Unit 2: Day 4

Mateo 5

Pasiuna

Ang Mateo 5–7 nagrekord og usa ka wali nga gihatag sa Manluluwas diha sa sinugdanan sa iyang pagpangalagad. Kini nailhan isip ang Wali Ibabaw sa Bungtod. Kini nga leksyon naglakip sa Mateo 5, nga naglangkob og mga baruganan nga gitudlo sa Manluluwas nga naggiya ngadto sa kalipay. Siya usab misugo sa Iyang mga disipulo sa pagpakita og matarung nga ehemplo ug pagtudlo sa mas labaw nga balaod.

Mateo 5:1–12

Ang Manluluwas nagsugod sa Wali Ibabaw sa Bungtod pinaagi sa pagtudlo sa mga Kabulahanan

Si Jesus nagtudlo sa Wali Ibabaw sa Bungtod

Unsaon nimo sa pagtubag sa mosunod nga mga pangutana: Malipayon ba ka? Ngano o nganong dili man?

Ikonsiderar ang gisulti ni Presidente Dieter F. Uchtdorf sa Unang Kapangulohan mahitungod sa kalipay:

“Kasagaran madala kita sa atong ilusyon nga adunay butang nga dili nato makab-ot nga makahatag kanato og kalipay: mas maayo nga sitwasyon sa pamilya, mas maayong sitwasyon sa pinansyal , o ang katapusan sa mahagitong pagsulay.

“… Ang kahimtang sa gawas dili diay importante o modeterminar sa atong kalipay.

“Kita ang importante. Kita ang nagtino sa atong kalipay” (“Mga Pagmahay ug Resolusyon,” Ensign o Liahona, Nob. 2012, 23).

Samtang imong tun-an ang Mateo 5, pangitaa ang mga baruganan nga makatabang kanimo nga makasabut unsay modala og tinuod nga kalipay.

Susiha ang Mateo 5:3–11, nga mangita sa mga pulong nga gibalik diha sa sinugdanan sa kada bersikulo. (Mahimo nimong markahan ang pulong nga bulahan nga makaplagan diha sa Mateo 5:3.)

Tungod kay ang pulong bulahan gihubad gikan sa pulong nga Latin beatus, nagpasabut nga palaran o malipayon, kini nga mga bersikulo kasagaran nga gitawag og Mga Kabulahanan.

Sa panahon sa Iyang pagbisita sa mga Nephite, mihatag si Jesukristo og usa ka wali nga susama sa Wali Ibabaw sa Bungtod nga makaplagan diha sa Mateo 5. Isip usa ka pasiuna sa Iyang Wali ngadto sa mga Nephite, gipasabut sa Manluluwas nga ang paagi sa pagduol ngadto Kaniya mao ang pagbunyag ug pagdawat sa Espiritu Santo (tan-awa sa 3 Nephi 12:1–2). Ang Mga Kabulahanan nga makita diha sa Mateo 5:1–12 ug 3 Nephi 12:1–12 naghatag og agianan alang kanato nga makahibalo unsaon sa pagduol ngadto Kaniya.

Basaha ang 3 Nephi 12:3–6, nga mangita kon sa unsang paagi ang mensahe sa Ginoo niadto nga mga bersikulo paghatag og mas maayo nga pagsabut sa mga tudling sa kasulatan diha sa Mateo 5:3–6.

1. Pagpili og usa sa Mga Kabulahanan diha sa Mateo 5:3–12. Sa imong scripture study journal, pagsulat og mubo nga pakigpulong mahitungod niana nga kabulahanan. (Mahimong imong i-apil ang mga panabut gikan sa 3 Nephi 12.) I-apil ang mosunod nga impormasyon isip kabahin sa imong pakigpulong:

   1. Ilha ang panalangin nga gisaad kanato tungod sa pagsunod niana nga kabulahanan.

   2. Pagsugyot og piho nga mga paagi nga kita makapuyo sumala niini nga kabulahanan.

   3. Ipasabut sa unsa nga paagi ang pagpuyo sumala niini nga kabulahanan makadala kanato og kalipay. Mahimo usab nga imong ipakigbahin ang kasinatian nga nagpakita giunsa niana nga kabulahanan pagdala kanimo og kalipay.

Tingali imong natan-aw nga ang kada usa sa mga Kabulahanan nagtudlo mahitungod sa mga hiyas ni Jesukristo. Pinaagi sa pagsunod niini nga mga pagtulun-an kita mahimo nga mas mahisama Kaniya. Gikan sa Mateo 5 atong makat-unan nga samtang kita nagpalambo og Kristohanon nga mga hiyas, kita makakaplag og dugang nga kalipay.

Pagpili og hiyas gikan sa usa sa mga Kabulahanan, ug paghimo og tumong nga motabang nimo sa pagpalambo niana nga hiyas.

Mateo 5:13–16

Nagtudlo si Jesukristo sa Iyang mga disipulo sa paghimo og matarung nga ehemplo

Pagkonsiderar og usa ka tawo nga imong kaila, sama sa usa ka miyembro sa pamilya o higala, kinsa mapanalanginan pinaagi sa pagpaduol pa ngadto sa Langitnong Amahan. Samtang nagpadayon ka sa pagtuon sa Mateo 5, pangitaa ang mga baruganan nga makagiya kanimo samtang ikaw naninguha sa pagtabang niini nga tawo.

Ilista ang tanang mga gamit sa asin nga imong mahunahunaan:

Dugangi ang imong lista human mabasa ang unsay gisulti ni Elder Carlos E. Asay sa Seventy mahitungod sa asin.

“Ang [asin] importante sa panglawas; ang mga cell sa lawas kinahanglan gayud og asin aron mabuhi ug motrabaho. Kini adunay antiseptic, o igpapatay og kagaw, nga mga kinaiya. Kini usa ka makapapreserba. Kini usa ka sagol sa daghang mga pagkaon ug mga produkto. Ug kini gibanabana nga adunay labaw sa katorse ka libo nga mga kagamitan sa asin. …

“…Ang [asin nga] may lami … limpyo, lunsay, walay hugaw, ug mapuslanon. Niini nga kahimtang o kondisyon ang asin mopreserba, motimpla, moayo, ug mohimo og ubang magamit nga mga kahimoan” (“Salt of the Earth: Savor of Men and Saviors of Men,” Ensign, Mayo 1980, 42).

Basaha ang Mateo 5:13, nga mangita kon kinsa ang gipakigsama sa Manluluwas ngadto sa asin.

Ikonsiderar kon sa unsa nga paagi ang mga disipulo ni Jesukristo makapakita og sama nga mga kinaiya sa maayong asin.

Sumala sa bersikulo 13, unsa ang mahitabo kon ang asin mawad-an sa iyang lami?

Ang pulong nga lami nagpasabut dili lamang timpla sa asin apan usab sa talagsaon niini nga mga kalidad nga naghimo niini nga usa ka makatambal ug makapapreserba nga butang.

Unsa sa imong hunahuna ang makaingon sa asin nga mawad-an sa iyang lami?

Ang asin mawad-an sa iyang lami kon kini isagol sa ubang mga elemento (sama sa hugaw) ug mahimong mahugawan.

Kon ang asin nagrepresentar sa mga disipulo ni Jesukristo, unsa ang girepresentar sa hugaw o sa ubang makahugaw?

Gikan sa mga pagtulun-an sa Manluluwas, atong nakat-unan nga ang mahugawan pinaagi sa sala sa kalibutan makapugong kanato nga mahimong usa ka panalangin ngadto sa uban. Mahimo nga imong isulat kini nga baruganan diha sa margin sa imong mga kasulatan duol sa Mateo 5:13.

Mihatag usab si Elder Asay og tambag aron pagtabang kanato sa paglikay nga mahugawan sa mga sala sa kalibutan: “Ako motanyag niining yano nga mga sumbanan … ingon nga mga paagi sa pagpatunhay sa lami: Kon kini dili limpyo, ayaw paghunahuna niini; kon kini dili tinuod, ayaw pagsulti niini; kon kini dili maayo, ayaw pagbuhat niini ” (“Salt of the Earth,” 42–43).

Ikonsiderar kon unsay imong mabuhat karong adlawa sa paglikay nga mahugawan pinaagi sa mga sala sa kalibutan. Hinumdumi nga pinaagi sa hugot nga pagtuo diha ni Jesukristo ug sa paghinulsol, ikaw mahimong maputli gikan sa bisan unsang mga sala nga imong nahimo.

Basaha ang Mateo 5:14–16, ug tan-awa kon sa unsa nga paagi gikumpapar sa Manluluwas ang Iyang mga disipulo ngadto sa usa ka kandila. (Ang Mateo 5:14–16 usa ka scripture mastery passage. Mahimo nimong markahan kini sa lahi nga paagi aron sa pagtabang kanimo sa pagpangita niini sa umaabot.)

Scripture Mastery—Mateo 5:14–16

2. Sa imong scripture study journal, pagdrowing og usa ka yanong kandila ug tubaga ang mosunod nga mga pangutana:

   1. Unsay ipasabut sa pagpadan-ag sa imong kahayag?

   2. Ngano sa imong hunahuna importante ang pagsunod sa mga sugo sa Ginoo diha sa Mateo 5:14–16 sa pagpakita og matarung nga ehemplo?

Mga Kapanguhaan sa Scripture Mastery

Mahimo kang mopamilyar sa mga kapanguhaan sa scripture mastery nga anaa sa LDS.org. Lakip niini nga mga kapanguhaan mao ang mga kard sa scripture mastery, mga bookmark, mga kalihokan sa pagkat-on, ug mga apps alang sa mobile nga mga device ug sa web. Kini nga mga kapanguhaan makatabang kanimo niining mga tudling sa kasulatan.

Sumala niini nga mga bersikulo, atong nakat-unan nga ang atong matarung nga mga ehemplo makatabang sa pag-awhag sa uban nga mas magpaduol sa Langitnong Amahan. Ikonsiderar ang pagsulat niini nga baruganan diha sa imong mga kasulatan.

3. Tubaga ang mosunod nga pangutana diha sa imong scripture study journal: Kanus-a ang usa ka tawo nakapakita og usa ka matarung nga ehemplo nga nakatabang kanimo nga mas magpaduol ngadto sa Langitnong Amahan?

Pamalandungi kon unsay imong mabuhat nga mahimong usa ka mas maayong ehemplo ngadto sa imong pamilya ug mga higala.

Mateo 5:17–48

Si Jesukristo nagtudlo sa Iyang mga disipulo kon unsaon nga mahimong hingpit sama sa Langitnong Amahan

Ang Mateo 5:17–20 nagrekord nga si Jesukristo nagtudlo nga Siya wala moanhi sa pagbungkag, o sa pagwagtang, sa mahangturong mga kamatuoran diha sa balaod ni Moises. Hinoon, Siya mianhi sa pagpahiuli sa kahingpitan sa ebanghelyo nga nawala tungod sa kadautan ug sa apostasiya, sa pagkorihir sa bakak nga mga pagtulun-an, ug sa pagtuman sa mga panagna nga gihimo sa mga propeta sa Daang Tugon.

Sa Mateo 5:21–48, misulti ang Manluluwas mahitungod sa nagkalainlaing mga balaod ug mga tradisyon nga gipalambo sa mga Judeo o gidugang ubos sa balaod ni Moises. Samtang Siya mipasabut sa tinuod nga kahulugan sa mga balaod, siya mitudlo og mas maayo nga paagi sa pagpuyo, Ang mga miyembro sa gingharian sa Dios kinahanglan gayud mosunod niining mas labaw nga balaod. Aron sa pagtabang kanimo sa pag-ila kon unsay gitudlo ni Jesukristo sa Iyang mga disipulo mahitungod sa mas labaw nga balaod, kompletoha ang mosunod nga pagpares-pares nga kalihokan:

Mosunod lamang sa gisugo sa balaod

Sa unsa nga paagi kinahanglang magkinabuhi ang mga disipulo ni Jesukristo

“Ayaw pagbuno” (tan-awa sa Mateo 5:21–26). “Ayaw pagpanapaw” (tan-awa sa Mateo 5:27–30). Kutob nga ikaw may “lisensya” sa pagpakigbulag kini mahimo ang pagbulag sa imong asawa (tan-awa sa Mateo 5:31–32). Tumana lamang ang mga panumpa nga imong gihimo diha sa ngalan sa Ginoo (Tan-awa sa Mateo 5:33–37). “Mata tungod sa mata, ug ngipon tungod sa ngipon” (tan-awa sa Mateo 5:38–42). Gikinahanglan lamang nimo ang paghigugma sa imong silingan (tan-awa sa Mateo 5:43–47).

Ikaw wala magkinahanglan og mga panumpa; ang imong pulong igo ra. Higugmaon nimo ang imong kaaway. Ayaw pakigbulag gawas sa pagpanapaw. Ayaw kasuko. Itahan ang pikas nga aping. Ayaw paghimo og panapaw diha sa imong kasingkasing pinaagi sa pag-abi-abi og maibugon nga mga hunahuna,

4. Ribyuha ang mga kamatuoran nga imong nakat-unan sa panahon niini nga leksyon. Diha sa lain nga mga linya sa imong scripture study journal, isulat ang mga pulong Sugod, Hunong, ug Padayon. Timbang-timbanga ang imong kinabuhi, ug pagpili og usa ka butang nga imong masugdan og buhat, usa ka butang nga imong mahunong pagbuhat, ug usa ka butang nga imong mapadayon og buhat aron sa paggamit unsay imong nakat-unan niini nga leksyon. Sunod sa angay nga pulong diha sa imong scripture study journal, isulat unsay imong napilian nga sugdan ug unsay imong napilian nga ipadayon. Butangi og marka nga tsek sunod sa pulong nga Hunong sa pagpakita nga ikaw nakapili og usa ka butang nga ikaw makahunong sa pagbuhat.

5. Isulat ang mosunod diha ubos sa buluhaton karong adlawa sa imong scripture study journal:

   Akong natun-an ang Mateo 5 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: