Unit 4: Day 1

Mateo 13:24–58

Pasiuna

Ang Manluluwas migamit og mga sambingay sa pagtudlo mahitungod sa gingharian sa langit, sa pagpahiuli ug pagtubo sa Iyang Simbahan sa ulahing mga adlaw, sa pagpundok sa matarung, ug sa paglaglag sa dautan diha sa Iyang Ikaduhang Pag-anhi.

Mateo 13:24–30, 36–43

Nagtudlo si Jesus sa sambingay sa trigo ug sa mga bunglayon

Ikonsiderar ang mosunod nga mga pangutana, ug isulat ang tubag sa katapusang pangutana:

• Mibati ka ba sukad og kapakyasan o kasilo tungod kay adunay daghang dautan sa kalibutan?

• Ngano nga dili man lamang kuhaon sa Ginoo ang dautan nga naglibut kanato?

• Nganong kinahanglan nga mopili ka nga mahimong matarung kon ang pipila sa mga katawhan nga naglibut kanimo ingon og wala magsinati og negatibong mga sangputanan gikan sa ilang dili matarung nga mga pagpili?

Samtang imong tun-an ang Mateo 13:24–30, 36–43, pangitaa ang kamatuoran nga makatabang kanimo sa pagkaplag og kahupayan samtang naningkamot sa pagpuyo og matarung sa usa ka dautang kalibutan. Human og tuon sa istorya diha sa Mateo, ikonsiderar ang pagbasa sa Doktrina ug mga Pakigsaad 86:1–7, diin ang Dios mihatag og dugang nga pagpasabut ngadto sa sambingay sa trigo ug sa bunglayon.

Diha sa Mateo 13:24–30 ang Manluluwas mitudlo sa sambingay mahitungod sa trigo ug sa bunglayon.

Ang mga bunglayon mga matang sa makahilo nga sagbut. Ang trigo ug ang bunglayon magkaparehas kon kini mogitib, apan makaila ka niini kon kini moguwang na.

Basaha ang Mateo 13:24–30 ug ang bahin sa Hubad ni Joseph Smith diha sa Mateo 13:30, footnote b, nga mangita sa unsay nahitabo sa trigo ug sa mga bunglayon.

Unsa ang nahitabo sa trigo ug sa bunglayon?

Ngano sa imong hunahuna ang magpupugas sa maayong liso misulti sa iyang sulugoon sa pagtugot sa trigo ug sa bunglayon “nga managkaipon karon sa pagtubo hangtud sa ting-ani” (Mateo 13:30)?

Sumala sa Hubad ni Joseph Smith, hain ang pangibton og una—ang trigo o ang bunglayon?

Human ang Manluluwas mihatag sa sambingay sa trigo ug sa bunglayon, ang Iyang mga disipulo nangutana Kaniya sa pagpasabut sa kahulugan niini. Basaha ang Mateo 13:36–43, mangita sa pagpasabut sa Manluluwas kabahin sa sambingay. (Mahimong imong isulat ang mga tubag sa mosunod nga mga pangutana diha sa imong mga kasulatan.)

• Kinsa ang nagpugas, o nagtanom, sa maayong liso?

• Kinsa ang nagpugas, o nagtanom, sa bunglayon?

• Unsa ang girepresentar sa trigo ug sa bunglayon? (Samtang ikaw nagtubag niini nga pangutana, hinumdumi nga ang dautan mao kadtong kinsa nagpili nga dili maghinulsol [tan-awa sa Doktrina ug mga Pakigsaad 29:17].)

Ang Joseph Smith Translation nagklaro nga ang pulong “katapusan sa kapanahunan” diha sa bersikulo 39 nagpasabut sa kalaglagan sa mga dautan diha sa Ikaduhang Pag-anhi sa Manluluwas. Ang Joseph Smith Translation nagtabang usab kanato sa pagsabut nga sa katapusang mga adlaw ang Ginoo mopadala og mga anghel ug mga mensahero aron sa pagtabang og bulag sa mga matarung gikan sa mga dautan (tan-awa sa Hubad ni Joseph Smith, Mateo 13:39–44 [diha sa Bible appendix sa LDS version sa mga kasulatan]).

Usa ka kamatuoran nga gitudlo niini nga sambingay mao nga ang Ginoo mopundok sa mga matarung sa panahon sa katapusang mga adlaw ug dayon laglagon ang mga dautan diha sa Iyang Pag-anhi.

Pamalandungi kon unsaon niini nga kamatuoran magdala nimo og kahupayan samtang nagpuyo sa usa ka dautang kalibutan. Unsaon niini pagtabang kanimo sa pagsabut nganong kinahanglan ka nga mopili nga mahimong matarung kon ang pipila sa mga katawhan nga naglibut kanimo ingon og wala magsinati og negatibong mga sangputanan gikan sa ilang dili matarung nga mga pagpili?

Tungod sa atong kabubut-on, atong gitino pinaagi sa atong mga pagpili kon kita mapundok ba uban sa mga matarung o mag-antus ba uban sa mga dautan. Hinumdumi nga tungod kay kitang tanan masayop, ang Manluluwas nagdapit kanato sa paghinulsol aron nga kita mapundok uban sa mga matarung.

Pagpahisama sa mga Kasulatan sa Imong Kaugalingon

Ang pagpahisama sa mga kasulatan nganha sa imong kaugalingon mao ang pagkumparar niini nganha sa imong kaugalingon nga kinabuhi. Ikaw makapangutana, “Sa unsa nga paagi ako sama sa mga tawo nga akong gitun-an diha sa mga kasulatan?” Samtang imong makita ang pagkasama tali sa imong mga kasinatian ug niadtong mga tawo sa mga kasulatan, ikaw mas maayong moila sa mga doktrina ug mga baruganan ug makadawat og pagpadayag kalabut sa unsaon nimo paggamit kadtong mga kamatuoran diha sa imong kaugalingong kinabuhi.

Basaha ang mosunod nga pahayag ni Elder David A. Bednar sa Korum sa Napulog Duha ka mga Apostoles, nga mangita sa unsay iyang gisulti nga atong kinahanglan gayud nga buhaton aron mapundok sa Ginoo.

“Ang Ginoo nagpundok sa Iyang katawhan sa panahon nga sila modawat Kaniya ug mosunod sa Iyang mga sugo. …

“… Ang Ginoo nagpundok sa Iyang katawhan sa pagsimba, sa pagtukod sa Simbahan, alang sa panalipod, ug sa pagdawat og tambag ug pagtudlo. …

“Si Propeta Joseph Smith mipadayag nga sa tanang panahon ang balaan nga katuyoan sa pagpundok mao ang pagtukod og mga templo aron ang mga anak sa Ginoo makadawat sa labing taas nga mga ordinansa ug pinaagi niana makabaton og kinabuhing dayon [tan-awa sa Mga Pagtulun-an sa mga Presidente sa Simbahan: Joseph Smith (2007), 416–17]” (“The Spirit and Purpose of Gathering” [Brigham Young University–Idaho devotional, Oct. 31, 2006], byui.edu/devotionals).

Sumala ni Elder Bednar, unsa ang atong kinahanglan nga buhaton aron mapundok sa Ginoo?

Pamalandungi ang mga panalangin nga miabut sa imong kinabuhi samtang kamo napundok sa Ginoo?

Tan-awa ang mosunod nga mga hulagway:

Hunahunaa kon giunsa niini nga mga hulagway pagpakita unsa ang atong mabuhat sa pagtabang sa Manluluwas sa pagpundok sa mga anak sa Langitnong Amahan.

Basaha ang mosunod nga pahayag ni Elder Russell M. Nelson sa Korum sa Napulog Duha ka mga Apostoles:

“Kini nga doktrina sa pagpundok mao ang usa sa mga importanting pagtulun-an sa Ang Simbahan ni Jesukristo sa mga Santos sa Ulahing mga Adlaw. … Wala lamang kita magtudlo niini nga doktrina, apan nag-apil kita niini. Kita nagbuhat sa mao samtang kita nagtabang pagpundok sa pinili sa Ginoo sa duha ka bahin sa tabil. …

“Magpundok kita og mga pedigree tsarts, maghimo og family group sheets, ug maghimo og pagpuli nga buhat sa templo aron sa pagpundok sa mga indibidwal ngadto sa Ginoo ug ngadto sa ilang mga pamilya.

“Dinhi sa yuta, ang misyonaryong buhat kinahanglanon kaayo sa pagpundok sa Israel” (“Ang Pagpundok sa Nagkatibulaag nga Israel,” Ensign o Liahona, Nob. 2006, 80–81).

Pamalandungi ang mga panalangin nga imong nadawat sa pagtabang sa Ginoo pagpundok sa matarung pinaagi sa misyonaryong buhat ug templo nga buhat.

1. Tubaga ang mosunod nga mga pangutana diha sa imong scripture study journal:

   1. Sa unsa nga paagi ang pag-apil niini nga pagpundok nagtabang kanimo sa pagpuyo nga matarung bisan pa og nagpuyo sa usa ka kalibutan nga puno sa tintasyon ug sala?

   2. Unsay imong buhaton aron sa pagpundok sa imong kaugalingon, imong pamilya, ug sa uban ngadto sa Manluluwas ug sa Iyang Simbahan

Mateo 13:31–35, 44–52

Si Jesus naggamit og mga sambingay sa pagtudlo mahitungod sa gingharian sa langit

Diha sa daghang mga sambingay gikumparar sa Manluluwas ang gingharian sa langit (o ang Iyang Simbahan ug ebanghelyo) ngadto sa liso sa mustasa, libadura (libadura, o patubo gigamit sa pagluto ug idugang ngadto sa minasa nga pan aron pagtabang niini nga motubo sa dili pa ihudno), nakatago nga bahandi, perlas, ug pukot sa pangisda.

2. Basaha ang matag usa sa mosunod nga tudling sa kasulatan, nga mangita sa unsay gitudlo sa Manluluwas sa Iyang mga disipulo niana nga sambingay. Diha sa imong scripture study journal, isulat og unsa nga mga kamatuoran sa imong hunahuna ang gitudlo sa Manluluwas.

   1. Mateo 13:31–32

   2. Mateo 13:33

   3. Mateo 13:44

   4. Mateo 13:45–46

   5. Mateo 13:47–50

Usa ka kamatuoran nga gitudlo sa Manluluwas diha sa mga sambingay sa liso sa mustasa ug sa igpapatubo sa tinapay mao nga ang gipahiuli nga Simbahan ni Jesukristo motubo gikan sa gamay nga sinugdanan aron sa pagpuno sa tibuok kalibutan. Ikonsiderar ang pagsulat niini nga kamatuoran diha sa margin sa imong mga kasulatan tupad sa Mateo 13:31–33.

Si Presidente Joseph F. Smith mitudlo kon unsaon sa mga sumusunod ni Jesukristo nga mahisama sa igpapatubo sa tinapay: “Samtang kini masulti, ug kini may pagkatinuod, nga kita dyutay kon ikumparar sa atong isigkatawo sa kalibutan, apan kita mahimong ikumparar sa igpapatubo sa tinapay nga gipamulong sa Manluluwas, nga sa kadugayan mopatubo sa tibuok kalibutan” (Gospel Doctrine, 5th ed. [1939], 74).

Si Elder Dallin H. Oaks sa Korum sa Napulog Duha ka mga Apostoles mitudlo usab mahitungod niini nga sambingay. “Magpakabuhi kita sa kalibutan apan dili iya sa kalibutan. Kinahanglan gayud magpakabuhi kita sa kalibutan tungod kay, sama sa gitudlo ni Jesus sa sambingay, ang Iyang gingharian “sama sa igpapatubo,” kansang gamit mao ang pagpatubo sa harina pinaagi sa gahum niini (tan-awa sa Lucas 13:21; Mateo 13:33; tan-awa usab 1 Mga Taga-Corinto 5:6–8). Dili makahimo niana ang Iyang mga sumusunod kon makig-uban lamang sila niadtong kinsa sama nila og tinuohan ug mga binuhatan” (“Paghigugma sa Uban ug Pagpakabuhi nga may mga Panaglahi,” Ensign o Liahona, Nob. 2014, 25).

Pamalandungi kon unsa ang imong mabuhat sa pagtabang isip usa ka Santos sa Ulahing mga Adlaw sa pagpatubo sa Simbahan sa Manluluwas.

Lain nga baruganan nga gitudlo sa Manluluwas diha sa mga sambingay sa nalubong nga bahandi ug sa mutya nga bililhon kaayo mao nga tungod kay ang mga panalangin sa ebanghelyo may mahangturong bili, kini takus sa bisan unsa nga sakripisyo. Ikonsiderar ang pagsulat niini nga kamatuoran diha sa margin sa imong mga kasulatan tupad sa Mateo 1:44-46.

3. Aron sa pagtabang kanimo nga makasabut niini nga baruganan, pagdrowing og duha ka kolum nga tsart diha sa imong scripture study journal. Butangi og ngalan ang usa ka kolum Mga panalangin sa ebanghelyo, ug butangi og ngalan ang lain nga kolum Mga sakripisyo aron makabaton og mga panalangin.

   Diha sa “Mga panalangin sa ebanghelyo” nga kolum, ilista ang pipila ka mga panalangin sa ebanghelyo (ang mga ehemplo mahimong maglakip sa kahibalo gikan sa mga kasulatan, paggiya gikan sa buhing mga propeta, makaluwas nga mga ordinansa ug mahangturong kaminyoon). Alang sa matag panalangin nga nalista, diha sa “Mga sakripisyo aron makabaton og mga panalangin” nga kolum, isulat kon unsa nga mga sakripisyo ang imong kinahanglan nga buhaton aron makabaton niana nga panalangin. Sama pananglit, aron madawat ang panalangin sa Kahibalo gikan sa mga kasulatan, kita kinahanglan nga Mosiksik sa mga kasulatan kada adlaw.

Ikonsiderar ang mga panalangin nga imong gilista, ug pamalandungi kon ngano nga ang pagbaton niadto nga mga panalangin takus sa bisan unsa nga sakripisyo nga gikinahanglan.

4. Tubaga ang mosunod nga mga pangutana diha sa imong scripture study journal:

   1. Unsa nga panalangin sa ebanghelyo ang imong gitinguha nga mabatunan?

   2. Ngano nga nagtinguha ka niana nga panalangin?

   3. Sa unsa nga paagi ikaw mosakripisyo aron madawat kana nga panalangin?

Mateo 13:53–58

Si Jesus nagtudlo sa Nazaret ug gisalikway sa Iyang kaugalingong katawhan

Ingon nga narekord diha sa Mateo 13:53–58, ang katawhan sa Nazaret misalikway sa Manluluwas ug sa Iyang mga pagtulun-an. Agi og resulta sa ilang walay pagtuo, ang Manluluwas wala makahimo og daghang mga milagro diha kanila.

5. Isulat ang mosunod diha ubos sa mga assignment karong adlawa sa imong scripture study journal:

   Akong natun-an ang Mateo 13:24–58 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: