1 Pedro 1–2

Pasiuna

Misulat si Apostol Pedro aron sa paglig-on sa pagtuo sa mga Santos dihang grabe ang ilang pag-antus gumikan sa pagpanglutos nga gihimo sa Empiryo sa Roma. Iyang gihatagan og emphasis nga sila natubos pinaagi sa bililhong dugo ni Jesukristo ug gipahinumduman sila sa ilang balaang mga panulundon isip lahi nga mga katawhan sa Dios. Gitudloan niya ang mga Santos nga himayaon ang Dios tali sa mga katawhan ug lahutayon ang pag-antus sama sa gibuhat ni Jesukristo.

1 Pedro 1

Gitudloan ni Pedro ang mga Santos sa potensyal nilang kabilin ug sa panginahanglan sa mga pagsulay

Si Elder M. Russell Ballard sa Korum sa Napulog Duha ka mga Apostoles miingon, “Samtang nagbiyahe ko libut sa mga Simbahan, nakita nako ang mga miyembro nga gisulayan pinaagi sa tunawan sa mga kasakit” (“Hyrum Smith: ‘Firm As the Pillars of Heaven,’” Ensign, Nob. 1995, 9).

Ang tunawan usa ka sudlanan diin ang mga puthaw o ubang mga butang himoong lunsay, nagpasabut nga sila sunugon ug tunawon aron matangtang ang mga hugaw ug malunsay ang mogawas nga produkto. Sigun sa gigamit ni Elder Ballard, “ang tunawan sa kasakit” nagpasabut sa mahagitong mga pagsulay sa kinabuhi. Unsa ang pipila ka mga pagsulay, o “mga tunawan sa kasakit,” nga inyong nasinati?

Gihimo ni Apostol Pedro kini nga sulat para sa paglig-on ug pag-awhag sa mga Santos samtang magsinati sila og mga pagsulay. Hangtud sa gibana-bana nga mga A.D. 64, sa panahon dihang gihimo ni Pedro kini nga sulat, ang gobyerno sa Roma mipakita og kinatibuk-ang pagtugot sa Kristiyanismo. Pagka Hulyo nianang tuiga usa ka sunog ang miguba sa kadaghanan sa Roma. Ang ubang prominente nga mga Romano mipasangil nga ang mga Kristiyanos maoy nagsunog. Dinhi nagsugod ang grabeng pagpanglutos sa mga Kristiyanos sa tibuok Empiryo sa Roma. Ang ubang dili maayong pagtratar nga nasinati sa mga Kristiyanos naggikan sa ilang kanhi mga higala ug mga silingan.

Samtang imong tun-an ang 1 Pedro 1–2, pangita og mga kamatuoran nga makatabang nimo nga magpabilin kang matinud-anon atol sa imong mga pagsulay.

Sa 1 Pedro 1:1–2, gitimbaya ni Pedro ang mga Santos nga nagpuyo sa Romanong mga probinsya sa Asia Minor (moderno nga Turkey) ug gipahinumduman sila nga sila pinili nga mga tawo.

Basaha ang 1 Pedro 1:3–5, nga mangita sa umaabut nga mga panalangin nga gisaad sa mga Santos. Ikonsiderar ang pagmarka sa unsay imong nakit-an.

Diha sa mga kasulatan ang mga pulong nga kaluwasan ug kahimayaan kasagaran gipasabut sa mao ra gihapon nga butang. Diha sa 1 Pedro 1:5, nag-refer si Pedro sa kahimayaan, o mahangturong kinabuhi, nga mao ang pagpuyo kauban sa presensya sa Dios ug magpadayon isip mga pamilya (tan-awa sa D&P 132:19–20).

Basaha ang 1 Pedro 1:6, nga mangita kon giunsa sa pagsanong sa mga Santos ang saad bahin niining umaabut nga mga panalangin. Timan-i nga ang pulong nga mga tintasyon nagpasabut sa mga pagsulay ug mga kasakit (tan-awa sa 1 Pedro 1:6).

Makat-unan nato ang mosunod nga kamatuoran gikan sa 1 Pedro 1:3–6: Bisan og makasinati kita og mga pagsulay, mahimo kitang magmaya sa Pag-ula ni Jesukristo ug sa umaabut nga mga panalangin nga gisaad sa Dios nga ihatag kanato.

Mitudlo si Pedro nga bisan sa mga kalisdanan nga atong giagian, mahimo kitang magmaya tungod kay makabaton kita og talagsaong mga panalangin pinaagi sa Pag-ula ni Jesukristo. Sa unsang paagi ang paghinumdom sa Pag-ula ni Kristo makatabang nimo sa pagmaya bisan og nagsinati ka og mga pagsulay?

Basaha ang 1 Pedro 1:7–9, nga mangita kon unsay gitudlo ni Pedro mahitungod sa pagsulay sa pagtuo sa mga Santos. Ikonsiderar ang pagmarka kon unsay iyang gikumpara bahin sa pagsulay sa pagtuo sa mga Santos.

Ang pagtuo, sama sa bulawan, bililhon. Apan hinoon, ang pagtuo mas labi pang bililhon kay sa bulawan kay ang bulawan, “madugta ra” (1 Pedro 1:7) samtang ang pagtuo kang Jesukristo mogiya ngadto sa kaluwasan (tan-awa sa 1 Pedro 1:9), nga usa ka mahangturon. Agig dugang, ang bulawan lunsayon pinaagi sa grabe kaayo nga init, ug sa samang paagi, ang atong pagtuo ug mga gituohan usahay hagiton sa mga kasamok, mga pangutana, ug mga pagduha-duha. Usa sa kamatuoran nga atong makat-unan gikan sa mga pulong ni Pedro ngadto sa mga Santos mao nga ang atong hugot nga pagtuo kang Jesukristo sulayan ug lunsayon samtang nagmatinud-anon kita sa paglahutay sa mga pagsulay.

Tubaga ang mosunod nga mga pangutana diha sa imong scripture study journal:
1. Unsa ang pipila ka mga pagsulay nga imong giatubang o giatubang sa imong mga higala karon gayud?
2. Sa unsang mga paagi kini nga mga pagsulay nagsulay kanimo o sa imong hugot nga pagtuo?

Basaha ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles, ug markahi ang unsay iyang giawhag kanato nga buhaton kon magsinati kita og mga pagsulay sa atong pagtuo:

“Unsaon ninyo sa pagpabilin nga ‘makanunayon ug dili matarug’ [Alma 1:25] kon sulayan ang hugot nga pagtuo? Isubsob ninyo ang inyong kaugalingon sa mga butang nga nakatabang sa paglig-on sa pagtuo [sa wala pa ang pagsulay]: ipakita ninyo ang inyong hugot nga pagtuo kang Kristo, mag-ampo kamo, mamalandong sa kasulatan, maghinulsol, magsunod sa mga sugo, ug magserbisyo sa uban.

“Kon mag-atubang og pagsulay sa hugot nga pagtuo—bisan unsay inyong buhaton, ayaw pagpalayo sa Simbahan! Ang pagpalayo gikan sa gingharian sa Dios kon may pagsulay sa hugot nga pagtuo sama ra sa pagbiya sa luwas nga lawak taguanan dihang nagkaduol na ang buhawi” (“Pagsulay sa Inyong Hugot nga Pagtuo,” Ensign o Liahona, Nob. 2012, 40).

Ngano kaha nga importante man ang paghimo sa mga butang nga giawhag ni Elder Anderson nga atong buhaton kon sulayan ang atong hugot nga pagtuo?

Basaha ang 1 Pedro 1:13–17, nga mangita kon unsay giawhag ni Pedro nga buhaton sa mga Santos aron matinud-anong makalahutay sa mga pagsulay. Ikonsiderar ang pagmarka sa unsay imong nakit-an. Ang mga pulong nga “andama ninyo ang inyong mga salabutan” diha sa bersikulo 13 nagpasabut sa pag-andam sa inyong kaugalingon.

Basaha ang 1 Pedro 1:18–21, nga mangita sa dugang nga mga kamatuoran nga gitudlo ni Pedro sa mga Santos aron matabangan sila nga matinud-anong makalahutay sa mga pagsulay kay sa talikdan ang ilang pagtuo.

Ang mosunod mao ang pipila ka mga kamatuoran nga gitudlo ni Pedro sa mga Santos niini nga mga bersikulo: Natubos kita sa bililhong dugo ni Jesukristo. Tungod kay si Jesukristo nagpuyo og kinabuhi nga walay sala, Iyang ikahalad ang Iyang Kaugalingon isip usa ka sakripisyo alang kanato. Si Jesukristo gi-orden nang daan nga mahimo natong Manunubos.

Gitudlo ni Propeta Joseph Smith, “Sa unang organisasyon didto sa langit didto kitang tanan ug nakakita sa Manluluwas nga gipili ug gitudlo ug ang plano sa kaluwasan gihimo, ug gitugotan nato kini” (Mga Pagtulun-an sa mga Presidente sa Simbahan: Joseph Smith [2007], 249).

Sa unsang paagi nga ang paghinumdom niini nga mga kamatuoran makatabang sa mga Santos nga makalahutay sa ilang mga pagsulay?

Paghunahuna og usa ka panahon sa dihang ikaw o ang usa ka tawo nga imong nailhan mipili nga lahutayon ang usa ka pagsulay uban sa hugot nga pagtuo kang Jesukristo kay sa talikdan ang pagtuo Kaniya. Sa imong scripture study journal, isulat ang mahitungod niana nga kasinatian ug ang mga pamaagi diin ang imo o ang pagtuo nianang tawhana sa Manluluwas nalig-on gumikan niana nga proseso.

Diha sa 1 Pedro 1:22–25, giawhag ni Pedro ang mga Santos nga maghigugmaay sa usag usa ug mohinumdom nga natawo sila pag-usab pinaagi sa pulong sa Dios, nga molahutay sa hangtud.

1 Pedro 2:1–12

Gihatagan og emphasis ni Pedro ang responsibilidad sa mga Santos

Unsa ang pipila ka mga paagi nga ang mga miyembro sa Simbahan lahi kay sa niadtong nagsunod sa mga pamaagi sa kalibutan? Unsa ang pipila ka mga hagit nga atong atubangon tungod kay lahi kita?

Samtang imong tun-an ang 1 Pedro 2:1–12, pangita og baruganan nga makalig-on sa imong tinguha nga mahimong lahi sa kalibutan.

Sigun sa narekord sa 1 Pedro 2:1–8, gitudlo ni Pedro nga ang matinud-anong mga Santos susama niadtong buhing mga bato nga gitukod sa bato sa pamag-ang diha ni Jesukristo ug ang mga masinupakon mahiagum sa Iyang kasuko tungod kay Siya dili mosuporta sa ilang kasupakan.

Basaha ang 1 Pedro 2:9–10, nga mangita kon giunsa sa paghulagway ni Pedro ang matinud-anong mga Santos. Ikonsiderar ang pagmarka sa mga pulong nga importante para nimo.

Asa sa mga tawag nga gihatag ni Pedro ngadto sa mga Santos ang imong paborito?

Aron masabtan unsay ipasabut sa pagkahimong “katawhan nga iyang kaugalingon sa Dios [lahi nga katawhan],” basaha ang 1 Pedro 2:9.

Sa unsa kaha nga paagi ang mga pulong nga gigamit ni Pedro sa paghulagway sa mga Santos diha sa 1 Pedro 2:9–10 nakatabang nila sa pagbaton og kaisug dihang nasinati nila ang pagpanglutos sa relihiyon?

Basaha ang 1 Pedro 2:11–12, nga mangita kon unsay gihangyo ni Pedro nga buhaton isip katawhan nga iyang kaugalingon sa Dios, o gibahandi, nga katawhan. Timan-i nga gitawag ni Pedro ang mga Santos og “dumuloong” ug “mga langyaw” tungod kay nagpuyo sila uban sa mga tawo nga lahi ang kultura ug relihiyon kay sa mga Santos o tungod kay layo sila sa ilang langitnong panimalay, nga nagpakabuhing temporal isip mga mortal.

Gisultihan ni Pedro ang mga Santos nga mamahimo silang mga ehemplo sa mga tawo sa ilang palibut ug makatabang sa uban sa paghimaya sa Dios (tan-awa sa 1 Pedro 2:12). Gikan sa 1 Pedro 2:11–12 atong nakat-unan nga gitawag sa Dios ang Iyang mga Santos nga mahibulag ug malahi sa kalibutan aron ang uban makakita sa ilang ehemplo ug mohimaya Kaniya. Ikonsiderar ang pagsulat o pagtimaan niini nga baruganan diha sa imong mga kasulatan.

Si Sister Elaine S. Dalton dihang siya pa ang kinatibuk-ang presidente sa Young Women miingon: “Kon nagtinguha mo sa paghimo’g kalainan sa kalibutan, kinahanglang lahi kamo sa kalibutan” (“Karon ang Panahon sa Pagtindog ug Pagpakita!” Ensign o Liahona, Mayo 2012, 124.

Tubaga ang mosunod nga mga pangutana diha sa imong scripture study journal:
1. Unsa ang pipila ka mga paagi diin ang mga Santos sa Ulahing mga Adlaw gihangyo nga mahibulag ug malahi gikan sa kalibutan?
2. Sa unsang paagi ang imong pagpili nga mahibulag ug malahi sa kalibutan nakaapekto sa uban alang sa kaayohan o nakatabang nga madala sila ngadto sa Dios?
3. Unsay mas maayo nimong mahimo aron mahibulag ug malahi sa kalibutan aron ikaw mahimo nga ehemplo? (Isulat ang imong tumong kon unsay plano nimong buhaton aron mahimong ehemplo ngadto sa uban.)

1 Pedro 2:13–25

Gitambagan ni Pedro ang mga Santos sa paglahutay sa mga pag-antus sama sa gihimo sa Manluluwas

Diha sa 1 Pedro 2:13–18, gitudloan ni Pedro ang mga Santos nga itugyan ang ilang mga kaugalingon ngadto sa mga balaod ug sa sibil nga mga awtoridad nga nagdumala kanila (lakip ang emperador sa Roma kinsa nagpasiugda og grabeng pagpanglutos batok kanila). Giawhag niya kadtong mga sulugoon nga nag-antus og mga kalisud sa pagpas-an sa ilang mga pag-antus uban sa pailub ug sa paghinumdom nga ang Dios nakakita kanila.

Basaha ang 1 Pedro 2:19–20, nga mangita kon unsay gitambag ni Pedro sa mga Santos kon unsaon nila sa paglahutay ang mga pag-antus.

Giawhag ni Pedro ang mga Santos sa paglahutay sa ilang mga pag-antus sa mapailubong paagi. Basaha ang 1 Pedro 2:21–25, nga mangita sa deskripsyon ni Pedro kon giunsa sa pagsanong ni Jesukristo ang pagpanglutos. Ikonsiderar ang pagmarka sa unsay imong nakit-an.

Sumala sa 1 Pedro 2:21, unsang butanga ang ikahatag sa pag-antus sa Manluluwas alang kanato?

Makat-unan nato ang mosunod nga kamatuoran gikan sa mga pagtulun-an ni Pedro mahitungod sa paglahutay sa mga pagsulay: Atong masunod ang ehemplo sa Manluluwas pinaagi sa mapailubong paglahutay sa mga pagsulay.

Ikonsiderar kon unsay imong mahimo aron mas masunod nimo ang ehemplo ni Jesukristo sa mapailubong paglahutay sa mga pagsulay.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 1 Pedro 1–2 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: