Juan 13

Pasiuna

Human nangaon sa pagkaon sa Pagpalabay, ang Manluluwas mihugas sa mga tiil sa Iyang mga Apostoles, miila ni Judas nga maoy magbudhi kaniya, ug mihatag sa Iyang mga Apostoles og “bag-ong sugo” (Juan 13:34). Sa katapusang semana sa Iyang mortal nga pangalagad, gitutok ni Jesukristo ang Iyang mga pagtulun-an diha sa pagkamasulundon, pagserbisyo, ug paghigugma—mga hiyas nga naghulagway sa Iyang kinabuhi ug angay nga maghulagway sa atong mga kinabuhi isip Iyang mga disipulo.

Juan 13:1–17

Si Jesus naghugas sa mga tiil sa Iyang mga Apostoles

Pamalandungi ang mosunod nga mga pangutana:

Asa man nimo ibutang ang imong kaugalingon niini nga sukdanan?
Gusto ba nimo nga mas malipayon kay sa unsa ka sa karon?
Makahunahuna ba ka og usa ka tawo nga gusto nimong tabangan aron mahimong mas malipayon?

Samtang magtuon ka sa Juan 13, pangita og usa ka baruganan nga nagtudlo sa unsay atong mabuhat aron mas magmalipayon.

Human sa madaugon nga pagsulod ni Jesus ngadto sa Jerusalem, Siya misaulog sa fiesta sa Pagpalabay uban sa Iyang mga Apostoles. Ang Juan 13:1–3 nag-asoy nga samtang si Jesus mipakigbahin niini nga pagkaon (ang Katapusang Panihapon) uban sa Iyang mga Apostoles, Siya nasayud nga hapit na Siyang mamatay ug ang Iyang espiritu mobalik ngadto sa Iyang Langitnong Amahan.

Jesus Naghugas sa mga Tiil sa mga Apostoles

Basaha ang Juan 13:4–5, nga mangita kon unsay gibuhat ni Jesus pagkahuman og pagpangaon Niya ug sa Iyang mga Apostoles sa pagkaon sa Pagpalabay. Ang mga pulong nga “mihukas sa iyang mga saput” diha sa Juan 13:4 nagpasabut nga si Jesus mitangtang sa iyang panggawas nga saput. Kini susama sa usa ka tawo nga naghukas og jacket sa atong panahon.

“Sa kapanahonan sa Bag-ong Tugon, ang mga tawo nagsul-ob og bukas nga mga sandal, naglakaw sa sagad abugon nga mga dalan diin natapok ang hugaw sa mga hayop, ug panagsa ra nga adunay magamit nga tubig pangkaligo. Ang ilang mga tiil hugaw kaayo, ug ang paghugas sa mga tiil sa laing tawo tingali luod nga buhat. … Kining naandan nga buhat sa kamaabi-abihon sa kasagaran buhaton sa pinakaubos nga matang sa mga sulugoon” (New Testament Student Manual [manwal sa Church Educational System, 2014], 242).

Tubaga ang mosunod nga mga pangutana diha sa imong scripture study journal:
1. Kon anaa ka didto sa dihang si Jesus mihugas sa mga tiil sa Iyang mga Apostoles, unsa kaha ang imong reaksyon kon si Jesus misugod sa paghugas sa imong mga tiil?
2. Unsa ang napadayag kabahin sa kinaiya ni Jesus sa Iyang paghugas sa mga tiil sa Iyang mga Apostoles?

Basaha ang Hubad ni Joseph Smith, Juan 13:8 (sa Giya ngadto sa mga Kasulatan), nga mangita kon unsay gisulti ni Pedro sa dihang ang Manluluwas misugod sa paghugas sa iyang tiil.

Basaha ang Hubad ni Joseph Smith, Juan 13:9–10 (sa Giya ngadto sa mga Kasulatan), nga mangita sa tubag ni Pedro sa gisulti sa Ginoo kaniya.

Diha sa Juan 13:9, unsay atong nakat-unan mahitungod kang Pedro gikan sa iyang tubag sa unsay gisulti sa Ginoo kaniya?

Pinaagi sa paghugas sa mga tiil sa Iyang mga Apostoles, ang Manluluwas wala lamang mipahigayon og usa ka matahum nga buhat sa pagserbisyo, apan Siya usab mituman sa usa ka bahin sa balaod ni Moises ug mipasiugda og sagrado nga ordinansa aron sa pagtabang sa Iyang matinud-anong mga sumusunod nga mahimong limpyo gikan sa sala. Kini nga ordinansa gipahiuli sa atong dispensasyon pinaagi ni Propeta Joseph Smith (tan-awa sa D&P 88: 74–75, 137–41).

Basaha ang Juan 13:11, nga mangita kon nganong si Jesus miingon nga ang mga Apostoles “dili tanan … mga mahinlo.”

Siya mipasabut ngadto ni Judas Iscariote, kinsa sa dili madugay mobudhi Kaniya.

Basaha ang Juan 13:12–17, nga mangita kon unsay gitudlo sa Manluluwas sa Iyang mga Apostoles pagkahuman Niya gihugasan ang ilang mga tiil. Ikonsiderar ang pagmarka sa mga pulong nga naghulagway sa mga ehemplo nga gihimo sa Manluluwas ug gidapit ang Iyang mga Apostoles sa pagsunod.

Basi sa saad sa Manluluwas ngadto sa Iyang mga Apostoles nga narekord sa Juan 13:17, unsa nga panalangin ang atong madawat samtang kita mosunod sa Iyang ehemplo pinaagi sa pagserbisyo sa uban? Tubaga kini nga pangutana pinaagi sa pagkompleto sa mosunod nga baruganan: Samtang kita nagsunod sa ehemplo sa Manluluwas pinaagi sa pagserbisyo sa uban, kita mahimong ____________________.

Kompletuha ang mosunod diha sa imong scripture study journal:
1. Tubaga ang mosunod nga pangutana: Ngano kaha nga mahimo man kitang mas malipayon kon kita moserbisyo sa uban sama sa gibuhat sa Manluluwas?
2. Pagsulat mahitungod sa usa ka higayon nga ikaw malipayon tungod kay ikaw misunod sa ehemplo sa Manluluwas pinaagi sa pagserbisyo sa uban.

Basaha ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles, nga mangita kon unsay iyang gisulti nga atong mabuhat aron sa pagpangita og mga oportunidad sa pagserbisyo sa uban: “Sa inyong pag-ampo sa buntag matag adlaw, pangayo sa Langitnong Amahan nga giyahan kamo nga makakita og oportunidad sa pagserbisyo sa usa sa Iyang bililhong mga anak. Dayon lakaw tibuok adlaw nga ang inyong kasingkasing puno sa pagtuo ug gugma, mangita og tawo nga katabangan. … Kon buhaton ninyo kini, ang inyong espirituhanong kasensitibo molambo ug makakita kamo og mga oportunidad sa pagserbisyo nga sa una wala ninyo masayri nga posible” (“Magmatinguhaong Moapil,” Ensign o Liahona, Nob. 2012, 31).

Ikonsiderar ang pagsulat sa pamahayag ni Elder Ballard sa laing piraso nga papel ug ibutang kini diin kini makapahinumdom kanimo sa pag-ampo alang sa mga oportunidad sa pagserbisyo sa uban. Mahimo nimong irekord sa imong scripture study journal ug ipakigbahin sa uban kon sa unsang paagi ang imong pag-ampo natubag samtang imong gigamit ang tambag ni Elder Ballard.

Juan 13:18–30

Giila ni Jesus ang mobudhi Kaniya

Sumala sa Juan 13:18–30, human si Jesus mitudlo sa Iyang mga Apostoles nga sila magmalipayon kon sila moserbisyo sa uban, Siya miingon nga usa kanila mobudhi Kaniya. Sa dihang si Juan nangutana sa Manluluwas kinsa ang mobudhi Kaniya, si Jesus miingon kaniya nga “siya mao kadtong pagatunulan ko niining pan” (Juan 13:26), ug Siya mitunol niini ngadto ni Judas Iscariote.

Juan 13:31–38

Si Jesus nagtudlo sa Iyang mga disipulo sa paghigugma sa usag usa

Aduna bay mipasangil kanimo sukad nga dili ka Kristiyano, o tinuod nga sumusunod ni Jesukristo, tungod kay miyembro ka sa Ang Simbahan ni Jesukristo sa mga Santos sa Ulahing mga Adlaw? Kini tingali tungod sa pipila nato ka talagsaon nga mga tinuohan tungod sa Pagpahiuli, sama sa atong pagtuo diha sa Basahon ni Mormon ug nga ang mga sakop sa Dios nga Kapangulohan tulo ka managbulag ug managlahi nga binuhat. Giunsa nimo pagtubag? (O, kon wala ka makasinati niana, unsaon man nimo pagtubag ang tawo nga nagsulti nimo nga dili ka Kristiyano?)

Basaha ang Juan 13:34–35, nga mangita kon unsay gisulti ni Jesus nga makatabang sa uban nga makaila nga ang mga Apostoles mga disipulo ni Jesukristo. Ikonsiderar ang pagmarka sa Juan 13:34 sa sugo nga gihatag ni Jesus sa Iyang mga Apostoles.

Timan-i nga ang Juan 13:35 namahayag nga ang uban masayud nga ang mga Apostoles mga disipulo ni Jesukristo kon ang mga Apostoles mihigugma sa usag usa sama nga si Jesus nahigugma kanila. Gikan niini nga mga bersikulo atong nakat-unan nga samtang kita mohigugma sa usag usa sama nga si Jesukristo nahigugma kanato, ang uban masayud nga kita Iyang mga disipulo.

Sumala sa unsay imong natun-an niining tuiga kabahin ni Jesukristo, paglista sa imong scripture study journal og lima ka mga paagi nga Siya nagpakita nga Siya nahigugma sa katawhan.

Basaha ang mosunod nga istorya, nga gisaysay ni Elder Paul E. Koelliker sa Seventy, nga mangita kon sa unsang paagi ang mga misyonaryo nga gihulagway niini nga istorya misunod sa tambag sa Ginoo sa paghigugma sa usag usa:

“Duha ka misyonaryo nanuktok sa pultahan, nanghinaut nga may modawat sa ilang mensahe. Giablihan ang pultahan, ug usa ka dakong tawo mitagad nila nga dili kaayo mahigalaon: ‘Siguro nasultihan ko na kamo nga dili na manuktok. Gipasidan-an ko na kamo nga kon mobalik gani mo, dili nindot ang inyong masinati. Karon lakaw na mo.” Kalit niyang gisira ang pultahan.

“Sa paglakaw sa mga elder, ang mas dugay, mas sinati nga misyonaryo miagbay sa mas bag-ong misyonaryo sa paghupay ug pagdasig niya. Wala sila masayud, ang tawo nagtan-aw nila sa bintana sa pagsiguro nga nasabtan nila ang iyang gisulti. Nagtuo siya nga makita sila nga mangatawa ug ibaliwala lang ang iyang dili maayong pagtagad. Apan, sa iyang pagtan-aw sa kamabination sa duha ka misyonaryo, nahumok dayon ang iyang kasingkasing. Giablihan niyag balik ang pultahan ug gipabalik ang mga misyonaryo ug gipakigbahin ang ilang mensahe niya.

“… Kini nga baruganan sa paghigugmaay sa usag usa ug sa pagpalambo sa atong abilidad nga nakasentro kang Kristo sa atong paghunahuna, pagpamulong, ug buhat mao ang sukaranan sa pagkahimong disipulo ni Kristo ug magtutudlo sa Iyang ebanghelyo” (“Tinuod Siya nga Nahigugma Kanato,” Ensign o Liahona, Mayo 2012, 17).

Basaha ang mga pulong sa “Maghigugmaay” (Songbook sa mga Bata, nu. 74), ug paghunahuna og usa ka tawo nga imong kaila nga dali kaayong mailhan nga disipulo ni Jesukristo tungod sa gugma nga iyang gipakita ngadto sa uban. Sa imong scripture study journal, pagsulat kabahin sa paagi nga kining tawhana nagpakita og gugma alang sa uban ug sa unsang mga paagi nga gusto nimong sundon ang iyang ehemplo. Pagsulat usab og usa ka tumong kalabut sa unsay imong buhaton aron sa paghigugma sa uban sama sa paghigugma sa Manluluwas kanila.

Sumala sa Juan 13:36–38, human si Pedro mipahayag nga iyang itugyan ang iyang kinabuhi alang kang Jesukristo, si Jesus miingon kang Pedro nga siya molimud Kaniya sa tulo ka higayon sa dili pa motuktugaok ang manok.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Juan 13 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: