Juan 12

Pasiuna

Si Maria sa Betania, ang igsoong babaye ni Marta ug ni Lazaro, midihog sa tiil ni Jesus isip usa ka simbolo sa Iyang umaabut nga kamatayon ug paglubong. Pagkasunod adlaw si Jesus mihimo sa Iyang madaugon nga pagsulod ngadto sa Jerusalem ug nanagna sa Iyang kamatayon. Bisan pa sa Iyang mga milagro, ang ubang mga tawo wala motuo nga Siya mao ang Manluluwas, ang gisaad nga Mesiyas. Siya mitudlo sa mga sangputanan sa pagtuo ug sa dili pagtuo Kaniya.

Juan 12:1–19

Si Maria nagdihog sa tiil ni Jesus, ug si Jesus naghimo sa Iyang madaugon nga pagsulod ngadto sa Jerusalem

Sa imong scripture study journal, pag-drowing og hulagway o pagsulat mahitungod sa usa sa mga milagro sa Manluluwas nga girekord diha sa Bag-ong Tugon. Pamalandungi kon sa unsang paagi ang pagkasaksi og usa ka milagro nga sama niana moimpluwensya sa imong pagtuo sa Manluluwas.

Samtang magtuon ka sa Juan 12, pangitaa ang lain-laing mga paagi diin ang mga tawo misanong sa mga milagro sa Manluluwas, ingon man sa mga kamatuoran nga makatabang kanato nga makasabut sa ilang mga tubag.

Sa Juan 12:1–9 atong mabasa nga unom ka adlaw sa wala pa ang Pagpalabay, si Jesus nanihapon uban sa pipila ka mga higala sa Betania, usa ka gamay nga lungsod sa gawas sa Jerusalem. Si Maria, ang igsoong babaye ni Marta ug ni Lazaro, midihog sa tiil ni Jesus gamit ang mahalon nga pahumot. Si Judas Iscariote misupak sa paggamit niining mahalon nga pahumot, nag-ingon nga ang kwarta mahatag na unta ngadto sa mga kabus (tan-awa sa Juan 12:4–5). Ang iyang tinuod nga motibo, hinoon, “dili tungod kay siya may kahangawa alang sa mga kabus, kondili tungod kay siya kawatan man; ug kay siya mao man ang magtitipig sa panudlanan sa kwarta” (Juan 12:6). Ang mga pulong nga “siya mao man ang magtitipig sa panudlanan sa kwarta” nagpasabut sa tahas ni Judas isip tresurero alang niadtong mibiyahe uban sa Manluluwas.

Daghang mga tawo nakadungog nga si Jesus anaa sa Betania, ug sila miadto sa pagtan-aw Kaniya ug ni Lazaro, kinsa kaniadto gibuhi ni Jesus gikan sa mga patay. Hinumdumi nga tungod kay gibuhi og balik ni Jesus si Lazaro, ang mga lider nga Judeo misugod sa pagplano unsaon nila pagpatay si Jesus.

Basaha ang Juan 12:10–11, nga mangita kon unsay gustong buhaton sa mga sacerdote nga punoan ngadto ni Lazaro.

Nganong ang mga sacerdote nga punoan gusto man nga ipapatay si Lazaro?

Ang mga sacerdote nga punoan gustong ipapatay si Lazaro aron mawagtang ang ebidensya sa milagro sa Manluluwas. Unsaon nimo paghulagway ang lain-laing mga reaksyon sa mga tawo nga nakasaksi o nakahibalo mahitungod sa pagbuhi ni Jesus kang Lazaro gikan sa mga patay?

Sa Juan 12:12–16 atong nakat-unan nga sa adlaw human si Maria midihog sa mga tiil ni Jesus, Siya mihimo sa Iyang madaugon nga pagsulod ngadto sa Jerusalem. Basaha ang Juan 12:17–19, nga mangita kon unsay gibuhat sa mga tawo kinsa nakadungog kabahin ni Jesus nga nagbuhi ni Lazaro gikan sa mga patay panahon sa madaugon nga pagsulod sa Manluluwas ngadto sa Jerusalem.

Timan-i diha sa bersikulo 19 ang reaksyon sa mga Pariseo sa unsay nahitabo. Gibati nila nga wala molampus ang ilang mga paningkamot sa pagpugong sa mga katawhan sa pagsunod ni Jesus. Ngano kaha nga ang ubang mga tawo kinsa nakadungog sa mga milagro ni Jesus mituo ug misunod Kaniya samtang ang uban mipili sa pagsalikway Kaniya?

Juan 12:20–36

Si Jesus nanagna sa Iyang kamatayon

Sa Juan 12:20–22 atong nakat-unan nga “pipila ka mga Gresyanhon” (Juan 12:20), posible mga kinabig sa Judaismo kinsa miadto sa Jerusalem aron sa pag-obserbar sa Pagpalabay, mihangyo nga makig-istorya ni Jesus. Sa dihang si Jesus nahibalo sa ilang hangyo, Siya mitudlo kabahin sa Iyang nagsingabut nga pag-antus, kamatayon, ug Pagkabanhaw.

Basaha ang Juan 12:23–24, nga mangita kon unsay gitudlo ni Jesus kabahin sa Iyang kamatayon. Mahimo nimong markahan ang unsay imong makit-an.

Ang paghisgut sa Manluluwas sa “usa ka lugas trigo” nga kinahanglang “mahulog sa yuta ug mamatay” (Juan 12:24) aron makapamunga kini og daghan maoy usa ka pasumbingay sa Iyang kadaugan ibabaw sa kamatayon ug sala. Ang Iyang Pag-ula magtugot nga ang tanang katawhan mabanhaw, ug kini makahatag og kinabuhi nga dayon sa tanan nga adunay hugot nga pagtuo diha Kaniya, naghinulsol, ug nagsunod sa Iyang mga sugo. Sa Juan 12:25–26 atong mabasa nga ang Ginoo miawhag sa tanang tawo sa pagwagtang sa ilang mga kaugalingon diha sa pagserbisyo Kaniya.

Sa Juan 12:27–31 atong nakat-unan nga, nakamatikod sa gibug-aton sa Iyang umaabut nga pag-antus, si Jesus mihukom nga magpadayon sa pagtuman sa Iyang katuyoan. Siya nag-ampo nga ang ngalan sa Amahan mahimaya [mapasidunggan], ug kadtong naminaw nakadungog og tingog nga nagpamatuod nga kini pagahimayaon. Ang pamahayag sa Amahan nagpakita sa Iyang hingpit nga pagsalig sa Iyang Anak sa pagkompleto sa Pag-ula.

Basaha ang Juan 12:32–33, nga mangita kon unsa nga matang sa kamatayon ang gisulti sa Manluluwas nga antuson ug unsay epekto niini sa mga katawhan.

Human madungog ang mga pagtulun-an ni Jesus, ang mga tawo nangutana kon kinsa ang “Anak sa tawo” nga “igaisa” (Juan 12:34). Sa Juan 12:35–36 atong nakat-unan nga si Jesus mitubag pinaagi sa pagtawag sa iyang kaugalingon isip “ang kahayag.” Si Jesus miawhag sa katawhan sa paglakaw diha sa kahayag samtang Siya nag-uban kanila.

Juan 12:37–50

Siya nagtudlo sa mga sangputanan sa pagtuo ug sa dili pagtuo Kaniya

Nakahinumdom ka ba nga nakabasa sa Juan 12:9–11 kon unsay reaksyon sa mga tawo sa mga milagro sa Manluluwas? Basaha ang Juan 12:37, nga mangita kon unsay reaksyon sa laing grupo sa mga tawo ngadto sa mga milagro ni Jesus.

Kining managlahi nga mga reaksyon ngadto sa mga milagro nga gihimo ni Jesus nagpakita nga ang mga milagro lamang dili makahimo kanato sa pagtuo kang Jesukristo.

Bisan tuod nga ang mga milagro lang dili makapahimo kanato nga motuo kang Jesukristo, hunahunaa kon sa unsang paagi kini makaimpluwensya sa atong hugot nga pagtuo diha Kaniya.

Sa Juan 12:38–41 atong nakat-unan nga ang mga propesiya nga gihimo ni propetang Isaias (tan-awa sa Isaias 6:9–10; 53:1–3) natuman pinaagi niadtong mga tawo kinsa mipili sa dili pagtuo kang Jesus. Bisan pa sa mahinungdanong mga buhat sa Manluluwas, ang ubang mga tawo mipili sa pagbuta sa ilang mga mata ug pagpatig-a sa ilang mga kasingkasing batok Kaniya.

Si Elder Gerrit W. Gong sa Seventy mipamatuod sa mga panalangin nga magagikan sa pagpili nga motuo ug mosunod ni Jesukristo:

“Ang pagtuo usa ka pagpili [tan-awa sa Mosiah 4:9]. …

“Kon mopili kita sa pagtuo, kita makasabut ug makakita sa mga butang sa lahi nga paagi. Kon kita makakita ug magpakabuhi niana nga paagi, kita magmalipayon sa paagi nga ang ebanghelyo lang ang makahatag” (“Choose Goodness and Joy,” New Era, Ago. 2011, 44).

Hunahunaa ang pamahayag ni Elder Gong nga “ang pagtuo usa ka pagpili.” Sa imong scripture study journal, isulat kon unsay kahulugan niini nga pamahayag diha kanimo:

Basaha ang Juan 12:42–43, nga mangita nganong ang pipila sa labaw nga mga lider [punoan] nga Judeo wala mopadayag sa ilang pagtuo kang Jesus.

Sa imong kaugalingong mga pulong, ipasabut kon unsa sa imong hunahuna ang kahulugan nga nahigugma sa “pagdalayeg gikan sa mga tawo kay sa pagdalayeg gikan sa Dios” (Juan 12:43):

Gikan niini nga mga bersikulo atong makat-unan nga ang mas maghunahuna sa pagpahimuot sa uban kay sa pagpahimuot sa Dios makapugong kanato nga ipadayag ang atong pagtuo kang Jesukristo ug sa Iyang ebanghelyo. Ikonsiderar ang pagsulat niini nga kamatuoran sa imong mga kasulatan.

Tubaga ang usa o sobra pa sa mosunod nga mga pangutana diha sa imong scripture study journal:
1. Unsa ang pipila ka mga ehemplo sa atong panahon kon sa unsang paagi ang pagpakabana alang sa unsay gihunahuna sa uban nagpugong sa mga katawhan sa pagpadayag sa ilang pagtuo kang Jesukristo ug sa Iyang ebanghelyo?
2. Unsa ang pipila ka mga paagi nga atong mapakita nga kita mas naghunahuna sa unsay makapahimuot sa Dios kay sa unsay makapahimuot sa mga tawo nga naglibut kanato?
3. Unsa ang positibo nga mga sangputanan nga moabut sa pagpakita nga kita nagtuo kang Jesukristo ug sa Iyang ebanghelyo?

Paghunahuna og usa ka kasinatian dihang ikaw anaa sa hilabihan nga kangitngit. Hunahunaa kon unsay imong gibati. Gibati ba nimo nga nameligro? Sa unsang paagi nga ang pagkaadunay kahayag makatabang kanimo niana nga sitwasyon?

Sa unsang paagi nga ang pagkaanaa sa pisikal nga kangitngit susama sa pagkaanaa sa espirituhanong kangitngit?

Unsa nga mga peligro ang moabut gumikan sa pagpuyo diha sa espirituhanong kangitngit?

Basaha ang Juan 12:44–46, nga mangita kon sa unsang paagi nga mapanalanginan kadtong nanagtuo ni Jesukristo.

Usa ka baruganan nga atong makat-unan gikan sa bersikulo 46 mao ang kon kita motuo ni Jesukristo, kita dili kinahanglan nga magpuyo sa espirituhanong kangitngit.

Hunahunaa kon sa unsang paagi si Jesukristo usa ka kahayag ug sa unsang paagi ang pagtuo diha Kaniya makatangtang sa espirituhanong kangitngit gikan sa kinabuhi sa tawo.

Pagpili og usa sa mosunod nga mga hilisgutan, ug dayon tubaga ang duha ka mga pangutana diha sa imong scripture study journal: ang katuyoan sa atong pisikal nga lawas, kalingawan ug media, pag-angkon og kalinaw ug kalipay, kaminyoon ug pamilya, kinabuhi human sa kamatayon. Kon adunay laing tawo, mahimo nimong hisgutan kini nga mga pangutana uban niining tawhana ug isulat ang unsay inyong gihisgutan.
1. Unsa kaha ang gituohan sa mga tawo nga anaa sa espirituhanong kangitngit kabahin niini nga hilisgutan?
2. Unsa nga kahayag, o direksyon ug pagklaro, ang mahatag ni Jesukristo ug sa Iyang ebanghelyo kabahin niini nga hilisgutan?

Hunahunaa kon sa unsang paagi ang baruganan nga gitudlo sa Juan 12:46 makatabang kanato sa pagsabut nganong ang pagtan-aw nato sa piho nga mga hilisgutan ug mga isyu lahi kay sa ubang mga tawo. Hinumdumi nga mahimo usab nga ang pagtan-aw nato sa piho nga mga hilisgutan ug mga isyu susama sa mga tawo nga sakop sa ubang mga relihiyon. Adunay mga tawo nga walay gasa sa Espiritu Santo kinsa hugtanon gihapong nagtuo ni Jesukristo ug kansang mga pagpili gilamdagan sa kahayag ni Kristo (tan-awa sa Moroni 7:16–19; D&P 88:7, 11) ug sa Iyang mga pagtulun-an.

Sumala sa narekord sa Juan 12:47–50, si Jesus mipasabut nga kadtong dili motuo sa Iyang mga pulong ug kinsa misalikway Kaniya pagahukman pinaagi sa mga pulong nga Iyang gipamulong, nga mao ang mga pulong nga gihatag sa Langitnong Amahan Kaniya aron ipamulong.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Juan 12 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: