Unit 10: Day 2

Lucas 6:1–7:18

Pasiuna

Si Jesus mitudlo mahitungod sa kaimportante sa pagbuhat og maayo ngadto sa uban, lakip diha sa Igpapahulay. Human naggahin og usa ka gabii sa pag-ampo, gitawag Niya ang Napulog Duha ka mga Apostoles ug gitudloan sila ug ang usa ka panon sa mga katawhan. Giayo usab Niya ang ulipon sa kapitan ug gibangon ang namatay nga anak nga lalaki sa usa ka biyuda.

Lucas 6

Si Jesus nang-ayo sa Igpapahulay, nagpili sa Napulog Duha ka mga Apostoles, ug nagtudlo sa panon sa mga katawhan

Hunahunaa nga sa inyong mga miting sa Simbahan sa Dominggo imong madungog ang usa ka pahibalo mahitungod sa usa ka service project alang sa usa ka pamilya nga nagpuyo sa imong duol. Human sa pahibalo imong madungog ang mosunod nga mga tubag:

• “Kana nga pamilya nakasinati og daghang pagsulay sa dili pa lang dugay. Malipay akong motabang sa bisan unsang paagi nga ako makahimo.”

• “Mas maayo unta nga adunay mga pabugnaw pagkahuman, tungod kay kon wala, dili ako moadto.”

• “Dili man gyud ko ganahan moadto, apan magkinahanglan ako og pipila ka tabang sa sunod semana sa usa ka proyekto nga akong giorganisar, busa ako kinahanglan tingali nga motabang karon.”

• “Kon ang akong higala moadto, moadto ako.”

1. Sa imong scripture study journal, isulat unsay gisugyot sa nag-unang mga tubag mahitungod sa mga rason nganong moserbisyo ang mga tawo.

Paghunahuna mahitungod sa mga oportunidad nga diha kanimo sa pag-alagad ug unsay imong gibati mahitungod sa pagserbisyo. Samtang ikaw magtuon sa Lucas 6–7, pangitaa ang mga baruganan nga makatabang kanimo nga magserbisyo sa mas makahuluganon nga mga pamaagi.

Samtang didto sa Galilea sayo sa Iyang pagpangalagad, giayo ni Jesus ang mikuyos nga kamot sa tawo sa Igpapahulay (tan-awa sa Lucas 6:6–10), gigahin ang usa ka gabii diha sa pag-ampo, ug gitawag ang Napulog Duha ka mga Apostoles (tan-awa sa Lucas 6:12–13). Misugod dayon Siya sa pagtudlo kanila ug “usa ka dakong panon sa iyang mga tinun-an” (Lucas 6:17) kon unsaon pagdawat og langitnong mga ganti. Kini nga wali sa Lucas 6 kasagaran gipasabut isip ang Wali diha sa Patag ug susama kaayo ngadto sa Wali Ibabaw sa Bungtod sa Mateo 5–7. “Adunay nagkalainlaing hunahuna kon ang Wali Ibabaw sa Bungtod nga girekord ni Mateo ug ang Wali diha sa Patag nga girekord ni Lucas managsama o managlahi ba nga mga panghitabo. Hinoon, ang sunod-sunod nga pagkahan-ay sa hitabo ug ang kinatibuk-ang kahulugan sa rekord ni Lucas ingon og nagpakita nga samang wali ang girekord diha sa Lucas 6 ug Mateo 5–7” (New Testament Student Manual [manwal sa Church Educational System, 2014], 152–53; tan-awa usab sa Bible Dictionary, “Wali sa Ibabaw sa Bungtod”; Harmony of the Gospels). (Pahinumdom: Kadaghanan sa sulod sa Lucas 6 nalakip na sa dihang imong gitun-an ang Mateo 5–7; 10:1–4; ug Marcos 3:1–6.)

Basaha ang Lucas 6:19, nga mangita kon unsay gibuhat ni Jesus alang sa mga tawo sa wala pa Siya mosugod sa pagtudlo kanila.

Sunod, basaha ang Lucas 6:31, nga mangita sa tambag ni Jesus ngadto sa Iyang mga tinun-an.

Sa unsa nga paagi nga ang paghinumdom nga kinahanglan atong tagdon ang uban ingon nga kita gusto nga trataron nag-impluwensya sa paagi nga ikaw motratar sa mga tawo?

Basaha ang Lucas 6:32–35, nga mangita sa dugang tambag nga gihatag ni Jesus sa Iyang mga tinun-an mahitungod sa paghigugma ug pag-alagad sa uban. Tingali gusto kang momarka sa bersikulo 35 kon unsay atong kinahanglang paabuton agig balos sa pagbuhat og maayo ngadto sa uban. Hinumdumi unsa ang gisaad sa Ginoo niadtong kinsa naghimo og maayo alang sa uban nga dili magpaabut og bisan unsang balos.

Usa ka baruganan nga atong makat-unan gikan niini nga mga bersikulo mao nga kon mobuhat kita og maayo ngadto sa uban nga dili magpaabut og bisan unsang butang agi og balos, ang atong ganti mahimong dako ug kita mahimong mga anak sa Labing Halangdon.

Hinumdumi ang mga pulong “kamo mahimong mga anak sa Labing Halangdon” (bersikulo 35). Bisan tuod og kitang tanan mga anak sa Dios, kadtong kinsa naghimo og maayo ngadto sa uban sama sa gibuhat ni Kristo mituman sa ilang balaanon nga potensyal pinaagi sa pagkahimong sama sa atong Amahan sa Langit. Paghunahuna kon sa unsa nga paagi nga ang pag-alagad ngadto sa uban nga walay pagpaabut og bisan unsang balos makatabang sa usa ka tawo nga mas mahisama kang Kristo.

Basaha ang Lucas 6:36–38, nga mangita sa mga ehemplo nga gihatag ni Jesus nga mga paagi diin kita makahimo og maayo ngadto sa uban. Hinumdumi nga si Jesus misaad nga ang tawo kinsa nagpakita og kalooy ngadto sa uban, kinsa naglikay sa dili matarung nga pagpanghukom sa uban, ug kinsa dali nga mopasaylo makadawat og kalooy sa Dios.

Nasulayan naba nimo nga magbutang og dugang pang mga aytem sa usa ka kahon o maleta kay sa masulod niini? Sa Lucas 6:38 ang paghulagway kon unsa ka dako ang mahatag agig balos sa maayo nga atong gibuhat naglakip sa mga pulong nga “dinasok ug tinantan, ug magaawas.” Sa unsa nga paagi kini nga mga pulong naghulagway sa paagi nga ang Langitnong Amahan nagganti kanato samtang naghatag kita ngadto sa uban?

Usa ka kamatuoran nga atong makat-unan gikan sa Lucas 6:38 mao nga samtang nagmanggihatagon kita sa uban, ang Langitnong Amahan nagpanalangin kanato og mas daghan. Ikonsiderar ang pagsulat niini nga baruganan tupad sa bersikulo 38.

2. Paghunahuna og mga pamaagi nga kita mahimong magmanggihatagon ngadto sa uban. Dayon tubaga ang mosunod nga mga pangutana diha sa imong scripture study journal:

   1. Kanus-a ikaw o ang usa ka tawo nga imong kaila nagmanggihatagon ngadto sa uban?

   2. Sa unsang paagi nga ikaw o ang tawo nga imong kaila napanalanginan sa Ginoo sa pagkamanggihatagon?

   3. Unsay imong buhaton aron mahimong mas manggihatagon ngadto sa uban?

Usa ka paagi nga mahimo nimong ikonsiderar nga mahimong mas manggihatagon ngadto sa uban mao ang pagsunod sa balaod sa puasa pinaagi sa paghatag og halad sa puasa samtang ikaw nagpuasa. Ang imong mga ginikanan tingali nakahatag na og halad sa puasa alang sa inyong pamilya, apan kon ikaw makahimo, mahimo gihapon ka nga mohatag. Sa imong pagtinguha nga mahimong mas manggihatagon ngadto sa uban, pag-ampo alang sa panabang sa Ginoo nga makaalagad sama sa Iyang pag-alagad.

Luke 7:1–10

Si Jesus nag-ayo sa ulipon sa kapitan

Sa Lucas 7:1 atong makat-unan nga paghuman og tudlo sa dakong panon, si Jesus misulod sa Capernaum. Basaha ang Lucas 7:2–5, nga mangita kon kinsa ang nangayo sa tabang ni Jesus human makadungog nga Siya misulod sa lungsod.

Mga guba sa usa ka sinagoga sa Capernaum sa ika upat o ikalima nga siglo A.D.

Ang kapitan usa ka opisyal sa kasundalohan nga Romano kinsa nagmando og 50 ngadto sa 100 ka mga sundalo. Ang mga Judeo sa kinatibuk-an dili gusto sa mga kapitan tungod kay sila nagrepresentar sa politikal ug militar nga gahum sa mga Romano ibabaw kanila ug sa ilang yuta. Kini nga kapitan, hinoon, mabination ngadto sa mga Judeo.

Basaha ang Lucas 7:6–10, ug palandonga kon sa unsa nga paagi gipakita sa kapitan ang dakong hugot nga pagtuo diha ni Jesukristo ug sa unsa nga paagi ang iyang hugot nga pagtuo gigantihan.

Gikan niini nga asoy atong nakat-unan nga pinaagi sa paggamit og hugot nga pagtuo diha ni Jesukristo, makatabang kita sa pagdala og mga panalangin ngadto sa kinabuhi sa uban. Mahimo nimong isulat kining baruganan sa tupad sa Lucas 7:10.

Lucas 7:11–18

Gibangon ni Jesus ang anak nga lalaki sa biyuda gikan sa patay

Sa adlaw human giayo sa Manluluwas ang ulipon sa kapitan, mihimo Siya og laing milagro. Basaha ang Lucas 7:11–12, nga mangita kon unsay nasugatan ni Jesus ug sa Iyang mga tinun-an samtang nagkaduol sila sa siyudad nga gitawag og Nain.

Sumala sa bersikulo 12, nganong ang kamatayon niining batan-ong lalaki dako kaayong kasub-anan alang niini nga babaye?

Wala lamang kawad-i kining babaye sa iyang bugtong anak ngadto sa kamatayon, apan siya nawad-an usab sa iyang bana kanhi. Agig dugang ngadto sa dakong kasubo nga iyang gibati, tingali siya walay usa nga mosuporta kaniya sa pinansyal nga paagi.

Basaha ang Lucas 7:13–15, nga mangita kon unsay gibuhat sa Manluluwas sa dihang Iyang nakita kining nagbangutan nga babaye. Ang andas mao ang tongtonganan o bayanan diin ang patay nga lawas ibutang.

Sumala sa bersikulo 13, nganong giayo ni Jesus ang anak nga lalaki niini nga babaye? Hinumdumi nga ang biyuda wala mohangyo Kaniya sa pag-ayo sa iyang anak nga lalaki, apan Siya nag-obserbar sa iyang panginahanglan ug dayon gitabangan siya nga matuman kini. Kini importante usab nga masabtan nga kini nga lalaki wala mabanhaw; siya mamatay gihapon usa ka adlaw niana. Si Jesukristo ang unang nabanhaw.

Kon kini aduna, tan-awa ang video nga “The Widow of Nain” (2:22) gikan sa The Life of Jesus Christ Bible Videos, sa LDS.org, nga mangita kon sa unsa nga paagi nangalagad ang Manluluwas ngadto sa babaye bisan og siya wala mangayo alang sa Iyang panabang.

Hunahunaa ang mahitungod sa mga pagbati nga mahimong ikaw aduna kon ikaw pa ang anaa sa sitwasyon sa biyuda ug nakita ang Manluluwas nga mipabangon sa imong bugtong anak nga lalaki gikan sa patay.

Gikan niini nga istorya atong makat-unan ang mosunod nga baruganan: Kita makasunod sa ehemplo ni Jesukristo pinaagi sa pagpakita og kalooy alang sa uban ug mangalagad ngadto sa ilang dili masulti nga mga panginahanglan.

Sa unsa nga paagi kita makamatikod sa mga panginahanglan sa uban nga wala man nila kini ipakigbahin ngari kanato?

Si Presidente Thomas S. Monson mitudlo:

“Pipila ka mga istorya sa pagpanglagad sa Agalon ang nakatandog kanako labaw pa kay sa Iyang ehemplo sa kalooy nga gipakita ngadto sa nagbangutan nga biyuda sa Nain. …

“Unsa nga gahum, unsa nga kalumo, unsa nga kalooy nga sa ingon gipakita sa atong Agalon! Kita, usab, makapanalangin kon sundon lamang nato ang Iyang halangdon nga ehemplo. Ang mga oportunidad anaa bisan asa. Ang gikinahanglan mao ang mga mata nga makakita sa masulub-on nga panaw ug mga dalunggan nga makadungog sa hilum nga mga pangamuyo sa usa ka magul-anon nga kasingkasing. Oo, ug usa ka kalag nga puno sa kalooy, nga unta kita makapaila dili lamang mata sa mata o sa tingog ngadto sa dalunggan, apan sa halangdong paagi sa Manluluwas, gani kasingkasing ngadto sa kasingkasing” (“Meeting Life’s Challenges,” Ensign, Nob. 1993, 71).

3. Tubaga ang mosunod nga pangutana diha sa imong scripture study journal: Kanus-a ikaw o ang imong pamilya nakadawat og kalooy o pag-alagad gikan sa uban, bisan kon kamo wala maghangyo alang niini?

Basaha ang Lucas 7:16–18, nga mangita kon sa unsa nga paagi nga mi-react ang mga tawo ngadto sa milagro sa pagpabuhi sa anak nga lalaki sa biyuda.

Usa sa mga rason nga ang mga tawo nahimong nagpadayag nga “usa ka dakong propeta nahitungha sa atong kinataliwad-an” (Lucas 7:16) mao ang tungod sa pagkasusama tali sa pag-ayo sa anak nga lalaki sa biyuda sa Nain ug sa mga higayon sa dihang ang mga propeta sa Daang Tugon nga sila si Elias ug Eliseo mibuhi og anak nga mga lalaki gikan sa patay (tan-awa sa 1 Mga Hari 17:17–24; 2 Mga Hari 4:17–22, 32–37).

Sa imong personal nga pag-ampo niini nga semana, hangyoa ang Langitnong Amahan sa pagtabang kanimo nga makakita ug mobuhat sa mga pag-aghat nga imong madawat aron sa pagtubag sa wala ikasulti nga mga panginahanglan sa uban. Usab, ikonsiderar ang mga pamaagi nga ikaw makaserbisyo pag-ayo ug dili magpaabut sa bisan unsang butang agi og balos.

4. Isulat ang mosunod diha sa ubos sa mga assignment karong adlawa sa imong scripture study journal:

   Akong natun-an ang Lucas 6:1–7:18 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: