pagsabut kon unsa ang kinahanglan gayud natong buhaton aron tinud-anay nga maghinulsol.
Miabut si Jesukristo sa edad nga Siya magsugod na sa Iyang pangalagad. (Ang kasagarang edad nga ang mga lalaki sa Israel mosulod sa pagpangalagad mao ang 30 anyos ang panuigon [tan-awa sa Numeros 4:3].) Basaha ang Mateo 3:1–4, nga mangita sa unsay nahitabo niana nga panahon nga motabang sa pag-andam sa katawhan alang sa pagpangalagad sa Manluluwas.
Si Juan Bautista mao ang “anak nga lalaki ni Zacarias ug Elisabet, ingon nga pari ang kagikan pinaagi sa duha ka mga ginikanan. Kini nga kaliwatan importante, gumikan nga si Juan mao ang hulagway sa balaod ni Moises, gidesinyo sa pag-andam sa dalan sa Mesiyas, ug pag-andam sa katawhan sa pagdawat Kaniya” (Bible Dictionary, “John the Baptist”). Si Elisabet paryente usab ni Maria, ang inahan ni Jesus. Gihuptan ni Juan ang mga yawe sa Aaronic Priesthood (tan-awa sa D&P 13; 84:27–28). Ang Iyang panaput ug pagkaon, nga gihulagway diha sa Mateo 3:4, nagpaila sa iyang kabus nga kahimtang.
Gikan sa unsay imong nakat-unan diha sa Mateo 3:1–4, unsa ang gibuhat ni Juan?
Ang misyon ni Juan gipanagna ni Isaias (Esaias) ug sa ubang mga propeta (tan-awa sa Isaias 40:3; Malaquias 3:1; 1Nephi 10:7–10). Pagaandamon ni Juan ang dalan alang sa Mesiyas (Jesukristo) pinaagi sa pagpahayag og paghinulsol ug pagbunyag diha sa tubig.
Basaha ang Mateo 3:5–6, nga mangita kon giunsa sa mga katawhan pagtubag ang mensahe ni Juan.
Giunsa pagtubag sa katawhan ang mensahe ni Juan?
Ang kaandam sa pagkumpisal sa mga sala ngadto sa Langitnong Amahan ug, kon kinahanglan, sa gitudlo nga mga priesthood lider importante ngadto sa paghinulsol (tan-awa sa Matinud-anon sa Tinuhoan: Usa ka Pakisayran sa Ebanghelyo [2004], 132).
Basaha ang Mateo 3:7, nga mangita sa mga katawhan nga gipakigsultihan ni Juan.
Ang mga Pariseo usa ka relihiyosong pundok sa mga Judeo kansang ngalan nagsugyot nga ibulag o ilain. Mapagarbuhon sila sa higpit nga pagsunod sa balaod ni Moises ug mituo nga ang hinimo sa tawo nga mga pagdugang ngadto niini, nga nailhan isip ang balaod nga gipaagi sa ba-ba [tradisyon sa mga elder], ingon ka importante sa balaod ni Moises mismo (tan-awa sa Giya ngadto sa mga Kasulatan, “Pariseo, Mga”). Ang mga Saduceo usa ka gamay apan gamhanan sa politika nga pundok sa mga Judeo kinsa mituo sa pagsunod og higpit sa balaod ni Moises apan wala motuo sa doktrina sa pagkabanhaw o kinabuhing dayon (tan-awa ang Giya ngadto sa mga Kasulatan, “Saducio, Mga”).
Unsa ang gitawag ni Juan sa mga Pariseo ug mga Saduceo?
Ang Palistinian nga bitin mao ang labing komon nga makahilong bitin sa Israel. Ang mga bitin aktibo sa gabii ug kasagarang mangitag pagkaon pinaagi sa pag-ukoy ug dayon pagtukob sa ilang biktima. Kon bation nilang mahulga, ang mga bitin molikos sa ilang lawas, mosotsot, ug moatake sa ilang mga kaaway.
Palistinian nga bitin
© taviphoto/Shutterstock.com
Ngano sa imong hunahuna gipakisama ang mga Pariseo ug mga Saduceo sa mga bitin?
Ang Joseph Smith Translation naglakip og dugang nga mga pulong nga gisulti ni Juan ngadto sa mga Pariseo ug mga Saduceo. Human makigpulong kanila diha sa Mateo 3:7, mipahimangno si Juan:
“Nganong wala man ninyo gidawat ang pagsangyaw niya kinsa gipadala sa Dios? Kon wala ninyo kini dawata diha sa inyong kasingkasing, wala kamo modawat kanako; kon wala kamo modawat kanako, wala ninyo dawata siya nga ako gipadala aron sa pagsaksi; ug alang sa inyong mga sala kamo walay kupo.
“Busa, paghinulsol ug pamunga kamog mga bunga nga mahiangay sa paghinulsol” (Joseph Smith Translation, Matthew 3:34–35 [diha sa Bible appendix]).
Sumala ni Juan, kon ang mga Pariseo ug ang mga Saduceo misalikway sa iyang pagsangyaw, kinsa man usab ang ilang isalikway?
Unsaon nimo pag-summarize ang mensahe ni Juan ngadto kanila?
Ikonsiderar ang pagmarka sa mga pulong “Pamunga kamog mga bunga nga mahiangay sa paghinulsol” diha sa Mateo 3:8.
Diha sa mga kasulatan ang mga tawo usahay gisimbolo pinaagi sa mga kahoy nga namunga og maayong bunga o bati nga bunga. Ang bunga nagrepresentar sa atong mga tinguha ug mga lihok. Ang mga pulong “mahiangay sa” diha sa bersikulo 8 nagpasabut og “takus sa” (tan-awa sa Mateo 3:8 ).
Hunahunaa ang sitwasyon gikan sa sinugdanan niini nga leksyon—mahitungod sa usa ka estudyante nga nanguha og mga butang gikan sa ubang mga estudyante. Gipakita ba og husto sa estudyante ang tinuod nga baruganan sa paghinulsol pinaagi sa iyang mga tinguha ug mga aksyon? Nganong wala man?
Ang Mateo 3:8 nagtabang kanato sa pagsabut nga kita nagpakita og tinuod nga paghinulsol ngadto sa Dios samtang kita nag-usab sa atong mga tinguha ug mga lihok sa pagsunod sa iyang mga pagtulun-an. Ikonsiderar ang pagsulat niini nga baruganan diha sa margin tupad sa Mateo 3:8.
Pamalandungi kon giunsa sa atong mga tinguha ug mga lihok pagpakita nga kita sa tinuod naghinulsol sa atong mga sala samtang imong ikonsiderar ang mosunod nga mga kinaiya: manikas diha sa eskwelahan, dautan ngadto sa mga igsoon, mogamit og ngil-ad nga pulong, ug motan-aw og pornograpiya.
-
Diha sa imong scripture study journal, ipasabut kon unsaon sa usa ka tawo kinsa nakahinulsol niini nga mga sala sa paghunahuna ug paglihok.
Basaha ang Mateo 3:10, nga mangita sa sangputanan sa dili tininuod nga paghinulsol.
Pamalandungi ang bisan unsa nga mga tinguha o mga lihok nga mahimong imong usbon aron tininuod nga maghinulsol. Paghunahuna mahitungod sa unsaon nimo sa pagpakita og tinuod nga paghinulsol pinaagi sa pag-usab og bisan unsa nga mga tinguha o mga lihok nga dili pinasubay sa mga pagtulun-an sa Dios.
Basaha ang Mateo 3:11, nga mangita sa unsay gisulti ni Juan Bautista sa buhaton sa Manluluwas.
Si Jesus mobunyag “[uban] ang Espiritu Santo, ug kalayo” (Mateo 3:11). Kini nga bunyag gikinahanglan human sa bunyag pinaagi sa tubig ug nagpasabut ngadto sa pagdawat sa Espiritu Santo, nga nagbalaan ug naglimpyo sa atong mga kalag ingon og pinaagi sa kalayo (tan-awa sa 2 Nephi 31: 13–14, 17).
Ang Mateo 3:12 naghulagway unsay mahitabo sa sinimbolo nga paagi sa mga matarung kinsa midawat kang Jesukristo ug ngadto sa dautan kinsa misalikway Kaniya.
Mateo 3:13–17
Si Jesukristo gibunyagan, ug ang Amahan mipasidungog Kaniya ingon nga Iyang Hinigugmang Anak
-
Ingon nga na-rekord diha sa Mateo 3:13–17, si Jesukristo gibunyagan. Samtang imong tun-an kini nga mga bersikulo, pangita og mga pagkapareha tali sa imong bunyag ug sa bunyag sa Manluluwas.
Basaha ang Mateo 3:13–17, nga mangita sa mga tubag sa mosunod nga tulo ka pangutana mahitungod sa bunyag ni Jesus;
Pinaagi ni kinsa?
Giunsa?
Ngano?
Kon gikinahanglan, ipahiangay ang imong mga tubag pinasikad sa mosunod nga impormasyon:
Mibiyahe si Jesus gikan sa Galilea ngadto sa Suba sa Jordan aron magpabunyag ni Juan tungod kay si Juan naghupot sa mga yawe sa Aaronic Priesthood ug adunay awtoridad sa pagpahigayon sa ordinansa sa bunyag. Isulat ang Juan Bautista ug Tukma nga awtoridad diha sa linya sunod sa “Pinaagi ni kinsa?”
Si Jesus “mihaw-as dayon gikan sa tubig” (Mateo 3:16) nagpakita nga Siya gibunyagan pinaagi sa pagpaunlod—nagpasabut nga Siya hingpit nga natabunan sa tubig. Isulat Pinaagi sa pagpaaunlod diha sa linya sunod sa “Giunsa?”
Nahibalo si Juan Bautista nga ang posisyon ug awtoridad ni Jesus mas taas kay sa iyang kaugalingon. Hinoon, sumala sa Mateo 3:15, si Jesus miingon nga Siya nagkinahanglan nga mabunyagan “ aron sa pagtuman sa tibuok pagkamatarung.” Isulat kini nga mga pulong diha sa linya tupad sa “Ngano?”
“Aron sa pagtuman sa tibuok pagkamatarung” nagpasabut nga buhaton ang tanan nga gikinahanglan sa Langitnong Amahan ngari kanato aron kita makapuyo pag-usab uban Kaniya. Kini naglakip sa mga ordinansa sa kaluwasan. Pinaagi sa pagpabunyag, si Jesus mihan-ay sa hingpit nga ehemplo alang kanato sa pagsunod. Basaha ang 2 Nephi 31:4–9, ug isulat kini isip usa ka cross-reference diha sa margin tupad sa Mateo 3:15. Markahi ang mga pulong nga nagtabang kanimo sa pagsabut unsa ang kahulugan sa “ aron sa pagtuman sa tibuok pagkamatarung.”
Gamita ang mga tubag sa nag-unang mga pangutana aron sa pag-ila og doktrina mahitungod sa tukma nga bunyag gikan sa Mateo 3:13–17.
Sa unsa nga paagi nga ang imong bunyag makomparar sa ehemplo nga gihan-ay sa Manluluwas alang kanato?
Lain nga importanting doktrina diha sa Mateo 3:16–17 may kalabutan ngadto sa Diosnong Kapangulohan. Basaha og balik kini nga mga bersikulo, nga mangita sa unsay ilang gitudlo mahitungod sa Amahan, sa Anak, ug sa Espiritu Santo.
Sa mosunod nga mga linya, isulat ang kinatibuk-ang nahimutangan sa kada miyembro sa Diosnong Kapangulohan sa panahon sa pagbunyag sa Manluluwas:
Ang Amahan:
Ang Anak:
Ang Espiritu Santo:
Importante ang pagsabut nga ang Espiritu Santo wala sa tinuoray mausab ngadto sa usa ka salampati. Hinoon, ang salampati usa ka timailhan o simbolo nga ang Espiritu Santo mikunsad diha ni Jesus (tan-awa sa Giya ngadto sa mga Kasulatan, “Salampati, timailhan sa”).
Unsa ang gitudlo niini nga mga bersikulo mahitungod sa Diosnong Kapangulohan? (Tan-awa usab D&P 130:22–23.)
Daghang mga tawo nga walay husto o kompleto nga kahibalo sa Diosnong Kapangulohan. Kon mas daghan kitang masabtan sa tinuod nga kinaiyahan sa Diosnong Kapangulohan, mas dako nga gugma ang atong bation alang Kanila ug mas maayo ang atong pagpangandam sa pagtudlo ug pagpamatuod kabahin Kanila ngadto sa uban.
-
Ikonsiderar ang pagpakigbahin sa imong pagpamatuod sa Amahan, sa Anak, ug sa Espiritu Santo ngadto sa usa ka tawo nga imong kaila.
-
Akong natun-an ang Mateo 3 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: