Human mohatag og panudlo sa Iyang mga tinun-an sulod sa 40 ka adlaw, si Jesukristo mikayab ngadto sa langit. Ang mga Apostoles ug ang uban nagkahiusa sa pag-ampo ug pangamuyo. Pinaagi sa inspirasyon, si Matias gitawag sa pagpuli sa bakante sa Korum sa Napulog Duha ka mga Apostoles nga gibiyaan sa pagbudhi ug kamatayon ni Judas Iscariote.
Basaha ang mosunod nga mga pamahayag bahin sa Ikaduhang Pag-anhi ni Jesukristo, ug isulat kon ang matag pamahayag tinuod ba (T) o bakak (B) diha sa gihatag nga luna. Gamita ang gihatag nga mga kasulatan sa pagtabang nimo nga makatubag sa sakto.
____ 1. Si Jesukristo moabut sa yuta sa katapusan nga mga adlaw. (Tan-awa sa Moises 7:60.)
____ 2. Sa Iyang Ikaduhang Pag-anhi, si Jesukristo magpakita lamang sa matarung nga mga tawo. (Tan-awa sa D&P 101:23; Joseph Smith—Mateo 1:26)
____ 3. Tungod kay si Jesukristo magtakuban kon Siya mobalik na pag-usab, kadaghanan sa mga tawo dili makahibalo nga ang Ikaduhang Pag-anhi nahitabo. (Tan-awa sa D&C 49:22–23.)
Atol sa Iyang mortal nga pangalagad, si Jesukristo nanagna nga sa katapusang mga adlaw ang ubang mga tawo mosangyaw og bakak nga mga pagtulun-an mahitungod sa Iyang Ikaduhang Pag-anhi (tan-awa sa Joseph Smith—Mateo 1:22–25). Makahibalo kita kon ang maong pagtulun-an mahitungod sa Ikaduhang Pag-anhi ni Jesukristo tinuod ba o bakak kon mosunod kita sa mga pulong sa Manluluwas ug sa mga pulong sa Iyang mga propeta. Pinaagi sa pagbuhat niini makalikay kita nga mailad (tan-awa sa Joseph Smith—Mateo 1:37).
Samtang magtuon ka sa Mga Buhat 1:9–12, pangitaa ang mga kamatuoran mahitungod sa Ikaduhang Pag-anhi ni Jesukristo.
Ang Manluluwas nanudlo sa Iyang mga Apostoles sulod sa 40 ka adlaw human sa Iyang Pagkabanhaw (tan-awa sa Mga Buhat 1:3). Basaha ang Mga Buhat 1:9–12, nga mangita unsay nahitabo human sila mahatagi og instruksyon sa Manluluwas.
Hunahunaa nga didto ka sa pagsaksi sa pagkayab sa Manluluwas ngadto sa langit. Unsa nga mga hunahuna ug mga pagbati sa imong hunahuna ang imong masinati?
Imahe
Ang Pagkayab ni Jesus
Sa karaang Israel, usahay usa ka panganud makita nga maoy representasyon sa presensya ug himaya sa Dios (tan-awa sa Exodos 40:34). Ang panganud nga gihisgutan sa Mga Buhat 1:9 mao ang panganud sa himaya (tan-awa sa Bible Dictionary, “Cloud”). Ang duha ka lalaki nga gihisgutan sa Mga Buhat 1:10 mao ang mga anghel.
Tan-awa sa Mga Buhat 1:11 unsay gisulti sa mga anghel sa mga Apostoles. Usa ka kamatuoran nga atong makat-unan gikan sa pamahayag sa mga anghel mao nga sa Iyang Ikaduhang Pag-anhi, ang Manluluwas mokanaug gikan sa langit sa himaya.
Tan-awa sa Mga Buhat 1:12 nga ang Pagkayab sa Manluluwas nahitabo sa Bukid sa Oliba. Kon ang Manluluwas mobalik na pag-usab, usa sa Iyang pagpakita mao ang Iyang pagkanaug ug pagbarug sa Bukid sa Oliba (tan-awa sa Zacarias 14:4; D&P 45:47–53; 133:19–20). Kini ang mahitabo sa dili pa ang Iyang bantugan ug halangdong pagpakita sa kalibutan (tan-awa sa Isaias 40:5).
Palandunga ang mosunod nga pangutana: Sa unsang paagi nga ang pagkahibalo sa paagi sa pagbalik sa Manluluwas makatabang nato sa paglikay nga mailad samtang kita maghulat sa Iyang Ikaduhang Pag-anhi?
Si Matias napili sa pagpuli sa bakante sa Korum sa Napulog Duha ka mga Apostoles
Human makabalik ang mga Apostoles ngadto sa Jerusalem gikan sa Bukid sa Oliba, nagpundok sila uban sa matinud-anong mga lalaki ug babaye, lakip ni Maria, ang inahan ni Jesus, sa pag-ampo ug pagsimba. Basaha ang Mga Buhat 1:13, ug ipha ang gidaghanon sa mga Apostoles nga nalista.
Nganong 11 lang ka mga Apostoles ang naa nianang higayona?
Sa Mga Buhat 1:15–20 atong nahibaloan nga si Pedro nagbarug sa atubangan sa 120 ka mga tinun-an ug namulong mahitungod sa kamatayon ni Judas Iscariote. Tungod kay si Judas usa sa Napulog Duha ka mga Apostoles sa una, ang mga tinun-an nagpundok aron sa pagpili og bag-ong Apostol.
I-konsiderar ang lain-laing mga paagi diin ang pipila sa mosunod nga mga lider napili: usa ka kapitan sa team, usa ka lokal nga lider sa gobyerno, usa ka hari o rayna, ug usa ka presidente sa usa ka kompaniya. Unsa kaha ang pipila ka mga kwalipikasyon alang niining mga posisyon sa pagpangulo?
I-konsiderar kon sa unsa nga paagi nga ang usa ka Apostol ni Jesukristo napili ug unsay kwalipikasyon sa usa ka tawo nga moalagad isip usa ka Apostol.
Basaha ang Mga Buhat 1:21–26, nga mangita kon sa unsa nga paagi ang bag-ong Apostol napili human sa kamatayon ni Judas Iscariote.
Sa bersikulo 26 ang pulong “ilang giripahan” nagpasabut sa karaan nga pamaagi sa paghimo og desisyon. Alang sa mga matinud-anon, ang kamot sa Dios modirekta sa sangputanan (tan-awa sa Mga Proverbio 16:33).
Imahe
Elder Bruce R. McConkie
Si Elder Bruce R. McConkie sa Korum sa Napulog Duha ka mga Apostoles mipasabut: “Kon sila nagripa, mao kadto ang higayon diin ang Ginoo mipili sa resulta. Tingali, hinoon, ‘mihatag sila sa ilang boto,’ tingali ‘pagpaluyo nga boto’ sa pagtuboy kaniya nga gipili sa Dios sa pag-alagad sa balaan nga pagkaapostol” (Doctrinal New Testament Commentary, 3 vols. [1965–73], 2:32).
Sumala sa Mga Buhat 1:21–22, si Pedro miingon nga ang bag-ong Apostol pilion gikan niadtong personal nga nakaila ni Jesus ug mga saksi sa Iyang pangalagad gikan sa sinugdanan hangtud sa Iyang Pagkabanhaw.
Unsay nakadani nimo mahitungod sa pag-ampo sa mga Apostoles nga narekord sa Mga Buhat 1:24–25?
Usa ka kamatuoran nga atong makat-unan gikan niini nga asoy mao nga ang mga Apostoles ni Jesukristo gitawag sa Dios pinaagi sa pagpadayag. Ikonsiderar ang pagsulat niini nga kamatuoran diha sa imong mga kasulatan tupad sa Mga Buhat 1:24.
Tubaga ang mosunod nga pangutana diha sa imong scripture journal: Ngano sa imong hunahuna nga importante nga ang usa ka Apostol gitawag sa Dios pinaagi sa pagpadayag kay sa pilion sa samang paagi sa ubang mga lider sa kalibutan?
Sama pananglit kon sa unsa nga paagi ang modernong Apostol gipili pinaagi sa pagpadayag, basaha ang mosunod nga asoy gikan sa kinabuhi ni Presidente Heber J. Grant:
Imahe
President Heber J. Grant
“Si Presidente [Heber J.] Grant nakadawat og mga pagpadayag isip Presidente sa Simbahan aron sa paggiya sa tibuok Simbahan. Usa niana nga pagpadayag miabut human dayon sa paggahin kaniya isip Presidente sa Simbahan, sa dihang siya nagtinguha sa kabubut-on sa Ginoo mahitungod sa pagtudlo sa bag-ong sakop sa Korum sa Napulog Duha ka mga Apostoles. Samtang siya namalandong niini nga kapangakohan, ang iyang hunahuna nagbalikbalik ngadto sa iyang dugay na nga higala nga si Richard W. Young, usa ka matinuoron nga Santos sa Ulahing mga Adlaw ug napamatud-an na nga pangulo. Si Presidente Grant mihisgut niini nga kalagmitan uban sa iyang mga magtatambag, kinsa misuporta sa iyang desisyon. Sa dihang siya mibati na sa kasigurohan sa iyang buhaton, siya misulat sa ngalan sa iyang higala diha sa usa ka papel ug gidala ang papel ngadto sa senimana nga miting sa Unang Kapangulohan ug sa Korum sa Napulog Duha ka mga Apostoles. Apan sa diha nga iya na untang ipahayag ang ngalan alang sa pagtugot sa iyang mga Kaigsoonan, wala kini niya mahimo. Imbis nga ngalan ni Richard W. Young, iyang gipresentar ang ngalan ni Melvin J. Ballard, usa ka tawo nga wala kaayo niya hiilhi. Si Presidente Grant dayon miasoy sa gibug-aton niini nga kasinatian diha kaniya:
“Ako mibati sa pagdasig sa buhi nga Dios nga naggiya sa akong mga buhat. Sukad niadtong adlaw nga ako mipili sa wala kaayo hiilhi nga tawo nga mamahimong usa ka apostol, imbis sa akong dugay na ug suod kaayo nga higala, akong nailhan sama sa akong nasayran nga ako buhi, nga ako adunay katungod sa kahayag ug sa pagdasig ug sa paggiya sa Dios diha sa pagdumala sa Iyang buhat dinhi sa yuta’” (Mga Pagtulun-an sa mga Presidente sa Simbahan: Heber J. Grant [2002], 217–19).
Palandunga sa unsa nga paagi nga ang kamatuoran nga gitudlo sa Mga Buhat 1:24 gihulagway niini nga asoy nga nagsulti sa calling sa usa ka moderno nga Apostol.
Sa unsa nga paagi nga ang calling sa usa ka Apostol nagpakita nga ang Manluluwas nagpadayon sa paggiya sa Iyang Simbahan? (Hinumdumi ang kamatuoran nga gitudlo sa Mga Buhat 1:2—si Jesukristo migiya sa Iyang Simbahan pinaagi sa pagpadayag sa Iyang kabubut-on ngadto sa Iyang mga Apostoles pinaagi sa Espiritu Santo.)
Tubaga ang usa o daghan sa mosunod nga mga pangutana diha sa imong scripture study journal:
Kanus-a kamo nakasaksi og bag-ong Apostol nga gitawag ngadto sa Korum sa Napulog Duha ka mga Apostoles, ug unsa ang imong mga pagbati samtang nagpaluyo ka kaniya sa niini nga calling?
Unsa nga mga kasinatian ang nakatabang kanimo nga makaila nga ang buhi nga mga Apostoles gitawag sa Dios?
Ngano nga importante kanimo nga dunay pagpamatuod nga ang buhi nga mga Apostoles gitawag sa Dios?
Nakaila ba ka sa tanang mga pangalan sa mga Apostoles kinsa nag-alagad karon sa Simbahan? Ilista ang mga pangalan sa karon nga mga Apostoles kutob sa imong mahinumduman. (Sa pagsusi kon unsa ka kamaayo sa paghingalan sa mga Apostoles karon, tan-awa ang pahina nga adunay mga litrato ug mga pangalan sa mga General Authorities sa labing bag-ong edisyon sa magasin sa kinatibuk-ang komperensya sa Ensign o Liahona o pangitaa sa LDS.org.)
Isulat ang mosunod sa ubos sa imong mga assignment karong adlawa diha sa imong scripture study journal:
Akong natun-an ang Mga Buhat 1:9–26 ug nahuman kini nga leksyon sa (petsa).
Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: