Unit 14: Day 2

Juan 8

Pasiuna

Samtang ang Manluluwas didto sa Jerusalem alang sa Fiesta sa mga Payag, pipila ka mga escriba ug mga Pariseo midala ngadto Kaniya og usa ka babaye nga nakasala sa pagpanapaw ug nangutana kon angayan ba siya nga batuon, sumala sa balaod ni Moises. Iyang gilibug ang mga tig-akusar ug nagpakitag kalooy ngadto sa babaye. Si Jesus mipahayag usab nga ang Amahan nagsaksi mahitungod Kaniya, ug Siya mitudlo kabahin sa kagawasan gikan sa sala. Dihang Si Jesukristo mipahayag nga Siya mao ang halangdong Jehova, ang mga Pariseo misulay sa pagbato Kaniya.

Juan 8:1–11

Usa ka babaye nga nasakpan nga nanapaw gidala ngadto sa Manluluwas

Ang mga escriba ug Pariseo gusto nga dauton si Jesus atubangan sa katawhan ug makaestablisar og rason nga maakusahan Siya tungod kay gusto nila nga dakpon Siya ug silutan Siya sa kamatayon (tan-awa sa Juan 7:1, 32).

Basaha ang Juan 8:2–5, nga mangita kon unsa ang gibuhat sa mga escriba ug mga Pariseo samtang si Jesus nagtudlo didto sa templo sa Jerusalem.

Sumala sa Juan 8:6, nganong gidala man sa mga escriba ug mga Pariseo ang mananapaw nga babaye ngadto ni Jesus?

Si Elder Bruce R. McConkie sa Korum sa Napulog Duha ka mga Apostoles mipasabut kon sa unsang paagi unta ang mga escriba ug mga Pariseo makagamit niini nga hitabo isip usa ka rason sa pag-akusar ni Jesus:

“Sa panahon ni Jesus … wala na gibuhat ang pagpahamtang og silot sa kamatayon sa pagpanapaw. Sa pagkatinuod, walay silot sa kamatayon nga mapahamtang kon walay pagtugot sa mga kadagkoan sa Romano, ug sa kaso sa pagpanapaw ang balaod sa Roma dili mopahamtang og silot nga kamatayon.

“Sa pagdala niining mananapaw ngadto kang Jesus, ang mga escriba ug mga Pariseo nagpahimutang niini nga lit-ag alang sa Agalon: (1) kon siya miuyon ni Moises nga kinahanglan batuon ang babaye, iyahang (a) mapukaw ang kasuko sa kinatibuk-an sa katawhan pinaagi sa daw pagsuporta sa pagpahibalik sa silot nga walay popular nga suporta, ug (b) mosukwahi [mobatok] sa sibil nga balaod pinaagi sa pagpabuhat sa unsay gidili sa Roma. (2) kon siya dili mouyon ni Moises ug moawhag og bisan unsa nga ubos ra sa kamatayon pinaagi sa pagbato, maakusahan siya nga nagtuis sa balaod, ug nga nagpasiugda sa dili pagtahud ug sa pagbiya sa gibalaan nga mga binuhatan sa nangagi” (Doctrinal New Testament Commentary, 3 vols. [1965–73], 1:450–51).

Imbis nga motubag kanila, ang Manluluwas “mitikubo ug nagsulat sa yuta pinaagi sa iyang tudlo” (Juan 8:6).

Basaha ang Juan 8:7–8, nga mangita kon unsay gitubag sa Manluluwas ngadto sa mga escriba ug mga Pariseo.

Unsa kaha ang gihunahuna o gibati sa mga escriba ug mga Pariseo sa dihang ilang nadungog ang tubag ni Jesus?

Human madungog ang tubag sa Manluluwas, kadtong mga nag-akusar sa babaye mibati nga nakasala ug mibiya nga wala mosilot sa babaye (tan-awa sa Juan 8:9).

Unsa kaha ang mga pagbati niini nga babaye samtang ang iyang sala gipahibalo ngadto ni Jesus ug sa dakong pundok sa katawhan? Basaha ang Juan 8:10–11, nga mangita kon unsay gisulti sa Manluluwas ngadto sa babaye human namiya ang tanan.

Ang Joseph Smith Translation sa Juan 8:11 nagdugang sa mosunod: “Ug ang babaye midayeg sa Dios gikan niana nga takna, ug mituo sa iyang ngalan” (Joseph Smith Translation, Juan 8:11 ).

Ang Manluluwas wala mobaliwala sa sala niini nga babaye apan mimando kaniya sa “[pag]lakaw, ug ayaw na pagpakasala” (Juan 8:11). Gikan sa bersikulo 11 atong nakat-unan ang mosunod nga kamatuoran: Ang Manluluwas nagpakita kanato og kalooy pinaagi sa paghatag kanato og mga oportunidad sa paghinulsol. Hunahunaa kon sa unsang paagi kini nga istorya makapalambo sa imong pagsalig nga si Jesukristo maloloy-on ug mabination ug gusto nga mopasaylo niadtong tinud-anay nga naghinulsol.

Juan 8:12–30

Si Jesus nagtudlo nga ang Iyang Amahan naghatag og pagsaksi kabahin Niya

Paghunahuna og nindot nga butang. Dayon piyunga ang imong mga mata ug, sa laing piraso nga papel, sulayi sa pagdrowing og simple nga hulagway niana nga butang nga dili motan-aw.

Sa unsang paagi nga ang imong gi-drawing ikakumparar sa unsay imong gihunahuna?

Gawas sa pagdrowing, unsa pa ang ubang mga butang nga mas maayo nimong mahimo kon imong makita ang unsay imong gibuhat?

Panahon sa Fiesta sa mga Payag, upat ka dagkong bulawan nga mga kandelabra (gitawag usab nga mga menorah o kandela-an) mihatag og kahayag sa nataran sa templo panahon sa mga sayaw ug ubang kalingawan nga gihimo hangtud sa lawum nga kagabhion o sayong kabuntagon. Kining bulawan nga mga kandelabra wala lamang mohatag og kahayag alang sa mga pagsaulog, apan kini nagsimbolo nga ang Israel maoy usa ka kahayag ngadto niadtong naglakaw diha sa kangitngit.

Basaha ang Juan 8:12, nga mangita kon unsay gideklarar ni Jesus kabahin sa iyang Kaugalingon samtang Siya mitudlo diha sa templo duol sa gibarugan sa mga kandelabra. Ikonsiderar ang pagmarka sa unsay imong nakit-an.

Atong nakat-unan gikan niini nga bersikulo nga si Jesukristo mao ang Kahayag sa Kalibutan.

Dagkong mga menorah naghatag og kahayag sa mga korte sa templo panahon sa Fiesta sa mga Payag.

Kompletuha ang mosunod nga baruganan gikan sa unsay atong makat-unan gikan sa pagtulun-an sa Manluluwas diha sa Juan 8:12: Kon kita mosunod sa Manluluwas, kita

1. Tubaga ang mosunod nga pangutana diha sa imong scripture study journal: Sa unsang paagi nga imong gibati ang Manluluwas nga nagtabang kanimo nga makalikay sa paglakaw diha sa espirituhanong kangitngit?

Pipila ka mga panagna sa Daang Tugon nagpasabut nga ang Mesiyas mahimong usa ka kahayag ngadto sa tanang kanasuran (tan-awa, pananglit, sa Isaias 49:6; 60:1–3). Busa, sa pagpahayag sa iyang Kaugalingon nga mao ang Kahayag sa Kalibutan, si Jesus nagproklamar nga Siya mao ang Mesiyas.

Ang mga Pariseo misaway ni Jesus tungod sa pagpamatuod alang sa Iyang Kaugalingon (tan-awa sa Juan 8:13). Si Jesus mideklarar nga Siya ug ang Iyang Amahan nagsaksi nga ang Manluluwas mao ang Anak sa Dios (tan-awa sa Juan 8:14–18).

Basaha ang Juan 8:19, nga mangita kon unsay gisulti ni Jesus mahitungod sa nahibaloan sa mga Pariseo kabahin sa Langitnong Amahan.

Basi sa bersikulo 19, kita makat-on sa mosunod nga baruganan: Samtang kita nagkat-on kabahin ni Jesukristo, kita makaila sa Amahan.

Si Elder Jeffrey R. Holland sa Korum sa Napulog Duha ka mga Apostoles mitudlo kon sa unsang paagi kita mahimong masayud kabahin sa atong Langitnong Amahan samtang kita nagkat-on mahitungod sa Iyang Anak, Si Jesukristo:

“Sa tanang gisulti ug gibuhat ni Jesus, lakip na ug ilabi na gayud sa Iyang maulaong pag-antus ug sakripisyo, Siya nagpakita kanato kon kinsa ug unsa gayud ang Dios nga atong Mahangturong Amahan, unsa ka hingpit ang Iyang pagkamaunongon ngadto sa Iyang mga anak sa tanang panahon ug kanasuran. Sa pulong ug sa buhat si Jesus nagtinguha sa pagpadayag ug sa paghimong personal ngari kanato sa tinuod nga kinaiya sa Iyang Amahan, ang atong Amahan sa Langit. …

“Mao nga ang pagpakaon sa gigutom, pag-ayo sa masakiton, pagbadlong sa pagpakaaron-ingnon, paghangyo sa hugot nga pagtuo—kini mao si Kristo nga nagpakita kanato sa paagi sa Amahan, Siya kinsa ‘maloloy-on ug mabination, dugay nga masuko, mainantuson ug puno sa pagkamaayo’ [Lectures on Faith (1985), 42]” (“The Grandeur of God,” Ensign o Liahona, Nob. 2003, 70, 72).

Diha sa Juan 8:21–30 atong mabasa nga ang Manluluwas mipasidaan sa mga Pariseo nga kon sila dili motuo Kaniya, sila mamatay diha sa ilang mga sala. Siya mitudlo usab nga Siya walay gibuhat sa iyang Kaugalingon pagbuot; Siya nagbuhat lamang sa unsay gitudlo sa Amahan nga Iyang buhaton.

Juan 8:31–36

Si Jesus nagtudlo mahitungod sa kagawasan gikan sa sala

Nakasulay ka na ba nga napugngan ang imong panglihok, sama sa gihigtan ka o dili makagawas sa gamay nga lugar? Unsay imong gibati niana? Samtang magtuon ka niini nga tipik sa leksyon, pangitaa kon unsa ang moresulta ngadto sa espirituhanon nga pagpugong ug unsa ang moresulta ngadto sa espirituhanong kagawasan.

Basaha ang Juan 8:31–32, nga mangita kon unsay gisulti sa Manluluwas nga kinahanglan natong buhaton aron mahimong gawasnon. Dayon, basi sa unsay imong nakat-unan, sulati ang matag blangko diha sa mosunod nga diagram:

Si Elder Bruce R. McConkie milista og pipila sa mga kagawasan nga atong matagamtam kon kita magpadayon diha sa pulong ni Kristo, mamahimong Iyang mga disipulo, ug masayud sa kamatuoran: “Gawasnon gikan sa makalaglag nga gahum sa sayop nga doktrina; gawasnon gikan sa pagkaulipon sa gana sa pagkaon ug kamaulagon; gawasnon sa mga kadena sa pagpakasala; gawasnon gikan sa kadautan ug sa hiwi nga impluwensya ug gikan sa matag makapugong ug makapahunong nga gahum; gawasnon sa pagpadayon ngadto sa walay kinutuban nga kagawasan diin ang kinatibuk-an niini matagamtam lamang sa nahimaya nga mga binuhat” (Doctrinal New Testament Commentary, 1:456–57).

Basaha ang Juan 8:33, nga mangita sa unsay gituohan sa mga Judeo nga nakahimo kanila nga gawasnon.

Ang mga Judeo nasayop sa pagtuo nga ang pagkahimo lamang nga mga kaliwat ni Abraham ug manununod sa pakigsaad ni Abraham ang mohimo kanila nga gawasnon sa espirituhanong paagi. Basaha ang Juan 8:34–36, nga mangita kon unsay gisulti ni Jesus nga kinahanglan nga mahimong gawasnon niini ang mga tawo.

Gikan niini nga mga bersikulo atong nakat-unan nga kon kita makasala ug dili maghinulsol, niana kita mahimo nga mga ulipon sa sala. Unsa kaha ang gipasabut nga mahimong “ulipon sa sala” (Juan 8:34)? The word translated as servant here may also be translated as slave.

Tun-i ang mosunod nga diagram:

Pipila ka mga tawo karon ang naglibug, nagtuo nga ang pagsunod sa mga pulong ni Kristo nagpugong kanila, samtang ang pagpuyo sa kalibutanong estilo sa kinabuhi naghimo kanila nga gawasnon. Si Elder D. Todd Christofferson sa Korum sa Napulog Duha ka mga Apostoles mitudlo nga ang bali niini maoy tinuod:

“Ang pagnunot sa mga tintasyon [ni Satanas] mopadulong ngadto sa nagkadiyutay nga nagkadiyutay nga kapilian hangtud nga wala nay mahabilin ug ngadto sa mga pagka-adik nga wala kitay gahum sa pagbuntog. …

“… Ang kalibutan … [nagkonsiderar] sa pagkamasulundon sa mga balaod ug ordinansa sa Dios isip ‘pagkaulipon’ (Alma 30:24, 27). Sa unsang paagi ang pagkamasulundon ug kamatuoran makahimo kanato nga gawasnon? Sayon kitang makahunahuna og pipila ka praktikal nga paagi diin ang kamatuoran naghatag kanato sa abilidad sa pagbuhat og mga butang nga dili unta nato mahimo o sa paglikay sa mga kalisdanan nga ato untang masagubang. …

“… Aduna bay nagduhaduha nga, isip resulta sa paghupot sa tanang kahayag ug kamatuoran, ang Dios adunay hingpit nga kagawasan nga mamahimo ug magbuhat?

“Sa samang paagi, samtang nagtubo ang atong pagsabut sa doktrina ug mga baruganan sa ebanghelyo, ang atong kabubut-on mapalapdan. Una, mas daghan na kita og kapilian ug mas daghan og makab-ut ug makadawat og mas daghang panalangin tungod kay mas daghan kita og balaod nga masunod. Paghunahuna og hagdanan—ang matag bag-ong balaod o sugo nga atong makat-unan sama sa usa ka ang-ang sa hagdanan nga nagtugot kanato nga mosaka og mas taas pa. Ikaduha, uban sa dugang panabut kita makahimo og mas maalamon nga mga pagpili tungod kay kita mas klarong nakakita dili lamang sa mga alternatibo apan usab sa ilang potensyal nga mga sangputanan” (“Moral Agency,” Ensign, Hunyo 2009, 49–51).

2. Siksika ang Alang sa Kalig-on sa Kabatan-onan nga booklet alang sa mga ehemplo kon sa unsang paagi ang pagsunod sa mga sugo ug mga sumbanan mosangput sa kagawasan ug sa unsang paagi ang pagkamasinupakon mosangput sa pagkaulipon. Pagpili og usa ka sumbanan gikan sa booklet, ug diha sa imong scripture study journal, kopyaha ug sulati ang mosunod nga tsart:

   Sumbanan gikan sa Alang sa Kalig-on sa mga Kabatan-onan:
   Sa unsang paagi nga ang pagsunod niini nga sumbanan makahatag og kagawasan?	Sa unsang paagi nga ang dili pagsunod niini nga sumbanan moresulta sa pagkaulipon?

3. Unsa nga mga kagawasan nga gisaad sa Alang sa Kalig-on sa Kabatan-onan ang personal nimo nga isip resulta sa pagsunod sa mga sugo ug mga sumbanan? Sa imong scripture study journal, pagrekord og dili mominus usa ka piho nga paagi nga ikaw magtinguha nga mahimong gawasnon pinaagi sa pagpuyo sumala sa mga pagtulun-an sa Manluluwas.

Juan 8:37–59

Si Jesus nagpamatuod sa Iyang kabalaan

Paghunahuna og tawo nga imong nailhan nga susama kaayo sa iyang amahan. Paghunahuna og tawo nga lahi ra kaayo sa iyang amahan.

Ang Juan 8:37–50 nagrekord nga si Jesukristo misulti sa mga dili matuohon nga mga Judeo nga samtang Siya namulong sa mga pulong sa Iyang Amahan, sila mihimo sa buhat sa ilang amahan. Agig pagdepensa, ang mga Judeo nangangkon nga ang ilang amahan mao si Abraham. Dayon ang Manluluwas mitudlo nga kadtong mga anak ni Abraham “magabuhat unta sa gibuhat ni Abraham” (Juan 8:39) ug dili magtinguha sa pagpatay sa tawo nga nagtudlo sa kamatuoran. Si Jesus misulti niini nga mga Judeo (ang mga Pariseo) nga ang ilang amahan mao ang yawa. Siya mipasabut nga kadtong modawat sa pulong sa Dios iya sa Dios. Nangasuko, ang mga Judeo namasangil nga si Jesus usa ka Samarianhon (kinsa gituohan sa mga Judeo nga maoy pinakaubos sa tanang katawhan) ug nasudlan sa yawa.

Basaha ang Juan 8:51–53, nga mangita kon unsa dayon ang gipangutana niini nga mga Judeo ngadto sa Manluluwas.

Timan-i nga ang termino nga “Ako mao” sa Juan 8:58 susama sa ngalan nga gigamit sa Dios alang sa Iyang Kaugalingon sa kapanahonan sa Daang Tugon—“AKO MAO”. (tan-awa sa Exodo 3:14). Ang “AKO MAO” nagpasabut ni Jehovah. Ang Septuagint mao ang hubad sa Gresyanhon sa Daang Tugon.

Importante ang termino nga “AKO MAO” tungod kay kini nagpaila ni Jehova, ang ngalan nga maoy nailhan sa mga Judeo sa Dios ni Abraham, Isaac ug Jacob sa mga panahon sa Daang tugon. Pinaagi sa pagtawag sa Iyang Kaugalingon nga“Ako mao,” gideklarar ni Jesus nga Siya mao ang Dios sa Daang Tugon. Mahimo nimong isulat ang mosunod nga doktrina diha sa margin sa imong mga kasulatan tupad sa Juan 8:58: Si Jesukristo mao si Jehova, ang Dios sa Daang Tugon.

Ngano kaha nga importante alang kanato nga makahibalo nga si Jesukristo mao si Jehova, ang Dios sa Daang Tugon?

Basaha ang Juan 8:59, nga mangita kon unsay reaksyon niini nga mga Judeo sa deklarasyon sa Manluluwas nga Siya mao si Jehova.

Ang mga Judeo mipunit og mga bato uban sa tinguha sa pagpatay kang Jesus, nagtuo nga Siya nakasala og pagpasipala pinaagi sa pagpaila sa iyang Kaugalingon isip Jehova.

4. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Juan 8 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo:

Tubag sa diagram basi sa Juan 8:31–32: Kon magpadayon kita diha sa pulong ni Jesukristo, nan kita mahimo Niyang mga disipulo ug mahibalo sa kamatuoran, nga makahimo kanato nga gawasnon.