Unit 28: Day 4
Mga Hebreohanon 12–Santiago 1
Pasiuna
Gitambagan ni Apostol Pablo ang mga miyembro sa Simbahan nga mga Judeo nga paningkamutan ang pagkahimong disipulo pinaagi sa pagsunod sa ehemplo ni Jesukristo. Iya usab nga gipasabut ang mga panalangin sa pagkadawat og pagpanton gikan sa Ginoo. Si Santiago, kinsa usa usab ka Apostol ni Jesukristo, miawhag sa nagkatibulaag nga balay sa Israel nga magmainantuson sa ilang mga kasakit ug tinguhaon ang kaalam gikan sa Langitnong Amahan. Gitudloan usab sila ni Santiago nga batukan ang tintasyon, mamahimong tigtuman sa mga pulong, moserbisyo sa uban, ug magpabiling limpyo sa espiritwal.
Mga Hebreohanon 12
Gitambagan ni Pablo ang mga Santos sa pagpaningkamot sa kinabuhi uban sa hugot nga pagtuo ug kamainantuson
Diha sa luna nga giandam, ihulagway unsa nga mga kasinatian ang masugatan sa usa ka tiglumba sa dagan samtang daganon niya ang layo nga distansya sa lumba:
Unsa man kaha ang makadasig sa usa ka tiglumba sa dagan aron magpadayon bisan kon siya nag-atubang og mga kalisdanan?
Sa unsang mga paagi ang kinabuhi isip disipulo ni Jesukristo susama sa paglahutay sa usa ka lumba? Unsa nga mga kalisdanan ang tingali atong sagubangon isip mga disipulo ni Jesukristo? Unsa nga mga kalisdanan ang imong gisagubang isip sumusunod ni Jesukristo?
Samtang imong tun-an ang Mga Hebreohanon 12, pangita og mga kamatuoran nga makatabang nimo nga makapadayon sa pagsunod ni Jesukristo bisan og kini malisud.
Basaha ang Mga Hebreohanon 12:1, nga mangita kon unsay gisulti ni Apostol Pablo sa mga Santos nga maoy gikinahanglang buhaton aron magmalampuson ang ilang paningkamot sa pagkahimong disipulo.
Hunahunaa ang pag-apil sa usa ka lumba samtang nagpas-an ka og backpack nga puno sa bato. Sa unsang paagi ang pagpas-an niini nga backpack makaapektar sa imong pagdagan?
Sa unsang paagi ang imong mga sala sama sa mga bato nga gisulod sa backpack? Hunahunaa unsa kahay pagbati kon tangtangon ang backpack human ka makadagan og makadiyot.
Ikonsiderar kon unsay ipasabut sa pagpaningkamot nga mahimong disipulo uban sa pailub.
Basaha ang Mga Hebreohanon 12:2–4, nga mangita kon unsay gisulti ni Pablo nga buhaton sa mga Santos nga makatabang nila sa pagwagtang sa ilang mga sala ug mapailubong molahutay sa oposisyon. Ang pulong nga pagsupak diha sa bersikulo 3 nagpasabut sa oposisyon.
Usa ka baruganan nga atong makat-unan gikan sa gitudlo ni Pablo ngadto sa mga Santos mao nga samtang kita magtan-aw sa ehemplo ni Jesukristo, makakaplag kita og kalig-on nga ihikling ang atong mga sala ug mainantusong molahutay sa oposisyon.
Basaha ang Mga Hebreohanon 12:2–4 pag-usab, nga mangita sa tahas sa Manluluwas dinhi sa atong kinabuhi.
Unsa kaha ang gipasabut ni Pablo dihang gihulagway niya si Jesukristo isip “ang mag-uugmad ug maghihingpit sa atong pagtuo” diha sa bersikulo 2. Ikonsiderar ang pagmarka sa matang sa oposisyon nga gilahutay sa Manluluwas dinhi sa pagka-mortal.
Gisultihan ni Pablo ang mga Santos nga andam si Jesukristo nga antuson ang kamatayon sa krus ug lahutayon ang pagpakaulaw sa kalibutan kay nahibalo Siya sa kalipay nga Iyang madawat kon magpabilin Siyang matinud-anon sa Langitnong Amahan.
Si Elder Neal A. Maxwell sa Korum sa Napulog Duha ka mga Apostoles mitudlo nga ang “pagkat-on sa dili pagpanumbaling sa pagpakaulaw sa kalibutan nagpasabut nga dili kini hunahunaaon, sama sa dili pagpanumbaling sa tintasyon (tan-awa sa D&P 20:22)” (Lord, Increase Our Faith [1994], 99).
Si Elder Jeffrey R. Holland sa Korum sa Napulog Duha ka mga Apostoles miingon sa mosunod mahitungod sa paglahutay sa Manluluwas nga: “Si Jesus nagpadayon. Mipadayon Siya. Ang kamaayo nga anaa Kaniya mitugot sa pagtuo nga magmadaugon bisan sa kahimtang ubos sa hingpit nga kapait. Ang pagsalig nga Iyang gipuy-an misulti Kaniya bisan pa sa Iyang mga gibati nga Siya dili gayud motalikod ingon man dili mopakyas kanato” (“Walay Bisan Usa nga Nakig-uban Kaniya,” Ensign o Liahona, Mayo 2009, 88).
Hunahunaa kon sa unsang paagi ang pagtan-aw sa ehemplo ni Jesukristo makatabang kon mag-atubang ka og mga pag-antus ug mga kalisud. Ikonsiderar kon sa unsang paagi ang ehemplo sa Manluluwas makadasig kanimo sa paghikling sa imong mga sala ug magbaton og dugang nga pailub sa imong kaugalingon ug sa uban.
Unsaon nimo sa pagsanong ang mga pagkorihir?
Hunahunaa ang panahon sa dihang dunay tawo nga mikorihir kanimo. Unsay imong reaksyon niana nga pagkorihir? Ngano nga usahay lisud man ang pagdawat og koreksyon gikan sa uban?
Unsa kaha ang ubang mga rason nganong ang uban gusto man nga mokorihir kanato, ilabi na kon nahibalo sila nga basin dili ta ganahan sa ilang pagkorihir?
Samtang maningkamot kita nga mahimong disipulo, malauman nato nga kita pantunon o korihian.
Basaha ang Mga Hebreohanon 12:6–9, nga mangita kon si kinsa ang mokorihir kanato ug ngano. Ang pulong nga mga pinaangkan diha sa bersikulo 8 nag-refer niadtong mga natawo nga gawas sa kaminyoon, kinsa wala ikonsiderar nga legal nga mga manununod. (Ang mga Hebreohanon 12:9 usa ka scripture mastery passage. Mahimo nimo kining markahan sa lahi nga paagi aron dali ra nimo kining makit-an sa umaabut.)
-
Tubaga ang mosunod nga mga pangutana diha sa imong scripture study journal:
-
Sa unsang mga paagi nga ang himoong pagpanton sa Langitnong Amahan usa ka indikasyon sa Iyang paghigugma sa Iyang mga anak?
-
Unsa kaha ang pipila ka mga paagi sa pagpanton kanato sa atong Langitnong Amahan?
-
Bisan og ang pagpanton sa Langitnong Amahan moabut sa managlahi nga paagi, kinahanglang magmainampingon kita sa dili paghunahuna nga ang matag pagsulay o pag-antus nga atong nasinati naggikan sa Dios.
Diha sa Mga Hebreohanon 12:10, giila ni Pablo nga bisan og ang atong kalibutanong mga amahan nga nahigugma kanato usahay mopanton kanato sa dili hingpit nga paagi, ang pagpanton sa Langitnong Amahan hingpit ug gidesinyo alang sa atong kaayuhan.
Basaha ang Mga Hebreohanon 12:10–11, nga mangita kon unsang mga panalangin ang moabut gumikan sa mapaubsanong pagtugyan ngadto sa pagpanton sa Dios. Ang mga pulong nga “makaambit sa iyang pagkabalaan” diha sa bersikulo 10 nagpasabut nga mas mahisama sa Dios.
Bantayi sa bersikulo 11 kon unsay gitudlo ni Pablo kon unsa kaha ang una natong bation kon kita pantunon. Ang paghinumdom nga ang Langitnong Amahan nahibalo sa unsay pinakamaayo kanato makatabang nga motugyan kita sa pagpanton kon kini moabut. Usa ka baruganan nga atong makat-unan gikan niini nga mga bersikulo mao nga kon motugyan kita sa pagpanton gikan sa Langitnong Amahan, mahimo kitang mas mahisama Kaniya ug makabaton sa kalinaw gumikan sa pagkamatarung.
Kon may access ka sa internet, tan-awa ang Mormon Messages nga video “The Will of God” (3:02), nga anaa sa LDS.org. Kini nga video naghulagway sa gugma ug kaalam nga makita diha sa pagkorihir sa Langitnong Almahan sa atong kinabuhi.
Hunahunaa ang panahon dihang gibati nimo nga gipanton ka sa Langitnong Amahan. Giunsa nimo sa pagsanong? Sa lahi nga papel, mahimo nga magdesinyo ka og usa ka timailhan nga magpahinumdom kanimo nga motugyan sa pagpanton sa Langitnong Amahan sa umaabut. Ibutang kini nga timailhan sa dapit diin mapahinumduman ka sa mga pagtulun-an ni Pablo diha sa Mga Hebreohanon.
Diha sa Mga Hebreohanon 12:12–29, gisultihan ni Pablo ang mga Santos nga tabangan ang ubang mga miyembro sa Simbahan sa pagpabiling matinud-anon aron dili mawala ang mga panalangin sa Dios. Iya usab nga gipasabut nga ang mga Santos kinsa nagpabiling matinud-anon ug miserbisyo sa Dios makadawat og himaya ug usa ka dapit nga walay ikatandi sa gingharian sa Dios.
Scripture Mastery—Mga Hebreohanon 12:9
-
Mga Hebreohanon 13
Mihatag si Pablo og managlahi nga tambag sa mga Santos
Gitapos ni Pablo ang iyang sulat ngadto sa mga Santos nga Hebreohanon pinaagi sa pagtambag kanila sa managlahi nga mga hilisgutan. Basaha ang Mga Hebreohanon 13:1–9, 17, nga mangita sa tambag nga gihatag ni Pablo sa mga Santos.
Gikan sa imong nabasahan, asa kaha nga tambag ang gikinahanglan kaayo sa atong panahon? Ngano man?
Ikonsiderar asa nga mga porsyon o bahin sa tambag ni Pablo ang mas maimplementar nimo sa kaugalingon nimong kinabuhi.
Diha sa Mga Hebreohanon 13:10–25, gitudlo ni Pablo nga human makompleto ni Jesukristo ang Pag-ula, ang mga pagsakripisyo gamit ang mga hayop wala na kinahanglana (tan-awa sa 3 Nephi 9:18–20). Agig puli, ang mga Santos mahimong mohalad og pagdayeg sa Dios ug maayong mga buhat.
Santiago 1
Giawhag ni Santiago ang nagkatibulaag nga Israel nga pangitaon ang kaalam gikan sa Dios ug mamahimong tigtuman sa pulong
Nasulayan na ba nimo ang pagpanghinaot nga unta mas maalamon ka o unta mas masabtan nimo ang kabubut-on sa Langitnong Amahan para nimo? Paghunahuna og mga sitwasyon sa imong kinabuhi diin gusto ka nga makabaton og mas dako nga kaalam.
Basaha ang Joseph Smith—Kasaysayan 1:9–10, nga mangita sa mga pangutana ni Joseph Smith niadtong batan-on pa siya.
Si Joseph nagbasa sa Sulat ni Santiago dihang nadiskubrihan niya kon unsaon nga makakita og tubag sa iyang mga pangutana. Si Santiago usa ka Apostol ni Jesukristo ug bishop sa Jerusalem. Ang tradisyong Kristiyano naghatag usab og ideya nga si Santiago anak ni Maria ug Jose ug, mao nga, managsoon sila ni Jesukristo sa inahan.
Basaha ang Santiago 1:1–4, nga mangita kon unsay gitudlo ni Santiago sa balay sa Israel mahitungod sa ilang mga paningkamot ug mga kasakit. Ang Hubad ni Joseph Smith, sa Santiago 1:2 (sa Giya ngadto sa mga Kasulatan) miusab sa mga pulong nga “nagkalainlaing mga panulay” ngadto sa “daghan nga mga kasakit.”
Timan-i ang mga reference sa pagkamainantuson diha sa Santiago 1:3–4. Nganong importante ang pagkamainantuson atol sa mga panlimbasug ug mga kasakit?
Basaha ang Santiago 1:5–6, nga mangita kon unsay nadiskubrihan ni Joseph Smith nga nakatabang nga makaplagan niya ang mga tubag sa iyang mga pangutana. Tingali makatabang ang pagkahibalo nga diha sa bersikulo 5 ang pulong nga madagayaon gayud nagpasabut nga walay pagpugong ug sa dinaghan, ug nga ang walay pagpamuyboy nagpasabut nga pagbadlong o pagpanaway. Ang (Santiago 1:5-6 usa ka scripture mastery passage. Mahimo nimo kining markahan sa lahi nga paagi aron dali ra nimo kining makit-an sa umaabut.)
-
Unsa kaha ang ipasabut sa “mangayo siya uban sa pagtuo, sa walay pagduhaduha” “(Santiago 1:6)”?
Basaha ang Joseph Smith—Kasaysayan 1:12, nga nagrekord sa pagsanong o reaksyon ni Joseph sa Santiago 1:5. Unsay resulta tungod sa gibuhat ni Joseph Smith agi og paglihok sa unsay gitudlo sa Santiago 1:5–6?
Paghunahuna og mga panahon dihang ang Langitnong Amahan walay pagpugong nga mitubag sa imong mga pag-ampo human nga nag-ampo ka Kaniya uban sa pagtuo. Hunahunaa kon unsaon nimo sa paggamit ang mga baruganan nga imong nahibaloan diha sa Santiago 1:5–6 aron makadawat ka og kaalam ug tubag sa imong mga pangutana.
Sigun sa narekord sa Santiago 1:7–11, mipasidaan si Santiago batok sa tawo nga tagurhag panghunahuna, o nagaduha-duha sa pagkamaunungon ug pasalig sa Ginoo. Gipasidan-an usab niya ang mga adunahan o datu mahitungod sa mga problema nga moabut bahin sa katigayunan.
Diha sa Santiago 1:12–21, gitudlo ni Santiago nga ikapakita nato ang atong gugma sa Ginoo pinaagi sa pagbatok sa mga tintasyon, nga maoy usa sa mga rekisito sa pagkadawat og korona o purongpurong sa kinabuhing dayon. Gitudlo usab niya nga ang tanang maayong mga gasa naggikan sa Dios ug ang tanang mga Santos kinahanglang mowagtang “sa tanang buling” ug dawaton ang mga pulong sa Ginoo “uban sa kaaghup” (Santiago 1:21).
Basaha ang Santiago 1:22, nga mangita kon unsay giawhag ni Pablo nga buhaton sa mga Santos inubanan sa pulong sa Dios.
Hunahunaa kon giunsa ni Joseph Smith sa pagsunod kini nga tambag. Pamalandungi kon unsaon nimo sa paglihok unsay imong nakat-unan samtang tun-an nimo kini nga leksyon.
Basaha ang Santiago 1:27, nga mangita og mga paagi nga mamahimo kang tigtuman sa pulong. Ang paggamit ni Santiago sa pulong nga relihiyon niini nga kinatibuk-ang kahulugan nag-refer sa pagpakita sa atong debosyon ngadto sa Dios.
Scripture Mastery—Santiago 1:5–6
Ang pagmemorya sa Santiago 1:5–6 makatabang kanimo sa tibuok nimong kinabuhi kon duna kay mga pangutana mahitungod sa ebanghelyo, samtang magtinguha ka og panabang sa Ginoo sa paghimo og mga desisyon, ug samtang magtudlo ka sa ebanghelyo ngadto sa uban.
Gahini og pipila ka minutos ang pagsulay og memorya sa Santiago 1:5–6. Hinumdumi ang kanunay nga pagribyu sa namemorya na nga mga scripture mastery passages aron magpabilin ang imong nakat-unan.
-
Akong natun-an ang Mga Hebreohanon 12–Santiago 1 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: