Unit 5: Day 1

Mateo 18–20

Pasiuna

Gitudloan ni Jesukristo ang Iyang mga disipulo og mga baruganan nga motabang kanila sa paggiya sa Iyang Simbahan human sa Iyang Pagsaka sa langit. Gihatag usab Niya ang sambingay sa dili mapinasayloon nga ulipon agi og tubag ngadto sa pangutana ni Pedro mahitungod sa pagpasaylo, ug gitudlo Niya ang mahitungod sa kabalaan sa kaminyoon. Gihatagan og importansya sa Manluluwas ang pagpili sa mahangturong kinabuhi labaw sa kalibutanong bahandi, ug gihatag Niya ang sambingay sa mga mamumoo sa parasan.

Mateo 18

Si Jesukristo nagtudlo sa Iyang mga disipulo og mga baruganan nga motabang kanila sa paggiya sa Simbahan, ug naghatag Siya sa sambingay sa dili mapinasayloon nga ulipon

Ang mosunod nga istorya, giasoy ni Presidente Thomas S. Monson, nagsaysay kabahin sa usa ka pamilya kansang duha ka bulan nga batang gamay namatay. “[Ang] amahan usa ka panday og kabinet ug naghimo og usa ka nindot nga lungon alang sa lawas sa iyang minahal nga batang gamay. Ang adlaw sa paglubong masulub-on, sa ingon naghulagway sa kaguol nga ilang gibati sa ilang pagkanawad-an. Samtang ang pamilya naglakaw ngadto sa chapel, ang amahan nagdala sa gamay nga lungon, pipila nga gidaghanon sa mga higala nagpundok. Bisan pa niana ang pultahan sa chapel nakasarado. Ang nagkapuliki nga bishop nakalimot sa lubong. Mga paningkamot sa pagpangita kaniya napakyas. Wala mahibalo kon unsay buhaton, gisipitan sa amahan ang lungon sa iyang mga bukton ug, uban sa iyang pamilya diha sa iyang kilid, gidala kini sa balay, naglakaw sa nagbunok nga ulan” (“Hidden Wedges,” Ensign, Mayo 2002, 19).

1. Tubaga ang mosunod nga mga pangutana diha sa imong scripture study journal:

   1. Kon ikaw miyembro niadto nga pamilya, unsa kaha ang imong pagabation sa dihang ang bishop wala moabut alang sa lubong?

   2. Ngano kaha nga malisud ang pagpasaylo sa bishop?

Diha sa Mateo 18:1–20 atong mabasa nga gitudloan ni Jesus ang Iyang mga disipulo didto sa Galilea sa pagpaubos sa ilang mga kaugalingon ug magpakasama sa gagmay nga mga bata. Gipasabut usab Niya nga kadtong kinsa “makaangin aron makasala” sa Iyang sama sa gagmayng mga bata nga mga sumusunod, o naggiya kanila nga mahisalaag, mag-antus (tan-awa sa mga bersikulo 6–7 Mateo 18:6).

Ang pagkamapainubsanon sa mga bata mahimong ipakigsama ngadto sa pagkamapainubsanon sa bag-ong mga kinabig sa Simbahan. Unsa nga mga leksyon ang atong makat-unan gikan sa bag-ong mga kinabig? Unsaon nato pag-amuma ang mga bata ug ang bag-ong mga kinabig sa Simbahan?

Ang Manluluwas dayon mitambag sa Iyang mga disipulo sa pagtangtang gikan sa ilang mga kinabuhi kadtong mga butang nga makaangin kanila nga makasala, o makapadagma kanila (tan-awa sa bersikulo 9). Gitudloan usab Niya ang mga Apostoles nga kon ang usa ka tawo makalapas, o makasala batok kanila, kinahanglan sila maninguha sa pagsulbad sa problema ngadto sa tawo sa hilum. Kon ang tawo modumili sa paghinulsol, niana siya mahimong dad-on sa atubangan sa mga awtoridad sa Simbahan. (Pahinumdom: Ang mga pagtulun-an sa Manluluwas nga makaplagan diha sa Mateo 18:1–14 pagahisgutan og mas maayo diha sa mga leksyon sa Marcos 9 ug Lucas 15.)

Human niini nga panudlo, nangutana si Pedro sa Ginoo mahitungod sa pagpasaylo. Basaha ang Mateo 18:21, nga mangita sa pangutana ni Pedro.

Pipila sa relihiyosong mga lider sa panahon ni Pedro nagtudlo nga ang indibidwal dili kinahanglan nga motanyag ngadto sa laing tawo og pasaylo labaw sa makatulo. Sa pagpangutana sa Ginoo kon siya kinahanglan bang mopasaylo og usa ka tawo makapito, naghunahuna si Pedro nga siya nagmanggihatagon (tan-awa sa Bruce R. McConkie, The Mortal Messiah: From Bethlehem to Calvary, 4 vols. [1979–81], 3:91). Basaha ang Mateo 18:22, nga mangita sa tubag sa Manluluwas ngadto ni Pedro.

“Kapitoan ka pito” maoy usa ka paagi sa pag-ingon nga kita kinahanglan nga dili mobutang og utlanan diha sa gidaghanon sa atong pagpasaylo sa uban. Ang tubag sa Manluluwas ngadto ni Pedro nagtudlo sa kamatuoran nga ang Ginoo nagmando kanato sa pagpasaylo niadtong kinsa nakapasilo o nakasala batok kanato.

Ang pagpasaylo sa uban mao ang pagtagad sa tawo uban ang gugma nga nakapasilo o nakapasakit kanimo ug sa dili pagbaton og ngil-ad nga pagbati ngadto kaniya (tan-awa ang Giya ngadto sa mga Kasulatan, “Pasaylo,” scriptures.lds.org; D&P 64:9–11). Ang pagpasaylo wala magpasabut nga ikaw magpadayon sa pagtugot sa uban nga mopasakit kanimo o nga ang nakasala kinahanglan nga dili patubagon alang sa iyang mga binuhatan, sa legal o laing paagi.

Human tubaga ang pangutana ni Pedro, gitudloan sa Manluluwas ang Iyang mga disipulo og usa ka sambingay nga makatabang kanato sa pagsabut kon nganong kinahanglan kitang mopasaylo sa uban.

Basaha ang Mateo 18:23–30, nga mangita kon pilay utang sa ulipon ug sa masigkaulipon.

Pilay utang sa ulipon ngadto sa hari?

Pilay utang sa masigkaulipon ngadto sa ulipon?

Gamita ang mosunod nga impormasyon sa pagtabang kanimo pagbana-bana kon unsa kadugayon kaha sa kada mangungutang sa pagbayad sa unsay iyang nautang.

Sa panahon ni Jesus “kini gibana-bana nga 10,000 ka talento mobalor og 100,000,000 ka mga denario [salapi sa Romano]. Usa ka denario mao ang kasagarang sweldo sa usa ka adlaw sa usa ka ordinaryong mamumoo” (Jay A. Parry ug Donald W. Parry, Understanding the Parables of Jesus Christ [2006], 95). Bana-banaa unsay kadugayon alang sa ulipon ang pagbayad niini nga utang pinaagi sa pagbahin sa 100,000,000 ka mga denario sa 365 ka adlaw.

Kon ang tanan niyang sweldo ibayad, pila ka mga adlaw ang ulipon makabayad sa iyang utang?

Sa pagtandi, ang 100 ka pence mobalor og 100 ka mga denario. (Hinumdumi nga ang kasagaran sa mga mamumoo mokita og usa ka denario kada adlaw.) Bana-banaa unsa kadugayon sa masigkaulipon ang pagbayad sa iyang utang.

Kon ang tanan niyang sweldo ibayad, pila ka mga adlaw ang masigkaulipon makabayad sa iyang utang?

Basaha ang Mateo 18:31–35, nga mangita sa reaksyon sa hari sa dihang nadiskubrehan niya ang mga gibuhat sa ulipon batok sa masigkaulipon.

Ngano sa imong hunahuna ang hari misulti sa ulipon nga siya dautan sa dili pagpasaylo sa iyang masigkaulipon?

Pinasikad sa imong nabasa sa bersikulo 35, isulat kinsa sa imong hunahuna ang girepresentar sa kada usa sa tulo ka mga tawo diha sa sambingay :

Hari = 

Ulipon = 

Masigkaulipon = 

Naggamit sa unsay imong nakat-unan gikan niini nga sambingay, kompletoha ang mosunod nga baruganan: Kon gusto kita nga mopasaylo ang Dios kanato, busa . Ikonsiderar ang pagsulat niini nga baruganan diha sa margin sa imong mga kasulatan tupad sa Mateo 18:24–35.)

Unsa ang mabuhat sa tawo kon siya nanlimbasog sa pagpasaylo og usa ka tawo?

Si Presidente James E. Faust sa Unang Kapangulohan nagtudlo:

“Gikinahanglan natong ilhon ug dawaton ang kasuko nga mga pagbati. Nagkinahanglan og pagpaubos ang pagbuhat niini, apan kon kita moluhod ug mangayo sa Langitnong Amahan alang sa usa ka pagbati sa pagpasaylo, Siya motabang kanato. Ang Ginoo nagkinahanglan kanato ‘nga mopasaylo sa tanang mga tawo’ [D&P 64:10] alang sa atong kaugalingong kaayohan tungod kay ang ‘kasilag nagsumpo sa espirituhanong pagtubo’ [Orson F. Whitney, Gospel Themes (1914), 144]. Sa pagkuha lamang diha sa atong mga kaugalingon sa kasilag ug kaligutgot nga ang Ginoo makabutang og kahupay sa atong mga kasingkasing. …

“… Kon ang trahedya moabut, kinahanglan nga dili kita molihok pinaagi sa pagpaninguha og personal nga panimalos apan hinoon isang-at sa hustisya ug palabya ang sakit nga mga pagbati. Dili kini sayon ang pagpalabay sa sakit nga pagbati ug paghabwa sa kaligutgot sa atong mga kasingkasing. Ang Manluluwas nagtanyag ngari kanatong tanan og usa ka bililhong kalinaw pinaagi sa Iyang Pag-ula, apan kini moabut lamang samtang kita andam sa pagsalikway sa negatibong mga pagbati sa kasuko, yubit, ug panimalos. Alang kanato kinsa mopasaylo ‘niadtong nakalapas kanato’ [Hubad ni Joseph Smith, Mateo 6:13], bisan niadtong kinsa nakasala og seryosong mga krimen, ang Pag-ula nagdala og pipila ka kalinaw ug kahupay” (“Ang Makaalim nga Gahum sa Pagpasaylo,” Ensign o Liahona, Mayo 2007, 69).

2. Diha sa imong scripture study journal, pagsulat mahitungod sa usa ka panahon nga ang Ginoo mitabang kanimo sa pagpasaylo og usa ka tawo kinsa nakasala batok kanimo o nakapasilo kanimo.

Ang mosunod mao ang katapusan sa istorya ni Presidente Thomas S. Monson nga gipakigbahin sa unahan niini nga leksyon: “Kon ang pamilya dili pa maayo kaayo og integridad, sila makabasol sa bishop ug magbaton og mga kasuko. Sa dihang nahibaloan sa bishop ang trahedya, gibisitahan niya ang pamilya ug nangayo og pasaylo. May sakit pa nga klaro diha sa iyang panagway, apan inubanan sa mga luha sa iyang mga mata, gidawat sa amahan ang pagpangayo og pasaylo, ug ang duha naggakos diha sa espiritu sa pagsinabtanay” (“Hidden Wedges,” 19).

Pamalandungi kadtong kinsa tingali wala pa nimo pasayloa diha sa imong kinabuhi. Pag-ampo alang sa usa ka tinguha sa pagpasaylo ug sa abilidad nga makapalabay sa sakit ug kasuko nga gibati aron si Jesus makatabang kaninyo sa pagbati og kalinaw ug kahupay pinaagi sa Iyang Pag-ula.

Mateo 19:1–12

Ang Manluluwas nagtudlo sa kabalaan sa kaminyoon

Ang doktrina sa Ginoo kalabut sa kaminyoon ug diborsyo lahi gikan sa daghang mga tinuohan sa kalibutan.

Unsa ang pipila sa mga tinuohan sa kalibutan mahitungod sa kaminyoon ug diborsyo?

Samtang imong tun-an ang Mateo 19:1–12, pangitaa ang mga pagtulun-an sa Ginoo mahitungod sa kaminyoon ug sa diborsyo ug ikonsiderar ang importansya niini nga mga pagtulun-an alang kanimo.

Basaha ang Mateo 19:1-3, nga mangita sa pangutana nga gipangutana sa mga Pariseo ni Jesus.

Ang mga pulong “pagpakigbulag niya sa iyang asawa sa bisan unsang hinungdan” (Mateo 19:3) nagpasabut ngadto sa usa ka lalaki nga nakigdiborsyo sa iyang asawa sa bisan unsang rason, bisan og kini walay hinungdan o hinakog.

Basaha ang Mateo 19:4–6, nga mangita sa unsay gitudlo sa Manluluwas mahitungod sa kaminyoon ug sa diborsyo.

Kini nga mga bersikulo nagtudlo nga ang kaminyoon tali sa usa ka babaye ug sa usa ka lalaki usa ka sagradong relasyon nga gidesinyo ug gitukod sa Dios. Ikonsiderar ang pagsulat niini nga doktrina diha sa margin sa imong mga kasulatan tupad sa Mateo 19:6. Sa modernong panahon nga pagpadayag ang Ginoo mipamatuod nga “ang bag-o ug walay katapusan nga pakigsaad sa kaminyoon” (kaminyoon diha sa templo) importante sa kahimayaan (tan-awa sa D&P 131:1–4).

Basaha ang Mateo 19:7, nga mangita sa lain nga pangutana nga gipangutana sa mga Pariseo ni Jesus.

Ang Mateo 19:8–9 nagrekord nga ang Manluluwas misulti ngadto sa mga Pariseo nga gitugutan ni Moises ang diborsyo nga mahitabo sa iyang panahon tungod sa kagahi sa mga kasingkasing sa katawhan. Ang pulong nga “pagpakigbulag” niini nga bersikulo mahimo usab nga sabtong pagbiya.

Ang mosunod nga pahayag ni Elder Dallin H. Oaks sa Korum sa Napulog Duha ka mga Apostoles nagtabang sa pagklaro kon sa unsa nga paagi kini nga pagtulun-an may kalabutan sa atong panahon: “Ang matang sa kaminyoon nga gikinahanglan alang sa kahimayaan—mahangturon ang gidugayon ug diosnon ang kahimili—dili maghunahuna og diborsyo. Diha sa mga templo sa Ginoo, ang magtiayon pagakaslon nga molungtad sa tanang kahangturan. Apan pipila ka mga kaminyoon wala mouswag paingon ngadto niana nga sumbanan. Tungod sa pagpatig-a sa [atong] mga kasingkasing’ [Mateo 19:8], ang Ginoo sa pagkakaron wala mopatuman sa mga sangputanan sa celestial nga sumbanan. Nagtugot Siya sa diborsyado nga mga tawo sa pagminyo pag-usab nga walay mantsa sa pagkamakasasala nga gihisgutan sa mas labaw nga balaod” (“Diborsyo,” Ensign o Liahona, Mayo 2007, 70).

3. Diha sa imong scripture study journal, paglista og pipila ka mga paagi nga kamo nag-andam alang “sa matang sa kaminyoon nga gikinahanglan alang sa kahimayaan” nga gihulagway ni Elder Oaks. Unsay imong mabuhat sa pagsulod og mahangturon nga kaminyoon nga may lig-on nga pasalig sa paghusay og mga kalainan nga dili magdiborsyo?

Mateo 19:13–20:34

Si Jesus nagtudlo mahitungod sa kinabuhing dayon, ug Siya naghatag og sambingay sa mga mamumoo sa parrasan

Ang Mateo 19:13–30 nagrekord nga giawhag ni Jesus ang Iyang mga sumusunod sa pagpaninguha sa kinabuhing dayon kay sa kalibutanong bahandi. Nangutana si Pedro kon unsay madawat sa mga disipulo tungod kay gibiyaan nila ang ilang kalibutanong mga kabtangan sa pagsunod sa Manluluwas. (Pahinumdom: Ang mga panghitabo nga gihisgutan niini nga mga bersikulo pagahisgutan nga detalyado diha sa leksyon alang sa Marcos 10.)

Diha sa Mateo 20:1–16 atong mabasa nga ang Manluluwas nagtudlo sa Iyang mga disipulo og sambingay sa pagtabang kanila pagsabut sa tinguha sa Langitnong Amahan sa paghatag sa tanan Niyang mga anak og oportunidad sa pagdawat og kinabuhing dayon. Niini nga sambingay usa ka tawo nangitag mamumoo nga iyang kasuholan sa lainlaing oras sa tibuok adlaw sa pagtrabaho diha sa iyang parrasan, ug unya iyang gibayran silang tanan og samang suhol sa katapusan sa adlaw.

Ang Mateo 20:17–34 nagrekord nga gipanagna ni Jesukristo nga Siya pagabudhian ug pagahukman og kamatayon kon Siya mobalik ngadto sa Jerusalem. Gitudloan Niya ang Iyang mga disipulo nga imbis maningkamot og posisyon ug awtoridad, kinahanglan ilang sundon ang Iyang ehemplo ug moserbisyo sa uban.

4. Isulat ang mosunod diha ubos sa mga assignment karong adlawa sa imong scripture study journal:

   Akong natun-an ang Mat.18–20 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: