2 Mga Taga-Corinto 1–3

Pasiuna

Si Apostol Pablo misulat ngadto sa mga Santos sa Corinto ug mipasabut kon sa unsang paagi sila makahimo sa paghupay sa uban. Siya usab miawhag kanila sa pagpasaylo sa usa ka makasasala nga anaa sa ilang kongregasyon. Si Pablo mitudlo sa mga Santos nga samtang sila modangup ngadto sa Ginoo, sila mahimong mas mahisama sa Dios.

2 Mga Taga-Corinto 1

Si Pablo nagtudlo sa mga Santos nga taga-Corinto unsaon sa paghupay sa uban

Paghunahuna og higayon nga ang imong kaila nakasinati og lisud nga pagsulay o kasakit. Unsa ang imong gibuhat aron sa pagtabang kanila?

Nakasulay ka ba nga gusto nimong mohupay sa usa ka tawo nga nakasinati og lisud nga pagsulay sa iyang kinabuhi, apan wala ka masayud unsaon?

Samtang magtuon ka sa 2 Mga Taga-Corinto 1, pangitaa ang usa ka kamatuoran nga makatabang kanimo nga masayud unsaon paghupay sa uban diha sa ilang mga pagsulay ug mga kasakit.

Si Apostol Pablo didto sa Efeso sa dihang iyang gisulat ang 1 Mga Taga-Corinto ngadto sa mga miyembro sa Simbahan sa Corinto. Wala madugay usa ka kagubot nahitabo sa Efeso agi og tubag sa mga pagtulun-an ni Pablo didto (tan-awa sa Mga Buhat 19:23–41; ang Asia nga gihisgutan niini nga mga bersikulo mao ang usa ka Romano nga probinsya sa moderno nga Turkey). Si Pablo mibiya sa Efeso ug miadto sa Macedonia, diin si Tito mibalita nga ang unang sulat ni Pablo gihangup sa mga Santos sa Corinto. Nasayran usab ni Pablo nga ang mga Santos nakasinati og mga kalisdanan ug nga ang pipila ka mini nga mga magtutudlo sa Corinto mituis sa tinuod nga doktrina ni Kristo. Si Pablo misulat sa 2 Mga Taga-Corinto aron sa paghupay sa mga Santos ug sa pagtubag sa mga problema nga namugna sa mini nga mga magtutudlo.

Basaha ang 2 Mga Taga-Corinto 1:1–5, nga mangita kon unsay gisulti ni Pablo sa mga Santos sa Corinto kabahin sa ilang mga kalisdanan. Ikonsiderar ang pagmarka o isulat sa imong mga kasulatan kon unsay gisulti ni Pablo sa mga bersikulo 3–4 nga tingali nakatabang sa paghupay kanila.

Gikan sa 2 Mga Taga-Corinto 1:4 atong makat-unan ang mosunod nga kamatuoran: Tungod kay ang Langitnong Amahan mohupay kanato panahon sa atong mga kalisdanan, kita makahimo sa pagtabang sa uban nga makadawat sa Iyang paghupay.

Sa imong scripture study journal, pagsulat kabahin sa usa ka higayon nga imong nadawat ang paghupay sa Dios atol sa usa ka pagsulay. Sa unsang paagi kaha kana nga kasinatian nakatabang kanimo sa pagtabang sa uban nga makadawat sa Iyang paghupay?

Sa 2 Mga Taga-Corinto 1:6–8 atong makat-unan unsay gisulti ni Pablo sa mga Santos sa Corinto kabahin sa grabe ug makahulga sa kinabuhi nga mga kalisdanan nga nasinati niya ug sa iyang mga kauban samtang nagsangyaw sa ebanghelyo didto sa Efeso.

Basaha ang 2 Mga Taga-Corinto 1:9–11, nga mangita kon unsay nakatabang ni Pablo ug sa iyang mga kauban panahon sa ilang mga pagsulay.

Basi sa bersikulo 11, kompletuha ang mosunod nga kamatuoran kabahin sa unsaon nimo pagtabang samga katawhan nga nakasinati og mga pagsulay: makatabang niadtong nakasinati og mga pagsulay.

Tubaga ang usa o ang duha ka mga pangutana diha sa imong scripture study journal:
1. Sa unsang paagi ang imong mga pag-ampo makatabang sa usa ka tawo nga nakasinati og mga pagsulay?
2. Sa unsang paagi ang mga pag-ampo sa uban nakatabang nimo panahon sa usa ka pagsulay nga imong nasinati?

Sa 2 Mga Taga-Corinto 1:12–24 atong makat-unan nga si Pablo nalipay niadtong midawat sa tambag nga iyang gihatag sa iyang unang sulat. Sa mga bersikulo 15–20 siya mitubag niadtong nanaway kaniya sa dihang iyang giusab ang iyang mga plano nga mobisita kanila. Ang pipila sa mga kritiko ni Pablo daw nag-ingon nga tungod kay giusab ni Pablo ang iyang mga plano sa pagbiyahe, dili na sila makasalig kaniya o sa iyang mga pagtulun-an. Si Pablo mipahayag nga ang mensahe sa ebanghelyo tinuod, bisan unsa pa ang kausaban sa iyang mga plano.

2 Mga Taga-Corinto 2

Nag-awhag si Pablo sa mga Santos sa Corinto sa pagpasaylo sa usa ka makasasala

Paghunahuna og usa ka higayon nga ang usa ka tawo mipasakit kanimo o sa tawo nga imong gimahal. Hunahunaa kon nganong mahimong lisud ang pagpasaylo nianang tawhana.

Samtang magtuon ka sa 2 Mga Taga-Corinto 2, pangita og mga kamatuoran nga makatabang kanimo nga makasabut nganong importante nga mopasaylo sa tanan nga mga katawhan.

Sa unang sulat ni Apostol Pablo ngadto sa mga taga-Corinto, siya mipanton kanila tungod sa ilang pagkamasinupakon ug kakulang sa pagtuo. Basaha ang 2 Mga Taga-Corinto 2:1–4, nga mangita kon unsay gilauman ni Pablo nga masayran sa mga Santos sa Corinto kabahin sa iyang pagpanton. Ikonsiderar ang pagmarka o pagsulat diha sa bersikulo 4 sa rason nga gihatag ni Pablo sa iyang pagpanton.

Sa unsang paagi nga ang pagpanton o pagkorihir mahimong ebidensya sa gugma sa usa ka tawo alang kanato?

Sama sa narekord sa 2 Mga Taga-Corinto 2:5–6, si Pablo misulat kabahin sa usa ka miyembro sa Simbahan nga nakasala batok sa mga miyembro sa Simbahan ug maoy hinungdan sa ilang kasub-anan. Isip resulta, ang Simbahan midisiplina niining tawhana.

Basaha ang 2 Mga Taga-Corinto 2:7–8, nga mangita sa gisulti ni Pablo kon unsaon sa mga Santos pagtratar kining tawhana.

Bisan tuod nakasala kining tawhana, ang bili sa iyang kalag mahinungdanon sa panan-aw sa Dios (tan-awa sa D&P 18:10). Si Pablo miawhag sa mga Santos sa pagpasaylo, paghupay, ug paghigugma niining tawhana aron sa pagtabang kaniya nga maghinulsol.

Basaha ang 2 Mga Taga-Corinto 2:9–11, nga mangita og laing rason nganong miingon si Pablo nga ang mga Santos kinahanglang mopasaylo sa uban.

Sumala sa unsay gitudlo ni Pablo sa mga Santos diha sa bersikulo 11, makaila kita sa mosunod nga kamatuoran: Kon dili kita mopasaylo sa uban, niana si Satanas adunay mas dakong impluwensya diha kanato. Ikonsiderar ang pagmarka o pagsulat niini nga kamatuoran diha sa 2 Mga Taga-Corinto 2:11. Sa modernong pagpadayag ang Ginoo misugo kanato nga mopasaylo sa tanan (tan-awa sa D&P 64:8–11).

Ang pagpasaylo sa usa ka tawo wala magpasabut nga ang makasasala dili na angay nga manubag sa iyang mga binuhatan. Ni kini nagpasabut nga kinahanglan natong ibutang ang atong mga kaugalingon sa mga sitwasyon diin ang mga tawo makapadayon sa pagpasakit kanato. Hinoon, ang pagpasaylo sa uban nagpasabut sa pagtagad uban sa Kristohanong gugma niadtong nakapasakit kanato ug sa dili paghambin og pagdumot o kasuko ngadto kanila, nga makaapekto sa atong kaugalingong espirituhanong pag-uswag (tan-awa sa Giya ngadto sa mga Kasulatan, “Pasaylo,” scriptures.lds.org).

“Kon kamo biktima sa pang-abuso, hibaw-i nga kamo inosente ug nga ang Dios nahigugma kaninyo. Pakigsulti sa inyong mga ginikanan o sa laing masaligan nga hamtong, ug pangayo dayon og tambag sa inyong bishop. Makasuporta sila kaninyo sa espirituhanong paagi ug makatabang kaninyo nga makakuha og proteksyon ug tabang nga inyong gikinahanglan. Ang proseso sa pag-ayo mahimong molungtad og dugay-dugay. Salig sa Manluluwas. Siya moayo kaninyo ug mohatag kaninyo og kalinaw” (Alang sa Kalig-on sa Kabatan-onan [booklet, 2011], 36–37).

Tubaga ang mosunod nga pangutana diha sa imong scripture study journal: Sa unsang paagi kaha si Satanas adunay dakong impluwensya kanato kon dili kita mopasaylo sa uban?

Paghunahuna og usa ka tawo nga tingali kinahanglan nimo nga pasayloon. (Hinumdumi nga ang pagpasaylo wala magpasabut nga tugutan nimo ang imong kaugalingon nga mapasakitan. Kini nagpasabut sa pagpasaylo sa nakasala aron makapadayon ka sa imong kaugalingong espirituhanong pag-uswag.) Paghimo og usa ka tumong sa pagpasaylo nianang tawhana aron si Satanas dili makabaton og impluwensya diha kanimo. Pangayo og tabang gikan sa Langitnong Amahan samtang nagtinguha ka sa pagpasaylo sa uban.

Sumala sa narekord sa 2 Mga Taga-Corinto 2:12–17, si Pablo misulti sa mga Santos nga nagpasalamat siya sa Dios, kinsa “pinaagi kang Kristo nagamando kanato sa kanunay paingon sa kadaugan” (bersikulo 14), bisan sa malisud nga mga panahon.

2 Mga Taga-Corinto 3

Si Pablo nagtudlo sa mga Santos sa Corinto nga samtang sila modangup ngadto sa Ginoo, sila mahimong mas mahisama sa Dios

Human mibiya sa Corinto si Apostol Pablo, pipila sa mini nga mga magtutudlo misugod sa pagsupak sa iyang mga pagtulun-an ug misulay sa pagdaut kaniya pinaagi sa pagsulti sa mga kinabig nga kinahanglan gihapon nila nga mosunod sa balaod ni Moises. Sa 2 Mga Taga-Corinto 3:1, agi og tubag niadtong misulay sa pagdaut kaniya, si Pablo nangutana sa mga miyembro sa Simbahan sa Corinto og usa ka pinalabihan [rhetorical] nga pangutana—usa ka pangutana nga dunay makapanton nga epekto diha kanila, nga wala magdahum nga motubag sila—kon magkinahanglan ba siya nga mohatag kanila o makadawat gikan kanila og usa ka “sulat sa pagpaila sa kaugalingon” nga nagpamatuod sa iyang pagkatawo ug sa iyang pagkatinuod nga Apostol ni Jesukristo. (Sa panahon ni Pablo, ang mga tawo nga bag-ong moabot sa usa ka komunidad magdala og mga sulat sa pagpaila sa kaugalingon uban kanila. Kini nga mga sulat mipaila sa bag-ong mga nangabut ug mihatag og kasiguroan sa ilang maayo nga pagkatawo.)

Basaha ang 2 Mga Taga-Corinto 3:2–3, nga mangita kon unsay gisulti ni Pablo nga magsilbing iyang sulat sa pagpaila.

Si Pablo mitudlo nga ang nausab nga mga kinabuhi sa mga Santos maoy sama sa usa ka sulat nga gikan ni Kristo Mismo nga nagsilbing sulat sa pagpaila sa pagkatawo ni Pablo. Ang mga pulong nga “pagahibaloan ug pagabasahon sa tanang mga tawo” diha sa bersikulo 2 nagpasabut nga daghang mga tawo unang makaila sa Simbahan ug mohukom sa katinuod niini pinaagi sa personal nga pamatasan ug mga ehemplo sa mga miyembro sa Simbahan.

Ikonsiderar ang pagmarka o pagtimaan sa mga pulong nga “dili diha sa mga papan nga bato kon dili sa mga papan nga mga kasingkasing sa tawo” sa 2 Mga Taga-Corinto 3:3. Sa panahon ni Moises ang mga sugo gisulat diha sa mga papan nga bato. Si Pablo migamit niini nga mga pulong aron sa pagtabang sa mga Santos sa Corinto nga makasabut nga pinaagi sa gahum sa Espiritu Santo ang mga kasugoan gisulat diha sa ilang mga kasingkasing.

Sa 2 Mga Taga-Corinto 3:5–13 si Pablo migamit sa usa ka istorya sa Daang Tugon aron sa pagtabang sa mga Santos nga makasabut sa espirituhanong kahimtang sa ilang panahon. Siya mipahinumdom sa mga Santos sa Corinto nga si Moises nagtaptap sa iyang nawong sa dihang siya nanaog gikan sa pagpakigsulti sa Ginoo diha sa Bukid sa Sinai tungod kay ang mga anak sa Israel nangahadlok sa kasanag nga naggikan sa iyang nawong.

Basaha ang 2 Mga Taga-Corinto 3:14–15, nga mangita kon sa unsang paagi gitandi ni Pablo ang mga Israelite kinsa nahadlok sa kasanag nga naggikan sa nawong ni Moises ngadto sa mga Judeo sa iyang panahon. Ikonsiderar ang pagmarka o pagtimaan sa unsay imong makit-an sa imong mga kasulatan.

Unsa kaha ang gipasabut sa “ang ilang mga salabutan nangagahi” (bersikulo 14) ug sila adunay “taptap nga nagalimis sa ilang mga hunahuna” (bersikulo 15)?

Sama nga ang mga Israelite sa panahon ni Moises dili makasugakod sa kasanag nga naggikan sa nawong ni Moises tungod sa ilang pagkadili takus, ang mga Judeo sa panahon ni Pablo dili makasabut sa mga panagna sa Daang Tugon kabahin ni Jesukristo tungod sa ilang pagkadautan.

Basaha ang 2 Mga Taga-Corinto 3:16–18, nga mangita kon unsay gisaad ni Pablo nga makatangtang sa sayop nga pagsabut gikan sa mga kasingkasing ug hunahuna sa katawhan.

Ang Hubad ni Joseph Smith nag-usab sa mga pulong nga “sa diha nga ang tawo makadangup na sa Ginoo” diha sa bersikulo 16 ngadto sa “sa diha nga ang ilang mga kasingkasing makadangup na sa Ginoo” (Hubad ni Joseph Smith, 2 Mga Taga-Corinto 3:16; mga italic gidugang).

Sumala sa 2 Mga Taga-Corinto 3:18, unsay mahitabo niadtong modangup sa Ginoo ug matangtangan sa taptap sa sayop nga pagsabut? Ikonsiderar ang pagmarka o pagtimaan sa tubag nga imong makita diha sa imong mga kasulatan.

Ang mga pulong nga “ginausab kita ngadto sa pagkasama sa iyang panagway gikan sa kasanag ngadto sa kasanag” (bersikulo 18) nagpasabut sa hinay-hinay nga kausaban nga atong madawat pinaagi sa Espiritu nga nagtabang kanato nga mahimong mas mahisama sa Dios. Gikan niini nga mga bersikulo atong makat-unan nga samtang ang atong mga kasingkasing modangup ngadto sa Ginoo, kita makabaton sa Espiritu, nga hinay-hinay mousab kanato aron mahimong mas mahisama sa Dios.

Kompletuha ang mosunod diha sa imong scripture study journal:
1. Ipasabut kon unsa sa imong hunahuna ang gipasabut nga ang atong mga kasingkasing modangup ngadto ni Jesukristo.
2. Paghimo og lista sa mga paagi nga mapadangup nimo ang imong kasingkasing ngadto ni Jesukristo.

Hunahunaa kon sa unsang paagi ang Espiritu nakapausab kanimo sukad sa higayon nga ikaw nagsugod sa imong pagtuon sa Bag-ong Tugon niining tuiga. Sa imong personal nga journal, pagsulat og usa ka tumong nga makatabang kanimo nga mas hingpit nga modangup sa Ginoo aron imong madawat ang Espiritu ug mahimong mas mahisama sa Dios.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Mga Taga-Corinto 1–3 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: