2 Mga Taga-Tesalonica

Pasiuna

Sa wala madugay human masulat ang iyang unang epistola ngadto sa mga Santos nga taga-Tesalonica, misulat nila si Apostol Pablo og ikaduhang epistola, diin iyang gipasabut ang dugang nga mga kamatuoran bahin sa Ikaduhang Pag-anhi ni Jesukristo. Gitudlo niya nga ang Manluluwas dili moanhi pag-usab hangtud mahitabo ang usa ka apostasiya. Nagsangyaw dayon si Pablo batok sa pagkatapulan ug gitambagan ang mga Santos nga “ayaw pagkataka [pagkaluya] sa pagbuhat og maayo” (2 Mga Taga-Tesalonica 3:13).

2 Mga Taga-Tesalonica 1–2

Giawhag ni Pablo ang mga Santos pinaagi sa pagpanagna bahin sa Ikaduhang Pag-anhi ni Jesukristo

Si Elder Jeffrey R. Holland sa Korum sa Napulog Duha ka mga Apostoles miingon: “Uban sa pagdayeg ug pag-awhag alang sa tanan kinsa kinahanglan nga magpabiling lig-on niining ulahing mga adlaw, ako moingon sa tanan ug ilabi na sa kabatan-onan sa Simbahan nga kon wala pa kamo tawaga, moabut ang adlaw nga kamo pagatawgon sa pagpanalipod sa inyong tinuohan o tingali bisan sa paglahutay sa personal nga mga pang-abuso tungod kay kamo mga miyembro sa Ang Simbahan ni Jesukristo sa mga Santos sa Ulahing mga Adlaw. Ang maong higayon magkinahanglan og kaisug ug maayong pamatasan sa inyong bahin” (“Ang Bili—ug mga Panalangin—sa Pagkadisipulo,” Ensign o Liahona, Mayo 2014, 6).

Diha sa imong scripture study journal, pagsulat bahin sa usa ka kasinatian sa dihang kinahanglan nimong panalipdan ang imong pagtuo o molahutay sa pagsupak tungod sa pagkamiyembro nimo sa Simbahan. Iapil kon unsay imong reaksyon sa sitwasyon. Kon wala ka makasulay nga kinahanglan kang manalipod sa imong pagtuo o makasinati og pagsupak tungod sa pagkamiyembro nimo sa Simbahan, pagsulat bahin kon unsa kaha sa imong hunahuna ang imong reaksyon kon mag-atubang ka niining matang sa sitwasyon.

Si Apostol Pablo misulat og ikaduhang sulat ngadto sa mga Santos nga taga-Tesalonica ug naghisgot og pipila ka mga hilisgutan, lakip na ang pagpanggukod nga giatubang sa mga Santos. Samtang magtuon ka sa 2 Mga Taga-Tesalonica 1, pangitaa ang baruganan nga makatabang nga malahutay nimo ang pagsupak ug kalisdanan nga mahimo nimong sagubangon isip usa ka miyembro sa Simbahan.

Basaha ang 2 Mga Taga-Tesalonica 1:3–5, nga mangita kon nganong gidayeg ni Pablo ang mga Santos nga taga-Tesalonica.

Ikonsiderar ang pagmarka o pagsulat diha sa bersikulo 5 sa ganti nga madawat sa mga Santos tungod sa paglahutay sa pagpanggukod ug kalisdanan uban sa “pagkamainantuson ug pagtuo” (2 Mga Taga-Tesalonica 1:4).

Gikan sa 2 Mga Taga-Tesalonica 1:3–5 atong makat-unan nga kon matinud-anon kitang molahutay sa pagsupak ug kalisdanan uban sa pagkamainantuson ug pagtuo, maisip kitang takus sa gingharian sa Dios.

Hunahunaa kon unsay gipasabut sa mainantusong molahutay sa mga pagsulay. Nganong magkinahanglan man kita og pagtuo aron mainantusong molahutay sa pagsupak o kalisdanan?

Basaha ang mosunod nga pamahayag ni Presidente Dieter F. Uchtdorf sa Unang Kapangulohan, nga magmarka sa unsay gipasabut sa mainantusong molahutay sa mga pagsulay: “Ang pailub dili ang pagkawalay pagtagad, ni kini kapakyas sa pagbuhat tungod sa atong mga kahadlok. Ang pailub nagkahulugan nga aktibong maghulat ug maglahutay. Nagkahulugan kini nga magpabilin uban sa usa ka butang ug sa pagbuhat sa tanan kutob sa atong mahimo—motrabaho, molaum, ug mogamit sa hugot nga pagtuo; paglahutay sa kalisud uban sa determinasyon, bisan kon ang mga tinguha sa atong mga kasingkasing nalangan. Ang pailub dili lamang ang paglahutay; kondili paglahutay og maayo!” (“Ipadayon ang Pagpailub,” Ensign o Liahona, Mayo 2010, 57).

Hunahunaa ang usa ka tawo nga imong nailhan o nabasahan diha sa mga kasulatan nga matinud-anon ug mainantusong milahutay sa pagpanggukod ug kalisdanan. Diha sa imong scripture study journal, pagsulat bahin kon nganong ang ehemplo niining tawhana makahuluganon man nganha nimo.

Hunahunaa ang bahin sa pagpanggukod ug kalisdanan nga mahimong kasamtangan nimong nasinati, ug desisyuni kon unsaon nimo sa paglahutay niining mga hagit uban sa pagkamainantuson ug hugot nga pagtuo. Ikonsiderar ang pag-ampo alang sa panabang.

Nanagna si Pablo bahin sa Ikaduhang Pag-anhi ni Jesukristo. Basaha ang 2 Mga Taga-Tesalonica 1:6–10, nga mangita sa mga pulong nga gigamit ni Pablo sa paghulagway sa Ikaduhang Pag-anhi. Samtang magbasa ka, hibaloi kon sa unsang paagi nga ang kasinatian sa mga matarung mahimong lahi sa kasinatian sa mga dautan inig-anhi sa Ginoo.

Usa ka kamatuoran nga atong makat-unan gikan niining mga bersikulo mao nga atol sa Ikaduhang Pag-anhi ni Jesukristo, ang mga matarung makapahulay ug ang mga dautan pagalaglagon.

Sa imong hunahuna sa unsang butanga nga ang mga matarung makapahulay?

Sa unsang paagi nga kining doktrina makapahupay niadtong kasamtangan nga naglahutay og mga kalisdanan tungod sa ilang pasalig ngadto ni Jesukristo?

Nakahunahuna ka ba kon kanus-a ang Ikaduhang Pag-anhi ni Jesukristo? Ang 2 Mga Taga-Tesalonica 2:2 nagsugyot nga ang mga Santos didto sa Tesalonica mahimong naghunahuna nga ang Ikaduhang Pag-anhi sa Ginoo hapit na mahitabo o nahitabo na. Nabalaka si Pablo nga nalipat sila.

Basaha ang 2 Mga Taga-Tesalonica 2:1–3, nga mangita sa gisulti ni Pablo nga mahitabo sa Ikaduhang Pag-anhi. Diha sa bersikulo 3 ang mga pulong nga “kadtong adlawa” nagpasabut sa Ikaduhang Pag-anhi ug ang pulong nga “pagsupil” nagpasabut og apostasiya, o pagbiya gikan sa kamatuoran. (Hinumdumi nga ang 2 Mga Taga-Tesalonica 2:1–3 usa ka scripture mastery passage. Mahimo nimo kining markahan sa usa ka talagsaong paagi aron matabangan ka nga matultulan nimo kini sa umaabut.)

Gikan sa 2 Mga Taga-Tesalonica 2:1–3 atong makat-unan nga sa dili pa ang Ikaduhang Pag-anhi ni Jesukristo, usa ka apostasiya ang mahitabo.

Niining mga bersikulo gisugyot ni Pablo nga ang mga miyembro sa Simbahan sa iyang panahon kinahanglang mas mabalaka bahin sa apostasiya nga nagsugod na diha kanila kay sa kanus-a mahitabo ang Ikaduhang Pag-anhi sa Ginoo. Ang mosunod nga pagpasabut makatabang nga masabtan nimo ang Dakong Apostasiya, nga nahitabo sa wala madugay human sa kamatayon ni Pablo ug sa ubang mga Apostoles. Nasayud si Pablo nga kining pagsupil mahitabo sa dili pa ang Ikaduhang Pag-anhi sa Ginoo.

“Human sa kamatayon ni Jesukristo, ang dautang mga tawo migukod sa mga Apostoles ug sa mga miyembro sa Simbahan ug mipatay sa kadaghanan kanila. Uban sa pagkamatay sa mga Apostoles, ang mga yawe sa priesthood ug ang katungod sa pagpangulo sa priesthood gikuha gikan sa yuta. Ang mga Apostoles mibantay sa mga doktrina sa ebanghelyo nga magpabiling lunsay ug mipatunhay og kahusay ug naghimog sumbanan sa katakus alang sa mga miyembro sa Simbahan. Nga wala ang mga Apostoles, sa ngadto-ngadto ang mga doktrina nangatuis, ug walay pagtugot nga mga pag-usab gihimo diha sa organisasyon sa Simbahan ug sa mga ordinansa sa priesthood, sama sa bunyag ug pagtugyan sa gasa sa Espiritu Santo.

“Nga walay pagpadayag ug katungod sa priesthood, ang mga tawo nagsalig nalang sa tawhanong kaalam sa paghubad sa mga kasulatan ug sa mga baruganan ug mga ordinansa sa ebanghelyo ni Jesukristo. Sayop nga mga hunahuna gitudlo ingon nga tinuod. Kadaghanan sa kasayuran sa tinuod nga pagkatawo ug kinaiya sa Dios Amahan, sa Iyang Anak nga si Jesukristo, ug sa Espiritu Santo nangawala. Ang mga doktrina sa hugot nga pagtuo kang Jesukristo, paghinulsol, bunyag, ug sa gasa sa Espiritu Santo nanga-usab o gipangkalimtan. Ang katungod sa priesthood nga gihatag ngadto sa mga Apostoles ni Kristo nawala na sa yuta. Kini nga apostasiya sa ngadto-ngadto miresulta sa pagtumaw sa daghang mga simbahan” (Isangyaw ang Akong Ebanghelyo: Usa ka Giya sa Misyonaryo nga Pangalagad [2004], 40–41).

Maghunahuna sa imong nakat-unan bahin sa Apostasiya, pamalandungi nganong gikinahanglang ipahiuli ang ebanghelyo ni Jesukristo ug ang Iyang Simbahan sa dili pa moanhi ang Ginoo.

Ang “tawo sa kalapasan” nga gihisgutan diha sa 2 Mga Taga-Tesalonica 2:3 nagpasabut ni Satanas. Ang Pagpahiuli sa ebanghelyo, lakip na ang pag-abut sa Basahon ni Mormon, mipakita sa mga pagpanglingla ni Satanas ug sa iyang mga sumusunod.

Atong mabasa diha sa 2 Mga Taga-Tesalonica 2:4–17 nga nanagna si Pablo nga tugutan sa Ginoo si Satanas nga molingla sa mga lumulupyo sa yuta hangtud sa Ikaduhang Pag-anhi (tan-awa sa Joseph Smith Translation, 2 Mga Taga-Tesalonica 2:7–9 [diha sa Ang Giya ngadto sa mga Kasulatan, scriptures.lds.org]). Giawhag ni Pablo ang mga Santos nga “magbarug nga malig-on” diha sa mga kamatuoran nga gitudlo kanila (2 Mga Taga-Tesalonica 2:15).

Scripture Mastery—2 Mga Taga-Tesalonica 2:1–3

Gamit ang mga tabang sa pagtuon sa kasulatan, pangita og laing kasulatan nga nagtudlo bahin sa Apostasiya. Mahimo nimong isulat kini nga reference diha sa imong mga kasulatan tupad sa 2 Mga Taga-Tesalonica 2:1–3. Diha sa imong scripture study journal, isulat kon unsaon nimo paggamit kining mga bersikulo sa pagpasabut sa sukaranang mga doktrina bahin sa Apostasiya ug sa Pagpahiuli ngadto sa usa ka tawo nga dili miyembro sa Simbahan.

2 Mga Taga-Tesalonica 3

Gipasidan-an ni Pablo kadtong dili mosunod sa tambag sa Ginoo, ug nagsangyaw siya bahin sa pagpaningkamot sa kaugalingon

Atol sa pagsulat ni Pablo sa iyang ikaduhang epistola ngadto sa mga taga-Tesalonica, ang ubang mga miyembro sa Simbahan walay mga buhat o tapulan, ug wala maninguha nga mahimong mapaningkamuton sa kaugalingon. Nagpaabut sila nga masangkapan pinaagi sa paghago sa uban.

Unsa unta nga mga problema ang miresulta gikan niini nga sitwasyon?

Sumala sa 2 Mga Taga-Tesalonica 3:1–9, gidayeg ni Pablo ang mga Santos nga taga-Tesalonica nga nagmatinud-anon ug gipasidan-an sila bahin sa pakig-uban niadtong may “pagkabagdoy” (bersikulo 6). Usa ka kahulugan sa pulong nga pagkabagdoy mao ang kawalay disiplina, ug diha sa kinatibuk-ang kahulugan sa 2 Mga Taga-Tesalonica 3 nagpasabut kini og pagkatapulan. Ang mga miyembro sa Simbahan nga may pagkabagdoy mao kadtong makahimo sa pagtrabaho aron sa pagsuporta sa ilang kaugalingon apan wala mobuhat sa ingon. Gipasabut ni Pablo nga siya ug ang iyang mga kauban mipakita og ehemplo sa pagpaningkamot sa kaugalingon pinaagi sa pagtrabaho aron sa pagsuporta sa ilang kaugalingon.

Basaha ang 2 Mga Taga-Tesalonica 3:10–13, nga mangita sa gimando ni Pablo nga buhaton sa mga Santos kalabut niadtong mibalibad nga motrabaho.

Gitambagan usab ni Pablo ang mga Santos sa “dili pagkataka sa pagbuhat og maayo” (2 Mga Taga-Tesalonica 3:13). Gimanduan niya sila nga palambuon ang ilang kaugalingon sa tanang butang ug sa pagtabang sa uban (tan-awa usab sa D&P 64:33).

Gikan sa instruksyon ni Pablo atong makat-unan nga gimanduan kita nga mahimong mapaningkamuton sa kaugalingon ug motabang sa uban.

Basaha ang mosunod nga pamahayag, nga mangita kon unsay buot ipasabut sa pagkamapaningkamuton sa kaugalingon:

“Usa sa mga panalangin sa trabaho mao ang pagpalambo sa pagpaningkamot sa kaugalingon. ‘‘Kon kamo mapaningkamuton sa kaugalingon, gamiton ninyo ang mga panalangin ug mga abilidad nga gihatag sa Dios kaninyo aron sa pag-atiman sa inyong kaugalingon ug sa inyong pamilya ug sa pagpangita og mga solusyon sa inyong kaugalingong mga problema. Ang pagpaningkamot sa kaugalingon wala magpasabut nga kamo kinahanglang makahimo sa tanang mga butang nga kamo ra. Aron mahimong tinuoray nga mapaningkamuton sa kaugalingon, kinahanglan kamong makat-on kon unsaon sa pakig-uban og trabaho sa lain ug moduol sa Ginoo alang sa Iyang tabang ug kalig-on.

“Hinumdumi nga ang Dios adunay mahinungdanong buhat nga ipahimo kaninyo. Siya mopanalangin kaninyo sa inyong mga paningkamot sa pagtuman niana nga buhat” (Alang sa Kalig-on sa mga Kabatan-onan [booklet, 2011], 41).

Paghunahuna og usa ka butang nga imong mabuhat aron mahimong mapaningkamuton sa kaugalingon karon ug sa umaabut. Paghimo og tumong, ug tinguhaa ang tabang sa Ginoo sa pagkab-ot niini nga tumong.

Sama sa narekord diha sa 2 Mga Taga-Tesalonica 3:14–18, gitapos ni Pablo ang iyang epistola pinaagi sa pag-awhag sa mga Santos sa pagtabang niadtong mga tapulan nga mahimong mapaningkamuton sa kaugalingon pinaagi sa “dili pagpakigharong” kanila, o pagpalayo gikan kanila (bersikulo 14). Giawhag niya ang mga Santos, hinoon, sa dili pagtagad sa mga tapulan isip mga kaaway apan mga kaigsoonan diha sa ebanghelyo.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Mga Taga-Tesalonica ug nahuman kini nga leksyon sa (petsa).

Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: