1 Mga Taga-Corinto 7–8

Pasiuna

Si Apostol Pablo mitudlo sa mga minyo ug sa mga dili minyo nga mga miyembro sa Simbahan sa Corinto kabahin sa kaminyoon ug sa misyonaryo nga buhat. Nagtubag sa pangutana kabahin sa pagkaon sa karne nga gihalad ngadto sa mga dios-dios, siya mitudlo sa mga Santos sa pagkonsiderar sa epekto sa ilang personal nga mga binuhatan ngadto sa uban ug mag-andam sa paglikay sa pipila ka mga buhat kon kadto nga mga buhat maoy mahimong hinungdan nga ang laing tawo mapandol sa espirituhanong paagi.

1 Mga Taga-Corinto 7

Si Pablo nagtambag sa mga minyo ug dili minyo nga mga miyembro sa Simbahan kabahin sa kaminyoon

Drowinga ang mosunod nga diagram diha sa imong scripture study journal: Imo kining dugangan samtang magtuon ka sa 1 Mga Taga-Corinto 7.

Sama kanato, ang mga miyembro sa Simbahan sa Corinto nagpuyo sa usa ka katilingban nga adunay makalibug ug nagkasumpaki nga mga ideya kabahin sa kaminyoon ug pisikal o sekswal nga kasuod. Uban niini ug uban pang mga doktrina ug mga baruganan sa ebanghelyo, importante nga makahimo sa pag-ila tali sa tinuod ug sayop nga mga tinuohan.

Sa 1 Mga Taga-Corinto 5–6 imong nabasa ang kabahin sa pipila ka sayop nga mga tinuohan kabahin sa sekswal nga relasyon nga naglukup sa Corinto. Usa niining sayop nga mga tinuohan mao ang mosunod: Maayo ra ang pag-apil sa pisikal nga kasuod uban ni bisan kinsa. Isulat kini nga pamahayag ubos sa “Sayop nga tinuohan:” sa tuo nga bahin sa diagram diha sa imong scripture study journal. Ikonsiderar nganong sayop kini nga tinuohan.

Ang mga miyembro sa Simbahan sa Corinto misulat ngadto ni Apostol Pablo nga nangayo og giya kabahin sa sumbanan sa Ginoo sa sekswal nga kaputli. Basaha ang 1 Mga Taga-Corinto 7:1, nga mangita kon unsa ang gipangutana sa mga Santos sa Corinto ngadto ni Pablo.

Ang mga pulong nga “maayo unta alang sa lalaki ang dili pagpakigduol og babaye” diha sa bersikulo 1 nagpasabut nga ang mga Santos sa Corinto adunay mga pangutana kon kanus-a ug kon angay ba ang pisikal nga pakigsuod. Agig dugang, ang uban tingali nakapangutana kon ang mga minyo kinahanglan ba nga moapil sa pisikal nga kasuod. Isulat ang mosunod ubos sa “Sayop nga tinuohan:” sa wala nga bahin sa diagram diha sa imong scripture study journal: Dili gayud maayo ang pag-apil sa pisikal nga kasuod, bisan gani sulod sa kaminyoon.

Ang duha ka mga sayop nga tinuohan nga gisulat diha sa imong scripture study journal nagrepresentar sa grabeng mga panglantaw nga lahi ra sa sumbanan sa Dios alang sa pisikal nga kasuod.

Basaha ang 1 Mga Taga-Corinto 7:2–3, nga mangita kon unsay gitudlo ni Pablo sa mga taga-Corinto mahitungod sa pisikal nga kasuod. Ang pulong nga pakighilawas sa bersikulo 2 nagpasabut sa sekswal nga relasyon gawas sa kaminyoon, ug ang mga pulong nga “angay sa magtiayon” sa bersikulo 3 nagpasabut sa gugma ug kasuod nga ipadayag tali sa bana ug asawa.

Diha sa Alang sa Kalig-on sa Kabatan-onan atong masayran nga ang “pisikal nga kasuod tali sa bana ug asawa maanindot ug sagrado. Kini gi-orden sa Dios aron malalang ang mga anak ug alang sa pagpadayag og gugma tali sa bana ug asawa. Ang Dios misugo nga ang sekswal nga kasuod itagana alang sa kaminyoon”” ([booklet, 2011], 35).

Isulat ang mosunod ubos sa “Kamatuoran:” sa imong scripture study journal: Ang pisikal nga kasuod tali sa bana ug asawa gi-orden sa Dios.

Si Presidente Boyd K. Packer sa Korum sa Napulog Duha ka mga Apostoles miingon:

“Ang sugo sa pagdaghan ug pagpuno sa yuta wala pa gayud mausab. Importante kini sa plano sa katubsanan ug maoy tinubdan sa tawhanong kalipay. Pinaagi sa matarung nga paggamit niini nga gahum, mahiduol kita sa atong Amahan sa Langit ug makasinati og kahingpitan sa kalipay, gani ang pagkadios. Ang gahum sa pagpasanay dili sulagma nga bahin sa plano; kini ang plano sa kalipay; kini ang yawe sa kalipay.

“Ang tinguha nga makahimo og anak ang mga tawo kanunay ug labihan kakusog. Ang atong kalipay sa mortal nga kinabuhi, ang atong kalipay ug kahimayaan magdepende kon unsaon nato pagtubag kining makanunayon, dili kapugngan nga pisikal nga mga tinguha” (“Ang Plano sa Kalipay,” Ensign o Liahona, Mayo 2015, 26).

Ngano nga ang pagpasanay—ang abilidad sa paglalang og mortal nga kinabuhi—importante kaayo sa plano sa Langitnong Amahan alang sa kaluwasan sa Iyang mga anak?

Sumala sa narekord diha sa 1 Mga Taga-Corinto 7:1–24, si Pablo mitudlo nga gawas sa espesyal, temporaryo nga mga kahimtang, ang magtiayon kinahanglang dili mohikaw sa kahinam sa kaminyoon gikan sa usag usa; nga ang balu ug diborsyado nga mga miyembro sa Simbahan gitugutan nga magminyo pag-usab kon gusto nila; ug nga ang mga miyembro sa Simbahan kinahanglang “magapabilin … kauban sa Dios” (1 Mga Taga-Corinto 7:24) bisan unsa pa ang ilang mga kahimtang. Si Pablo usab mitambag batok sa diborsyo.

Adunay mga miyembro sa Simbahan sa Corinto kansang mga kapikas dili mga Kristiyano. Ikonsiderar ang pipila ka mga kalisdanan nga tingali masinati sa mga kapikas nga adunay managlahi nga mga tinuohan.

Basaha ang 1 Mga Taga-Corinto 7:12–17, nga mangita sa kamatuoran nga gitudlo ni Pablo nga makatabang karon sa mga pamilya nga dili tanan miyembro sa simbahan.

Ang mosunod mao ang usa ka kamatuoran nga atong makat-unan gikan niini nga tudling: Ang matinud-anong mga sumusunod ni Jesukristo adunay balaanon nga epekto sa ilang mga pamilya.

Tubaga ang mosunod nga pangutana diha sa imong scripture study journal: Unsa nga mga ehemplo ang imong nakit-an diin ang usa ka miyembro sa Simbahan adunay positibo nga epekto sa mga sakop sa pamilya kinsa dili mga miyembro sa Simbahan o dili aktibo sa Simbahan?

Diha sa 1 Mga Taga-Corinto 7:25–40 si Pablo mihisgut sa mga bintaha ug dili bintaha sa pagkadili minyo o pagkaminyo samtang “gitawag ngadto sa pagpangalagad” (Hubad ni Joseph Smith, 1 Mga Taga-Corinto 7:29 [sa Giya ngadto sa mga Kasulatan, scriptures.lds.org.]), o gitawag sa pagmisyon. Mitudlo siya nga ang dili minyo o ulitawo ug dalaga nga mga misyonaryo diyutay ra og mga sagabal samtang nagserbisyo kay sa tawo nga minyo ug adunay temporal nga mga kabalaka kabahin sa pagsangkap sa pamilya. Hinoon, siya wala magpugong kanila sa pagminyo o mahimong minyo samtang nagserbisyo og misyon. Ang pipila ka mga ehemplo sa mga magtiayon nga miapil sa full-time nga pagserbisyo sa Simbahan karon mao ang mga senior missionary couple, mga mission president, mga temple president, ug mga General Authority sa Simbahan.

1 Mga Taga-Corinto 8

Si Pablo nagtubag og pangutana kabahin sa pagkaon sa karne nga gihalad ngadto sa mga dios-dios

Si Elder L. Tom Perry sa Korum sa Napulog Duha ka mga Apostoles mipakigbahin sa mosunod nga kasinatian:

“Akong nabantayan nga kon kamo magpakabuhi sa paagi nga kamo kinahanglang magpakabuhi, ang mga tawo makamatikod ug makadayeg sa inyong mga gituohan ug kamo adunay impluwensya sa kinabuhi sa uban.

“Akong gigahin ang akong panginabuhi diha sa department store nga negosyo. Tungod kay kabahin ko sa management team, importante kanako nga makig-uban sa mga organisasyon sa lokal nga negosyo. Ang mga miting sa kasagaran niining mga organisasyon kanunayng magsugod sa oras sa ting-inom [diin ang mga ilimnong makahubog kasagaran nga idalit]. Panahon kini sa pakigsagol ug pakigsuod sa mga tawo nga apil sa organisasyon. Kanunay ko nga mobati nga dili komportable niining mga orasa sa pakighimamat. Sa sinugdanan nangayo ko og lemon-lime nga softdrink. Nadiskubrihan dayon nako nga ang lemon-lime nga softdrink pareha og dagway sa uban nga mga ilimnon. Dili ko makamugna og hunahuna nga ako dili manginginom uban sa tin-aw nga softdrink nga naa sa akong mga kamot” (“Ang Tradisyon sa usa ka Balanse, Matarung nga Kinabuhi,” Liahona, Ago. 2011, 32–33).

Unsa kaha ang mahitabo kon si Elder Perry mipadayon sa pag-inom og non-alcoholic nga mga ilimnon nga susama tan-awon sa ilimnon nga makahubog atol niadto nga sosyal nga mga panagtigum?

Unsa ang pipila ka sitwasyon diin ang imong ehemplo negatibong makaimpluwensya sa uban bisan tuod wala kay gibuhat nga sayop?

Ang mga miyembro sa Simbahan sa Corinto naglibug kon maayo ra ba nga mokaon sila sa pagkaon nga gihalad ngadto sa mga dios-dios, o pagano nga mga dios. Agi og tubag, si Apostol Pablo miangkon nga ang mga miyembro sa Simbahan tingali maghunahuna nga maayo ra kini tungod kay sila nasayud nga ang pagano nga mga dios dili tinuod (tan-awa sa 1 Mga Taga-Corinto 8:4–6).

Basaha ang 1 Mga Taga-Corinto 8:1, nga mangita kon unsa ang gitudlo ni Pablo sa mga Santos nga taga-Corinto.

Tan-awa sa bersikulo 1 kon unsay moresulta gikan sa kahibalo ug unsay moresulta gikan sa gugma nga putli. Si Pablo nagsugyot nga ang gugma nga putli (“ang tiunay nga gugma ni Kristo” [Moroni 7:47], pagkaadunay dili hinakog nga gugma alang sa uban) mas importante kay sa pagpakita sa kahibalo sa mga balaod sa piho nga mga pagkaon.

Basaha ang 1 Mga Taga-Corinto 8:7–11, nga mangita kon unsay gitudlo ni Pablo kabahin sa pagkaon nga tingali gihalad ngadto sa mga dios-dios. Ang pulong nga mahuyang niini nga mga bersikulo nagpasabut sa ang mga miyembro sa Simbahan kinsa huyang sa ilang hugot nga pagtuo. Ang pulong nga kagawasan diha sa bersikulo 9 nagpasabut nga walay piho nga sugo nga nagdili sa pagkaon sa pipila ka mga pagkaon.

Timan-i sa 1 Mga Taga-Corinto 8:9 nga si Pablo mihatag og bug-at nga rason nganong ang mga Santos mahimong mopili nga dili mokaon sa pagkaon nga gihalad ngadto sa mga dios-dios. Unsa nga ehemplo ang gihatag ni Pablo diha sa 1 Mga Taga-Corinto 8:10–11 kabahin sa usa ka paagi nga ang pagkaon sa pagkaon nga gihalad sa mga dios-dios mahimong usa ka babag?

Basaha ang 1 Mga Taga-Corinto 8:12–13, nga mangita kon giunsa pagtapos ni Pablo ang iyang pasidaan kabahin sa pagbuhat og mga butang nga posibleng moresulta sa pagkapandol sa uban. Ang mga pulong nga “mao man ang hinungdan sa pagkahulog sa akong igsoon” sa bersikulo 13 mahimo usab nga hubaron nga “maoy hinungdan nga mapandol [o] masayop ang akong igsoon”.

Usa ka baruganan nga atong makat-unan gikan sa mga pagtulun-an ni Pablo mao ang mosunod: Kita makapakita og gugmang putli alang sa uban pinaagi sa paglikay sa mga binuhatan nga mahimong makapapandol kanila sa espirituhanong paagi. (Mahimong imong mahinumduman sa imong pagtuon sa Mga Taga-Roma 14 nga si Pablo mitudlo og susama nga baruganan ngadto sa mga Santos sa Roma.)

Basaha ang sumpay sa istorya ni Elder Perry kabahin sa iyang mga pagpili atol sa oras sa ting-inom. Timan-i kon giunsa niya paggamit kini nga baruganan.

“Sa katapusan nakahukom ko nga mangayo og imnonon nga klarong mopaila kanako nga dili hinginom. Miadto ko sa bartender ug nangayo og usa ka baso nga gatas. Ang bartender wala pa makasulay nga gipangayoan og sama niana. Miadto siya sa kusina ug mikuha og usa ka baso nga gatas para nako. Karon aduna na koy imnonon nga lahi kaayo tan-awon sa makahubog nga mga ilimnon nga giinom sa uban. Sa kalit lang ako ang nahimong sentro sa pagtagad. Daghan kaayong mga nagkomedya sa akong giinom. Ang akong gatas mao ang nahimong hilisgutan sa panag-istoryahanay. …

“Ang gatas mao ang akong napili nga ilimnon atol sa oras sa ting-inom. Sa wala madugay nahibaloan na sa tanan nga ako usa ka Mormon. Ang respeto nga akong nadawat nakapasurprisa gayud kanako, ingon nga ang makapaikag nga hitabo nagsugod sa pagpanghitabo. Ang uban miapil kanako sa pag-inom og gatas!

“Paningkamot nga mahimong lahi. Sunda ang mga sumbanan nga gitudlo kanato sa ebanghelyo” (“Ang Tradisyon sa usa ka Balanse, Matarung nga Kinabuhi,” 33).

Tubaga ang mosunod nga pangutana diha sa imong scripture study journal: Unsa ang pipila ka mga ehemplo kon sa unsang paagi ikaw mahimong makapakita og gugmang putli alang sa uban pinaagi sa paglikay sa mga binuhatan nga mahimong makapandol kanila sa espirituhanong paagi?
Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Mga Taga-Corinto 7–8 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: