2 Mga Taga-Corinto 10–13

Pasiuna

Si Apostol Pablo mitudlo kabahin sa espirituhanong gubat nga giapilan sa mga anak sa Dios. Iyang gidepensahan ang iyang kaugalingon batok niadtong misupak kaniya. Iyang gisaysay kon sa unsang paagi siya nadala ngadto sa ikatulong langit, ug iyang gihulagway kon sa unsang paagi ang iyang kahuyang nahimong usa ka panalangin ngadto kaniya. Sa wala pa taposa ang iyang sulat, si Pablo miawhag sa mga Santos sa Corinto sa pagsusi sa ilang mga kaugalingon ug sa pagpamatuod sa ilang pagkamatinud-anon.

2 Mga Taga-Corinto 10–11

Si Pablo nagsulat kabahin sa espirituhanong gubat, sa mga pagpangilad ni Satanas, ug sa iyang kaugalingong mga kalisdanan

Unsay mosulod sa hunahuna kon imong makita ang pulong nga gubat?

Paghunahuna og mga paagi diin kita naapil sa usa ka gubat batok ni Satanas. Unsa ang pipila sa labing lisud nga pakig-away nga atong giatubang niini nga espirituhanong gubat?

Basaha ang 2 Mga Taga-Corinto 10:3–6, nga mangita kon unsay gitudlo ni Apostol Pablo nga kinahanglan natong buhaton aron magmalampuson niini nga gubat batok ni Satanas.

Ang instruksyon nga “[bihagon] ang tanang panghunahuna aron kini magmasinugtanon kang Kristo” (2 Mga Taga-Corinto 10:5) nagpasabut sa pagkontrolar sa atong mga hunahuna, lakip ang paglikay sa dili angay nga mga hunahuna, ug sa pagtutok sa maayo, makabayaw nga mga butang. Usa ka kamatuoran nga atong makat-unan gikan sa bersikulo 5 mao nga samtang nagkontrolar kita sa atong mga hunahuna agig pagsunod ni Jesukristo, kita mahimong mas malampuson sa gubat batok ni Satanas.

Tubaga ang mosunod nga mga pangutana diha sa imong scripture study journal:
1. Unsa ang pipila ka mga butang nga atong mahimo nga makatabang kanato sa pagkontrolar sa atong mga hunahuna? (Tan-awa sa Alma 37:36; D&P 121:45; ug sa First Presidency Preface, sa Hymns [page x], alang sa makatabang nga mga ideya.)
2. Unsa nga mga panalangin ang imong nasinati samtang imong gikontrolar ang imong mga hunahuna agig pagsunod sa Manluluwas?

Ikonsiderar unsay imong buhaton aron sa pagkontrolar sa imong mga hunahuna agig pagsunod sa Manluluwas. Ang ubang mga tawo nakakaplag nga makatabang ang pag-ampo, pagbasa o pagsag-ulo sa mga kasulatan, ug sa pagkanta og mga himno.

Diha sa 2 Mga Taga-Corinto 10:7–18 atong makat-unan nga si Pablo naghimaya diha sa Ginoo ug mitudlo nga ang iyang kaugalingong mga kahuyang kinahanglan dili gamiton nga rason nga dili maminaw kaniya.

Diha sa 2 Mga Taga-Corinto 11 atong mabasa nga si Pablo mihisgut og dugang nga mga paagi nga si Satanas nagtinguha nga mohaylo sa atong mga hunahuna ug modala kanato palayo kang Jesukristo, lakip ang paggamit sa mini nga mga Kristo ug mini nga mga Apostoles. Si Pablo nanugid sa mga pag-antus nga iyang giagwanta isip usa ka tinuod nga Apostol sa Manluluwas.

2 Mga Taga-Corinto 12

Si Pablo nagsaysay nga siya gisakgaw dala ngadto sa langit ug nagtudlo kon sa unsang paagi ang pag-ila sa atong mga kahuyang makabenepisyo kanato

Paghunahuna og usa ka higayon dihang napasakitan ka sa mga tunok. Sa unsang paagi ang mga tunok makapalisud sa kinabuhi?

Si Apostol Paul migamit sa konsepto sa usa ka tunok aron sa pagsimbolo sa usa ka pagsulay o kahuyang nga iyang nasinati.

Samtang imong basahon ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ikonsiderar ang mga matang sa mga pagsulay ug mga kahuyang nga imong nasinati: “Ang uban nawad-an sa usa ka minahal tungod sa kamatayon o sa pag-amuma alang sa usa ka masakiton. Ang uban nasakitan tungod sa diborsyo. May lain nga nangandoy og mahangturong kaminyoon. Ang uban nabiktima sa maka-adik nga butang o mga bisyo sama sa bino, tabako, drugas o pornograpiya. May lain nga nangabakol o may deperinsya sa panghunahuna. Ang uban naghigwaos tungod sa pagkaibug sa isigka lalaki o isigka babaye. Ang uban may mapait nga pagbati sa pagka-ubos o wala kinahanglana. Sa laktud, daghan ang gibug-atan sa gipas-an” (“Iyang Papahulayon ang Nag-antus,” Ensign o Liahona, Nob. 2006, 6).

Samtang magtuon ka sa 2 Mga Taga-Corinto 12, pangitaa ang mga kamatuoran nga makatabang kanimo samtang nakasinati ka og mga pagsulay ug mga kahuyang.

Basaha ang 2 Mga Taga-Corinto 12:1–4, nga mangita sa panan-awon nga nakita ni Pablo. (Niini nga mga bersikulo si Pablo mipasabut sa iyang kaugalingon sa dihang misulti siya mahitungod sa “usa ka tawo.” Diha sa bersikulo 2 ang pamahayag nga “kon diha ba siya sulod sa lawas o sa gawas, wala ako masayud: ang Dios mao lamang ang nasayud” nagpasabut nga si Pablo nakakita og usa ka panan-awon.)

Basaha ang 2 Mga Taga-Corinto 12:5–6, nga mangita kon unsay reaksyon ni Pablo niini nga panan-awon sa celestial nga gingharian.

Timan-i nga bisan nakakita si Pablo niini nga panan-awon, dili siya “magpasigarbo” (o manghambog) kabahin niini. Basin nabalaka siya nga ang uban tingali taas na kaayo og panghunahuna kaniya nga aduna pa ra ba siyay mortal nga mga panlimbasug nga angay mabuntog.

Basaha ang 2 Mga Taga-Corinto 12:7–9, nga mangita kon sa unsang paagi ang Ginoo mitabang ni Pablo nga magpabiling mapainubsanon. (Ang “makapasulabi sa pagkahimuot” [bersikulo 7] nagpasabut nga mahimong mapasigarbuhon.)

Si Elder Bruce R. McConkie sa Korum sa Napulog Duha ka mga Apostoles mikomentaryo nga ang “tunok sa lawas” ni Pablo mao ang “wala hinganli nga pisikal nga sakit, nga daw seryuso kaayo nga ang Apostol kanunay o pabalik-balik nga nag-antus” (Doctrinal New Testament Commentary, 3 vols. [1965–73], 2:448).

Timan-i kon kapila si Pablo nag-ampo nga matangtang kini nga tunok sa lawas. (Ang pulong nga makatulo [bersikulo 8] nagpasabut og tulo ka higayon.)

Ikonsiderar ang pagmarka sa mga pulong diha sa 2 Mga Taga-Corinto 12:9 nga nagpasabut nga ang Ginoo mipili nga dili tangtangon ang tunok sa lawas ni Pablo.

Gikan niini nga mga bersikulo atong makat-unan nga ang Ginoo mahimong motugot nga makasinati kita og mga kahuyang ug mga pagsulay aron kita makakat-on sa pagpaubos. Mahimo nimong isulat o timan-an kini nga kamatuoran diha sa imong mga kasulatan tupad sa 2 Mga Taga-Corinto 12:7–9.

Basaha ang 2 Mga Taga-Corinto 12:9–10, nga mangita sa mga kamatuoran nga nakat-unan ni Pablo nga mitabang kaniya nga makalahutay sa iyang mga kahuyang. Samtang magbasa ka, hinumdomi nga ang grasya mao ang “diosnon nga panabang o kalig-on gihatag pinaagi sa kalooy ug gugma sa Dios” (Giya ngadto sa mga Kasulatan, “Grasya,” scriptures.lds.org).

Mahimo nimong markahan ang mga pulong sa 2 Mga Taga-Corinto 12:9–10 nga nagtudlo sa mosunod nga mga kamatuoran: Ang grasya ni Jesukristo igo aron sa paglig-on kanato sa atong mga kahuyang. Ang Ginoo dili kanunay motangtang sa atong mga hagit, apan Siya molig-on kanato samtang kita matinud-anong molahutay niini.

Si Elder Dallin H. Oaks mipamatuod, “Ang makaayo nga gahum ni Ginoong Jesukristo — kon kini nagkuha man sa atong mga palas-anon o naglig-on kanato sa paglahutay ug pagpuyo uban niini sama ni Apostol Pablo—anaa alang sa matag kasakit sa pagka-mortal” (“Iyang Papahulayon ang Nag-antus,”8).

Tubaga ang duha o ang tanan sa mosunod nga mga pangutana diha sa imong scripture study journal:
1. Unsay gipasabut niini kanimo nga ang grasya sa Manluluwas “igo” (2 Mga Taga-Corinto 12:9) sa paglig-on kanimo diha sa imong mga kahuyang?
2. Sa unsang paagi ang mga kamatuoran nga gitudlo diha sa 2 Mga Taga-Corinto 12:9–10 makatabang kanimo samtang makasinati ka og mga kahuyang ug mga pagsulay?
3. Kanus-a man ka o ang imong kaila gilig-on sa Manluluwas aron matabangan sa usa ka kahuyang o panahon sa pagsulay?

2 Mga Taga-Corinto 13

Si Pablo nag-awhag sa mga Santos sa pagsusi sa ilang mga kaugalingon ug sa pagmatuod sa ilang pagkamatinud-anon

Pipila ka mga tawo karon magduda sa mga pagtulun-an ug sa awtoridad niadtong gitawag sa pagserbisyo sa Simbahan diha sa mga posisyon sa pagpangulo. Sa samang paagi, adunay mini nga mga magtutudlo taliwala sa mga Santos nga taga-Corinto kinsa misupak ni Pablo ug sa iyang awtoridad isip usa ka Apostol.

Basaha ang 2 Mga Taga-Corinto 13:3, nga mangita kon unsay gipangitaan og pruweba sa mga miyembro sa Simbahan sa Corinto.

Basaha ang 2 Mga Taga-Corinto 13:5–6, nga mangita kon unsay giawhag ni Apostol Pablo nga buhaton sa mga Santos nga taga-Corinto kay sa mangutana kon ang Ginoo namulong ba pinaagi kaniya isip usa ka Apostol. Ikonsiderar ang pagmarka sa mga aksyon nga pulong diha sa bersikulo 5 nga nagsulti unsay angay buhaton sa mga Santos nga taga-Corinto.

Sa dihang gihangyo ni Pablo ang mga Santos nga taga-Corinto sa pagsusi kon sila “nagapadayon ba sa [ilang] pagtuo” [bersikulo 5], siya naghangyo kanila sa pagkonsiderar kon sila nagmatinud-anon ba ngadto sa Ginoo ug sa Iyang Simbahan. Gikan sa 2 Mga Taga-Corinto 13:5–6 atong makat-unan nga kay sa manaway sa mga lider sa Simbahan, ang mga miyembro sa Simbahan kinahanglan mosusi sa ilang kaugalingong pagkamatinud-anon.

Basaha ang mosunod nga pamahayag ni Propeta Joseph Smith, nga mangita kon unsay iyang gitudlo nga mahitabo kon kita mopili sa pagsaway sa atong mga lider imbis nga susihon ang atong pagkamatinud-anon: “[Kon ang usa ka tawo] mibarug aron paghukom sa uban, nangitag sayop diha sa Simbahan, moingon nga sila anaa sa dili maayong dalan, samtang siya sa iyang kaugalingon maoy matarung, nan hibaloi pag-ayo, nga kanang tawhana nagpaingon sa dalan sa apostasiya; ug kon siya dili maghinulsol, mobiya sa kamatuoran, ingon nga ang Dios buhi” (Mga Pagtulun-an sa mga Presidente sa Simbahan: Joseph Smith [2007], 384).

Paggahin og pipila ka gutlo sa pagpamalandong sa mosunod nga mga pangutana: Dayon pirmahi ang imong scripture study journal nga nagpasabut nga imong nakompleto kini nga buluhaton.
1. Sa usa ka sukdanan nga 1–10 (diin ang 10 mao ang hingpit nga paagi), unsa ka maayo nimong gisunod ang tambag sa mga lider sa Simbahan?
2. Unsa ang usa ka sumbanan nga gitudlo sa mga propeta ug mga apostoles nga mahimo nimong masunod nga mas matinud-anon?
3. Sa usa ka sukdanan nga 1–10 (diin ang 10 mao ang matag oportunidad nga aduna ka), kapila ka mopahayag og pasalamat alang sa imong mga lider sa Simbahan, sa personal man o diha sa pag-ampo?
4. Unsay imong mahimo aron sa pagpakita og dugang nga pasalamat alang sa sakripisyo ug paningkamot nga gihimo sa imong mga lider alang kanimo?
Tubaga ang mosunod nga pangutana diha sa imong scripture study journal: Unsa nga mga panalangin ang moabut gikan sa kanunay nga paghimo og usa ka espirituhanong pagsusi sa kaugalingon sama niini?

Diha sa 2 Mga Taga-Corinto 13:7–14 atong makat-unan nga si Pablo miawhag sa mga Santos sa paglikay sa dautan ug sa pagpaningkamot alang sa pagkahingpit.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Mga Taga-Corinto 10–13 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: