Unit 28: Day 1

Mga Hebreohanon 5–6

Pasiuna

Gitudlo ni Apostol Pablo nga kadtong makadawat sa priesthood kinahanglan nga tinawag sa Dios ug nga si Jesukristo “gitudlo siya nga [mahimong] labawng sacerdote [halangdon nga pari] sumala sa laray ni Melquisedec” (Mga Hebreohanon 5:10). Giawhag ni Pablo ang mga miyembro sa Simbahan nga magbaton og kakugi, pagtuo, pailub, ug paglaum sa pag-angkon sa mga saad sa Dios.

Magtuon sa mga Kasulatan kada Adlaw

Ang padayon nga inadlawng pagtuon sa kasulatan makatabang nimo sa pagkat-on sa ebanghelyo, makapalambo sa imong pagpamatuod, ug pagpaminaw sa tingog sa Ginoo. Miingon si Presidente Harold B. Lee, “Kon kita dili magbasa sa mga kasulatan adlaw-adlaw, ang atong mga pagpamatuod magtubo nga magkahanap, ang atong pagkaespirituhanon dili magkadugang ang giladmon” (Mga Pagtulun-an sa mga Presidente sa Simbahan: Harold B. Lee [2000], 71). Samtang imong ipadayon ang imong pagtuon sa Bag-ong Tugon, mapanalanginan ka sa pagbasa sa mga kasulatan adlaw-adlaw.

Mga Hebreohanon 5

Gitudlo ni Pablo nga kadtong modawat sa priesthood kinahanglan nga tinawag sa Dios

Hunahunaa nga ang usa ka kaila misulat sa title nga Doktor sa usa ka papel ug gipapilit kini sa iyang sinina. Bisan og isul-ob niya kana nga gisulatan niana nga titulo o tawag, unsay imong kalabutan mga kabalaka kon kining tawhana mosulay sa pag-opera nimo human ka maaksidente? Unsay imong mga kabalaka kon magsul-ob siya og label nga may titulo o tawag nga Law Enforcement Officer ug tiketan ka tungod kay mihimo ka og sayop?

Ngano kaha nga magpanuko man ka sa pagsalig niining tawhana sa paghimo sa mga tahas nga may kalabutan sa mga title nga siya ra ang naghimo-himo?

Bisan og nagsul-ob siya og label nga dunay title, kining tawhana kulang sa gikinahanglang awtoridad ug abilidad sa paghimo niini nga mga tahas. Sama nga ang katilingban moestablisar og mga paagi sa pagkuha og awtoridad aron makabuhat sa piho nga mga responsibilidad, ang Dios miestablisar og pamaagi aron mabatunan ang Iyang awtoridad sa pagbuhat sa piho nga mga responsibilidad sa Iyang Simbahan. Samtang imong tun-an ang Mga Hebreohanon 5, pangitaa ang sumbanan nga giestablisar sa Dios aron mabatunan ang Iyang awtoridad.

Gihulagway ni Apostol Pablo ang Manluluwas isip “labawng sacerdote [halangdong pari]” (Mga Hebreohanon 4:14). Basaha ang Mga Hebreohanon 5:1–3, nga mangita kon unsay gitudlo ni Apostol Pablo mahitungod sa tahas sa high priest tali sa mga Israelite ubos sa balaod ni Moises.

“Ubos sa balaod ni Moises, ang opisyal nga tigdumala sa Aaronic Priesthood gitawag og halangdon nga pari [high priest]. Ang buhatan [office] gipanunod ug madawat sa unang natawo diha sa banay [pamilya] ni Aaron, si Aaron sa iyang kaugalingon nga mao ang unang halangdon nga pari sa Aaronic nga kapunongan.” Ang high priest sa kasagaran magserbisyo hangtud sa katapusan sa iyang kinabuhi, apan kini nga office sa katapusan giilog sa dautang mga tawo. “Ang mga halangdon nga pari wala na mapili sa tukmang paagi ug gipanghatag na kini ubos sa pagbuot ni Herod ug ingon man sa mga Romano. Ang office langkuban sa 28 ka lahi-lahi nga mga lalaki niadtong 37 B.C. ug A.D. 68” (Giya ngadto sa mga Kasulatan, “Halangdon nga Pagkapari”).

Basaha ang Mga Hebreohanon 5:4, nga mangita sa unsang paagi pilion ang halangdon nga pagkapari.

Aron masabtan sa unsang paagi si Aaron “tinawag sa Dios” (Mga Hebreohanon 5:4), basaha ang Exodo 28:1, nga nagrekord sa inter-aksyon nga nahitabo tali sa Dios ug ni Moises sa Bukid sa Sinai.

Hunahunaa kon nganong mahinungdanon nga ang Dios mopadayag sa tawag ni Aaron ngadto kang Moises kay sa kang Aaron ra mismo o sa uban. Si Moises maoy propeta ug siya, mismo, gihatagan sa awtoridad nga makadawat sa ingon niana nga pagpadayag ug pagdumala sa paggamit sa Iyang priesthood dinhi sa yuta.

Gikan sa instruksyon ni Pablo diha sa Mga Hebreohanon 5:4, atong nakat-unan nga kadtong gi-orden sa priesthood kinahanglang tinawag sa Dios pinaagi sa pagpadayag sa awtorisado Niyang mga sulugoon. Sa Simbahan karon, ang awtorisadong mga lider sa priesthood ang mointerbyu sa kandidato para i-orden ug mangayo og giya sa Espiritu Santo sa pagtino sa kaandam sa kandidato ug katakus nga ma-orden sa priesthood.

Sa unsang paagi kini nga kamatuoran susama sa proseso sa pagtawag og mga tawo nga moserbisyo sa ubang mga posisyon sa Simbahan?

Basaha ang Mga Artikulo sa Hugot nga Pagtuo 1:5, nga mangita sa unsang paagi giila ang nag-una nga kamatuoran diha sa Mga Hebreohanon 5:4 ug ang “pagkatinawag sa Dios, sama ni Aaron” makita diha sa gisulat ni Propeta Joseph Smith. Hinumdumi nga ang panagna nagpasabut nga pagpadayag.

Sumala sa ikalima nga artikulo sa hugot nga pagtuo, subay sa giingon nga “pagatawgon sa Dios, pinaagi sa panagna,” unsa pa ang laing mahitabo sa tawo aron mahimong awtorisado sa “pagsangyaw sa Ebanghelyo ug sa pagpangalagad sa mga ordinansa niini”?

Ang Daang Tugon ug ang Bag-ong Tugon nagrekord nga ang mga propeta, mga naghupot sa priesthood, ug mga magtutudlo sa ebanghelyo makadawat sa ilang mga calling pinaagi sa pagpandong sa mga kamot pinaagi sa awtorisadong mga naghupot sa priesthood (tan-awa sa Numeros 27:18–23; Mga Buhat 6:5–6; 13:2–3; 1 Timoteo 4:14).

1. Tubaga ang usa o duha ka mga pangutana diha sa imong scripture study journal:

   1. Sa unsang paagi ang proseso sa pagtawag og mga tawo diha sa mga posisyon sa Simbahan karon nagsubay sa sumbanan nga giestablisar sa mga kasulatan?

   2. Nganong importante man nga mahibaloan nga ang awtoridad sa priesthood madawat lamang sa ingon niini nga paagi?

Basaha ang Mga Hebreohanon 5:5–6, nga mangita kon si kinsa ang mihatag sa Manluluwas sa Iyang awtoridad.

Sumala niini nga mga bersikulo, ang Langitnong Amahan mihatag sa priesthood ngadto sa Iyang Anak nga si Jesukristo. Mamahimo Siya nga “pari hangtud sa kahangturan sumala sa laray ni Melchisedec” (Mga Hebreohanon 5:6).

Isip usa ka office sa Melchizedek Priesthood, ang office sa halangdong pari o high priest “magamit kang Jesukristo isip Halangdong Pari. Si Adan ug ang tanang patriyarka mga halangdong pari usab. Karon, tulo ka tigdumala nga halangdon nga mga pari naglangkob sa Kapangulohan sa Simbahan ug nagdumala sa tanan nga naghupot sa priesthood ug sa mga miyembro sa Simbahan. Dugang nga takus nga mga tawo gi-orden nga halangdon nga mga pari nga angay sa tibuok Simbahan karon” (Giya ngadto sa mga Kasulatan, “Halangdon nga Pagkapari,” scriptures.lds.org).

Basaha ang Mga Hebreohanon 5:7–10, ug ikonsiderar ang pagmarka sa bersikulo 9 kon unsay nakab-ot ni Jesukristo. Ang mga bersikulo 7–8 nag-refer ngadto ni Melchizedek, nga propeta ug hari nga nagpuyo sa panahon ni Abrahan.

Si Elder Bruce R. McConkie sa Korum sa Napulog Duha ka mga Apostoles mitudlo nga kining mga bersikulo “magamit kang Melchizedek ug kang Kristo, tungod kay si Melchizedek usa ka ehemplo kang Kristo ug ang pangalagad sa propeta naglarawan ug naghulagway sa atong Ginoo” (Doctrinal New Testament Commentary, 3 vols. [1965–73], 3:157).

2. Tubaga ang mosunod nga pangutana diha sa imong scripture study journal: Sa unsang paagi si Jesukristo “nahimong tuburan sa dayong kaluwasan” (Mga Hebreohanon 5:9) sa tanang motuman Kaniya?

Sigun sa narekord sa Mga Hebreohanon 5:11–14, gipahayag ni Pablo ang usa ka tinguha nga makatudlo pa og dugang niini nga hilisgutan apan miingon nga ang mga tawo nagkulang sa espiritwal nga panabut ug kahingkod aron masabtan ang mas dugang pa nga mga pagtulun-an.

Mga Hebreohanon 6

Giawhag ni Pablo ang mga miyembro sa Simbahan nga magbaton og kakugi, pagtuo, pailub, ug paglaum sa pag-angkon sa mga saad sa Dios

Misaad ang Dios sa Iyang mga anak og mga panalangin sama sa kalinaw, kalipay, kapasayloan, tubag sa pag-ampo, mga panalangin nga nalakip sa patriyarkal nga mga panalangin, pagkabanhaw, ug kinabuhing dayon. Ang uban niini nga panalangin mag-agad sa atong mga pagpili.

Unsa ang usa ka gisaad nga panalangin ang gipaabut nimong madawat?

Sigun sa narekord sa Mga Hebreohanon 6, giawhag ni Pablo ang mga Santos nga dili hunungon ang pagpaningkamot sa mga panalangin nga gisaad sa Ginoo. Samtang imong basahon kini nga kapitulo, pangita og mga kamatuoran nga makatabang nga imong madawat ang mga panalangin nga gisaad sa Dios.

Basaha ang Mga Hebreohanon 6:1–3, nga mangita kon unsay gitudlo ni Pablo sa mga Santos nga pagabuhaton. Hinumdumi nga ang Hubad ni Joseph Smith, Mga Hebreohanon 6:1 nag-ingon nga, “Busa sa walay pagbiya sa mga baruganan sa doktrina ni Kristo” (mga italic gidugang). Sa Hubad ni Joseph Smith, sa Mga Hebreohanon 6:3 (sa Giya sa mga Kasulatan) nag-ingon nga, “Ug kita moadto ngadto sa kahingpitan kon ang Dios motugot.”

Ang pagkahingpit nagpasabut nga pagkahimong hingkud sa espirituhanon o kompleto (tan-awa sa Giya ngadto sa mga Kasulatan, “Hingpit,” scriptures.lds.org). Atong mabasa sa Mga Hebreohanon 6:1–2 nga ang nahaunang mga baruganan ug mga ordinansa sa ebanghelyo magporma og pundasyon nga angay natong tukuron samtang magtrabaho kita padulong sa pagkahingpit, o espirituhanong pagkahingkod.

Sigun sa narekord sa Mga Hebreohanon 6:4–8, gihulagway ni Pablo kadtong giingon nga mga anak sa kapildihan—kadtong adunay kompleto ug hingpit nga kahibalo nga si Jesus mao ang Kristo ug dayon mopalayo gikan niini nga kamatuoran ug mamahimong mga kaaway sa Dios. Gikumpara ni Pablo kini nga mga indibidwal ngadto sa mga Santos kinsa maoy tuyo niini nga sulat, nga naghago sa pangalan ni Kristo (tan-awa sa Mga Hebreohanon 6:9–10).

Basaha ang Mga Hebreohanon 6:11–15, nga mangita kon unsay giawhag ni Pablo nga buhaton sa mga Santos samtang naningkamot sila nga makaangkon sa gisaad nga mga panalangin sa Dios. Makatabang ang pagkahibalo nga ang mga pulong nga “magapadayag sa samang [pagkamapaningkamuton] sa pagkab-ot sa hingpit nga pagsalig sa paglaum” diha sa bersikulo 11 nagpasabut sa pagkugi hangtud atong madawat ang gisaad sa Dios nga mga panalangin.

Gihulagway ni Pablo ang ehemplo ni Abraham sa kakugi, pagtuo, ug pailub sa pagtinguha sa gisaad sa Dios nga mga panalangin. Si Abraham 75 anyos dihang gisaaran siya sa Dios og kaliwatan, ug dayon naghulat siya og 25 ka tuig nga matuman kini nga saad pinaagi sa pagkatawo ni Isaac. Gikan sa instruksyon ni Pablo atong makat-unan nga pinaagi sa pagkugi hangtud sa katapusan, pagtuo kang Jesukristo, ug pailub, atong mapanunod ang gisaad sa Dios nga mga panalangin.

3. Tubaga ang mosunod nga mga pangutana diha sa imong scripture study journal:

   1. Ngano kaha nga ang kakugi, pagtuo kang Jesukristo, ug pailub importante man samtang magtinguha kita nga makadawat sa gisaad sa Dios nga mga panalangin?

   2. Kanus-a ka nakadawat sa gisaad nga panalangin pinaagi sa kakugi, pagtuo kang Jesukristo, ug pailub?

Sigun sa narekord sa Mga Hebreohanon 6:16–18, gitudlo ni Pablo nga ang Dios motuman sa Iyang mga saad ug dili mamakak. Busa, makalaum kita sa Iyang mga saad ug makasiguro sa katumanan niini.

Basaha ang Mga Hebreohanon 6:19–20, nga mangita sa unsang paagi ang atong paglaum sa mga saad sa Dios makaapektar sa atong kinabuhi.

Usa ka kamatuoran nga atong mahibaloan sa Mga Hebreohanon 6:19 mao nga ang atong paglaum sa mga gisaad sa Dios usa ka espirituhanong angkla sa atong mga kalag. Ang paglaum mao “ang masaligon nga pagpaabut ug paghandom alang sa gisaad nga mga panalangin sa pagkamatarung” (Giya ngadto sa mga Kasulatan, “Paglaum,” scriptures.lds.org).

4. Sa imong scripture study journal, pagdrowing og litrato sa usa ka angkla. Ikonsiderar unsay mahimo sa angkla para sa usa ka barko. Isulat kon sa unsang paagi ang imong paglaum sa mga gisaad sa Dios nahimong espirituhanon nga angkla para kanimo.

Pamalandungi kon sa unsang paagi nimo mapalambo sa hingpit ang kakugi, pagtuo, pailub, ug paglaum. Mahimo nimong irekord ang mga impresyon nga imong nadawat diha sa imong personal nga journal.

5. Isulat ang mosunod diha sa ubos sa mga assignment karong adlawa sa imong scripture study journal:

   Akong natun-an ang Mga Hebreohanon 5–6 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: