Unit 30: Day 2
1 Juan
Pasiuna
Si Apostol Juan midapit sa mga miyembro sa Simbahan sa pagtinguha sa pagpakigdait sa Amahan ug Iyang Anak, si Jesukristo. Siya mipasabut og maayo sa panginahanglan sa pagsunod sa mga sugo sa Dios aron sa pagpakita sa atong gugma alang Kaniya. Si Juan usab mipahinumdom sa mga miyembro sa Simbahan sa paghigugma sa uban.
1 Juan
Gipasabut ni Juan ang kaimportante sa pagsunod sa mga sugo ug paghigugma sa usag usa
-
Sa imong scripture study journal, isulat ang pulong nga apostasiya ug ang kahulugan niini. Kon nagkinahanglan ka og tabang, gamita ang Giya ngadto sa mga Kasulatan, o ang Sukaranang mga Doktrina nga dokumento sa sinugdanan niini nga giya sa pagtuon.
Si Apostol Juan misulat niini nga sulat sa panahon nga ang apostasiya mikaylap sa Simbahan. Siya mipasidaan sa mga Santos kabahin sa mga antikristo (tan-awa sa 1 Juan 2:18–26; 4:3). Ang usa ka antikristo mao ang “bisan kinsa o bisan unsa nga mahasupak sa tinuod nga ebanghelyo sa laraw sa kaluwasan ug nga sa dayag o sa tinago misupak kang Kristo” ug sa awtoridad ug mga pagtulun-an sa Iyang pinili nga mga sulugoon (Giya ngadto sa mga Kasulatan, “Antikristo,” scriptures.lds.org). Pipila ka mga antikristo sa kapanahunan ni Juan nagtudlo nga si Jesukristo walay pisikal nga lawas samtang ania sa yuta apan makita lamang nga usa ka pisikal nga binuhat.
Basaha ang 1 Juan 1:1–4, nga mangita kon unsay gipamatud-an ni Juan aron masupak kining sayop nga pagtulun-an. Timan-i nga “ang Pulong nga nagahatag og kinabuhi” sa bersikulo 1 nagpasabut ngadto ni Jesukristo.
Timan-i sa bersikulo 3–4 nga si Juan gusto nga ang mga Santos adunay pakigdait sa mga lider sa Simbahan, kinsa adunay pakigdait sa Langitnong Amahan ug ni Jesukristo. Siya usab nagtinguha nga sila makasinati og hingpit nga kalipay. Usa ka baruganan nga atong makat-unan gikan niini nga mga bersikulo mao nga kon kita modawat ug mosunod sa mga pagtulun-an sa mga propeta ug mga apostoles, kita makaangkon og panagdait uban sa Amahan ug Anak.
Ang pagkaangkon og panagdait nagpasabut nga matagamtaman ang relasyon sa pagsalig, panaghigalaay, pakig-uban, ug panaghiusa. Hunahunaa ang mga tawo nga nagserbisyo sa Unang Kapangulohan ug sa Korum sa Napulog Duha ka mga Apostoles. Sa unsang paagi nga ang pagsunod sa mga pagtulun-an sa mga propeta ug mga apostoles makatabang kanato nga makaangkon og pakigdait uban sa atong Langitnong Amahan ug Iyang Anak, si Jesukristo?
Basaha ang 1 Juan 1:5–6, nga mangita kon unsay makapugong kanato sa pag-angkon og pagpakigdait uban sa atong Langitnong Amahan.
Usa sa labing mahinungdanong mga tema sa sinulat ni Juan gipresentar sa 1 Juan 1:5—si Jesukristo mao ang Kahayag sa Kalibutan (tan-awa sa Juan 1:4–9; 8:12; 9:1–5). Paghunahuna og usa ka higayon nga literal ka nga naglakaw sa kangitngit. Ang paggamit ni Juan sa pulong nga kangitngit nagpasabut sa espirituhanong kangitngit.
Unsa kaha ang gipasabut nga maglakaw diha sa espirituhanong kangitngit?
Tun-i ang 1 Juan 1:7–2:6, nga mangita sa mga kamatuoran nga gitudlo ni Juan nga makatabang kanato nga masayud unsaon sa paglakaw diha sa kahayag sa ebanghelyo. Ang mga pulong halad-pasighiuli sa 1 Juan 2:2 nagpasabut sa usa ka maulaong sakripisyo nga motagbaw sa kaangayan sa Dios.
-
Sa imong scripture study journal, isulat ang pipila sa mga kamatuoran nga imong nailhan diha sa 1 Juan 1:7–2:6. Dayon hunahunaa kon unsaon nimo pagtubag ang mosunod nga mga pangutana:
-
Ngano kaha nga ang atong gugma alang sa Dios mahimong mas hingpit, o kompleto, kon mosunod kita sa Iyang mga sugo?
-
Kanus-a ka nakasinati og mas dakong gugma alang sa Dios sa dihang naningkamot ka sa pagsunod sa Iyang mga sugo?
-
Basaha ang mosunod nga paghulagway, nga mangita og piho nga sugo nga gipanglimbasugan nga sundon niining duha ka batan-on:
-
Usa ka batan-ong lalaki nagbasa sa mga kasulatan matag adlaw ug matinud-anong nagbuhat sa daghan niyang mga katungdanan sa priesthood, apan kanunay siya nga dili mabination ngadto sa iyang manghud nga lalaki.
-
Usa ka batan-ong babaye kanunay nga magtambungan sa iyang mga miting sa Simbahan ug nakadawat sa iyang Young Womanhood Recognition. Hinoon, kanunay siyang mohimo og bati nga mga komentaryo mahitungod sa pipila sa iyang mga kauban sa klase ug mga magtutudlo diha sa social media.
Unsa nga sugo ang gipanglimbasugan nga sundon niining duha ka batan-ong Santos sa Ulahing mga Adlaw? (Ribyuha ang scripture mastery passage nga Mateo 22:36–39 alang sa tabang sa pagtubag niini nga pangutana.)
Pamalandungi ang mga sitwasyon diin naglisud ka sa pagpakita og gugma alang sa uban.
-
Basaha ang 1 Juan 2:9–11; 4:7–11, 19–21, nga mangita kon unsay gitudlo ni Juan mahitungod sa gugma. Ikonsiderar ang pagmarka o pagtimaan sa mga pagtulun-an nga makahuluganon alang kanimo. Dayon tubaga ang mosunod nga mga pangutana diha sa imong scripture study journal:
-
Asa sa mga pagtulun-an ni Juan mahitungod sa gugma ang makahuluganon alang kanimo? Ngano man?
-
Usa ka baruganan nga atong mahibaloan niini nga mga bersikulo mao nga kon kita nahigugma sa Dios, kita mohigugma sa uban. Ngano kaha nga atong mapakita ang atong gugma alang sa uban kon kita tinud-anay nga nahigugma sa Dios?
-
Timan-i nga si Juan nagpasabut sa pagdumot sa uban diha sa 1 Juan 4:20. Adunay daghang mga paagi nga atong mapugngan ang atong gugma o pagkamabination ngadto sa uban gawas sa pagdumot kanila. Unsa kaha ang pipila niini nga mga paagi?
Basaha ang 1 Juan 3:17–18, nga mangita kon unsaon nato sa pagpakita sa atong gugma alang sa uban.
Ngano kaha nga importante nga atong ipakita ang atong gugma pinaagi sa atong mga lihok ug dili lamang pinaagi sa atong mga pulong?
Kinsa ang imong nailhan nga maayo nga ehemplo sa pagpakita og gugma ngadto sa uban?
Kon mahimo, tan-awa ang video nga giulohan og “Two Brothers Apart” nga makita sa LDS.org. Samtang magtan-aw ka, pangitaa kon sa unsang paagi kini nga mga managsuon mipakita og ehemplo niini nga baruganan ug unsay epekto niini diha sa matag usa kanila.
-
Paghunahuna og usa ka tawo diha sa imong kinabuhi nga mahimo nimong mapakitaan og dugang nga gugma. Sa imong scripture study journal, isulat ang pangalan nianang tawhana ug ang piho nga butang nga imong mahimo sa pagpakita sa imong gugma o pagkamabination ngadto niana nga tawo. Dili kinahanglan nga imong ipakita ang imong gugma sa pinasulabi nga paagi. Ang gagmay, yano nga mga buhat sa gugma ug pagkamabination sa kasagaran mao ang labing makahuluganon.
Kon atong ipakita ang atong gugma pinaagi sa atong mga lihok, kita naglakaw sama sa paglakaw ni Jesus, o nagpakabuhi sama sa gibuhat ni Jesus (tan-awa sa 1 Juan 2:6; 3:1–3). Ang Ginoo mopanalangin kanimo samtang imong gamiton kini nga kamatuoran sa imong kinabuhi.
Basaha ang 1 Juan 4:12, ug dayon basaha ang Hubad ni Joseph Smith, 1 Juan 4:12 (sa Giya ngadto sa mga Kasulatan, scriptures.lds.org). Unsa ang giklaro sa Hubad ni Joseph Smith kabahin sa pagkakita sa Dios?
Sa 1 Juan 5, si Juan mitudlo unsay atong buhaton aron matawo [igaanak] pag-usab, nga nagpasabut sa “pagbaton sa Espiritu sa Ginoo [nga] makahimo og usa ka dako nga kausaban diha sa kasingkasing sa usa ka tawo nga sa ingon siya wala nay tinguha sa pagbuhat og dautan, apan hinoon nagtinguha sa pagpangita sa mga butang sa Dios” (Giya ngadto sa mga Kasulatan, “Natawo sa Dios, Natawo Pag-usab,” scriptures.lds.org). Basaha ang mosunod nga mga tudling, ug ilista unsay angay natong buhaton aron matawo pag-usab:
1 Juan 5:18
-
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang 1 Juan ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: