Unit 27, Day 1: 2 Timoteo

Unit 27: Day 1

2 Timoteo

Pasiuna

Diha sa iyang ikaduhang epistola ngadto ni Timoteo, gitudlo ni Apostol Pablo nga ang kahadlok wala magagikan sa Dios ug mitambag kang Timoteo nga dili ikaulaw ang iyang pagpamatuod bahin ni Jesukristo. Giawhag niya si Timoteo nga magmatinud-anon sa paglahutay sa mga pagsulay ug mimando kaniya sa pagtudlo sa mga Santos nga maghinulsol. Gipasabut ni Pablo nga bisan tuod nga dayag ang apostasiya ug ang pagkadautan sa ilang panahon ingon man usab sa katapusang mga adlaw, kinahanglan nga magpabiling matinud-anon si Timoteo sa mga kamatuoran nga iya nang nakat-unan. Gitudlo usab ni Pablo ang bahin sa mga katuyoan sa mga kasulatan. Gitapos niya ang iyang sulat pinaagi sa pag-awhag ni Timoteo nga makugihong motuman sa iyang pangalagad.

2 Timoteo 1

Gitambagan ni Pablo si Timoteo nga dili ikaulaw ang ebanghelyo

Paghunahuna og usa ka higayon nga nakasinati ka og kahadlok. Diin man ka? Unsa may imong gibuhat?

Gipasabut ni Presidente Gordon B. Hinckley kon sa unsang paagi nga ang kahadlok makaimpluwensya kanato: “Kinsa man kanato ang makaingon nga wala siya mibati og kahadlok? Walay akoy nailhan bisan usa nga wala makasinati niini. Ang uban, siyempre, nakasinati og kahadlok nga mas labaw pa kay sa uban. Ang uban dali nga nakabuntog niini, apan ang uban napugngan ug nawad-an og kadasig ug nalupig pa gani niini. Nag-antus kita sa kahadlok nga biay-biayon, ang kahadlok nga mapakyas, ang kahadlok nga mag-inusara, ang kahadlok sa kawalay alamag. Ang uban nahadlok sa karon, ang uban sa umaabut. Ang uban nagpas-an sa kabug-at sa sala ug motugyan sa hapit tanan aron mahimong gawasnon ang ilang kaugalingon gikan nadtong mga kabug-at apan nahadlok nga mousab sa ilang kinabuhi. Atong ilhon nga ang kahadlok wala magagikan sa Dios, apan kining makapabalaka, makadaut nga elemento nagagikan sa kaaway sa kamatuoran ug sa pagkamatarung. Ang kahadlok mao ang katugbang sa hugot nga pagtuo. Makadaut kini, gani makamatay” (“God Hath Not Given Us the Spirit of Fear,” Ensign, Okt. 1984, 2).

Sa unsa kaha nga paagi nga ang kahadlok makaapekto sa atong abilidad sa pagsunod sa ebanghelyo?

Samtang magtuon ka sa 2 Timoteo 1, pangitaa ang baruganan nga makatabang nimo aron mabuntog ang kahadlok.

Samtang gibilanggo si Pablo didto sa Roma hapit na sa katapusan sa iyang kinabuhi, gisulat niya ang iyang ikaduhang epistola ngadto ni Timoteo. Sama sa narekord diha sa 2 Timoteo 1:1–5, gipahayag ni Pablo ang iyang tinguha nga makita si Timoteo ug naghisgot bahin sa sinsero nga pagtuo ni Timoteo.

Basaha ang 2 Timoteo 1:6–8, nga mangita sa gipahinumdom ni Pablo kang Timoteo aron mabuntog ang kahadlok.

Ang “gasa sa Dios” nga nadawat pinaagi sa pagpandong sa mga kamot (2 Timoteo 1:6) mahimong nagpasabut sa Espiritu Santo. Ang pulong nga “buhion” diha sa bersikulo 6 nagpasabut og ipabalik o bag-uhon. Gitambagan ni Pablo si Timoteo nga ipabalik ang gasa sa Espiritu Santo, o dapiton ang Espiritu Santo nga magauban kaniya.

Sumala sa 2 Timoteo 1:7, unsa nga mga panalangin ang moabut kon magauban kanato ang Espiritu?

Gipasabut ni Pablo ang kalibutanong kahadlok, nga nagmugna og kabalaka, kawalay kasiguroan, ug makapalisang ug lahi sa unsay gipasabut sa mga kasulatan nga “ang pagkahadlok sa Ginoo” (Mga Proverbio 9:10). Ang pagkahadlok sa Ginoo mao ang “pagbati og balaan nga pagtahud ug kataha alang Kaniya ug sa pagsunod sa Iyang mga sugo” (Giya ngadto sa mga Kasulatan, “Kahadlok,” scriptures.lds.org). Ang atong kahadlok, o balaang pagtahud, sa Ginoo makapalig-on kanato batok sa kalibutanong kahadlok.

Usa ka baruganan nga atong makat-unan gikan sa tambag ni Pablo ngadto ni Timoteo mao nga samtang kinasingkasing kitang magtinguha nga makauban nato ang Espiritu, mabuntog nato ang kahadlok ug dili ikaulaw ang pagpamatuod bahin ni Jesukristo.

Tubaga ang mosunod nga mga pangutana diha sa imong scripture study journal:
1. Unsa ang mga paagi diin mapakita nimo nga dili nimo ikaulaw ang imong pagpamatuod bahin ni Jesukristo?
2. Kanus-a man ka gitabangan sa Espiritu nga mabuntog nimo ang kalibutanong kahadlok o gihatagan ka og kaisug nga lig-ong mobarug sa imong pagpamatuod bahin ni Jesukristo?

Pamalandungi kon unsay imong mabuhat sa pagdapit sa Espiritu nga makauban nimo aron mabuntog nimo ang kalibutanong kahadlok ug dili ikaulaw ang imong pagpamatuod bahin ni Jesukristo.

Sama sa narekord diha sa 2 Timoteo 1:9–18, giawhag ni Pablo si Timoteo nga magpabiling matinud-anon sa tinuod nga doktrina. Mipamatuod siya bahin sa makaluwas nga gahum ni Jesukristo, nga nakapahimong posible sa Pagkabanhaw, pagka-imortal, ug kinabuhing dayon.

2 Timoteo 2

Gimanduan ni Pablo si Timoteo nga matinud-anong molahutay sa mga kalisdanan

Sama sa narekord diha sa 2 Timoteo 2:1–9, giawhag ni Pablo si Timoteo nga mosalig sa ebanghelyo ug molahutay sa mga kalisdanan sama sa buhaton sa usa ka maayong sundalo. Gisulti usab ni Pablo nga nakasinati siya og daghang mga pagsulay tungod sa pagkahimong disipulo ni Kristo.

Basaha ang 2 Timoteo 2:10–12, nga mangita sa gisulti ni Pablo kon nganong nakalahutay siya sa maong mga kalisdanan. Ang “mga pinili” (bersikulo 10) nagpasabut sa matinud-anong mga miyembro sa Simbahan (tan-awa sa D&P 29:7), ug ang pulong nga magaantus diha sa bersikulo 12 nagpasabut sa paglahutay ug pagpabiling makanunayon.

Usa ka baruganan nga atong makat-unan gikan niining mga bersikulo mao nga samtang molahutay kita sa mga kalisdanan ug magpabiling matinud-anon sa Ginoo, matabangan nato ang atong kaugalingon ug ang uban nga makabaton og kaluwasan pinaagi ni Jesukristo.

Unsaon man nato pagtabang sa uban nga makabaton og kaluwasan pinaagi ni Jesukristo pinaagi sa matinud-anong paglahutay sa atong kaugalingong mga pagsulay?

Diha sa 2 Timoteo 2:13–19 gitambagan ni Pablo si Timoteo nga pahinumduman ang mga Santos aron malikayan ang panagbingkil ug “magabiya sa pagkadautan” (bersikulo 19). Ikonsiderar ang pagmarka sa katapusang sentence diha sa 2 Timoteo 2:19.

Aron matabangan si Timoteo nga masabtan ang panginahanglan sa mga Santos nga maghinulsol, migamit si Pablo og lain-laing mga matang sa sulodlan, o mga sudlanan, isip sambingay alang sa mga sakop sa pamilya, o sa Simbahan, ni Jesukristo.

Basaha ang 2 Timoteo 2:20, nga mangita kon unsa nga mga matang sa sulodlan nga anaa “diha sa dakong balay.” Ang mga pulong nga “ang uban alang sa dungganan nga kagamitan, ug ang uban alang sa talamayon nga kagamitan” nagsugyot nga ang ubang mga miyembro sa Simbahan mga takus ug mipahinungod sa ilang kaugalingon sa halangdon nga mga katuyoan, samtang ang uban wala.

Basaha ang 2 Timoteo 2:21, nga mangita kon unsay makapahimo sa usa ka tawo nga haum nga “sulodlan … nga mapuslan sa agalon sa panimalay.” Ang mga pulong nga “magaputli sa iyang kaugalingon gikan sa mga butang nga talamayon” nagpasabut og mahimong limpyo gayud gikan sa kadautan (tan-awa sa 2 Timoteo 2:19).

Usa ka baruganan nga atong makat-unan gikan sa sambingay ni Pablo mao nga kon maputli nato ang atong kaugalingon sa kadautan, mas makaserbisyo kita sa Ginoo.

Unsa may atong mahimo aron maputli nato ang atong kaugalingon sa kadautan?

Basaha ang 2 Timoteo 2:22, nga mangita sa ubang mga butang nga gisulat ni Pablo nga atong mabuhat aron maputli nato ang atong kaugalingon sa kadautan.

Si Elder Jeffrey R. Holland sa Korum sa Napulog Duha ka mga Apostoles mihatag og ehemplo kon sa unsang paagi nga kining baruganan magamit sa mga misyonaryo:

“Ang Ginoo mibutang og mga linya sa katakus alang niadtong gitawag sa paghago uban Kaniya niini nga buhat. Walay misyonaryo nga wala maghinulsol sa sekswal nga kalapasan o malaw-ay nga sinultihan o pagtan-aw og pornograpiya ug dayon magpaabut nga mohagit sa ubang tawo sa paghinulsol niadtong nahimo nga samang mga butang! Dili kamo makahimo niana. Ang Espiritu dili makig-uban kaninyo, ug ang mga pulong moungot sa inyong tutunlan samtang litukon ninyo kini. Dili kamo mahimong mosubay sa unsay giingon ni Lehi nga ‘gidili nga mga dalan’ [1 Nephi 8:28] ug magpaabut nga mogiya sa uban ngadto sa ‘higpit ug pig-ot’ [2 Nephi 31:18] nga dalan—dili kana mahimo.

“Apan adunay tubag niini nga hagit alang kaninyo sa matag tipik samtang adunay butang alang sa investigator nga inyong adtoon. Bisan kinsa pa kamo ug bisan unsay inyong nahimo, kamo mapasaylo. Ang matag usa kaninyo … makabiya sa bisan unsang kalapasan diin kamo nakiglimbasug. Mao kini ang milagro sa pagpasaylo; mao kini ang milagro sa Pag-ula ni Ginoong Jesukristo. Apan dili ninyo kana mahimo nga walay aktibong pasalig sa ebanghelyo, ug dili ninyo kana mahimo kon walay paghinulsol diin kini gikinahanglan. Naghangyo ako kaninyo … nga mag-aktibo ug magmalimpyo. Kon gikinahanglan, mohangyo ako kaninyo nga mag aktibo ug mag malimpyo” (“Apil Kitang Tanan,” Ensign o Liahona, Nob. 2011, 45).

Pamalandungi nganong gikinahanglan nga malimpyuhan gikan sa sala kon magsangyaw sa ebanghelyo. Hunahunaa ang bisan unsang mga sala nga kinahanglann nimong hinulsulan aron mas makaserbisyo ka sa Ginoo. Hinumdumi nga ang imong bishop o branch president mahimong usa ka importante nga tinubdan sa tabang samtang maningkamot ka nga mahimong limpyo ug putli.

2 Timoteo 3

Gihulagway ni Pablo ang mga panahon nga malisud sa katapusang mga adlaw

Nabalaka ka ba nga ikaw o ang imong umaabut nga mga anak mahimong dili makasugakod sa mga kadautan sa kalibutan sa atong panahon?

Gitudloan ni Apostol Pablo si Timoteo kon unsaon pagbuntog ang mga panahon nga malisud sa kalibutan. Basaha ang 2 Timoteo 3:1–5, nga mangita sa uban sa mga kakuyaw nga gisulti ni Pablo kang Timoteo ug atong masinati o masaksihan sa atong kinabuhi. Mahimo kang mogamit sa footnotes aron sa pagtabang nimo nga makasabut sa ubang lisud nga mga pulong.

Hunahunaa ang usa ka panahon bag-ohay lang diin mahimong naobserbahan nimo kining mga matang sa makuyaw nga mga kinaiya.

Diha sa 2 Timoteo 3:6–13 gipadayon sa paghulagway ni Pablo kining mga kakuyaw, ug nanagna siya nga sa katapusang mga adlaw mas magkagrabe kini.

Hibaloi nga diha sa 2 Timoteo 3:7 gihisgutan ni Pablo kadtong “kanunayng managtuon apan bisan unsaon dili gayud managpakakab-ot sa kahibalo sa kamatuoran.” Unsa ang ubang mga pilosopiya o mga ideya nga popular karon apan sukwahi sa kamatuoran nga gipadayag sa Dios pinaagi sa Iyang mga propeta?

Human mahulagway kining mga kakuyaw, gitambagan ni Pablo si Timoteo—ug kita—kon unsaon pagbuntog kining espirituhanong mga kakuyaw.

Basaha ang 2 Timoteo 3:14–17, nga mangita sa tambag ni Pablo. (Hinumdumi nga ang 2 Timoteo 3:15–17 usa ka scripture mastery passage. Mahimo nimo kining markahan sa usa ka talagsaong paagi aron matultulan nimo kini sa umaabut.)

Hunahunaa kon unsa kaha ang gipasabut sa “magpadayon ka diha sa mga butang nga imong nahikat-unan ug imong ginatuohan pag-ayo” (2 Timoteo 3:14).

Atong makat-unan ang mosunod nga duha ka mga baruganan gikan niining mga bersikulo: Kon magpadayon kita diha sa mga kamatuoran nga atong nakat-unan gikan sa kasaligan nga mga tinubdan ug diha sa mga kasulatan, mabuntog nato ang espirituhanong mga kakuyaw sa katapusang mga adlaw. Samtang magtuon kita sa mga kasulatan, makakat-on kita og doktrina ug makadawat og koreksyon ug instruksyon nga makatabang nato nga molambo paingon sa pagkahingpit.

Diha sa imong scripture study journal, pagsulat bahin sa usa ka higayon sa dihang ang mga kasulatan nakatabang nimo sa usa o dugang pa sa mosunod nga mga paagi:
1. Aron masabtan ang doktrina sa ebanghelyo
2. Pinaagi sa pagtanyag og pagbadlong o pagkorihir kalabut sa usa ka butang diha sa imong hunahuna, mga pagpili, o kinaiya nga dili sakto
3. Pinaagi sa paghatag og usa ka tubag sa pag-ampo o paghatag og instruksyon kon unsaon nimo pagsulbad ang usa ka problema

Scripture Mastery—2 Timoteo 3:15–17

Paggahin og pipila ka gutlo ug memoryaha ang 2 Timoteo 3:16–17. Dayon isulat diha sa imong scripture study journal: Namemorya nako ang 2 Timoteo 3:16–17. Ikonsiderar kon unsaon nimo pagtuon ang imong mga kasulatan karong semanaha sa paagi nga makatabang nimo aron madawat ang mga saad niining mga bersikulo nganha sa imong kinabuhi.

2 Timoteo 4

Gipadayag ni Pablo nga gibugno niya ang maayong pakigbugnoay ug mimando ni Timoteo sa pagpadayon sa pagsangyaw

Posible nga ang 2 Timoteo mao ang katapusang sulat nga gisulat ni Apostol Pablo sa wala pa ang iyang kamatayon. Basaha ang 2 Timoteo 4:1–5, nga mangita sa duha ka mga butang: (1) Ang tambag ni Pablo kang Timoteo ug (2) ang panagna ni Pablo bahin sa umaabut sa karaang Kristohanong Simbahan. Gamita ang footnotes aron matabangan ka nga makasabut sa unsay imong gibasa. Ang mga pulong nga “may kahigayunan ka o wala, magmadasigon ka niini” diha sa bersikulo 2 nagpasabut nga magdali sa buhat sa Ginoo ug sa pagbadlong o pagkorihir niadtong wala magdali (tan-awa sa Joseph Smith Translation, 2 Timoteo 4:2).

Isulat ang imong mga nakit-an diha sa mosunod nga tsart:

Tambag ni Pablo ngadto ni Timoteo	Panagna ni Pablo bahin sa karaan nga Kristohanong Simbahan

Sa imong hunahuna nganong giawhag man ni Pablo si Timoteo nga magpadayon sa pagsangyaw ug sa pagpangalagad sa mga tawo bisan pa kon nasayud siya nga daghan ang mobiya gikan sa kamatuoran?

Basaha ang 2 Timoteo 4:6–8, nga mangita sa gisulat ni Pablo bahin sa iyang kaugalingong mga paningkamot sa pagsangyaw sa ebanghelyo.

Hibaloi nga ang atletikanhong pagpasabut ni Pablo sa pagpakigbugno og maayong pakigbugnoay ug pagtapos sa pagdagan sa lumba naghulagway kon giunsa niya paghuman ang iyang misyon sa matinud-anong paagi. Sumala sa bersikulo 8, unsa may nahibaloan ni Pablo nga naghulat kaniya human sa kamatayon?

Atong makat-unan ang mosunod nga baruganan gikan niining mga bersikulo: “Kon magpabilin kitang matinud-anon sa tanang gikinahanglan sa Ginoo kanato, makadawat kita og purongpurong sa pagkamatarung. Ang “purongpurong sa pagkamatarung” naglakip sa pagkahisama sa Langitnong Amahan.

Diha sa imong scripture study journal, ilista ang ubang mga gikinahanglan nga gihatag sa Ginoo ngadto sa mga kabatan-onan sa Simbahan aron matabangan sila nga mahisama sa ilang Amahan sa Langit. (Kon magkinahanglan ka og tabang, tan-awa diha sa Alang sa Kalig-on sa mga Kabatan-onan nga booklet.) Dayon isulat ang mga tubag sa mosunod nga mga pangutana:
1. Nganong ang mga kabatan-onan mahimong mopili man nga mohunong sa pagkamatinud-anon sa uban niining mga gikinahanglan?
2. Kinsa man ang imong nailhan nga, sama ni Pablo, usa ka maayong ehemplo sa pagpabiling matinud-anon bisan kon kini lisud? Unsay ilang gihimo nga nakapakita og ehemplo niini nga baruganan?”

Sama sa narekord diha sa 2 Timoteo 4:9–22, gitapos ni Pablo ang iyang sulat pinaagi sa pagpasabut nga bisan kon mibati siya nga magul-anon usahay sa iyang buhat, nasayud siya nga nagauban kaniya ang Ginoo ug milig-on kaniya.

Hinumdumi nga magpagpabiling matinud-anon sa unsay gikinahanglan sa Ginoo kanato. Mahimo nimong isulat ang bahin sa bisan unsa nga mga impresyon o mga pag-aghat gikan sa Langitnong Amahan nga imong gibati panahon niining leksyon. Ikonsiderar ang paghimo og usa ka tumong sa paglihok sa imong mga impresyon.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Timoteo ug nahuman kini nga leksyon sa (petsa).

Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: