Mipamatuod si Jesukristo nga si Juan Bautista gipadala sa pag-andam sa dalan alang Kaniya, ug misaad Siya og kapahulayan ngadto sa tanan kinsa moduol ngadto Kaniya. Mitubag Siya sa mga pasangil sa mga Pariseo nga ang Iyang gahum gikan sa yawa. Mipahimatngon Siya kanila batok sa paghimo og bakak nga mga pasangil ug pagpangita og mga timailhan, ug Siya mitudlo sa sambingay sa balay nga walay nagpuyo.
Mipamatuod si Jesukristo nga si Juan Bautista gipadala sa pag-andam sa dalan alang Kaniya
Imahe
naka-uniporme nga opisyal sa pulis, doktor nga nagpakita og mga x-ray, Ginoong Jesukristo
Nganong importante ang mahibalo nga ang mga tawo kinsa nagpresentar sa ilang mga kaugalingon isip mga opisyal sa pulis o mga doktor tinuod nga mao gayud kon unsa sila nga makita? Unsaon ninyo pagkahibalo nga sila mao gayud kon unsa sila nga makita?
Sa panahon sa mortal nga pangalagad ni Jesukristo, samtang Siya naghimo og mga milagro ug nagtudlo sa katawhan, daghan ang nagtinguha nga mahibalo kon Siya mao ba sama nga Siya nagpakita—ang gisaad nga Mesiyas. Niining panahona giaresto ug gibilanggo ni Haring Herod si Juan Bautista. Basaha ang Mateo 11:2–3, nga mangita kon giunsa ni Juan Bautista pagtabang ang duha sa iyang mga disipulo pag-angkon og pagpamatuod alang sa ilang mga kaugalingon kon kinsa si Jesus.
Unsay gisugo ni Juan sa iyang mga disipulo nga ipangutana ni Jesus?
Niini nga pangutana diha sa bersikulo 3, ang mga disipulo ni Juan nangutana ni Jesus kon Siya ba ang Mesiyas. Hinumdumi nga si Juan Bautista nakahibalo na nga si Jesus mao ang Mesiyas (tan-awa sa Mateo 3:11, 13–14; Juan 1:29–34).
Ngano sa imong hunahuna gisugo ni Juan ang iyang mga disipulo sa pag-ila sa ilang mga kaugalingon kon si Jesus mao ba ang Mesiyas nga siya nakahibalo na man kinsa si Jesus?
Basaha ang Mateo 11:4-5, nga mangita kon giunsa pagtubag ni Jesus ang ilang pangutana.
Kay sa motando lamang nga Siya mao ang Mesiyas, gidapit ni Jesus ang mga disipulo ni Juan Bautista sa pagpabuhat og unsa?
Sayon unta nga masultihan ni Jesus ang mga disipulo ni Juan nga Siya mao ang Mesiyas. Hinoon, gidapit Niya sila sa pagpamalandong sa Iyang mga buhat ug dayon mobalik ngadto ni Juan ug mopamatuod sa mga butang nga ilang nadungog ug nakita nga gibuhat ni Jesus.
Sa unsa kaha nga paagi ang pagpamalandong sa mga buhat ni Jesus nakatabang sa mga disipulo ni Juan Bautista sa pagdawat og mas gamhanang pagsaksi kalabut sa Manluluwas kay sa Iyang gisulti lamang kanila kon kinsa Siya?
Gikan niini nga istorya atong nakat-unan nga samtang kita maninguha sa pagkat-on kalabut ni Jesukristo ug samtang kita magpamatuod Kaniya, ang atong kaugalingon nga pagpamatuod Kaniya mahimong malig-on.
Diha sa imong scripture study journal, pagsulat mahitungod kon giunsa nimo pagkahibalo diha sa imong kaugalingon nga si Jesukristo mao ang Anak sa Dios.
Ang Mateo 11:7–27 nagrekord nga human ang duha ka disipulo mibiya, misulti si Jesus sa pundok sa katawhan nga si Juan Bautista mao ang propeta nga napili sa pag-andam sa dalan alang sa Mesiyas. Gipanghimaraut ni Jesus kadtong kinsa misalikway Kaniya ug ni Juan Bautista bisan pa og nakasaksi og tataw nga mga ebidensya sa pagkabalaan ni Jesus.
Basaha ang Mateo 11:28–30, nga mangita sa imbitasyon ug sa saad nga gitanyag ni Jesus ngadto sa tanan niadtong kinsa modawat Kaniya isip ang Mesiyas. (Ang Mateo 11:28–30 usa ka scripture mastery passage. Mahimo nimong markahan kini nga kasulatan sa lahi nga paagi aron dali nimo kining madumduman.)
Kompletuha ang mosunod nga baruganan pinasikad sa unsay imong nakat-unan gikan sa mga bersikulo 28–30: Kon kita moduol ngadto ni Jesukristo, Siya mo .
I-rekord ang imong tubag sa mosunod nga pangutana diha sa imong scripture study journal: Kanus-a nimo gibati nga ang Manluluwas mihupay sa imong mga palas-anon samtang ikaw miduol ngadto Kaniya?
Aron sa pagtabang nimo sa pagmemorya sa Mateo 11:28–30, paghimo og mga aksyon nga morepresentar og mga pulong sa kada bersikulo. Itudlo kini nga mga aksyon ngadto sa laing tawo (sama sa mga miyembro sa pamilya panahon sa family home evening o sa usa ka higala). Pagbansay sa pagpasundayag sa mga aksyon samtang nagbasa sa mga bersikulo hangtud ikaw maka-recite sa tudling nga na memorya. Diha sa imong scripture study journal, pagsulat og sentence nga nagpakita nga imong nakompleto kini nga buluhaton.
Gibadlong ni Jesukristo ang mga Pariseo tungod sa ilang bakak nga mga pasangil ug sa pagpangita og mga timailhan
Imahe
Si Kristo ug ang mga Pariseo
Atong nakat-unan diha sa Mateo 12:1–21 nga human maayo ni Jesus ang usa ka tawo sa Igpapahulay nga adlaw, ang pipila sa mga Pariseo misugod sa pagtinguha sa pagpatay Kaniya. Sa diha nga Iyang giayo ang usa ka tawo nga gisaniban og yawa, misulay sila sa pagdaot sa dungog Niya diha sa atubangan sa mga tawo pinaagi sa pagpasangil kaniya nga naghimo niadtong mga buhat pinaagi sa gahum sa yawa. Si Jesus nahibalo sa ilang mga hunahuna ug mipahayag sa tinuoray nga, hinoon, pinaagi sa pagpapahawa og mga yawa nagpakita Siya nga Siya mao ang Mesiyas ug nagtukod sa gingharian sa Dios.
Basaha ang Mateo 12:30, nga mangita sa unsay gitudlo ni Jesus mahitungod niadtong kinsa dili mouban Kaniya.
Sumala sa bersikulo 30, kon kita nagtinguha nga mahimong kabahin sa gingharian sa Dios, kinahanglan gayud nga kita hingpit nga mopasalig ngadto ni Jesukristo.
Pamalandong og pipila ka mga paagi nga ikaw makapakita sa imong hingpit nga pasalig ngadto ni Jesukristo.
Ang Mateo 12:31–42 nagrekord nga si Jesus mipamatuod og usab nga ang Iyang maayong mga buhat mga ebidensya nga Siya iya sa Dios ug dili sa yawa. Gipahimangnoan usab niya ang mga Pariseo nga ang Dios mopatubag kanila alang sa ilang mga pulong sa pagpamasangil. Ang pipila sa mga escriba ug mga Pariseo dayon nangayo og mga timailhan, ug gibadlong sila ni Jesus tungod sa pagpangita og timaan ug sa pagkapakyas sa pag-ila nga Siya mas gamhanan kay ni bisan kinsa nga propeta o hari kaniadto sa Israel. Gipanghimaraut usab sa Ginoo ang pagpangita og timailhan sa atong panahon ug gitudlo nga ang hugot nga pagtuo dili mosunod human sa mga timailhan (tan-awa sa D&P 63:7–11).
Unsa ang gipasabut sa “pasipala batok sa Espiritu Santo” (Mateo 12:31)?
Imahe
Propeta Joseph Smith
Ang Propeta Joseph Smith mipasabut kon unsaon sa usa ka tawo pagbuhat niini nga sala: “Kinahanglan nga nadawat niya ang Espiritu Santo, ang kalangitan naabli alang kaniya, ug nakaila sa Dios, ug dayon nakasala batok kaniya. Human ang tawo nakasala batok sa Espiritu Santo, walay paghinulsol alang kaniya. Siya kinahanglan nga mosulti nga ang adlaw wala mosidlak samtang nakita niya kini; siya kinahanglan nga molimud ni Jesukristo bisan og ang kalangitan naablihan ngadto kaniya, ug ilimud ang plano sa kaluwasan bisan og nakakita siya og ebidensya niini; ug sukad niana nga panahon nagsugod siya nga mahimong kaaway” (sa History of the Church, 6:314).
Usahay ang mga Santos sa Ulahing mga Adlaw nabalaka mahitungod sa sala sa pagpasipala batok o paglimod sa Espiritu Santo. Si Presidente Spencer W. Kimball mitudlo: “Ang sala batok sa Espiritu Santo nagkinahanglan og kahibalo nga kini imposible gyud kaayo alang sa ordinaryo nga tawo sa pagpakasala sa maong sala” (The Miracle of Forgiveness [1969], 123).
Diha sa Mateo 12:39–40, ang pagpangita og timailhan gipanghimaraut sa Manluluwas. Misulti si Propeta Joseph Smith mahitungod niini nga pagtulun-an sa Manluluwas: “Siya kinsa nangita og timailhan usa ka mananapaw nga tawo; ug kana nga baruganan mahangturon, dili motipas, ug lig-on sama sa mga haligi sa langit; kay bisan kanus-a kamo makakita og tawo nga nangita og timailhan, makasiguro kamo nga siya usa ka mananapaw nga tawo” (sa History of the Church, 3:385).
Si Propeta Joseph Smith miingon sa wala madugay: “Sa diha nga ako nagsangyaw sa Philadelphia, usa ka Quaker misinggit alang sa usa ka timailhan. Gisultihan ko siya sa paghunong. Human sa wali, miusab siya sa pagpangayo og timailhan. Gisultihan nako ang kongregasyon nga ang tawo usa ka mananapaw, nga ang usa ka dautan ug mananapaw nga henerasyon nangita og timailhan; ug nga ang Ginoo miingon ngari kanako sa usa ka pagpadayag, nga bisan kinsa nga tawo kinsa nangita og timailhan usa ka mananapaw nga tawo. ‘Tinuod kini,’ misinggit ang usa, ‘kay nasakpan ko siya sa akto gayud,’ diin ang tawo human niana mikumpisal sa dihang siya gibunyagan” (sa History of the Church, 5:268).
Nagtudlo si Jesus sa sambingay sa wala puy-i nga balay
Hunahunaa nga usa sa imong mga higala nangayo kanimo og tambag unsaon paglikay nga dili mausab ang sala nga siya naninguha sa pagbiya. Unsa nga tambag ang imong ihatag aron pagtabang sa imong higala sa pagbatok sa tintasyon?
Mihatag si Jesukristo og usa ka sambingay mahitungod sa mahugaw nga espiritu nga gipapahawa gikan sa tawo. Samtang imong tun-an kini nga sambingay, pangitaa ang baruganan nga makatabang sa imong higala unsaon pagbuntog og tintasyon.
Basaha ang Mateo 12:43–44, nga mangita sa unsay gibuhat sa mahugaw nga espiritu human gipapahawa gikan sa tawo.
Unsay gibuhat sa mahugaw nga espiritu human nga wala makakita og kapahulayan bisan asa?
Unsa nga mga pulong ang naghulagway sa kahimtang sa “balay,” o sa tawo, sa dihang ang mahugaw nga espiritu mibalik?
Basaha ang Mateo 12:45, nga mangita sa unsay gibuhat sa mahugaw nga espiritu sa dihang nakita ang “balay,” o ang tawo, nga wala puy-i.
Sa unsa nga paagi nga ang kasinatian sa tawo niini nga sambingay nagrepresentar sa usa ka tawo kinsa naghinulsol sa sala ug naninguha sa pagbatok sa tintasyon?
Human mapapahawa ang yawa, unsa ang wala mabuhat sa tawo niini nga sambingay nga nagtugot sa dautang espiritu sa pagbalik?
Samtang imong basahon ang mosunod nga pahayag ni Presidente Spencer W. Kimball, pamalandungi kon sa unsang paagi ang tawo diha sa sambingay sa Manluluwas mahimong sama sa usa ka tawo nga nakigbisog sa pagbatok og tintasyon.
Imahe
Presidente Spencer W. Kimball
“Ang yawa nasayud asa motintal, asa mopunting sa iyang mga paninguha. Mahibaloan niya ang madutlan nga dapit. Diin ang usa ka tawo huyang kaniadto, siya labing dali nga matintal pag-usab.
“Sa pagbiya og sala ang usa ka tawo dili lamang mangandoy alang sa mas maayo nga mga kahimtang. Kinahanglan gayud niyang himoon kini. … Siya kinahanglan nga sigurado nga siya wala lamang mibiya sa sala apan nga siya nag-usab sa mga sitwasyon nga naglibut sa sala. Siya kinahanglan gayud nga molikay sa mga dapit ug mga kahimtang ug mga higayon diin ang sala nahitabo, kay kini labing dali nga makapausab niini. Kinahanglan gayud nga iyang biyaan ang mga tawo kinsa kauban sa paghimo sa sala. Tingali dili niya kasilagan ang mga tawo nga naapil apan kinahanglan gayud nga likayan sila ug ang tanan nga may kalabutan sa sala. … Kinahanglan gayud nga iyang wad-on ang bisan unsa nga makapahinumdom sa karaang mga panumduman.
“Kini nagpasabut ba nga ang tawo … makasinati og kinabuhi nga haw-ang sa makadiyut? Ang mga butang nga nagpaapil niya ug nakakuha sa iyang interes ug nag-okupar sa iyang mga hunahuna mawagtang, ug ang mas maayo nga mga pagpuli wala pa makapuno sa kahaw-ang. Kini oportunidad ni Satanas. …
Daghan kinsa mihunong sa ngil-ad nga naandang mga lihok nakahibalo nga ang pagpuli usa ka bahin sa tubag, ug nakabuntog og ngil-ad nga naandan nga lihok pinaagi sa pagpuli niini og usa ka maayo o dili makadaut nga butang” (The Miracle of Forgiveness, 171–73; italics gidugang).
Usa ka baruganan nga atong makat-unan gikan sa sambingay sa Manluluwas mao nga kita makapalayo og dautan nga mga impluwensya human sa pagkuha niini gikan sa atong mga kinabuhi pinaagi sa pag-ilis niini ug pagkamatarung. Ikonsiderar ang pagsulat niini nga kamatuoran diha sa margin sa imong mga kasulatan duol sa Mateo 12:43–45.
Tun-i ang mosunod nga pahayag, ug markahi ang mga paagi nga kita makabatok sa dautan nga mga impluwensya pinaagi sa pagpuno sa atong mga kinabuhi og pagkamatarung:
“Kini dili igo nga mosulay lamang pagbatok sa dautan o sa pagwagtang sa sala diha sa atong kinabuhi. Kinahanglan gayud nga pun-on nimo ang imong kinabuhi og pagkamatarung ug moapil sa mga kalihokan nga nagdala og espirituhanong gahum. Isubsob ang imong kaugalingon diha sa mga kasulatan. Pag-ampo kada adlaw sa Ginoo nga hatagan ka og kalig-on lapas sa imong kaugalingon. Usahay, pagpuasa alang sa espesyal nga mga panalangin.
“Ang hingpit nga pagkamasulundon magdala og hingpit nga gahum sa ebanghelyo nganha sa imong kinabuhi, lakip ang dugang nga kalig-on sa pagbuntog sa imong mga kahuyang. Kini nga pagkamasulundon naglakip sa mga kalihokan nga sa una wala tingali nimo ikonsiderar nga kabahin sa paghinulsol, sama sa pagtambong og mga miting, pagbayad sa ikapulo, paghatag og serbisyo, ug sa pagpasaylo sa uban” (Matinud-anon sa Tinuhoan: Usa ka Pakisayran sa Ebanghelyo [2004], 135).
Pamalandong og pipila ka mga butang nga imong mahimo sa pagpuno sa imong kinabuhi og pagkamatarung. Ilista kini diha sa imong scripture study journal, ug ipasabut unsaon nga ang pagbuhat niini makadala og mas dako nga espirituhanong gahum diha sa imong kinabuhi ug makatabang kanimo sa pagbuntog og dautang mga impluwensya.
Ang nahibilin sa Mateo12 nagrekord nga samtang si Jesus nagtudlo, usa ka tawo misulti Kaniya nga pipila sa mga miyembro sa Iyang pamilya buot nga makigsulti Kaniya. Ang Ginoo dayon mitudlo nga ang tanan kinsa mobuhat sa kabubut-on sa Amahan mga sakop sa Iyang pamilya.
Isulat ang mosunod diha ubos sa mga assignment karong adlawa sa imong scripture study journal:
Akong natun-an ang Mat.11–112 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: