Unit 7: Day 3

Marcos 1

Pasiuna

Si Juan Bautista nagsangyaw “mahitungod sa bautismo sa paghinulsol alang sa kapasayloan sa mga sala” (Marcos 1:4) Pagkahuman bunyagi ni Juan si Jesus, ang Manluluwas misugod sa pagsangyaw sa ebanghelyo ug nagbuhat ug mga milagro pinaagi sa balaanong gahum ug awtoridad. Siya mipapahawa sa mga mahugaw nga espiritu ug miayo sa sanlahon. Ang balita sa unsay Iyang nabuhat mikatap sa tibuok Galilea.

Marcos 1:1–20

Nagsugod si Jesus sa Iyang pagpangalagad

1. Paghangyo og duha o mas daghang tawo (sakop sa pamilya, mga higala, kauban sa klase, o uban pa) sa pagpakigbahin sa ilang pagpamatuod ni Jesukristo uban kanimo. Mahimo nimo silang hatagan og panahon sa pagpamalandong ug pagpangandam sa dili pa mopakigbahin sa ilang mga pagpamatuod uban kanimo. Sa imong scripture study journal, isulat ang usa ka minubo nga mga kamatuoran nga ilang gipakigbahin.

Ikonsiderar ang mosunod nga mga pangutana:

• Unsay bililhon mahitungod sa pagpamati og mga pagpamatuod gikan sa pipila ka mga tawo kaysa gikan lamang sa usa ka tawo?

• Unsa kaha sa imong hunahuna ang mahimong bililhon mahitungod sa pagtuon sa pagpamatuod ni Marcos, karon nga imong natun-an ang pagpamatuod ni Mateo?

Basaha ang Marcos 1:1–4, 9–11, nga mangita sa panghitabo diin si Marcos misugod sa iyang istorya sa kinabuhi sa Manluluwas.

Ang istorya ni Marcos sa kinabuhi sa Manluluwas lahi gikan sa kang Mateo. Kalit ang pagsugod niini ug paspas ang dagan sa istorya, naghatag og gibug-aton sa kabalaan sa Manluluwas pinaagi sa pagtutok diha sa Iyang mga buhat ug mga milagro. Si Marcos tingali misulat sa iyang istorya base sa unsay iyang nakat-unan gikan ni Apostol Pedro. Daghan nga mga eskolar mituo nga kini gisulat tali sa A.D. 66 ug A.D. 73, sa usa ka panahon sa dihang ang mga Kristyano sa tibuok Kagamhanan sa Romano nag-antus sa grabeng pagpanggukod.

Sa Marcos 1:12–20 atong mabasa nga human si Jesus mipuasa sulod sa 40 ka mga adlaw, Siya gitintal sa yawa (tan-awa usab sa Mateo 4:1–11). Siya usab misangyaw bahin sa paghinulsol didto sa Galilea ug mitawag og mga tinun-an aron mosunod Kaniya.

Marcos 1:21–39

Si Jesus mipapahawa sa mga yawa ug miayo sa mga masakiton

Unsa nga mga kakuyaw ang tingali atubangon sa usa ka sundalo diha sa teritoryo sa mga kaaway?

Basaha ang mosunod nga pamahayag ni Presidente Boyd K. Packer, sa Korum sa Napulog Duha ka mga Apostoles:

“Sa tanang panghitabo sa kalibutan, sa pagkunhod sa moral nga mga sumbanan, kamong mga batan-on gipadako sa teritoryo sa kaaway.

“Atong nasayaran gikan sa mga kasulatan nga dihay gubat sa langit ug nga si Lucifer nakigbatok ug, uban sa iyang sumusunod, ‘gitambog ngadto sa yuta’ [Pinadayag 12:9]. Determinado siya sa pagbalda sa plano sa atong Langitnong Amahan ug nagtinguha sa pagkontrolar sa mga hunahuna ug lihok sa tanan” (“Tambag ngadto sa mga Kabatan-onan,” Ensign o Liahona, Nob. 2011, 16).

2. Tubaga ang mosunod nga pangutana diha sa imong scripture study journal: Gikan sa gitudlo ni Presidente Packer, ug gikan sa imong kaugalingong mga kasinatian, sa unsang mga paagi nga ang atong kinabuhi dinhi sa yuta nahisama nga anaa sa teritoryo sa kaaway?

Ikonsiderar ang mga panahon sa imong kinabuhi sa dihang imong gibati nga nabug-atan tungod sa dautang mga impluwensya ug mga tintasyon nga naglibut kanimo. Samtang ikaw nagtuon sa Marcos 1:21–37, pangita og usa ka kamatuoran nga makatabang kanimo sa higayon nga ikaw nag-atubang sa mga dautang impluwensya ug mga tintasyon.

Basaha ang Marcos 1:21–22, nga mangita kon unsay gibuhat ni Jesus diha sa Capernaum ug sa unsang paagi mitubag ang mga Hudeo.

Nganong nahingangha ang mga Hudeo sa mga pagtulun-an sa Manluluwas?

Ang mga escriba nga gihisgutan diha sa bersikulo 22 giisip nga mga batid sa balaod ni Moises. Sila maoy “pagatawgon usahay og mga abogado o mga doktor sa balaod. Sila detalyado nga miugmad sa balaod ug migamit niini sa mga kahimtang sa ilang panahon” (Giya ngadto sa Kasulatan, “Escriba,” scriptures.lds.org). Kon sila nagsangyaw kanunay nilang gikutlo ang kanhi nga mga awtoridad diha sa balaod. Agig kalahian, si Jesus namulong uban sa gahum ug awtoridad sa Iyang Amahan. Siya usab mao ang Halangdon nga Jehova kinsa mihatag sa balaod ni Moises. Ang Hubad ni Joseph Smith nagtudlo nga “siya mitudlo kanila isip usa nga adunay awtoridad gikan sa Dios, ug dili isip nakaangkon og awtoridad gikan sa mga escriba” (Hubad ni Joseph Smith, Mateo 7:37).

Samtang si Jesus mitudlo diha sa sinagoga, Siya nakasugat og usa ka tawo nga gisudlan og usa ka mahugaw , o dautan, nga espiritu. Basaha ang Marcos 1:23–26, nga mangita kon unsay nahibaloan sa mahugaw nga espiritu mahitungod ni Jesus.

Kon anaa kini, mahimo nimong tan-awon ang video “Jesus Heals a Possessed Man” (1:48) gikan sa The Life of Jesus Christ Bible Videos, anaa sa LDS.org, nga mangita kon unsay nahibaloan sa mahugaw nga espiritu mahitungod ni Jesus.

Ang dautang mga espiritu nga nagtinguha sa pagsulod sa pisikal nga mga lawas mao ang mga sumusunod ni Lucifer. Nagpuyo sila didto sa presensya sa Langitnong Amahan ug ni Jesukristo sa wala pa sila gipapahawa gikan sa langit.

Kon ikaw anaa didto sa sinagoga kaniadto ug imong nakita unsay nahitabo, unsa ang imong mahunahuna mahitungod ni Jesus?

Basaha ang Marcos 1:27–28, nga mangita kon sa unsang paagi ang mga tawo mitubag human nakakita ni Jesus nga mipapahawa sa mahugaw nga mga espiritu diha sa tawo.

Usa ka kamatuoran nga atong makat-unan gikan niini nga istorya mao nga ang Manluluwas adunay gahum ibabao sa yawa ug sa iyang mga sumusunod.

3. Tubaga ang mosunod nga pangutana diha sa imong scripture study journal: Sa unsang paagi nga ang pagkahibalo nga ang Manluluwas adunay gahum ibabaw sa yawa ug sa iyang mga sumusunod makatabang kanimo sa panahon nga ikaw mobati nga nabug-atan tungod sa dautan nga mga impluwensya ug mga tintasyon nga naglibut kanimo?

Basaha ang mosunod nga mga pamahayag ni Presidente James E. Faust sa Unang Kapangulohan, ug markahi unsay atong mahimo aron makadawat og mas dakong gahum sa pagbatok sa yawa:

“Ang Propeta Joseph Smith … mipahayag, ‘Ang dautan nga mga espiritu adunay ilang mga utlanan, mga kinutuban, ug mga balaod pinaagi diin sila gidumala’ [sa History of the Church, 4:576]. Busa si Satanas ug ang iyang mga anghel dili gayud gamhanan. …

“… ang mga paningkamot ni Satanas mahimong mababagan sa tanan kinsa moduol ngadto kang Kristo pinaagi sa pagkamasulundon ngadto sa mga pakigsaad ug mga ordinansa sa ebanghelyo. Ang mapainubsanon nga mga sumusunod sa balaan nga Agalon dili kinahanglan nga malingla sa yawa. Si satanas dili motabang ug mobayaw ug mopanalangin. Iyang pasagdan kadtong iyang nagunitan diha sa kaulaw ug kauyamot. Ang espiritu sa Dios mao ang usa ka impluwensya nga matinabangon ug mabayawon” (“Serving the Lord and Resisting the Devil,” Ensign, Sept. 1995, 6, 7).

Ang Propeta Joseph Smith mitudlo: “Kita mianhi dinhi sa yuta aron kita makaangkon og lawas ug ipresentar kini nga putli diha sa atubangan sa Dios sa celestial nga gingharian. Ang dakong baruganan sa ebanghelyo naglangkob sa pag-angkon og usa ka lawas. Ang yawa walay lawas, ug kini mao ang iyang silot. Siya ganahan kon siya makaangkon og tabernakulo sa tawo, ug sa diha nga gihinginlan sa Manluluwas siya mihangyo sa pag-adto sa panon sa mga baboy,[tan-awa sa Marcos 5:1–13], nagpakita nga mipili siya sa lawas sa baboy kay sa wala. Ang tanang mga binuhat kinsa adunay mga lawas adunay gahum niadtong wala.” (Mga Pagtulun-an sa mga Presidente sa Simbahan: Joseph Smith [2007], 253).

Basaha ang Marcos 1:28, nga mangita kon unsay nahitabo human ang Manluluwas mipapahawa sa dautang espiritu.

Si Simon Pedro minyo, ug diha sa Marcos 1:29–31 atong mabasa nga ang Manluluwas miayo sa hilanat sa iyang ugangang babaye. Sa Marcos1:32–39 atong mabasa nga si Jesus miayo sa daghan pa kinsa masakiton, mipapahawa og mga yawa, ug mipadayon sa pagsangyaw didto sa tibuok Galilea.

Marcos 1:40–45

Si Jesus nag-ayo og usa ka sanlahon

Basaha ang Marcos 1:40, nga mangita kon kinsa ang miduol sa Manluluwas samtang Siya mipadayon sa pagsangyaw didto sa Galilea.

Kon anaa kini, mahimo nimong tan-awon ang video “Leksyon 18: New Testament Customs—Leprosy (1:01), anaa sa LDS.org.

Sa karaang panahon ang usa ka tawo nga nataptan og sanla gitawag og usa ka sanlahon. “Ang sanla usa ka laygay [chronic] nga sakit nga moataki sa panit, mga kaugatan, mga mata, mga bukog, ug mga lutahan. Kon mapasagdan, magpadayon kini nga mobalda sa mga biktima niini sa dili pa sila ibutang sa masakit nga kamatayon. Ang mga sanlahon sa karaang panahon sa Israel gi-quarantine- [gipugos sa pagpapuyo sa gawas sa lungsod], gimandoan nga mosinggit og ‘Hugaw!’ aron sa pagpasidaan ni bisan kinsa nga maduol kanila, ug giisip nga manakod sa ilang kahugaw ngadto ni bisan kinsa nga maduol kanila (tan-awa sa Levitico 13:45–46)” (New Testament Student Manual [manwal sa Church Educational System, 2014], 103).

Hunahunaa nga ikaw usa ka sanlahon sa panahon ni Jesukristo. Sa unsang paagi nga ang pagkasanlahon makaapekto sa imong kinabuhi?

Basaha ang Marcos 1:40, nga mangita alang sa unsa ang gihimo sa sanlahon sa dihang nakakita siya sa Manluluwas. (Ang pulong pangamuyo nagpasabut og paghangyo o pakilooy.)

Giunsa sa pagpakita sa sanlahon ang iyang hugot nga pagtuo diha ni Jesukristo?

Ang mga pulong nga “kon buot ka” nagpasabut nga ang tawo miila nga ang iyang pagkaayo nag-agad sa kabubut-on sa Manluluwas. Basaha ang Marcos 1:41–42, nga mangita kon sa unsa nga paagi ang Manluluwas mitubag sa mga pakilooy sa tawo.

Palandonga ang mosunod nga mga pangutana:

• Kon ikaw pa kadto ang sanlahon, unsa man ang kahulugan niini nganha kanimo nga gihikap sa Manluluwas? Ngano man?

• Sa unsang paagi nga ang imong kinabuhi mausab kon si Jesus moayo sa imong sanla?

Samtang imong gibasa ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles, markahi ang mga pamaagi nga siya miingon nga ang sanla ikatandi ngadto sa sala (tan-awa sa Levitico 14): “Ang sanla sa mga kapanahonan sa biblia, agig dugang sa grabeng pisikal nga mga kadaot, gitan-aw nga usa ka simbolo sa sala ug kahugaw, nagpasabut nga samtang kining dautan nga sakit mokutkot ug moguba sa pisikal nga lawas, ingon man ang sala mokutkot ug modaut sa espirituhanon nga bahin sa tawo. … Adunay mga panahon diha sa Daang Tugon—si Miriam, Gehazi, ug Uzzias—diin ang masinupakon nga mga tawo gitunglo og sanla isip usa ka silot alang sa ilang dautan nga binuhatan” (The Mortal Messiah: From Bethlehem to Calvary, 4 vols. [1979–81], 2:45).

Importante kining mahinumduman nga ang mga sakit sama sa sanla dili sala ang nakaingon. Apan adunay usa ka pagkasusama tali sa mga epekto sa sanla ug sa mga epekto sa sala. Basaha pag-usab ang: Marcos 1:40–42. Niining panahona, ilisi ang pulong makasasala og sanlahon ug sala alang sa sanla. Samtang ikaw nagbasa, tan-awa kon sa unsang paagi atong mapahisama kining pagkaayo sa mga sanlahon ngadto sa atong pagkahimong limpyo gikan sa sala.

Ipahisama sa mga Kasulatan

Ang pagpahisama sa mga kasulatan mao ang pagtandi niini nganha sa imong kaugalingon nga kinabuhi. Samtang imong makita ang pagkasusama tali sa imong mga kasinatian ug niadtong gihulagway diha sa mga kasulatan, mas maayo nimong maila ang mga doktrina ug mga baruganan sa ebanghelyo. Imo usab makita kon unsaon nimo sa paggamit kini nga mga doktrina ug mga baruganan diha sa imong kinabuhi.

Samtang ikaw magbasa sa bersikulo niini nga paagi, unsa nga mga pulong ang nagsugyot sa ideya nga gipasaylo?

Sa unsang paagi nga atong mahisama ang gibuhat sa sanlahon aron malimpyo gikan sa sanla ngadto sa unsay atong kinahanglan buhaton aron malimpyohan gikan sa sala?

Usa ka baruganan nga atong makat-unan pinaagi sa pagpahisama sa pag-ayo sa sanlahon ngadto sa nalimpyo gikan sa sala mao nga samtang kita may hugot nga pagtuo ug moduol ngadto sa Manluluwas, Siya adunay kapuangod ngari kanato ug molimpyo kanato gikan sa sala. Ikonsiderar ang pagsulat niining kamatuoran diha sa margin sa imong mga kasulatan sunod sa Marcos 1:40–42.

4. Tubaga ang mosunod nga mga pangutana diha sa inyong scripture study journal:

   1. Sa unsa nga mga pamaagi nga kinahanglan gayud nato ang hugot nga pagtuo ug moduol ngadto sa Manluluwas aron nga Siya makalimpyo kanato sa atong mga sala?

   2. Ikonsiderar pag-usab kon sama sa unsa ang kinabuhi sa sanlahon sa wala pa ug sa pagkahuman nga siya naayo na. Sa unsang paagi nga ang pagduol ngadto ni Jesukristo aron malimpyo gikan sa sala makapausab sa kinabuhi sa tawo?

   3. Kanus-a ka nakakita nga ang kinabuhi sa usa ka tawo nausab human nga nalimpyohan gikan sa sala pinaagi sa gahum sa Pag-ula ni Kristo?

Pamalandonga unsa nga mga sala ikaw kinahanglan nga malimpyo . Samtang ikaw magpaduol ngadto sa Manluluwas pinaagi sa hugot nga pagtuo diha Kaniya pinaagi sa pag-ampo, paghinulsol, ug pagkamasulundon, Siya makalimpyo kanimo.

Basaha ang Marcos 1:43–45, nga mangita alang sa mga instruksyon nga gihatag sa Manluluwas sa naayo nga sanlahon. Ang balaod ni Moises nagkinahanglan niadtong naayo sa sanla sa pagpakita sa ilang mga kaugalingon ngadto sa usa ka pari sa templo. Human ang pari mipahayag sa sanlahon nga naayo na, usa ka halad pagahimoon diin ang sanlahon mahimong ideklarar nga limpyo, nagtugot na usab kaniya og hingpit nga pakigdait uban sa iyang pamilya ug diha sa katilingban.

Unsay gibuhat sa tawo human ang Manluluwas mipasidan-an kaniya batok sa pagpanabi sa uban?

Unsa ang nahitabo tungod kay gisabwag sa tawo ang balita sa iyang pagkaayo?

5. Isulat ang mosunod diha sa ubos sa mga assignment karong adlawa sa imong scripture study journal:

   Akong natun-an ang Marcos 1 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: