Marcos 9:1–29

Pasiuna

Mga unom ka bulan sa wala pa ang Iyang Pagpalansang sa Krus, si Jesus nahimaya ang panagway (nakita sa Iyang nahimaya nga kahimtang) samtang Siya ug sila ni Pedro, Santiago, ug Juan didto sa usa ka bukid. Siya mitudlo dayon niining mga tinun-an nga si Juan Bautista mao ang usa ka Elias, o usa ka propeta kinsa nag-andam sa agianan alang sa Mesiyas. Human si Jesus mibalik ngadto sa Iyang uban nga mga tinun-an, usa ka lalaki mihangyo ni Jesus sa pagpapahawa sa espiritu sa yawa gikan sa iyang anak nga lalaki. Si Jesus mipapahawa sa espiritu sa yawa ug mitudlo sa Iyang mga tinun-an mahitungod sa panginahanglan alang sa pag-ampo ug pagpuasa.

Marcos 9:1–13

Si Jesus nahimaya ang panagway, ug Siya mitudlo nila ni Pedro, Santiago, ug Juan mahitungod ni Elias

Tan-awa kon pila ka push-up o sit-up ang imong mahimo sa usa ka minuto. I-rekord ang imong resulta dinhi: ____________________

Ngano nga ang usa ka tawo gusto o nagkinahanglan nga mopalambo sa iyang pisikal nga kusog?

Tubaga ang mosunod nga mga pangutana sa imong scripture study journal:
1. Sa unsa nga paagi nga ang pisikal nga kusog mahisama sa espirituhanon nga kusog, o hugot nga pagtuo diha kang Jesukristo?
2. Unsa ang pipila ka mga sitwasyon diin ikaw mahimong nagkinahanglan nga magpalig-on sa imong hugot nga pagtuo diha ni Jesukristo?

Samtang ikaw magtuon sa Marcos 9:1–29, pangita sa mga kamatuoran nga makatabang nimo sa pagpalig-on sa imong hugot nga pagtuo.

Ang Marcos 9:1–13 naglangkob sa istorya sa nahimayang panagway ni Jesus diha sa presensya nila ni Pedro, Santiago, ug Juan sa usa ka bukid ug ang pagpakita didto ni Moises ug ni Elias (Elijah), nga imong nakat-unan diha sa imong leksyon sa Mateo 17. Si Jesus mitudlo usab niini nga mga Apostoles nga gituman ni Juan Bautista ang gipanagna nga tahas sa usa ka Elias. Ang “Elias” mao ang usa ka tawag alang niadtong kinsa nag-andam sa agianan alang sa pag-abut sa Mesiyas.

Ang Hubad ni Joseph Smith nagtabang kanato nga mas makasabut pa mahitungod sa tubag sa Manluluwas sa pangutana sa mga Apostoles, “Nganong magaingon man ang mga escriba nga si Elias kinahanglan kuno nga mouna usa sa pag-anhi?” (Marcos 9:11):

“Ug kanila mitubag siya nga nag-ingon, Tinuod nga si Elias mouna sa pag-anhi aron sa pagpasiuli sa tanang mga butang; ug dili ba nahisulat man mahitungod sa Anak sa Tawo nga sa ingon magaantus siya sa daghang mga butang ug pagatamayon.

“Usab Ako moingon nganha kaninyo, Kana nga Elias sa pagkatinuod moabut, apan sila mibuhat ngadto kaniya sa bisan unsa nga ilang gusto; ug bisan pa man nga kini nahisulat ngadto kaniya; ug siya mipamatuod kanako, ug sila wala modawat kaniya. Sa pagkatinuod kini mao ang Elias” (Hubad ni Joseph Smith, Marcos 9:10–11).

Kinsa si Elias? Si Elder Bruce R. McConkie sa Korum sa Napulog Duha ka mga Apostoles mipasabut sa katungdanan ni Elias sa Pagpahiuli:

“Adunay tulo ka nagkalainlaing mga pinadayag nga naghinganlan ni Elias isip tulo ka managlahi nga personahe. Unsay atong ipanapos?

“… Daghang gipadala nga mga mensahero nga nangalagad gikan sa kahimayaan aron sa pagtugyan sa mga yawe ug mga gahum, aron itugyan pag-usab ang ilang mga dispensasyon ug kahimayaan ngadto sa mga katawhan dinhi sa yuta. Sa labing minus miabut ang mosunod: Moroni, Juan Bautista, Pedro, Santiago, ug Juan, Moises, Elijah, Elias, Gabriel, Raphael, ug Miguel. (D&P 13; 110; 128:19–21.) Tungod kay klaro nga walay usa ka mensahero nga magdala sa tibuok palas-anon sa pagpahiuli, apan hinoon nga ang matag usa miabut nga may usa ka piho nga tuga gikan sa kahitas-an, kini klaro nga ang Elias kombinasyon sa lain laing personahe. Ang pagpahayag kinahanglan gayud nga masabtan nga usa ka pangalan ug titulo alang niadtong kansang misyon mao ang paghatag sa mga yawe ug mga gahum ngadto sa mga tawo dinhi niining katapusan nga dispensasyon [tan-awa sa Doctrines of Salvation, comp. Bruce R. McConkie, 3 vols. (1954–56), 1:170–74]” (Mormon Doctrine, 2nd ed. [1966], 221).

Marcos 9:14–29

Si Jesus mipapahawa og dautan nga espiritu gikan sa anak nga lalaki sa usa ka tawo

Basaha ang Marcos 9:14–18, nga mangita kon unsay nahitabo sa dihang ang Manluluwas mibalik gikan sa bukid ngadto sa Iyang uban nga mga tinun-an.

Ang anak nga lalaki sa tawo nasudlan og dautan nga espiritu, nga maoy hinungdan sa pagkaamang , pagkabungol, ug ubang mga problema (tan-awa sa Marcos 9:17–18, 22, 25). Hunahunaa nga ikaw ni nga amahan. Sa unsa kaha nga paagi nga ang imong hugot nga pagtuo diha sa Manluluwas ug sa Iyang gahum naapektuhan sa dihang ang Iyang mga tinun-an dili makaayo sa imong anak nga lalaki?

Basaha ang Marcos 9:19–22, nga maghunahuna kon unsay mahimong bation niining amahan samtang siya nakig-istorya sa Manluluwas.

Si Elder Jeffrey R. Holland sa Korum sa Napulog Duha ka mga Apostoles naghatag og dugang panlantaw sa mga pagbati ug pangamuyo niini nga amahan: “Wala nay laing paglaum, siya nangamuyo sa Manluluwas sa kalibutan, ‘Kon duna may arang mo nga mahimo alang kanamo, kaloy-i intawon kami, ug tabangi kami’ [Marcos 9:22; italics gidugang]. Dili ko makabasa niini nga mga pulong nga dili maghilak. Ang plural nga pronoun nga kami gituyo gyud sa paggamit. Kini nga tawo nag-ingon, ‘Ang among tibuok pamilya nangamuyo. Wala gayud mahunong ang among paningkamot. Luya na kami. Ang among anak nahulog sa tubig. Nahulog siya sa kalayo. Padayon siya nga namiligro, ug padayon kami nga nahadlok. We don’t know where else to turn. Makatabang ka ba kanamo? Magpasalamat kami sa bisan unsa—sa parsyal nga panalangin, bisag tipik lang sa paglaum, gamay nga pagkahupay sa kabug-at nga gipas-an sa inahan niining bataa kada adlaw sa iyang kinabuhi’” (“Nagatuo Ako,” Ensign o Liahona, Mayo 2013, 93).

Basaha ang Marcos 9:23, nga mangita kon unsay gitudlo sa Manluluwas ngadto sa amahan.

Tingali gusto nimong markahan ang mga pulong sa bersikulo 23 nga nagtudlo sa mosunod nga baruganan: Kon kita motuo ni Jesukristo, ang tanang mga butang mahimo ngari kanato. (Hinumdumi nga “ang tanang mga butang” kalabut sa tanang matarung nga mga panalangin nga pinasubay sa mga katuyoan ug tukmang panahon sa Langitnong Amahan.)

Tubaga ang mosunod nga pangutana diha sa imong scripture study journal: Sa unsang paagi nga ang pagtuo niini nga baruganan nagtabang sa usa ka tawo nga nag-atubang og mga kalisdanan nga daw imposible nga mabuntog?

Basaha ang Marcos 9:24, nga mangita sa gitubag sa amahan ngadto sa baruganan nga gitudlo sa Manluluwas. Hinumdumi ang duha ka bahin sa tubag sa amahan.

Basaha ang mosunod nga pamahayag ni Elder Holland, kinsa mitudlo kon unsay mga pagtulun-an sa pamahayag sa amahan mahitungod sa unsay atong mahimo sa panahon sa “pagkawalay pagtuo,” o sa mga panahon sa pagduha-duha o kahadlok: “Kon mag-atubang og hagit sa hugot nga pagtuo, ang amahan magpahayag og una sa iyang kalig-on ug dayon diha lamang siya moila sa iyang limitasyon. Ang iyang inisyal nga deklarasyon positibo ug walay pagduha-duha: ‘Nagatuo Ako.’ Moingon ko sa tanan nga nangandoy og mas lig-on nga pagtuo, hinumdumi kining tawhana! Sa mga higayon sa kahadlok o pagduha-duha o sa malisud nga mga panahon, gamita ang hugot nga pagtuo nga napalambo na ninyo, bisan og limitado kini. Sa paglambo nga atong masinati sa pagka-mortal, ang susama nga espirituhanong kasakit sa bata o kadesperado sa amahan mahitabo usab kanatong tanan. Kon kini nga mga higayon moabut ug mogawas ang mga problema, ang kasulbaran dili dayon moabut, panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo.” (“Nagatuo Ako,” 93–94).

Ikonsiderar ang ikaduhang bahin sa tubag sa amahan: “Tabangi ang pagtoo ko nga nakulangan” (Marcos 9:24). Palandonga kon unsay imong mahimo sa mga panahon sa kawalay pagtuo, pagduha-duha, o kahadlok.

Basaha ang Marcos 9:25–27, nga mangita kon unsay tubag sa Manluluwas ngadto sa mga pangamuyo sa amahan.

Usa ka baruganan nga atong makat-unan gikan niini nga istorya mao nga kon kita mohupot sa unsay atong gituohan ug magtinguha sa tabang sa Ginoo, Siya motabang kanato sa pagpalig-on sa atong pagtuo.

Tubaga ang usa o duha sa mosunod nga mga pangutana diha sa imong scripture study journal:
1. Tan-awa ang mga sitwasyon nga imong nalista sa assignment 1 sa leksyon karon. Sa unsa nga paagi kini nga baruganan magamit niadto nga mga sitwasyon?
2. Kanus-a ka, o ang usa ka tawo nga imong kaila, nakadawat sa panabang sa Ginoo sa panahon sa kawalay pagtuo, pagduha-duha, o kahadlok pinaagi sa paghupot sa pagtuo ug sa pagtinguha Kaniya?

Paningkamot sa paggamit niini nga barunganan sa mga panahon sa kawalay pagtuo, pagduha-duha, o kahadlok nga imong giatubang. Mahimo usab nimong ipakigbahin ang baruganan uban sa sakop sa pamilya o higala nga kinsa tingali nakasinati og mga hagit.

Hinumdumi nga kini nga amahan unang midala sa iyang anak nga lalaki ngadto sa pipila ka mga tinun-an ni Jesukristo aron mamaayo. Hunahunaa nga ikaw usa sa mga tinun-an. Unsa kaha ang imong gihunahuna o gibati human mapakyas sa pagpapahawa sa dautang espiritu diha sa batang lalaki?

Basaha ang Marcos 9:28, nga mangita sa gipangutana sa mga tinun-an ngadto sa Manluluwas.

Sa Marcos 9:19 si Jesus mihulagway sa mga tawo isip usa ka “dili matoohon nga kaliwatan.” Kini nga pagbadlong mahimong gitumong usab ngadto sa Iyang mga tinun-an kinsa anaa. Ang pulong dili matoohon dinhi nagpasabut sa kakulang og hugot nga pagtuo diha ni Jesukristo. Ang hugot nga pagtuo diha ni Jesukristo gikinahanglan aron mahimong epektibo ang mga panalangin sa priesthood.

Basaha ang Marcos 9:29, nga mangita sa tubag sa Manluluwas ngadto sa mga pangutana sa Iyang mga tinun-an.

Gikan niini nga bersikulo atong makat-unan nga kita makapalambo sa atong hugot nga pagtuo diha ni Jesukristo pinaagi sa pag-ampo ug sa pagpuasa. Ikonsiderar ang pagsulat niining baruganan diha sa imong kasulatan tupad sa bersikulo 29.

Ang mosunod nga pamahayag nagtabang kanato sa pagsabut sa lain-laing mga sitwasyon diin kini nga kamatuoran mahimong magamit: “Kini nga asoy nagtudlo nga ang pag-ampo ug ang pagpuasa makahatag og dugang kalig-on niadtong naghatag ugnagdawat og mga panalangin sa priesthood. Ang asoy mahimo usab nga magamit sa imong personal nga mga paningkamot sa pagsunod sa ebanghelyo. Kon ikaw adunay kahuyang o sala nga ikaw nanlimbasog sa pagbuntog, nagkinahanglan ka nga magpausa ug mag-ampo aron makadawat ang tabang o kapasayloan nga imong gitinguha. Sama sa demonyo nga gipapahawa ni Kristo, ang imong kalisdanan tingali maong matang nga mogawas lamang pinaagi sa pag-ampo ug pagpuasa” (Matinud-anon sa Tinuhoan: Usa Ka Pakisayran sa Ebanghelyo [2004], 67).

Sa imong scripture study journal, isulat ang mahitungod sa usa ka kasinatian sa dihang ikaw o ang usa ka tawo nga imong kaila nakasinati og paglambo sa hugot nga pagtuo pinaagi sa pag-ampo ug sa pagpuasa. Sa unsa nga paagi nga ang pag-ampo ug ang pagpuasa nagtabang kanimo sa pagdawat sa matarung nga mga panalangin nga imong gitinguha?

Paghunahuna kon sa unsang paagi nga ang imong hugot nga pagtuo mahimong nagkinahanglan og paglig-on. Pagplano og usa ka panahon nga ikaw makatinguha sa pagpalambo sa imong hugot nga pagtuo pinaagi sa pag-ampo ug sa pagpuasa. Mahimo nimong isulat ang imong mga plano sa lain nga piraso sa papel ug ibutang kini sa dapit nga makapahinumdom nimo sa imong tumong.

Isulat ang mosunod diha sa ubos sa mga assignment karong adlawa sa imong scripture study journal:

Akong natun-an ang Marcos 9:1–29 ug nakompleto kini nga leksyon sa (petsa).

Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: