Marcos 2–3

Pasiuna

Si Jesus mipasaylo ug miayo sa paralitiko nga tawo , ug Siya mitawag ni Mateo sa pagsunod Kaniya. Siya mitudlo sa mga escriba ug mga Pariseo mahitungod sa Adlaw nga Igpapahulay. Ang Manluluwas mipadayon sa pagpang-ayo sa daghang tawo, Siya mipadala sa Iyang mga Apostoles aron sa pagsangyaw, ug Siya mipasidaan batok sa pagpasipala batok sa Espiritu Santo.

Marcos 2:1–12

Si Jesus mipasaylo ug miayo sa paralitiko nga tawo

Hunahunaa nga adunay usa ka tawo nga imong gihigugma nga nag-antus gikan sa usa ka mahulgaon sa kinabuhi nga hagit sa lawas nga nagkinahanglan og espesyal nga pagtambal. Kinsa ang imong pangitaon aron matabangan ang imong minahal? Ngano man? Unsay andam nimong buhaton kon adunay usa lamang ka doktor kinsa makatabang, apan lisud ang pag-iskedyul og appointment niini nga doktor?

Sumala sa narekord sa Marcos 2:1–4, diha sa balangay sa Capernaum sa Galilea, adunay usa ka tawo nga “paralitiko” (Marcos 2:3), diin nagpasabut nga siya usa ka paralisado. Laing upat ka mga tawo miyayong kaniya ngadto sa balay diin anaa si Jesus, apan ang balay puno kaayo nga dili sila makasulod niini. Gibuslotan sa upat ka mga tawo ang bahin sa atop sa balay ug gitonton ang paralitiko nga tawo ngadto sa atubangan sa Manluluwas.

Basaha ang Marcos 2:5, nga mangita kon unsay gisulti ni Jesus ngadto sa tawo nga may paralisis.

Basaha ang Marcos 2:6–12, nga mangita kon unsay sunod nga nahitabo.

Timan-i nga “dihay pipila sa mga escriba” (Marcos 2:6) nga mga madudahon sa abilidad sa Manluluwas sa paghatag og kapasayloan sa sala. Ikonsiderar unsay gipangutana ni Jesus sa mga escriba (tan-awa sa Marcos 2:9).

Ang mosunod mao ang usa ka kamatuoran nga atong maila gikan sa istorya: Si Jesukristo adunay gahum sa pag-ayo kanato sa espirituhaon ug sa pisikal nga paagi.

Marcos 2:13–22

Si Jesus mitawag ni Mateo sa pagsunod Kaniya, ug Siya mikaon kauban sa mga maniningil sa buhis ug sa mga makasasala

Sa dihang ang mga escriba nakakita sa tawo nga may paralisis nga mibangon gikan sa iyang higdaanan ug milakaw, sila nahatagan og dili ikalimud nga ebidensya nga si Jesukristo adunay talagsaong gahum sa pag-ayo og masakiton, ug sila nakadungog sa Iyang pagpamatuod nga Siya makapasaylo og mga sala. Hinoon, dinhi niining istorya wala kini masayri kon kini nga mga tawhana miduol ba ni Jesus sa kadugayan ug nangayo og kapasayloan alang sa ilang kaugalingong mga sala.

Diha sa imong scripture study journal, paglista og mga rason ngano ang mga indibidwal dili magtinguha sa kapasayloan sa Ginoo alang sa ilang mga sala. Pangayo sa usa ka sakop sa pamilya o higala ang tabang sa paglista.

Samtang ikaw mopadayon sa pagtuon sa Marcos 2, pangita alang sa mga kamatuoran nga makaawhag kanimo nga magtinguha sa kapasayloan sa Ginoo.

Basaha ang Marcos 2:13–15, nga mangita kon unsay gibuhat sa Manluluwas human sa pag-ayo sa tawo nga paralitiko.

Si Levi sa kaulahian nailhan isip Mateo. Siya mao gihapon ang Mateo kinsa misulat sa Ebanghelyo ni Mateo. Ang mga pulong “naglingkod sa buhisanan” (Marcos 2:14) nagpasabut nga si Mateo usa ka maniningil sa buhis, “usa ka tigkolikta sa buhis alang sa mga Romano sa Capernaum, [ug] tingali nagserbisyo diha ni Herodes Antipas” (Giya ngadto sa mga Kasulatan, “Mateo,” scriptures.lds.org). Daghan nga mga Hudeo ang nasilag sa mga maniningil sa buhis tungod kay ang ilang panan-aw sa mga maniningil sa buhis mga maluibon kinsa nangulikta og kwarta gikan sa kaugalingon nilang mga tawo alang sa mga Romano.

Timan-i nga daghan nga mga maniningil sa buhis ug mga makasasala mitambong usab sa kapistahan ni Mateo uban ni Jesus ug sa Iyang mga tinun-an. Atol niini nga panahon, ang pakigsalo sa pagkaon nagpasabut og labaw pa sa basta nagsalo lamang og pagkaon. Kini nagpakita nga usa ka lig-on nga panaghigalaay ug kalinaw anaa taliwala niadtong nanambong.

Basaha ang Marcos 2:16, nga mangita kon sa unsang paagi nga ang mga escriba ug mga Pariseo mi-react sa dihang ilang nakita ang Manluluwas nga nagkaon kauban niini nga mga tawo.

Ngano kaha nga ang mga escriba ug mga Pariseo misaway ni Jesus tungod sa pagkaon uban sa mga maniningil sa buhis ug sa mga makasasala?

Basaha ang Marcos 2:17, nga mangita alang sa tubag sa Manluluwas ngadto sa mga pagpanaway sa mga escriba ug mga Pariseo. Ikonsiderar ang paglingin sa pulong nga gigamit sa Manluluwas sa paghulagway sa Iyang Kaugalingon.

Pinaagi sa paggamit sa pulong mananambal, ang Manluluwas misubli sa pag-angkon sa Iyang gahum sa pag-ayo sa espirituhaon ug pisikal nga paagi. Gikan sa bersikulo 17 atong makat-unan nga ang Manluluwas nagtinguha sa pagtabang kanato sa paghinulsol sa atong mga sala ug mamaayo.

Pamalandunga nganong importante nga motuo nga si Jesus nagtinguha sa pagtabang kanato sa paghinulsol ug mamaayo.

Si Elder Craig A. Cardon sa Kapitoan miingon:

“Nahigugma ang Ginoo kanato ug gusto nga kita makasabut sa Iyang pagkaandam sa pagpasaylo. …

“… Sa Iyang kalooy, mitugot Siya og kalamboan sa taas nga panahon kay sa pagpamugos sa diha-diha nga kahingpitan. Bisan sa kadaghan sa mga sala tungod sa kahuyang sa pagka-mortal, bisan kapila kita maghinulsol ug mangayo sa Iyang kapasayloan, Siya balik balik nga mopasaylo. [tan-awa sa Moroni 6:8].

“Tungod niini, kitang tanan, lakip niadtong nakigbisog sa pagbuntog sa mga makaadik nga kinaiya sama sa drugas o pornograpiya ug niadtong suod niini, makahibalo na ang Ginoo moila sa atong matarung nga mga paningkamot ug mahigugmaong mopasaylo kon makompleto. … Apan wala kini magpasabut nga ang usa ka tawo mahimong makasala pag-usab nga dili masilotan [gawasnon gikan sa mga sangputanan]” (“Ang Manluluwas Gusto nga Mopasaylo,” Ensign o Liahona, Mayo 2013, 16).

Palandonga kon parehas ka ba sa mga maniningil sa buhis ug sa mga makasasala (kinsa miila sa ilang panginahanglan alang sa Manluluwas ug miduol ngadto Kaniya) o parehas ba sa mga escriba ug mga Pariseo (kinsa wala miduol ngadto sa Manluluwas aron pangayoon ang Iyang kapasayloan ug makaayo nga gahum). Desisyoni karon sa pagduol ngadto sa Manluluwas ug tuguti Siya sa pagtabang kanimo sa imong mga panginahanglan sa pisikal ug sa espirituhanon.

Sumala sa narekord sa Marcos 2:18–22, si Jesus mitudlo nganong ang Iyang mga tinun-an wala magpuasa samtang Siya uban kanila. Siya mitudlo usab nganong lisud alang sa uban nga mga tawo sa pagdawat sa Iyang ebanghelyo (tan-awa usab sa Mateo 9:14–17).

Marcos 2:23–3:6

Si Jesus nagtudlo mahitungod sa Igpapahulay

Ikaw ba mipili sukad sa dili pag-apil sa usa ka kalihokan aron sa pagsunod sa kasugoan sa pagbalaan sa adlaw nga Igpapahulay? Sa imong pagpadayon sa pagtuon sa Marcos 2–3, palandonga ang mosunod nga pangutana: Sa unsa nga paagi ikaw nakahibalo kon ang usa ka kalihokan angay ba nga buhaton sa Igpapahulay?

Basaha ang Marcos 2:23-24 ug Marcos 3:1-2, nga mangita kon unsa ang gibuhat sa Manluluwas ug sa Iyang mga tinun-an nga ang mga Saduceo nagtuo nga usa ka paglapas sa balaod sa Igpapahulay.

Hinumdumi nga ang mga Judeo nga mga magtutudlo midugang sa ilang kaugalingong mga lagda ug mga paghubad, nga gitawag og oral nga balaod o tradisyon, ngadto sa balaod ni Moises. Kini nga mga lagda nga gidugang gituyo aron mapugngan ang paglapas sa balaod sa Dios, apan ilang gipugngan ang uban nga mga tawo sa pagsabut sa tinuod nga katuyoan sa piho nga mga kasugoan, lakip sa mando sa pagbalaan sa adlaw nga Igpapahulay.

Basaha ang Marcos 2:27–28, ug dayon timan-i kon giunsa sa pagpatin-aw diha sa Joseph Smith Translation kon ngano nga ang Ginoo mihatag kanato sa Igpapahulay:

“Busa ang Igpapahulay gihatag ngadto sa tawo alang sa usa ka adlaw nga pagpahulay; ug usab nga ang tawo kinahanglan mohimaya sa Dios, ug dili nga ang tawo kinahanglan dili mokaon;

“Ang adlaw nga igpapahulay gibuhat alang sa tawo, dili ang tawo alang sa adlaw nga igpapahulay; busa ang Anak sa tawo Agalon kang kinsa nailalum bisan pa ang adlaw nga Igpapahulay.” (Joseph Smith Translation, Marcos 2:26–27 [diha sa appendix sa Biblia]).

Basaha ang Marcos 3:3–5, nga mangita kon unsay gitudlo sa Manluluwas mahitungod sa pag-ayo sa nikuyos nga kamot sa tawo sa Igpapahulay.

Base sa unsay atong makat-unan gikan sa Joseph Smith Translation ug sa Marcos 3:3–5, kompletoha ang mosunod nga kamatuoran: Atong mapabilin nga balaan ang adlaw nga Igpapahulay pinaagi sa: .

Tubaga ang mosunod nga mga pangutana diha sa imong scripture study journal:
1. Sa unsa nga mga paagi kita makahimaya sa Dios sa Iyang balaan nga adlaw?
2. Unsa ang pipila ka mga ehemplo sa paghimo og mga maayong buhat sa Igpapahulay?

Basaha ang Doktrina ug mga Pakigsaad 59:9–13. Dayon basaha ang mosunod nga pamahayag ni Presidente James E. Faust sa Unang Kapangulohan, ug hunahunaa kon sa unsa nga paagi nga imong matino kon unsay tukma nga buhaton sa Igpapahulay:

“Hain man ang utlanan mahitungod sa unsay mahimo ug dili mahimo sa Igpapahulay? Sulod sa mga guideline, ang matag usa kanato kinahanglan gayud motubag niini nga pangutana alang sa atong mga kaugalingon. Samtang kini nga mga guideline, nasulod diha sa mga kasulatan ug sa mga pulong sa moderno nga mga propeta, nakulit usab kini diha sa atong mga kasingkasing ug gidumala pinaagi sa atong konsensya. … Tingali walay bisan unsang bug-at nga kalapasan sa pagsimba sa Igpapahulay kon kita magmapainubsanon sa atubangan sa Ginoo ug ihalad kaniya ang atong tibuok kasingkasing, kalag, ug ang atong hunahuna. (Tan-awa sa Mat. 22:37.)

“Unsa ang takus o dili takus diha sa adlaw nga Igpapahulay mahimong mahukman pinaagi sa matag usa kanato sa pagpaningkamot nga magmatinud-anon uban sa Ginoo. Sa adlaw sa Igpapahulay kinahanglan atong himoon ang angay gayud natong buhaton sa kinaiya sa pagkamasimbahon ug unya limitahan ang uban natong mga kalihokan” (“The Lord’s Day,” Ensign, Nob. 1991, 35).

Tubaga ang mosunod nga mga pangutana diha sa inyong scripture study journal:
1. Sa unsang paagi nga gibati nimong napanalanginan samtang ikaw naningkamot sa pagsimba sa Dios ug naghimo og maayong mga buhat sa Igpapahulay?
2. Unsay usa ka paagi nga imong mas mapabalaan ang adlaw sa Igpapahulay?

Marcos 3:7–35

Si Jesus nag-ayo og daghang mga tawo, nagpadala sa Iyang mga Apostoles aron sa pagsangyaw, ug nagpasidaan sa uban mahitungod sa pagpasipala

Sumala sa narekord sa Marcos 3:7–35, si Jesus miadto sa dagat sa Galilea ug nang-ayo og daghang mga tawo kinsa misunod Kaniya didto, lakip sa uban nga nasudlan og mahugaw nga mga espiritu. Human sa pagpili sa Napulog Duha ka mga Apostoles, si Jesus miorden kanila ug mipadala kanila aron sa pagsangyaw, pag-ayo, ug pagpapahawa og mga yawa. Siya dayon mipasidaan sa mga escriba mahitungod sa pagsulti og pasipala batok sa Espiritu Santo ug mitudlo nga ang Iyang pamilya mao ang mga tawo kinsa nagbuhat sa kabubut-on sa Langitnong Amahan. Imong nakat-unan ang mahitungod sa uban niining mga panghitabo sa dihang imong gitun-an ang Mateo 12:22–35.

Isulat ang mosunod diha sa ubos sa mga assignment karong adlawa sa imong scripture study journal:

Akong natun-an ang Marcos 2–3 ug nakompleto kini nga leksyon sa (petsa).

Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: