1 Mga Taga-Corinto 9–10

Pasiuna

Si Apostol Pablo namulong sa mga kabalaka sa mga Santos sa Corinto mahitungod sa paggamit sa mga kapanguhaan sa Simbahan aron sa paghatag og allowance alang sa iyang mga galastuhan. Siya mipasabut nga ang katuyoan sa iyang pagsangyaw mao ang pagdala og kaluwasan ngadto sa mga anak sa Dios. Siya miawhag kanila sa paglikay nga makasala ingon man usab nga makasilo sa uban sa ilang relihiyusong tinuohan.

1 Mga Taga-Corinto 9

Si Pablo nagsangyaw sa ebanghelyo aron siya ug ang iyang mga tigpaminaw maluwas

Nakasulay ka na ba nga naglisud sa pagmata sa buntag ug nakapalta na lang hinoon sa usa ka importanteng butang? Unsay imong bation kon nakaamgo ka nga napaltahan o wala makab-ot ang usa ka importanteng butang tungod kay napakyas ka sa pagpangandam?

Ang labing importanteng butang niining kinabuhia nga paningkamutan natong makab-ot mao ang oportunidad nga mahimong takus alang sa kinabuhing dayon.

Sa imong scripture study journal, isulat kon nganong ang kinabuhing dayon maoy usa ka butang nga imong gitinguha.

Sama nga ang paglisud sa pagbangon inigka buntag moresulta nga kita makapalta o gani mapakyas sa pagkab-ot og importanteng mga butang, ang pipila ka mga kinaiya makahimo kanato nga mapakyas sa pagkab-ot sa labing importanteng butang sa tanan—ang kinabuhing dayon. Samtang magtuon ka sa 1 Mga Taga-Corinto 9, pangita og baruganan nga makatabang kanimo nga masayud kon unsaon sa pagsiguro nga imong makab-ot ang kinabuhing dayon.

Sa 1 Mga Taga-Corinto 9:1–21 si Pablo mitubag sa nagkadaiyang mga pangutana gikan sa mga Santos sa Corinto. Misulat siya nga bisan tuod siya mahimong hingpit nga angayan nga suportahan sa temporal nga mga panginahanglan sa mga miyembro sa Simbahan, wala siya magsalig kanila alang sa iyang mga galastuhan. Mipasabut siya nga pinaagi sa pagpahiuyon ngadto sa lain-laing mga kahimtang nga wala ikompromiso ang mga sumbanan sa ebanghelyo, nakahimo siya sa pagtabang sa mga Judeo, mga Hentil, ug bisan kinsa nga huyang diha sa ebanghelyo sa pagdawat sa ebanghelyo.

Basaha ang 1 Mga Taga-Corinto 9:17, nga mangita kon giunsa pagsangyaw ni Pablo ang ebanghelyo.

Basaha ang 1 Mga Taga-Corinto 9:22–23, nga mangita kon nganong andam kaayo nga misangyaw si Pablo sa ebanghelyo.

Hunahunaa kadtong nagpraktis o nagbansay ka alang sa usa ka panghitabo. Unsa ka malukpanon ang imong iskedyul sa praktis o programa sa pagbansay? Sa unsang paagi nga ang pagpaningkamot ngadto sa usa ka tumong nakapadasig kanimo?

Si Pablo mipasabut nga ang mga atleta makabuntog sa tintasyon nga dili magbansay pinaagi sa pagtutok diha sa ilang tumong. Basaha ang 1 Mga Taga-Corinto 9:24–25, nga mangita kon unsa nga pakigtigi sa kusog ang gigamit ni Pablo aron sa pagtudlo sa mga Santos nga taga-Corinto.

Unsa nga kalidad o kinaiya ang gisulti ni Pablo nga gikinahanglan sa mga magdadalagan aron magmalampuson?

Ang kamapugnganon sa tanang mga butang nagpasabut sa pagpugong sa kaugalingon, o pagkontrolar sa kaugalingon. Ang dili madunot nga purongpurong nga gipasabut ni Pablo nga molungtad sa kahangturan mao ang kinabuhing dayon.

Gikan sa 1 Mga Taga-Corinto 9:25 atong makat-unan ang mosunod nga baruganan: Aron makaangkon og kinabuhing dayon kita kinahanglang makat-on sa pagpugong sa kaugalingon sa tanan nga mga butang. Sa katapusan, hinoon, ang kinabuhing dayon moabut lamang pinaagi sa “mga maayo nga buhat, kalooy, ug grasya” ni Jesukristo (2 Nephi 2:8) kay sa pinaagi sa atong pagpugong sa kaugalingon.

Tubaga ang mosunod nga mga pangutana diha sa imong scripture study journal:
1. Ngano kaha nga ang pagpugong sa kaugalingon gikinahanglan aron makaangkon og kinabuhing dayon?
2. Unsa nga mga aspeto sa atong mga kinabuhi ang gikinahanglang gamitan og pagpugong sa kaugalingon aron makaangkon kita og kinabuhing dayon?

Basaha ang 1 Mga Taga-Corinto 9:26–27, nga mangita kon giunsa paghulagway ni Pablo ang iyang kaugalingong mga paningkamot sa pagpugong sa kaugalingon. Ang pulong nga “ginabun-og” diha sa bersikulo 27 nagpasabut nga disiplinahon og maayo.

Unsa kaha ang gipasabut ni Pablo diha sa bersikulo 27 sa dihang siya misulat, “ginabun-og ko ang akong lawas ug ginapanton ko kini, basi unya nga sa tapos ako makasangyaw ngadto sa uban, ako pagahukman na hinoon nga dili diay takus sa pag-apil sa bangga”?

Ikonsiderar ang mosunod nga pamahayag ni Presidente Brigham Young:

“Dili ninyo mapanunod ang kinabuhing dayon, hangtud nga ang inyong mga kaibug maanaa ubos sa pagdumala sa espiritu nga nagpuyo diha kaninyo, kana nga espiritu nga gihatag kanato sa atong Amahan sa Langit. Buot nakong ipasabut ang Amahan sa inyong mga espiritu, niadtong mga espiritu nga iyang gibutang niini nga mga lawas. Ang mga lawas kinahanglang madala ubos sa hingpit nga pagdumala sa espiritu, o ang inyong mga lawas dili mobayaw sa pag-angkon og kinabuhing dayon. … Pagmakugihon sa pagsiksik, hangtud inyong madala ang tanan ngadto ubos sa balaod ni Kristo” (Mga Pagtulun-an sa mga Presidente sa Simbahan: Brigham Young [1997], 237-238).

“Kon ang espiritu motugyan ngadto sa lawas, madunot kini; apan kon ang lawas motugyan ngadto sa espiritu mahimo kini nga putli ug balaan” (Mga Pagtulun-an: Brigham Young, 239).

Tubaga ang mosunod nga pangutana diha sa imong scripture study journal: Unsa ang pipila ka mga butang nga imong mahimo sa pagtabang sa imong lawas nga motugyan ngadto sa espiritu?

1 Mga Taga-Corinto 10

Si Pablo nagpasidaan sa mga Santos nga taga-Corinto sa paglikay sa sala ug pagpasakit sa uban

Si Presidente James E. Faust sa Unang Kapangulohan mipahimangno: “Usa sa sayop nga mga tinuohan sa kinabuhi mao ang pagtuo sa [mga indibidwal] nga dili sila madutlan. Daghan kaayo ang naghunahuna nga sila [hinimo] sa asero, igo ang kalig-on aron makabuntog sa bisan unsang tintasyon. Ilang giilad ang ilang mga kaugalingon sa paghunahuna nga, ‘Dili kini mahitabo kanako’” (“It Can’t Happen to Me,” Ensign, Mayo 2002, 46).

Paghunahuna og mga sitwasyon diin ang mga tawo mahimong motugot sa ilang mga kaugalingon nga mabantang sa tintasyon, naghunahuna nga igo ang ilang kalig-on sa pagbuntog niini.

Sumala sa narekord diha sa 1 Mga Taga-Corinto 10:1–5, si Pablo mihisgut sa pipila ka mga butang nga nasinati sa mga anak sa Israel sa panahon ni Moises nga nakahimo unta kanila nga lig-on sa espirituhanong paagi. Bisan tuod sila napanalanginan sa Ginoo diha sa kamingawan ug nakasaksi og daghang mga milagro, ang Ginoo wala mahimuot sa kadaghanan kanila, ug sila gisilotan.

Basaha ang 1 Mga Taga-Corinto 10:6–11, nga mangita kon unsay gusto ni Pablo nga makat-unan sa mga Santos nga taga-Corinto gikan sa ehemplo sa karaang mga Israelite.

Bisan tuod ang karaang mga Israelite nakasinati og dagkong mga panalangin, sila mipili nga magpadala sa tintasyon. Si Pablo gusto nga mopasidaan sa mga Santos nga taga-Corinto aron makalikay sila sa pagbuhat sa mga sala sa karaan nga mga Israelite.

Basaha ang 1 Mga Taga-Corinto 10:12, ug i-summarize ang mensahe ni Pablo sa imong kaugalingong mga pulong:

Basaha ang 1 Mga Taga-Corinto 10:13, nga mangita kon unsay gitudlo ni Pablo kabahin sa tintasyon. Mahimo nimong markahan ang unsay imong nakit-an.

Unsay atong makat-unan kabahin sa tintasyon gikan niini nga bersikulo?

Ikonsiderar ang mosunod nga pangutana: Kon ang Dios dili motugot kanato nga matintal labaw sa atong abilidad sa pagsukol, nganong nagpadala man ang karaang mga Israelite sa tintasyon?

Basaha ang 1 Mga Taga-Corinto 10:14, nga mangita kon unsay gitudlo ni Pablo nga buhaton sa mga Santos nga taga-Corinto. Ang pag-ampo sa mga dios-dios maoy usa ka sala nga gipanlimbasugan sa karaan nga mga Israelite ug sa mga Santos nga taga-Corinto.

Gikan sa 1 Mga Taga-Corinto 10:13–14 atong makat-unan nga ang Dios moandam og paagi alang kanato aron makalikay sa tintasyon, apan kinahanglan kitang mopili sa pagpahimulag sa atong mga kaugalingon gikan sa tintasyon.

Basaha ang Alma 13:28, nga mangita kon unsay atong mabuhat aron mapahimulag ang atong mga kaugalingon gikan sa tintasyon. Ikonsiderar ang pagsulat niini nga cross-reference diha sa imong mga kasulatan tupad sa 1 Mga Taga-Corinto 10:13–14.

Tubaga ang mosunod diha sa imong scripture study journal:
1. Gikan sa unsay imong nakat-unan diha sa 1 Mga Taga-Corinto 10:13–14 ug Alma 13:28, pagsulat og ulohan sa pamantalaan o slogan sa karatula nga nagsulti sa mga tawo unsaon nila paglingkawas sa tintasyon.
2. Sa unsang paagi ang pagpaubos sa atong kaugalingon ug ang kanunay nga pagbantay ug pag-ampo motabang kanato sa pagpahimulag sa atong mga kaugalingon gikan sa tintasyon?

Kamo tingali dili kanunay nga makalikay sa tintasyon. Tungod niini, kinahanglan kita nga modesisyon karon kon unsay atong buhaton kon makasugat kita og tintasyon. Ikonsiderar ang mosunod nga pamahayag ni Presidente Spencer W. Kimball:

“Ang husto nga mga desisyon maoy pinakasayon nga himoon kon gipangandaman na natong daan, uban sa pinakamahinungdanong mga tumong sa hunahuna, makapawala kini sa daghang kabalaka sa panahon sa pagdesisyon, kon kapuyon ug gitintal kita og maayo. …

“… Karon mao ang panahon sa pagdesisyon nga dili kita mohunong sa mas kubos pa kaysa kahigayunan nga mabuhi sa hangtud uban sa atong Amahan, aron ang matag pagpili nga atong himoon makaapekto sa atong determinasyon nga walay tugutan nga makabalda sa pagkab-ot nianang pinakataas nga tumong” (Mga Pagtulun-an sa mga Presidente sa Simbahan: Spencer W. Kimball, [2006], 137).

“Palamboa ang pagdisiplina sa kaugalingon aron dili ka na mag-usab-usab sa desisyon nga imong pagabuhaton kon mag-atubang ikaw sa mao gihapon nga pagtintal. Kinahanglan nga kausa ra ikaw modesisyon sa usa ka butang.

“Unsa ka mahinungdanon ang pagkahimo nga gawasnon sa pag-usab-usab og himo sa malisud nga desisyon kabahin sa usa ka pagtintal. Ang pagbuhat sa ingon dugay kaayo ug hilabihan ka kuyaw” (Mga Pagtulun-an: Spencer W. Kimball, 137–138).

“Ang panahon sa pag-undang sa dautang mga buhat mao ang sa wala pa sila magsugod. Ang sekreto sa maayong kinabuhi anaa diha sa pagpanalipud ug pagpugong. Kadtong kinsa misunod sa dautan sa kasagaran mao kadtong mibutang sa ilang mga kaugalingon sa makuyaw nga kahimtang” (Mga Pagtulun-an: Spencer W. Kimball, 137–138).

Ikonsiderar unsa nga mga tintasyon ang gipanlimbasugan nimo og maayo. Unsa nga mga kausaban ang imong mahimo sa paglikay sa tintasyon sa dili pa ka mag-atubang niini?

Paggahin og panahon sa pagbasa og usa ka hilisgutan gikan sa Alang sa Kalig-on sa Kabatan-onan nga makatabang kanimo nga masayud unsaon sa pagpahimulag sa imong kaugalingon gikan sa tintasyon. Basi sa unsay imong gibasa, ikonsiderar ang pagsulat og usa ka tumong ug sa pagdala-dala niini sulod sa usa ka higayon aron sa pagtabang nimo nga makahinumdom sa paglikay sa tintasyon.

Diha sa 1 Mga Taga-Corinto 10:15–33 si Pablo mitambag sa mga Santos nga taga-Corinto sa pagtahud sa relihiyusong mga binuhatan sa uban nga dili ikompromiso ang ilang kaugalingon, ug siya misulat pag-usab nga siya nagsangyaw aron sa pagtabang nga daghan ang maluwas.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Mga Taga-Corinto 9–10 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: