Mateo 26:31–75

Pasiuna

Didto sa Tanaman sa Getsemani gisugdan ni Jesukristo ang pagdala diha sa Iyang kaugalingon sa mga sala sa tanang katawhan isip kabahin sa Iyang Pag-ula. Gibudhian ni Judas si Jesus ngadto sa mga lider nga Judeo. Dayon si Jesus gitaral nga dili pinasubay sa balaod sa atubangan ni Caifas, ang labawng sacerdote, diin bakak nga mga pasangil gipahamtang batok Kaniya. Atol niini nga higayon gilimod og tulo ka higayon ni Pedro nga nakaila sa Manluluwas ngadto niadtong nakaila kaniya isip usa sa mga disipulo ni Kristo.

Mateo 26:31-46

Si Jesukristo nag-antus didto sa Tanaman sa Getsemani

Ikonsiderar ang mosunod nga mga sitwasyon: Sukad sa iyang pagkabata, ang usa ka batan-ong lalaki gitudloan nga kini usa ka priesthood nga responsibilidad ang pagserbisyo og full-time nga misyon. Isip usa ka tin-edyer, gibati niya nga kinahanglan siyang moserbisyo og misyon, apan nanlimbasog siya sa pagpasalig nga moadto. Mas interesado siya sa ubang mga oportunidad ug naguol nga ang misyon mopugong kaniya sa pagbaton niadto nga mga kasinatian.

Sa unsa nga laing mga sitwasyon kaha nga ang mga tinguha sa mga batan-ong lalaki og babaye lahi gikan sa unsay gusto sa Langitnong Amahan nga ilang buhaton?

Pamalandungi ang mga panahon nga tingali imong nakita kini nga lisud ang sa imong kabubut-on ngadto sa kabubut-on sa Langitnong Amahan. Samtang imong padayunon ang pagtuon sa Mateo 26, pangita sa mga baruganan nga makatabang kanimo kon ikaw nanlimbasog sa pagbuhat unsay gihangyo sa Langitnong Amahan kanimo.

Hinumdumi nga ang Mateo 26:1–30 nagsulti mahitungod sa panahon nga ang Ginoo mikaon sa bangkete sa Pagpalabay uban sa Iyang mga Apostoles ug gipasiugda ang sakrament. Basaha ang Mateo 26:31–35, nga mangita sa unsay gipanagna ni Jesukristo nga mahitabo sa Iyang mga Apostoles.

Niining kinatibuk-ang kahulugan, ang pulong managpanibog nagpasabut nga mopalayo o mobiya o mosalikway.

Tan-awa kon giunsa ni Pedro ug sa ubang mga Apostoles pagtubag sa unsay gisulti sa Manluluwas.

Basaha ang Mateo 26:36–38, nga mangita kon diin si Jesus ug ang mga Apostoles miadto human sa bangkete sa Pagpalabay.

Tan-awa ang mga litrato sa Bukid sa Oliba ug ang Tanaman sa Getsemani diha sa Bible Photographs, nu. 11 ug nu. 12. Ang Getsemani usa ka tanaman sa mga kahoy nga oliba nga nahimutang diha o duol sa Bukid sa Oliba, sa gawas lang gyud sa mga paril sa Jerusalem. “Ang pulong nga getsemani nagpasabut og ‘pug-anan sa oliba’” (Giya ngadto sa mga Kasulatan, “Getsemani,” scriptures.lds.org).

Markahi ang mga pulong diha sa Mateo 26:36–38 nga naghulagway unsay gibati ni Jesus samtang Siya misulod sa Getsemani.

Basaha ang Mateo 26:39, nga mangita sa unsay gibuhat ni Jesus human makalakaw sa “unahan og diyutay” ngadto sa tanaman.

Ang kopa nga gipasabut sa Manluluwas usa ka pulong nga may simbolo alang sa kapait sa pag-antus nga Iyang gisinati isip kabahin sa Pag-ula. Sa Getsemani, gisugdan ni Jesus ang pagdala diha sa Iyang kaugalingon sa mga sala ug pag-antus sa tanang katawhan isip kabahin sa Iyang dakong maulaong sakripisyo.

Si Elder Jeffrey R. Holland sa Korum sa Napulog Duha ka mga Apostoles mipasabut unsay gipangayo ni Jesus sa Amahan sa dihang Siya mihangyo nga isaylo ang kopa gikan Kaniya: “Ang Ginoo miingon, sa tinuod, ‘Kon adunay lain nga daIan, mas molakaw ako diha. Kon adunay laing agianan—bisan unsa nga agianan—malipayon akong modawat niana.’ … Apan sa katapusan, ang kopa wala isaylo” (“Teaching, Preaching, Healing,” Ensign, Ene. 2003, 41).

Mahimo nimong markahan ang mga pulong “ngani dili sumala sa akong pagbuot kon dili sa imo” (Mateo 26:39; tan-awa usab sa D&P 19:19).

Bisan tuod og Siya mihangyo og lain nga paagi sa pagtuman sa mga katuyon sa Amahan, si Jesukristo mipaubos sa Iyang kabubut-on ngadto sa kabubut-on sa Amahan sa pagtuman sa Pag-ula.

Pamalandungi kon unsa ang atong makat-unan mahitungod ni Jesus gumikan sa Iyang pagkaandam nga magpaubos ngadto sa kabubut-on sa Langitnong Amahan bisan tuod og kini nagpasabut nga Siya molahutay og grabe nga pag-antus ug sa dili madugay nga kamatayon.

Kompletuha ang mosunod nga pahayag pinasikad sa unsay imong nakat-unan gikan sa Mateo 26:39: Kita nagsunod sa ehemplo ni Jesukristo kon kita .

Ribyuha ang mga sitwasyon nga imong gilista diha sa sinugdanan niini nga leksyon. Dayon tubaga ang mosunod nga pangutana diha sa imong scripture study journal: Sa unsa nga paagi nga ang ehemplo sa Manluluwas naglig-on kanato niini nga mga sitwasyon?
Paghunahuna og mga higayon nga ang imong mga tinguha nalahi gikan sa kabubut-on sa Langitnong Amahan apan sa katapusan imong gipili ang pagsunod sa Iyang kabubut-on. Pagsulat mahitungod sa usa sa imong mga kasinatian diha sa imong scripture journal kon kini dili kaayo personal, ug ipasabut nganong mihimo ka niana nga pagpili ug unsay imong gibati mahitungod niini.

Pag-ila og usa ka piho nga paagi nga ikaw mosunod sa ehemplo ni Jesukristo pinaagi sa pagpaubos sa imong kabubut-on ngadto sa kabubut-on sa Langitnong Amahan. Ikonsiderar ang paghimo og tumong sa paglihok sa unsay imong nailhan.

Ribyuha ang Mateo 26:37–38, nga mangita sa mga panudlo sa Manluluwas ngadto ni Pedro, Santiago ug Juan didto sa Getsemani.

Ang panudlo nga “pagtukaw kamo uban kanako” diha sa bersikulo 38 nagpasabut nga magmata, mag-alisto, o magmabinantayon. Aron mas makasabut kon nganong ang mga disipulo nanginahanglan sa panudlo sa Manluluwas sa pagtukaw uban Kaniya, timan-i nga ang Hubad ni Joseph Smith nagdugang og pagpasabut nga sa dihang ang mga disipulo miadto sa tanaman, sila “misugod sa hilabihan nga pagkahibulong, ug paglibug kaayo, ug sa pagmulo diha sa ilang mga kasingkasing, natingala kon kini ba ang Mesiyas” (Hubad ni Joseph Smith, Marcos 14:36 [sa Giya ngadto sa mga Kasulatan]). Pinaagi sa pagtudlo sa mga disipulo sa pagtukaw uban Kaniya, mipahimangno si Jesus kanila sa pagmabinantayon tungod kay ang ilang hugot nga pagtuo pagasulayan.

Basaha ang Mateo 26:40, nga mangita sa unsay nadiskobrehan ni Jesus nga gibuhat ni “Pedro ug ang duha ka anak ni Zebedeo [Santiago ug Juan]” (Mateo 26:37) samtang Siya nag-ampo.

Ang Hubad ni Joseph Smith sa Lucas 22:45 nagpakita nga sila natulog, “tungod sa kasubo.”

Basaha ang Mateo 26:41, nga mangita sa unsay gisugo ni Jesukristo nga ilang buhaton.

Ang mosunod maoy usa ka baruganan nga atong makat-unan gikan sa mga gitudlo sa Manluluwas ngadto niini nga mga Apostoles: Kon kita magbantay ug mag-ampo kanunay, makabaton kita og kalig-on sa pagbatok sa tintasyon.

Unsa sa imong hunahuna ang gipasabut sa mga pulong “matinguhaon ang espiritu, apan maluya ang lawas” (Mateo 26:41)?

Usa ka kahulugan mahimo nga ang mga disipulo gusto nga mosunod sa Manluluwas, apan gitugutan nila ang ilang pisikal nga tinguha sa pagkatulog sa pagbuntog sa espirituhanon nga tinguha sa pagtukaw ug sa pag-ampo. Pamalandungi kon sa unsa nga paagi kini nga mga pulong mahimong makatabang kanato sa pagbatok sa tintasyon.

Human kutloa ang Mateo 26:41, si Presidente Henry B. Eyring sa Unang Kapangulohan miingon: “Ang pahimangno [sa Manluluwas] ngadto ni Pedro alang usab kanato. Ang lobo kinsa mopatay sa karnero siguradong mokunis-kunis sa magbalantay sa karnero. Busa kita kinahanglan gayud nga magbantay sa atong mga kaugalingon ingon man sa uban” (“Watch with Me,” Ensign, Mayo 2001, 39).

Hinumdumi nga ang “pagtukaw ” nagpasabut nga magmata, mag-alisto, o magmabinantayon. Paghunahuna mahitungod sa unsang paagi ang espirituhanong pagtukaw ug pag-ampo makatabang kanato sa pagbuntog sa atong mga kahuyang ug sa pagbatok sa tintasyon.

Pamalandungi kon ikaw sukad nahulog ba sa tintasyon tungod kay wala ka mag-ampo ug magmabinantayon. Ikonsiderar kon sa unsa nga paagi kana nga pagpili nakaapekto kanimo. Sunod, pamalandungi ang mga higayon nga ikaw nakigbatok og tintasyon pinaagi sa pag-ampo ug sa pagkamabinantayon. Unsa ang nakatabang kanimo nga magmakanunayon sa espirituhanong pagbantay ug pag-ampo?

Sa laing piraso nga papel o kard, isulat ang usa ka butang nga imong buhaton nga mas magbantay ug mag-ampo sa kanunay. Ikonsiderar ang pagdala niini nga papel uban kanimo aron sa pagpahinumdom kanimo sa imong tumong.

Timan-i nga ang Mateo 26:42–46 nagrekord nga si Jesus katulo mag-ampo diha sa Tanaman sa Getsemani. Sa matag higayon Iyang gipahayag ang Iyang pagkaandam sa pagsunod sa kabubut-on sa Iyang Amahan.

Mateo 26:47–75

Gidakop ug gitaral si Jesukristo diha sa atubangan ni Caifas

Ang mga sacerdote nga punoan ug ang mga escriba nagkunsabo sa pagpatay ni Jesukristo. Ang ilang dautan nga plano naglakip sa pagsoborno ni Judas, paghatag og bakakon nga mga saksi, pagbiaybiay, ug gani sa pagdagmal kang Jesus. Ang Manluluwas napugos sa pag-atubang sa duha ka pormal nga mga pagtaral: Ang una usa ka Judeo nga pagtaral diha sa atubangan sa Sanhedrin sa Jerusalem—usa ka katiguman sa 71 ka mga miyembro, lakip sa mga Levite, mga sacerdote nga punoan, mga escriba, mga Pariseo, mga Saduceo, ug kadtong uban nga gamhanan sa politika, ang tanan gidumala sa labawng sacerdote, kinsa mao si Caifas niana nga panahon. Ang ikaduha usa ka Romano nga pagtaral diha sa atubangan ni Pilato. Sa Judeo nga pagtaral si Jesus giakusar og panamastamas (pagbiaybiay, pagyubit, o pagtunglo sa Dios) (tan-awa sa Mateo 26:64–65). Tungod kay ang pagpanamastamas usa ka hilisgutan sa Judeo ug walay kalabutan ngadto sa mga Romano, ang mga lider nga Judeo miusab sa pasangil ngadto sa pagbudhi sa nasud sa dihang gidala nila si Jesus ngadto ni Pilato. Ang mga lider sa Judeo misulay sa paghaylo sa mga Romano nga si Jesus naninguha sa paghimo sa Iyang Kaugalingon isip usa ka hari, naglaum nga ang mga Romano mopatay Kaniya isip usa ka traydor ngadto ni Cesar. Bisan pa niana, sa panahon sa Romanong pagtaral si Pilato wala makakita og sala ni Jesus. Apan, sa katapusan mihatag og awtoridad si Pilato sa pagpatay ni Jesus aron sa paghilom sa mga lider nga Judeo.

Basaha ang mosunod nga pahayag ni Gerald N. Lund, nga sa kadugayan nasakop sa Seventy: “Hunahunaa [si Jesukristo,] ang Tawo kansang gahum, kansang kahayag, kansang himaya naghupot sa kalibutan sa kahapsay, ang Tawo kinsa namulong ug ang mga solar system, mga galaxy, ug mga bitoon nahimo—nagbarug sa atubangan sa dautang mga tawo ug gihukman nila isip usa ka tawo nga walay katakus o bili!” (“Knowest Thou the Condescension of God?” diha sa Doctrines of the Book of Mormon: The 1991 Sperry Symposium, ed. Bruce A. Van Orden and Brent L. Top [1992], 86).

Bisan tuod si Jesukristo adunay gahum sa paglaglag sa mga tawo kinsa mibunal ug miluwa Kaniya, Iyang giantus ug gilahutay kini sa kinabubut-on. Ang mga lider ug mga sundalo nga Romano wala makaamgo sa walay kinutubang gahum nga magamit unta ni Jesus kon kini kabubut-on pa sa Amahan nga Iyang buhaton kini.

Siksika ang Mateo 26:47–68, nga mangita sa giunsa ni Jesukristo sa pagpadayon sa paggamit og pagpugong ug sa pagpaubos ngadto sa kabubut-on sa Iyang Amahan bisan og siya gidagmalan ug gihukman sa dautang mga tawo (tan-awa usab sa 1 Nephi 19:9). Mahimo nimong markahan ang unsay imong nakit-an.

Diha sa imong scripture study journal, isulat unsa ang tataw diha kanimo mahitungod sa determinasyon sa Manluluwas sa pagbuhat sa kabubut-on sa Langitnong Amahan sa walay pagsapayan sa mga panghitabo. Isulat usab unsaon nimo nga makasunod sa ehemplo sa Manluluwas sa pagkamasulundon.

Diha sa Mateo 26:56, timan-i nga ang panagna sa Manluluwas nga ang mga Apostoles motalikod Kaniya natuman. Hinoon, kini nga pagbiya temporaryo lamang.

Ang Mateo 26:69–75 nagrekord nga samtang si Jesus gitaral human sa Iyang pagdakop, milimud si Pedro og katulo nga nakaila Kaniya. (Pahinumdom: Ang paglimud ni Pedro mas mahisgutan pa og maayo diha sa leksyon sa Lucas 22.)

Isulat ang mosunod diha ubos sa mga assignment karong adlawa sa imong scripture study journal:

Akong natun-an ang Mateo 26:31-75 ug nakompleto kini nga leksyon sa (petsa).

Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: