Pasiuna sa Mga Taga-Roma
Nganong Kinahanglang Tun-an Kini nga Basahon?
Ang Sulat ngadto sa mga Taga-Roma mao ang labing taas sa mga sulat ni Apostol Pablo ug gitan-aw sa daghang mga tawo isip iyang labing mahinungdanon. Kini nga sulat naglangkob sa iyang labing kompleto nga pagpasabut sa doktrina sa kapaangayan pinaagi sa hugot nga pagtuo diha ni Jesukristo kay sa mga pagtuman sa balaod ni Moises. Kini naglangkob sa daghang mga pagtulun-an mahitungod sa mga doktrina sa kaluwasan ug sa praktikal nga paggamit niadtong mga doktrina sa inadlaw nga kinabuhi. Pinaagi sa imong pagtuon niini nga sulat, makaangkon ka og mas dakong pagtamud sa Pag-ula ni Jesukristo ug sa paglaum ug kalinaw nga makaplagan sa tanang tawo diha kang Kristo.
Kinsa ang Nagsulat Niini nga Basahon?
Si Apostol Pablo mao ang tagsulat sa Sulat ngadto sa mga Taga-Roma (tan-awa sa Mga Taga-Roma 1:1). Sa pagsulat niini nga sulat, si Pablo migamit sa tabang sa usa ka tigsulat, si Tercio, kinsa misulat sa iyang kaugalingong pagtimbaya ngadto sa mga Santos sa Roma duol sa katapusan sa sulat (tan-awa sa Mga Taga-Roma 16:22).
Kanus-a ug Diin Kini Gisulat?
Si Pablo misulat sa iyang Sulat ngadto sa mga Taga-Roma gikan sa Corinto sa hinapos nga bahin sa iyang ikatulo nga misyonaryong panaw. Pipila ka mga timailhan nagsugyot nga siya misulat niini nga sulat sulod sa tulo ka bulan nga siya nagpabilin didto sa Corinto (tan-awa sa Mga Buhat 20:2–3; ang pulong nga Gresya niini nga mga bersikulo nagpasabut sa Corinto), posible tali A.D. 55 ug 56. (Tan-awa sa Giya ngadto sa mga Kasulatan, “Epistola ni Pablo, Mga.”)
Para kang Kinsa Kini Gisulat ug Ngano?
Ang Sulat ni Pablo ngadto sa mga Taga-Roma gitumong ngadto sa mga miyembro sa Simbahan didto sa Roma (tan-awa sa Mga Taga-Roma 1:7). Ang sinugdanan sa Simbahan didto sa Roma wala masayri apan tingali naestablisar human dayon sa adlaw sa Pentecostes, sa diha nga ang mga Judeo nga mibisita gikan sa Roma nakadungog sa pagsangyaw ni Pedro (tan-awa sa Mga Buhat 2:10). Bisan tuod si Pablo wala pa makaadto sa Roma, misulat siya og mga pagtimbaya ngadto sa piho nga mga Santos nga iyang nailhan tungod kay nahimamat niya kanhi o pinaagi sa uban nga nakapuyo sa Roma, sama ni Priscila ug Aquila (tan-awa sa Mga Buhat 18:1–2, 18; Mga Taga-Roma 16:1–16, 21).
Maingon og adunay dili mominos tulo ka importanteng mga rason nganong si Pablo mipadala niini nga epistola ngadto sa mga taga-Roma:
(1) Aron sa pag-andam alang sa iyang umaabut nga pag-abut sa Roma. Sulod sa mga katuigan si Pablo gusto nga mosangyaw sa ebanghelyo didto sa Roma (tan-awa sa Mga Buhat 19:21; Mga Taga-Roma 1:15; 15:23). Naglaum usab siya nga ang Simbahan didto sa Roma magsilbing sukaranan diin makaserbisyo siya og misyon ngadto sa España (tan-awa sa Mga Taga-Roma 15:22–24, 28).
(2) Aron sa pagklaro ug pagpanalipod sa iyang mga pagtulun-an. Si Pablo nag-atubang og pabalik-balik nga oposisyon gikan sa mga indibidwal nga wala makasabut o mituis sa iyang mga pagtulun-an kabahin sa balaod ni Moises ug hugot nga pagtuo diha kang Kristo (tan-awa sa Mga Buhat 13:45; 15:1–2; 21:27–28; Mga Taga-Roma 3:8; 2 Pedro 3:15–16). Siya adunay klaro nga rason nga magduda nga ang ingon nga sayop nga pagsabut nakaabut na sa mga miyembro sa Simbahan didto sa Roma, mao nga misulat siya sa paghupay sa bisan unsang kabalaka sa dili pa siya moabut.
(3) Aron sa pag-awhag og pagkahiusa tali sa mga Judeo ug sa hentil nga mga miyembro sa Simbahan. Sa hapit na mosulat si Pablo niini nga sulat, ang mga Kristiyanos nga Judeo kinsa gipapahawa ni emperador Claudio gikan sa Roma (tan-awa sa Mga Buhat 18:2) misugod sa pagbalik ngadto sa Roma ug ngadto sa mga kongregasyon nga gilangkuban kasagaran sa hentil nga mga Kristiyanos. Kini nga sitwasyon tingali maoy hinungdan sa panangbingkil ug mga problema tali sa Judeo ug hentil nga mga Kristiyanos. Isip “apostol sa mga Hentil” (Mga Taga-Roma 11:13), si Pablo nagtinguha sa paghiusa sa mga hentil nga kinabig ngadto sa Simbahan; apan isip usa ka Judeo (tan-awa sa Mga Taga-Roma 11:1), mibati usab siya og dakong tinguha nga ang iyang kaugalingon nga mga katawhan modawat sa ebanghelyo. Iyang gipasiugdahan ang paghiusa sa Simbahan pinaagi sa pagtudlo kon sa unsang paagi ang mga doktrina sa ebanghelyo magamit sa tanang mga Santos (tan-awa sa Mga Taga-Roma 3:21– 4:25; 11:13–36; 14:1–15:13).
Unsa Ang Pipila Ka Mga Butang nga Nakalahi Niini nga Basahon?
Human sa pangbukas nga pagtimbaya, ang sulat nagsugod sa usa ka pamahayag sa tema niini: “Ang Maayong Balita [ebanghelyo ni Kristo] … mao ang gahum sa Dios alang sa kaluwasan” sa tanan nga “mabuhi … pinaagi sa pagtuo” ni Jesukristo (Mga Taga-Roma 1:16–17).
Bisan tuod ang Sulat ni Pablo ngadto sa mga Taga-Roma adunay importante nga bahin sa kasaysayan sa Kristiyanismo, kini usab, sa walay swerte, mao “ang tinubdan sa mas daghang sayop nga pagsabut, sayop nga paghubad, ug kalibug kay sa bisan unsa nga basahon sa Biblia,” sumala ni Elder Bruce R. McConkie sa Korum sa Napulog Duha ka mga Apostoles (Doctrinal New Testament Commentary, 3 vols. [1965–73], 2:211). Bisan taliwala sa nag-unang mga Kristiyano, ang mga sinulat ni Pablo giisip nga “malisud sabton,” ug ang iyang mga pagtulun-an usahay gituis ug gisayop pagpasabut (2 Pedro 3:15–16).
Outline
Mga Taga-Roma 1–3. Si Pablo nagpasabut sa doktrina sa kapaangayan pinaagi sa hugot nga pagtuo diha ni Jesukristo. Siya nagpasabut sa kahimtang sa pagkamakasasala nga nag-atubang sa tanang katawhan ug nagtudlo nga ang solusyon sa Dios niini nga problema alang sa tanang mga tawo mao ang Pag-ula ni Jesukristo. Pinaagi sa matinud-anong pagdawat sa Pag-ula ni Jesukristo, ang tanang katawhan mahatagan og kaangayan (mapasaylo) ug makadawat og kaluwasan.
Mga Taga-Roma 4–8. Si Pablo nagkutlo sa ehemplo ni Abraham aron sa paghulagway sa doktrina sa kapaangayan pinaagi sa hugot nga pagtuo. Siya nagpatin-aw sa doktrina sa kaluwasan ug nagtudlo kon sa unsang paagi kaadto nga mga doktrina nakaapekto sa kinabuhi sa tanan nga adunay hugot nga pagtuo diha kang Kristo.
Mga Taga-Roma 9–16. Si Pablo nagsulat kabahin sa pinili nga kahimtang sa Israel, ang kasamtangang pagsalikway sa ebanghelyo, ug sa umaabut nga kaluwasan. Siya nagtambag sa mga miyembro sa Simbahan nga Judeo ug hentil sa pagsunod sa ebanghelyo aron adunay kalinaw ug panaghiusa sa Simbahan. Naghangyo siya sa mga Santos sa Roma nga magpadayon sa pagsunod sa mga sugo.