Lucas 17

Pasiuna

Si Jesus mitudlo sa Iyang mga tinun-an mahitungod sa panginahanglan sa pagpasaylo sa uban. Pagkahuman, ang mga Apostoles mihangyo ni Jesus sa pagdugang ang ilang hugot nga pagtuo. Agig tubag, ang Manluluwas mitudlo kanila sa sambingay sa ulipon nga walay hinungdan. Sa kaulahian, si Jesus miayo sa 10 ka mga sanlahon, apan usa lamang kanila ang mibalik aron magpasalamat Kaniya. Ang Manluluwas gisukmatan sa mga Pariseo, ug Siya mitudlo mahitungod sa pag-abut sa gingharian sa Dios.

Lucas 17:1–10

Ang mga Apostoles mihangyo ni Jesus sa pagpatubo sa ilang hugot nga pagtuo

Paghunahuna og mga sitwasyon nga tingali magkinahanglan kanimo nga mogamit og hugot nga pagtuo, sama sa pagtinguha og panalangin sa priesthood, pagbayad og ikapulo, o paghatag og usa ka pakigpulong o leksyon diha sa Simbahan. Isulat sa imong lista diha sa imong scripture study journal. Dayon tubaga ang mosunod nga mga pangutana: Gusto ba nimo sukad nga makaangkon og mas dakong hugot nga pagtuo? Kon mao, unsa nga mga kasinatian ang imong naangkon o giatubang nga nakatabang sa pagmugna niana nga tinguha?

Samtang ikaw magtuon sa Lucas 17, pangitaa ang mga baruganan nga makatabang kanimo sa pagpatubo sa imong hugot nga pagtuo.

Sa Lucas 17:1–2 ang Manluluwas mitudlo sa Iyang mga tinun-an nga ang usa ka tawo kinsa motintal sa uban sa pagpakasala adunay tulubagon.

Basaha ang Lucas 17:3–4, nga mangita sa kasugoan nga gihatag sa Manluluwas ngadto sa Iyang mga tinun-an nga tingali nagkinahanglan og hugot nga pagtuo. Ikonsiderar ang pagmarka niana nga kasugoan diha sa imong mga kasulatan.

Ngano kahang lisud ang pagpasaylo sa tawo nga balik-balik nga nakahimo og sayop kanimo.

Basaha ang Lucas 17:5, nga mangita sa unsay gitinguha sa mga Apostoles gikan sa Manluluwas human Siya mitudlo kanila mahitungod sa pagpasaylo.

Sa unsa nga paagi kaha nga ang pagtinguha og mas dakong hugot nga pagtuo diha sa Ginoo magtabang kanila sa pagsunod sa kasugoan nga magpasaylo sa uban?

Ingon nga narekord sa Lucas 17:6, ang Manluluwas mitubag sa pangamuyo sa mga Apostoles alang sa pagpatubo sa hugot nga pagtuo pinaagi sa pagpamatuod nga ang hugot nga pagtuo nga may gidak-on sa liso sa mustasa makahimo og mga milagro. Aron matabangan sila nga mahibalo kon sa unsa nga paagi mapatubo sa ilang hugot nga pagtuo, niana si Jesus mihatag og usa ka sambingay nga naghulagway sa relasyon sa usa ka agalon ug sa usa ka ulipon.

Basaha ang Lucas 17:7–10, nga mangita alang sa unsay gipaabut sa agalon ngadto sa iyang ulipon. Gamita ang mga footnote aron matabangan ka nga masabtan ang pipila sa mga lisud nga mga pulong diha sa sambingay.

Sa biblikanhon nga mga panahon ang agalon mohatag sa tanang panginahanglan sa kinabuhi sa iyang ulipon samtang ang ulipon matinud-anon nga mituman sa iyang gipaabut nga mga katungdanan. Tungod niini, wala kinahanglana nga ang agalon mohatag og espesyal nga pagpasalamat ngadto sa iyang ulipon o mobati nga utangan ngadto kaniya alang sa paghimo sa iyang mga katungdanan.

Paghunahuna og mga paagi nga ang Langitnong Amahan sama sa agalon niini nga sambingay.

Mahimo nimong markahan sa Lucas 17:10 ang mga pulong “makabuhat na kamo sa tanang gisugo kaninyo.”

Isulat ang mosunod diha sa inyong scripture study journal: Ang atong hugot nga pagtuo motubo samtang maningkamot kita sa pagbuhat sa tanang mga sugo sa Langitnong Amahan. Imong idugang kining pamahayag sa kaulahian.

Ikonsiderar ang pagmarka sa Lucas 17:10 unsay gisulti ni Jesus nga angay isulti sa mga ulipon human makabuhat sa unsay gisugo kanila.

Aron pag-ila nga kita walay pulos nga mga ulipon nagpasabut nga atong ilhon nga bisan unsaon nato ang pagsunod sa mga kasugoan, sa kanunay kita utangan ngadto sa Dios. Siya madagayaong nagpanalangin kanato nga dili gayud kita makabayad Kaniya—bisan kon kita nagmasulundon ug nagpuyo sa matarung nga paagi (tan-awa sa Mosiah 2:20–26).

Kompletoha ang pamahayag diha sa imong scripture study journal aron kini magpasabut sa mosunod nga mga baruganan: Ang atong hugot nga pagtuo motubo samtang naningkamot kita sa pagbuhat sa tanang gisugo sa Langitnong Amahan ug samtang kita naghinumdum nga kanunay kitang utangan ngadto Kaniya. Dayon tubaga ang mosunod nga pangutana: Sa unsang paagi nga ang pagpaningkamot sa pagbuhat sa tanang gisugo sa Dios makapatubo sa atong hugot nga pagtuo?

Si Presidente Heber J. Grant mitudlo mahitungod sa importansya sa pagbuhat sa atong katungdanan sa pag-alagad sa Dios: “Walay kakuyaw sa bisan kinsang lalaki o babaye nga mawad-an sa iyang pagtuo dinhi niining Simbahan kon siya mapainubsanon ug mainampoon ug masulundon ngadto sa iyang katungdanan. Ako walay sukad nahibaloan nga ingon niana nga tawo nga nawad-an sa iyang hugot nga pagtuo. Pinaagi sa pagbuhat sa atong mga katungdanan ang hugot nga pagtuo mousbaw hangtud nga kini mamahimong hingpit nga kahibalo” (Mga Pagtulun-an sa mga Presidente sa Simbahan: Heber J. Grant [2002], 28).

Palandonga ang usa ka panahon sa dihang gituman mo ang mga sugo o masulundon nga mihimo sa imong katungdanan ngadto sa Dios ug gibati ang pagtubo sa hugot nga pagtuo isip usa ka resulta.

Lucas 17:11–19

Si Jesus naghinlo sa 10 ka mga sanlahon

Basi sa unsay imong nahibaloan mahitungod sa sanla, kompletoha ang mosunod nga pamahayag: Sa kapanahonan sa Biblia, lisud unta ang mataptan og sanla tungod kay .

Ang sanla usa ka sakit nga makadala og kahiwi ug kamatayon. Ang mga sanlahon gilain gikan sa ubang tawo sa katilingban aron sa pagpanalipod sa panlawas sa uban, ug sila gikinahanglan nga mosinggit og “Hugaw!” aron makapasidaan sa tawo nga nagpadulong kanila (tan-awa sa Bible Dictionary, “Sanla”).

Basaha ang Lucas 17:11–12, nga mangita kon kinsa ang gikasugat ni Jesus sa iyang paghapit sa usa ka balangay samtang siya nagbiyahe paingon sa Jerusalem.

Kon ikaw usa niadtong mga sanlahon, unsa kaha ang imong mga pagbati sa dihang nakita nimo si Jesus?

Basaha ang Lucas 17: 13–14, nga mangita sa unsay gisulti sa mga sanlahon ngadto sa Manluluwas ug unsa ang Iyang tubag ngadto kanila.

Ang balaod ni Moises nagkinahanglan nga ang mga sanlahon mopakita sa ilang kaugalingon ngadto sa mga pari human sila mamaayo aron madawat og balik ngadto sa katilingban (tan-awa sa Levitico 14). Ikonsiderar ang pagmarka diha sa imong kasulatan kon unsay nahitabo samtang ang mga sanlahon miadto aron ipakita ang ilang mga kaugalingon ngadto sa pari.

Gikan sa Lucas 17:14 atong makat-unan nga madawat nato ang mga panalangin sa Ginoo samtang nagbuhat kita sa unsay Iyang gitudlo nga atong buhaton.

Ikonsiderar kon unsa kaha kini sama—sa unsa nga paagi kini makapausab sa imong kinabuhi—nga usasa mga sanlahon kinsa nalimpyo. Unsa sa imong hunahuna ang imo kahang buhaton sa higayon nga ikaw makaamgo nga nalimpyohan sa sanla?

Basaha ang Lucas 17:15–19, nga mangita kon sa unsa nga paagi ang usa sa mga sanlahon mi-react sa lahi nga paagi kay sa uban.

Usa ka kamatuoran nga atong makat-unan gikan sa sanlahon kinsa mibalik aron sa paghatag og pasalamat mao nga importante kining mopadayag og pasalamat alang sa mga panalangin nga atong nadawat.

Nganong importante kining mopadayag sa atong pasalamat ngadto sa Dios alang sa mga panalangin nga atong nadawat?

Sa unsang paagi nga kita usahay sama sa siyam ka mga sanlahon?

Samtang imong basahon ang mosunod nga pamahayag ni Presidente Thomas S. Monson, markahi ang unsay iyang gitudlo nga mahitabo samtang nagpadayag kita og pasalamat ngadto sa atong Amahan sa Langit: “Mga kaigsoonan, naka hinumdom ba kita nga nagpasalamat sa mga panalangin nga atong nadawat? Ang kinasingkasing nga pagpasalamat dili lamang makatabang kanato sa pag-ila sa atong mga panalangin, apan kini usab makaabli sa mga pultahan sa langit ug motabang kanato nga mobati sa gugma sa Ginoo” (“Ang Balaanong Gasa sa Pagpasalamat,” Ensign o Liahona, Nob. 2010, 87).

Mahimo nimong markahan sa Luke 17:19 kon unsa ang gisulti sa Manluluwas nga nahitabo ngadto sa sanlahon kinsa mihatag og pasalamat.

Sa unsa nga mga paagi kaha nga ang pagpasalamat ngadto sa Ginoo alang sa atong mga panalangin nagtabang kanato nga mamaayo?

I-rekord diha sa imong scripture study journal ang piho nga mga panalangin gikan sa Langitnong Amahan nga ikaw mapasalamaton. Paglista og pipila ka mga butang nga imong mahimo sa imong kinabuhi nga magpakita sa imong kamapasalamaton alang niini nga mga panalangin.

Lucas 17:20–37

Si Jesus nagtudlo kabahin sa pag-abut sa gingharian sa Dios

Si Jesus mitudlo mahitungod sa Ikaduhang Pag-anhi sa Lucas 17:20–37. Imong gitun-an ang pipila sa mga sulod niini nga tudling sa dihang nagtuon ka sa Mateo 24 ug Joseph Smith—Mateo.

Isulat ang mosunod diha sa ubos sa mga assignment karong adlawa sa imong scripture study journal:

Akong natun-an ang Lucas 17 ug nakompleto kini nga leksyon sa (petsa).

Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: