Juan 10

Pasiuna

Si Jesus mitudlo nga Siya ang Maayong Magbalantay ug nga Iyang itugyan ang Iyang kinabuhi alang sa Iyang mga karnero. Pipila ka mga tawo mipasangil Kaniya og pagpanamastamas tungod kay Siya mipahayag nga Siya mao ang Anak sa Dios.

Juan 10:1–24

Si Jesus nagtudlo nga Siya ang Maayong Magbalantay ug nga Iyang itugyan ang Iyang kinabuhi alang sa Iyang katawhan

Kon taptapan ang imong mata ug gihangyo nga ilhon ang mga sakop sa imong pamilya o pipila ka suod nga mga higala pinaagi sa paghikap sa ilang mga nawong, makabuhat kaha ka niini? Kon taptapan ang mata sa imong inahan, makaila kaha siya sa tanan niyang mga anak pinaagi lang sa paghikap sa ilang mga nawong?

Usa ka magbalantay og karnero sa Middle East kausa gipangutana kon giunsa niya pagkaila sa iyang mga karnero. Siya mitubag, “Kon imong taptapan og panapton ang akong mga mata, ug dad-on kanako ang bisan unsang karnero ug tugutan lamang ako sa pagbutang sa akong mga kamot sa nawong niini, makaila ako dayon kon akoa ba kini o dili” (gikutlo sa G. M. Mackie, Bible Manners and Customs [n.d.], 35).

Kon ikaw usa ka magbalantay sa karnero, unsa kaha ang gikinahanglan aron makaila sa mga karnero sa imong panon nga sama ka maayo sa nabuhat niana nga magbalantay?

Basaha ang Juan 10:14, ug hunahunaa nganong si Jesus motawag sa iyang Kaugalingon nga Maayong Magbalantay. Isulat ang mosunod nga pamahayag diha sa imong scripture study journal: Si Jesukristo mao ang Maayong Magbalantay. Samtang magtuon ka sa Juan 10, pangita og mga kamatuoran nga nagtudlo kanato kon sa unsang paagi ang Manluluwas mao ang atong Maayong Magbalantay. Isulat kini nga mga kamatuoran ubos niini nga pamahayag diha sa imong journal.

Kadtong mga naminaw sa mga pagtulun-an ni Jesus nga narekord sa Juan 10 nasayud mahitungod sa mga karnero, mga magbalantay sa karnero, ug mga toril. Sa panahon sa Manluluwas, ang mga magbalantay sa karnero migiya sa ilang mga panon ngadto sa pagkaon, tubig, ug kapasilongan nianang adlawa. Sa gabii, ang pipila ka mga magbalantay sa karnero mipundok sa ilang tagsa-tagsa ka mga panon ngadto sa usa ka komon nga toril. Ang toril sa karnero usa ka langub o kinoral nga dapit nga gilibutan sa mga paril nga bato nga adunay hait nga mga tunok nga gibutang sa ibabaw aron sa pagsanta sa ihalas nga mga hayop ug mga kawatan sa pagsulod.

Basaha ang Juan 10:1–5, nga mangita kon unsay buhaton sa maayong magbalantay. Isulat ang unsay imong nakit-an ubos sa pamahayag nga “Si Jesukristo mao ang Maayong Magbalantay” diha sa imong scripture study journal.

Ang Juan 10:3 naghulagway kon sa unsang paagi ang matag magbalantay mosulod sa pultahan ug motawag sa ngalan sa iyang mga karnero. Ang mga karnero lamang sa iyang panon ang mosunod kaniya pagawas sa toril, ug ang ubang mga karnero magpabilin.

Nganong ang mga karnero mosunod lamang sa ilang magbalantay?

Timan-i sa bersikulo 1 ug 5 unsay tawag sa Manluluwas niadtong misulay sa pagsulod sa toril sa mga agianan gawas sa pultahan.

Makatabang nga timan-an nga adunay mga Pariseo diha sa grupo sa katawhan diin ngadto namulong si Jesus (tan-awa sa Juan 9:40). Sa unsang mga paagi nga daghan sa mga Pariseo ang sama sa mga kawatan, mga tulisan, ug mga langyaw?

Diha sa Juan 10:6 atong nakat-unan nga ang mga Pariseo wala makasabut sa gitudlo ni Jesus. Basaha ang Juan 10:7–10, nga mangita kon giunsa pagsugod sa Manluluwas sa pagpasabut sa simbolismo sa toril sa mga karnero.

Timan-i nga ang Hubad ni Joseph Smith nagklaro unsay gisulti ni Jesus diha sa mga bersikulo 7 ug 8:

“Sa pagkatinuod, sa pagkatinuod, magaingon ako kaninyo, Ako mao ang pultahan sa toril sa mga karnero.

“Ang tanan nga nahianhi una kanako nga wala nagpamatuod kanako mao ang mga kawatan ug mga tulisan: apan ang mga karnero wala magpatalinghug kanila” (Joseph Smith Translation, Juan 10:7–8).

Unsa kaha ang gipasabut sa Manluluwas sa dihang Siya miingon “Ako mao ang pultahan” diha sa mga bersikulo 7 ug 9?

“Ang mga magbalantay sa karnero sa Israel magbarug sa ganghaan sa toril ug moinspeksyon sa matag karnero sa pagsulod niini, motambal sa mga angul kon gikinahanglan. Human mapundok ang mga karnero diha sa toril alang sa kagabhion, ang magbalantay sa karnero mohigda aron matulog diha sa ganghaan, mag-ali sa agianan aron ang mga mananakmit o mga kawatan dili makahilabut sa mga karnero” (New Testament Student Manual [manwal sa Church Educational System, 2014], 231–32).

Sa unsang paagi ang mga lihok niini nga mga magbalantay sa karnero susama sa unsay gibuhat sa Manluluwas alang kanato?

Sa unsang paagi kaha nga ang Manluluwas naghatag og kinabuhi “sa madagayaon gayud” (Juan 10:10) niadtong nagsunod Kaniya?

Basaha ang Juan 10:11–15, nga mangita kon unsa pa ang giingon sa Manluluwas nga buhaton sa maayong mga magbalantay sa karnero. (Ang sinuholan maoy usa ka tawo kansang nag-unang motibo sa pagtrabaho mao lamang aron masweldohan.) Isulat ang unsay imong nakit-an kabahin sa maayong mga magbalantay sa karnero ubos sa pamahayag nga “Si Jesukristo mao ang Maayong Magbalantay” diha sa imong scripture study journal.

Timan-i sa Juan 10:11, 13, 15 unsay andam nga buhaton sa usa ka maayo nga magbalantay sa karnero nga dili buhaton sa sinuholan.

Ang Juan 10:11–15 nagtudlo kanato nga isip Maayo nga Magbalantay, si Jesukristo nakaila sa matag usa kanato ug mitugyan sa Iyang kinabuhi alang kanato. Isulat kini nga baruganan ubos sa “Si Jesukristo mao ang Maayong Magbalantay” diha sa imong scripture study journal.

Hinumdumi unsay gisulti sa magbalantay sa karnero sa Middle East mahitungod kon unsa ka maayo niya nga nailhan ang matag usa sa iyang karnero, ug tubaga ang mosunod nga mga pangutana sa bag-o nga pahina sa imong scripture study journal:
1. Sa imong hunahuna unsa ka maayo ang pagkaila sa Manluluwas kanimo? Nganong importante kini nga masabtan?
2. Sa unsang paagi kaha nga ang imong pagpakabuhi matag adlaw maapektuhan sa pagsabut nga ang Manluluwas nakaila kanimo ug andam nga motugyan sa Iyang kinabuhi alang kanimo?

Human mitudlo nga andam Siyang motugyan sa Iyang kinabuhi alang kanato, ang Manluluwas mipasabut og lain pa nga butang nga Iyang buhaton. Basaha ang Juan 10:16, nga mangita kon unsa pa ang gisulti sa Manluluwas nga Iyang buhaton alang sa Iyang karnero (nagpasabut sa Iyang mga katawhan).

Sa Juan 10:16 ang Manluluwas nagtudlo sa mga Judeo sa Jerusalem nga Siya moduaw sa mga anak sa Langitnong Amahan nga anaa sa ubang mga yuta, motudlo kanila sa Iyang ebanghelyo, ug dad-on sila ngadto sa Iyang panon (Iyang Simbahan). Ang Basahon ni Mormon naghatag og dugang impormasyon kabahin niini nga bersikulo. Basaha ang 3 Nephi 15:14–24, ug ikonsiderar ang pagsulat niini nga reference diha sa imong mga kasulatan tupad sa Juan 10:16 . Ikonsiderar usab ang pagsulat sa cross-reference nga Juan 10:16 tupad sa 3 Nephi 15:14–24.

Tubaga ang mosunod nga pangutana diha sa imong scripture study journal: Sa unsang paagi kini nga mga bersikulo sa Basahon ni Mormon makatabang kanato nga mas makasabut sa Juan 10:16?

Basaha ang Juan 10:17–18, nga mangita og usa ka doktrina kabahin sa Manluluwas.

Tapusa ang mosunod nga mga pulong aron sa pag-ila niini nga doktrina: Isip ang literal nga Anak sa Dios, si Jesukristo adunay gahum sa . Ikonsiderar ang pagmarka sa mga pulong nga nagtudlo niini nga doktrina dinhi niini nga mga bersikulo.

Gikan sa Iyang inahan, si Maria, usa ka mortal nga babaye, si Jesus nakapanunod sa mortalidad, lakip ang abilidad nga mamatay. Gikan ni Elohim, ang Iyang balaang Amahan, napanunod Niya ang pagka-imortal ug ang gahum nga mabuhi sa kahangturan. Busa, Siya nakapanunod sa mga abilidad nga mamatay ug mabanhaw. Kini gikinahanglan aron mabuhat ni Jesus ang Pag-ula.

Sa Juan 10:19–24 atong nakat-unan nga human ang Manluluwas mitudlo niini nga mga butang, ang mga katawhan nabahin sa ilang mga opinyon mahitungod kon kinsa si Jesus. Sila miduol kang Jesus sa templo ug mipugos Kaniya sa pagpahayag sa Iyang tinuod nga pagkatawo isip ang Kristo, o Mesiyas.

Juan 10:25–42

Si Jesus namahayag nga Siya mao ang Anak sa Dios

Paghunahuna og pipila ka mga tawo nga imong nahimamat kada adlaw, ug sulayi sa paghinumdom kon sama sa unsa ang ilang mga tingog. Ngano kaha nga ang pipila ka mga tingog mas sayon nimong maila kay sa uban?

Basaha ang Juan 10:25–27, nga mangita kon giunsa pagtubag sa Manluluwas ang hangyo sa mga katawhan nga sultihan sila kon Siya ba ang Kristo. Mahimo nimong markahan kon unsay ilhanan nga ang usa ka tawo usa sa mga karnero sa Manluluwas.

Sama sa narekord sa Juan 10:28–30, si Jesus namulong kabahin sa Iyang Amahan ug mipamatuod, “Ako ug ang Amahan usa ra” (Juan 10:30).

Si Presidente Joseph F. Smith mihatag sa mosunod nga pagpasabut kon sa unsang paagi Sila usa ra: “Si Jesus ug ang iyang Amahan … usa sa kahibalo, sa kamatuoran, sa kaalam, sa panabut, ug sa katuyoan; sama nga ang Ginoong Jesukristo sa iyang kaugalingon mipahimangno sa iyang mga tinun-an nga mahiusa uban kaniya, ug mag-uban kaniya, nga siya unta maanaa kanila. Dinhi niini nga panabut nga akong nasabtan kini nga sinultihan, ug dili sama sa gipamatud-an niini sa pipila ka mga tawo, nga si Kristo ug ang iyang Amahan usa ra ka tawo. Akong ipahayag kaninyo nga sila dili usa ka tawo, kondili sila duha ka mga tawo, duha ka mga lawas, managlahi ug nagbulag, ug sama ka lahi sa bisan kinsang amahan ug anak” (Mga Pagtulun-an sa mga Presidente sa Simbahan: Joseph F. Smith [1998], 432–433).

Basaha ang Juan 10:28–30, nga mangita sa mga panalangin nga ihatag ngadto niadtong kinsa nakadungog sa tingog sa Manluluwas ug mosunod Kaniya.

Kini nga mga bersikulo nagtudlo kanato nga kon kita makaila sa tingog sa Maayo nga Magbalantay ug mosunod Kaniya, Siya mogiya kanato ngadto sa kinabuhing dayon. Isulat kini nga baruganan sa imong scripture study journal ubos sa “Si Jesukristo mao ang Maayong Magbalantay.” Mahimo usab nimong isulat kini sa imong mga kasulatan tupad sa Juan 10:27–28.

Basaha ang mosunod nga mga tudling, nga mangita kon sa unsang paagi kini makatabang nimo nga makasabut niini nga baruganan: Enos 1:4–8; Doktrina ug mga Pakigsaad 1:38; 8:2–3; 18:34–36.

Pamalandungi ang matag usa sa mosunod nga mga pangutana:

Unsay imong nabuhat aron mahimong mas pamilyar sa tingog sa Manluluwas?
Unsay imong mabuhat aron mas makaila og maayo sa tingog sa Manluluwas?
Unsa nga butang nga giaghat ka nga buhaton sa imong kinabuhi aron mas makasunod sa Manluluwas?

Sa laing piraso nga papel, pagsulat og (1) usa ka tumong nga mas maminaw og maayo alang sa tingog sa Manluluwas ug sa piho nga mga paagi nga mobuhat ka niini, o (2) usa ka tumong nga mas mosunod sa Iyang tingog ug sa unsang paagi nga imo kining buhaton. Ibutang ang imong tumong sa dapit nga imo kining makita ug mapahinumdoman ka nga buhaton kini.

Ang Juan 10:31–42 nagrekord nga human ang Manluluwas mipamatuod sa relasyon tali Kaniya ug sa Iyang Amahan, ang mga Pariseo nagtinguha sa pagbato Kaniya tungod sa pagpanamastamas. Hinoon, ang Manluluwas mitubag sa ilang pasangil pinaagi sa pagkutlo gikan sa Salmo 82: 6, nga mabasa, “Ako miingon, Kamo mao ang mga dios; ug kamong tanan mga anak sa Hataas Uyamut” (tan-awa sa Juan 10:34). Ang Manluluwas nangutana dayon sa mga Judeo nganong sila mipasangil Kaniya og panamastamas tungod kay Siya miingon nga Siya mao ang Anak sa Dios kon ang mga kasulatan nag-ingon nga kita mga anak sa Dios ug mamahimo nga mga dios mismo. Siya miawhag kanila sa pagtuo diha Kaniya ug sa Iyang mga buhat, nga nagpamatuod Kaniya ug sa Amahan kinsa mipadala Kaniya.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Juan 10 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: