Welcome sa Bag-ong Tugon

Unsa ang Bag-ong Tugon?

Ang Bag-ong Tugon naglakip sa mga sinulat sa unang mga Apostoles ug sa unang mga tinun-an ni Jesukristo kinsa misulat ubos sa inspirasyon sa Espiritu Santo. Kini naglakip sa upat ka mga Ebanghelyo, nga mao ang mga pagpamatuod ni Mateo, Marcos, Lucas, ug Juan ni Jesukristo ingon nga mao ang gisaad nga Mesiyas—ang Manluluwas ug Manunubos—ug ang nabanhaw nga Ginoo. Ang upat ka mga Ebanghelyo nag-istorya sa mga bahin sa kinabuhi ni Jesus ug usa ka rekord sa Iyang daghang mga pagtulun-an. Ang Bag-ong Tugon naglakip sa mga doktrina ug mga baruganan nga gitudlo sa Manluluwas ug sa Iyang mga Apostoles aron sa pagtabang sa uban nga makat-on unsaon sa pagbalik sa pagpuyo uban sa Dios ang Amahan ug pag-angkon og kinabuhing dayon. Alang sa mga Santos sa Ulahing mga Adlaw, ang Biblia nagbarug uban sa Basahon ni Mormon, Doktrina ug mga Pakigsaad, ug Perlas nga Labing Bililhon isip balaan nga kasulatan (tan-awa sa Ang mga Artikulo sa Hugot nga Pagtuo 1:8).

Si Elder Bruce R. McConkie sa Korum sa Napulog Duha ka mga Apostoles mi-summarize sa importante nga mga sulod sa Bag-ong Tugon: “Ang Bag-ong Tugon … nag-istorya sa katumanan sa karaang mga saad; naghisgot sa pagkatawo ug pangalagad ug sa maulaong sakripisyo sa Usa nga Gisaad; nagpasabut sa makaluwas nga mga doktrina sa iyang walay katapusang ebanghelyo; nagrekord sa paglambo ug pagdako sa kawsa sa ebanghelyo sa tunga-tunga sa panahon; nanagna sa kinatibuk-ang pagpalayo gikan sa pagtuo nga sa makausa gihatag ngadto sa mga santos; nagsaad sa mahimayaong pagpahiuli sa ebanghelyo sa katapusan mga adlaw; ug nanagna, pinaagi sa grapiko ug makahuluganong paghulagway, sa mga panghitabo nga nag-una, atol sa, ug sa nagsunod sa Ikaduhang Pag-anhi sa Anak sa Tawo. Ang labing importante nga katuyoan mao ang pagsaksi ni Kristo” (A New Witness for the Articles of Faith [1985], 392).

Nganong Importante ang Pagtuon sa Bag-ong Tugon?

Sama sa tanang kasulatan, ang Bag-ong Tugon nagtudlo ug nagpamatuod ni Jesukristo ug sa Iyang pagkabalaan. Si Apostol Juan namahayag nga ang iyang katuyoan sa pagsulat sa iyang Ebanghelyo mao ang pag-awhag sa uban nga “motuo nga si Jesus mao ang Kristo, ang Anak sa Dios, ug nga sa pagtuo makabaton kamog kinabuhi diha sa iyang ngalan” (Juan 20:31). Pinaagi sa pagtuon sa Bag-ong Tugon, ikaw makahibalo sa talagsaong pagkatawo sa Manluluwas, makasaksi sa Iyang mga milagro ug mga pagpang-ayo, makadungog sa talagsaong mga kamatuoran sa Iyang ebanghelyo, ug makapuyo pag-usab sa mga adlaw sa Iyang maulaong sakripisyo, pagkalansang sa krus, ug sa mahimayaong pagkabanhaw. Samtang ikaw magtuon sa kinabuhi ug mga pagtulun-an sa Manluluwas, ikaw makat-on unsaon sa pagduol ngadto Kaniya aron makadawat og paglaum, kapasayloan, kalinaw, ug mahangturong kalipay. Ang sinsero nga pagtuon sa Bag-ong Tugon makapalig-on sa imong pagtuo ni Jesukristo ug makatabang nimo nga mosalig sa Iyang mga pagtulun-an ug Pag-ula.

Si Elder L. Tom Perry sa Korum sa Napulog Duha ka mga Apostoles mitudlo nga ang Bag-ong Tugon “mao ang sentro sa kasaysayan sa kasulatan, sama nga ang Manluluwas Mismo kinahanglang mao ang sentro sa atong kinabuhi. Kinahanglang mopasalig kita sa atong kaugalingon sa pagtuon niini ug pagbahandi niini!

“Adunay bililhon kaayong mga perlas sa kaalam nga makaplagan sa atong pagtuon sa Bag-ong Tugon” (“Ang Igpapahulay ug ang Sakrament,” Ensign or Liahona, Mayo 2011, 6).

Ang mosunod mao ang pipila sa bililhong mga perlas sa kamatuoran ug kaalam nga makita sa Bag-ong Tugon:

Si Jesukristo mao “ang dalan, ang kamatuoran, ug ang kinabuhi,” ug pinaagi Kaniya ikaw makaila sa Langitnong Amahan (tan-awa sa Juan 14:6–7).
Ang Espiritu Santo mao “ang Manlalaban, … [kinsa] magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo” (Juan 14:26).
Ang mga disipulo ni Jesukristo adunay responsibilidad sa pagpahayag sa ebanghelyo sa tibuok kalibutan (tan-awa sa Mateo 28:19).
Ang Manluluwas nagpadayon sa paggiya sa Iyang Simbahan pinaagi sa pagpadayag ngadto sa Iyang napili nga mga sulugoon (tan-awa sa Mga Buhat 1:2).
Kamo ang mga kaliwat, o anak, sa Dios (tan-awa sa Mga Buhat 17:28–29).
Tungod sa pagkabanhaw sa Manluluwas, ang tanan magmadaugon sa kamatayon ug mabuhi pag-usab (1 Mga Taga-Corinto 15:21–26).
Kon ikaw nakulangan og kaalam ikaw makapangayo sa Dios pinaagi sa pag-ampo, ug Siya motubag (tan-awa sa Santiago 1:5–6).
Ang matinud-anong mga Santos kinsa mobuntog sa dautan makadawat og kinabuhing dayon (tan-awa sa Pinadayag 3).

Usa ka kasinatian sa kinabuhi ni Propeta Joseph Smith naghatag og ehemplo kon sa unsa nga paagi nga ang pagtuon sa Bag-ong Tugon makaimpluwensya ug makaapekto sa imong kinabuhi. Isip usa ka batan-on, si Joseph nakigbisog sa kalisud sa pagpangita alang sa iyang kaugalingon kon hain sa mga simbahan ang sakto. Miabli siya sa Biblia, ug usa ka adlaw iyang nabasahan ang tudling sa Santiago 1:5. Unya siya misulat: “Wala pay bisan unsa nga tudling sa kasulatan nga mituhop uban sa labaw nga gahum ngadto sa kasingkasing sa tawo kay sa nahimo niini nga panahon ngari kanako. Kini ingon og misulod uban sa makusog nga gahum ngadto sa matag tipik sa akong kasingkasing. Ako mipamalandong niini pagbalik-balik” (Joseph Smith—Kasaysayan 1:12).

Human makabasa ug makapamalandong niadtong mga pulong sa Bag-ong Tugon, si Joseph nakahukom sa pagbuhat sa kamatuoran nga iyang nakat-unan ug nangutana sa Dios, sumala sa gitudlo ni Santiago. Ang iyang desisyon misresulta sa iyang talagsaong Unang Panan-awon. Samtang ikaw magkugi sa pagtuon sa Bag-ong Tugon, ikaw usab mobati sa Espiritu Santo nga motandog sa imong kasingkasing ug motabang nimo sa pag-ila sa mga paagi sa paggamit sa mga doktrina ug mga baruganan sa ebanghelyo diha sa imong kinabuhi.

Samtang ikaw mainampoong magtuon sa Bag-ong Tugon, molihok sa mga pag-aghat sa Espiritu Santo. Pinaagi sa pagbuhat sa ingon ikaw makabig sa hingpit ngadto sa Ginoo. Ang tinuod nga pagkakabig mahitabo samtang ikaw magpadayon sa pagtuman sa mga doktrina nga imong nahibaloan nga tinuod ug sa pagsunod sa mga sugo, matag adlaw, matag bulan, sa nahibilin nga mga adlaw sa imong kinabuhi.

Mahitungod sa Bag-ong Tugon

Ang Biblia dili usa ka basahon. Koleksyon kini sa mga basahon. Ang Griyego nga pulong diin ang pulong nga biblia nakuha, nagpasabut nga “ang mga basahon.” “Ang Biblia sa Kristiyano adunay duha ka mga bahin, sa kasagaran nailhan nga ang Daan ug Bag-ong Tugon” (Giya ngadto sa mga Kasulatan, “Biblia,” scriptures.lds.org). Ang pulong nga gihubad nga tugon mahimong hubaron nga pakigsaad. Ang Bag-ong Tugon mao ang bag-ong pakigsaad.

Sa konteksto sa ebanghelyo, ang usa ka pakigsaad mao ang espesyal nga kasabutan tali sa Ginoo ug sa usa ka tawo o usa ka grupo. Ang Daang Tugon, o daang pakigsaad, mao ang balaod nga gihatag sa Ginoo ngadto sa Iyang katawhan sa karaang panahon. “Sa dihang ang Manluluwas mianhi sa tunga-tunga nga kapanahonan, gipahiuli Niya ang ebanghelyo ngadto sa Judeo didto sa Palestina. Tungod kay sila nahisalaag, bisan gikan sa balaod ni Moises, kini usa ka bag-o nga pakigsaad ngadto kanila” (Bible Dictionary, “Bible”).

Ang Bag-ong Tugon kasagaran gibahin ngadto sa Mga Ebanghelyo, ang Mga Buhat sa mga Apostoles, ang mga espistola ni Pablo, ang kinatibuk-ang mga epistola, ug ang basahon sa Pinadayag.

Ang mga Ebanghelyo. Ang mga basahon ni Mateo, Marcos, Lucas, ug Juan gitawag og ang mga Ebanghelyo, ug ang matag usa gipangalanan sunod sa tagsulat niini. Ang pulong ebanghelyo nagpasabut og “maayong balita.” Bisan ang upat ka mga Ebanghelyo magkalahi sa pipila ka mga detalye ug panlantaw, kining tanan naghisgot sa mga panghitabo sa kinabuhi ug yutan-ong pagpangalagad sa Manluluwas taliwala sa mga Judeo. Ang tanang upat ka mga Ebanghelyo nagtudlo ug nagpamatuod nga si Jesukristo mao ang anak sa Dios ug ang Manluluwas sa kalibutan. “Ang mga rekord sa Mateo, Marcos, ug Lucas nagpresentar og susama nga koleksyon sa mga materyal ug dunay ubay-ubay nga han-ay sa mga pulong nga komon, ingon man usab susama nga importanting mga punto, ug sa ingon usahay gitawag og ‘Synoptic Gospels’ (nagpasabut nga ‘susama’). Bisan pa, ang matag usa talagsaon ug dunay daghang detalye nga wala sa uban. Ang rekord ni Juan medyo lahi gikan sa laing tulo sa bokabularyo, han-ay sa mga pulong, ug pagpresentar sa mga hitabo” (Bible Dictionary, “Gospels”).
Ang mga Buhat sa mga Apostoles. Ang Mga Buhat sa mga Apostoles gisulat ni Lucas, ug maoy iyang asoy sa pagtubo sa Simbahan ubos sa direksyon ni Pedro ug sa ubang mga Apostoles (tan-awa sa Giya ngadto sa mga Kasulatan, “Mga Buhat sa mga Apostoles”).
Mga Espistola ni Pablo. Ang mga epistola, o mga sulat, ni Pablo ginganlan alang sa branch sa Simbahan o sa indibidwal o grupo diin ang sulat gisulat. Ang mga epistola ni Pablo gihan-ay “pinaagi sa gitas-on, sa nagkamubo nga han-ay gikan sa pinakataas (Mga Taga-Roma) ngadto sa pinakamubo (Filemon). Mao kini ang han-ay gawas sa sulat ngadto sa Mga Hebreohanon, nga gibutang sa katapusan tungod kay dunay mikwestyon kon si Pablo o dili ang nagsulat niini” (Bible Dictionary, “Pauline Epistles”).
Ang kinatibuk-ang mga sulat. Ang mga basahon ni Santiago ngadto ni Judas sa kasagaran gitawag nga kinatibuk-ang mga epistola tungod kay, gawas sa 2 ug 3 Juan, wala kini gitumong sa piho nga tawo o branch sa Simbahan. Sila ginganlan tungod sa ilang mga tagsulat. (Tan-awa sa Bible Dictionary, “General Epistles.”)
Ang basahon sa Pinadayag. Ang basahon sa Pinadayag (usahay gipasabut isip ang Apokalipsis) gisulat ni Apostol Juan, kinsa misulat usab sa Ebanghelyo ug sa mga epistola nga nagdala sa iyang pangalan. Ang asoy ni Juan sa usa ka pinadayag nga iyang nadawat gikan sa Ginoo. (Tan-awa sa Bible Dictionary, “Revelation of John.”)

Ang Hubad ni Joseph Smith ug Joseph Smith–Mateo

Ang Ginoo misugo ni Propeta Joseph Smith sa paghubad, o pag-usab, sa King James Version sa Biblia. Ang Hubad ni Joseph Smith (usahay gimubo og HJS) dili hubad sa Biblia gikan sa usa ka pinulongan ngadto sa lain. Hinoon, naglakip kini sa mga kausaban nga gidasig sa Ginoo nga himoon sa Propeta ngadto sa teksto sa Biblia.

Nagsugod si Joseph Smith sa iyang paghubad niadtong Hunyo 1830 ug nakompleto kini niadtong Hulyo 1833, bisan og siya nagpadayon sa paghimo og mga kausaban sa manuskrito hangtud sa hapit na siya mamatay niadtong 1844 (tan-awa sa Bible Dictionary, “Joseph Smith Translation”). Samtang ang mga bahin sa hubad ni Propeta Joseph Smith gimantala sa buhi pa siya, ang iyang nakompleto nga dinasig nga hubad sa Biblia unang gimantala niadtong 1867 pinaagi sa Reorganized Church of Jesus Christ of Latter Day Saints (nailhan nga Community of Christ). Sukad niadtong 1979 ang Latter-day Saint edition sa King James Version sa Biblia sa Iningles adunay gatusan sa importante nga mga tudling sa doktrina gikan sa Hubad ni Joseph Smith diha sa mga footnotes ug appendix. (Tan-awa sa Robert J. Matthews, “Joseph Smith’s Efforts to Publish His Bible ‘Translation,’” Ensign, Ene. 1983, 57–64; Bible Dictionary, “Hubad ni Joseph Smith.”) Sukad niadtong 2009 ang Latter-day Saint edition sa Biblia sa Spanish, ang Reina-Valera nga bersyon, naglakip usab sa mga tudling diha sa footnotes ug appendix. Niadtong 2015 ang Latter-day Saint edition sa Biblia gimantala sa Portuguese.

Ang Joseph Smith—Mateo, diha sa Perlas nga Labing Bililhon, kinuha gikan sa Hubad ni Joseph Smith (Hubad ni Joseph Smith, Mateo 23:39–24:56). Dinasig kini nga hubad sa Mateo 23:39–24:55.

Ang Hubad ni Joseph Smith nakatampo sa atong pagsabut sa Bag-ong Tugon pinaagi sa pagpahiuli sa pipila ka yano ug bililhong mga kamatuoran nga nawala gikan sa Biblia (tan-awa sa 1 Nephi 13:20–41) ug pagdugang sa komentaryo ug pagpatin-aw sa Ginoo.