Unit 16: Day 4

Juan 20–21

Pasiuna

Sa Dominggo human sa Paglansang sa Krus, si Maria Magdalena nakadiskobre nga ang lubnganan nga gibutangan sa lawas ni Jesus walay sulod, ug siya milakaw ug misulti ngadto ni Pedro ug Juan, kinsa midagan dayon paingon sa lubnganan. Ang nabanhaw nga Kristo mipakita ngadto ni Maria ug sa wala madugay ngadto sa Iyang mga disipulo. Diha sa baybayon sa Dagat sa Galilea, si Jesus midapit ni Pedro sa pagpakita sa iyang gugma alang Kaniya pinaagi sa pagpakaon sa Iyang karnero.

Juan 20:1–10

Si Maria Magdalena nakakaplag nga walay sulod ang lubnganan ni Jesus ug nanugid kang Pedro ug Juan, kinsa nanagan dayon padulong sa lubnganan

Hunahunaa kon unsa kaha ang imong bation kon anaa ka sa dihang ang lawas ni Jesus gibutang sa lubnganan. Usa kadto ka Biyernes, ug ang Iyang paglubong kinahanglang humanon sa dili pa ang Igpapahulay sa Judeo magsugod sa pagsawop sa adlaw ug nagpadayon hangtud pagsawop sa adlaw pagka-Sabado. Samtang imong basahon ang mosunod nga pamahayag ni Elder Joseph B. Wirthlin sa Korum sa Napulog Duha ka mga Apostoles, hunahunaa kon unsa ang gibati sa mga disipulo ni Jesus:

“Naghunahuna ko unsa ka ngitngit kadto nga Biyernes sa dihang si Jesukristo gilansang sa krus.

“Nianang makalilisang nga Biyernes ang kalibutan nauyog ug nangitngit. Makahahadlok nga mga unos mihampak sa yuta.

“Kadtong dautan nga mga tawo kinsa nagtinguha sa Iyang kinabuhi nagmaya. Karon nga wala na si Jesus, sigurado nga kadtong misunod Kaniya magkatibulaag. Nianang adlawa nagbarug sila nga madaugon.

“Nianang adlawa ang tabil sa templo nagisi ngadto sa duha ka bahin.

“Si Maria Magdalena ug si Maria, ang inahan ni Jesus, napuno sa kasubo ug kawalay paglaum. Ang halangdong tawo nga ilang gihigugma ug gitahud nagbitay nga wala nay kinabuhi diha sa krus.

“Niana nga Biyernes ang mga Apostoles nangahugno. Si Jesus, ang ilang Manluluwas—ang tawo nga milakaw sa tubig ug mibuhi sa patay—Mismo sa iyang Kaugalingon nahimong ubos sa pagkontrolar sa dautang mga tawo. Nagbantay sila nga wala nay mahimo samtang Siya gidaug sa Iyang mga kaaway.

“Niana nga Biyernes, ang Manluluwas sa katawhan gipanamastamasan ug gisamaran, giabuso ug gibugalbugalan.

“Usa kadto ka Biyernes nga puno sa makapagun-ob, makapahugno nga kasubo nga mikutkot sa mga kalag niadtong naghigugma ug nagtamud sa Anak sa Dios.

“Nagtuo ako nga ang tanang adlaw sukad sa sinugdanan sa kasaysayan sa kalibutan, kadto nga Biyernes mao ang pinakangitngit.” (“Ang Dominggo Moabut,” Ensign o Liahona, Nob. 2006, 29–30).

1. Hunahunaa nga ikaw usa ka news reporter sa panahon sa pagkamatay ug Pagkabanhaw ni Jesus ug nga ikaw gihangyo sa pagsulat og serye sa mga artikulo kabahin niini nga mga hitabo. Sa imong scripture study journal, pagsulat og news report nga daw nag-interbyu ka sa mga disipulo ni Jesus human Siya namatay ug gilubong. Mahimo nimong hisgutan ang mga hunahuna ug pagbati nga gisulti nila nga ilang nasinati samtang nagtan-aw sila sa lubnganan ni Jesus nga gisirad-an.

Bisan pa sa trahedya sa kamatayon ug paglubong sa Manluluwas, si Elder Wirthlin miingon, “Apan ang kawalay paglaum nianang adlawa wala magdugay” (“Ang Dominggo Moabut,” 30).

Samtang magtuon ka sa Juan 20, tan-awa kon ngano nga “ang kawalay paglaum nianang adlawa wala magdugay.”

Basaha ang Juan 20:1–2, nga mangita kon unsay nakaplagan ni Maria Magdalena sa dihang miabut siya sa lubnganan ni Jesus sa sayong buntag sa Dominggo.

Unsa ang gibuhat ni Maria sa dihang iyang nadiskobrehan nga ang bato gikuha gikan sa entrada sa lubnganan? Unsay iyang gituohan nga maoy nahitabo?

Basaha ang Juan 20:3–10, nga mangita kon unsay gibuhat ni Pedro ug Juan, kinsa maoy gipasabut nga “sa usang tinun-an” (bersikulo 2) ug “sa usang tinun-an” (bersikulo 3), human makadungog sa balita ni Maria.

Unsay reaksyon ni Juan pagkakita sa walay sulod nga lubnganan? Unsay iyang gituohan?

Hangtud nga si Juan mitan-aw ngadto sa walay sulod nga lubnganan, wala gayud siya hingpit nga nakasabut sa mga deklarasyon sa Manluluwas Siya mabanhaw gikan sa mga patay sa ikatulong adlaw. Sa pagkakita sa walay sulod nga lubnganan, si Juan nahinumdom ug mituo (tan-awa sa Juan 20:8–9).

Juan 20:11–31

Ang nabanhaw nga Manluluwas nagpakita ni Maria Magdalena ug sa wala madugay ngadto sa Iyang mga disipulo

Basaha ang Juan 20:11–15, nga mangita kon kinsay namulong ngadto kang Maria human mibiya sa lubnganan si Pedro ug Juan.

Paghanduraw sa mga Panghitabo gikan sa mga Kasulatan

Ang imong pagtuon sa kasulatan mahimong mas makahuluganon kon imong ihanduraw ang mga panghitabo nga girekord diha sa mga kasulatan. Sama pananglit, hunahunaa kon unsa kaha ang imong bation ug buhaton kon anaa ka niadto nga mga panghitabo nga gihulagway diha sa Juan 20. Ang paghanduraw makatabang usab kanimo nga makaamgo sa pagkasusama tali sa mga panghitabo sa kasulatan ug sa mga sitwasyon sa imong kinabuhi ug makaandam kanimo sa paggamit sa mga kamatuoran nga gitudlo sa mga kasulatan.

Basaha ang Juan 20:16–18, nga mangita kon unsa ang gisugo ni Jesus nga buhaton ni Maria.

Si Elder Bruce R. McConkie sa Korum sa Napulog Duha ka mga Apostoles mipasabut sa kahulugan sa mga pulong “ayaw na ako pagkupti” diha sa Juan 20:17: “Ang King James Version mikutlo kang Jesus nga nag-ingon nga ‘Ayaw ako paghikapa.’ Ang Joseph Smith Translation mabasa nga nag-ingon ‘Ayaw ako pagkupti.’ Ang lain-laing mga hubad gikan sa Griyego naghubad niini nga tudling isip ‘Ayaw panggunit kanako’ o ‘Ayaw pagkupot kanako.’ Ang uban naghatag sa kahulugan nga ‘Ayaw na panggunit kanako’ o ‘Ayaw na pagkupot kanako.’ Ang uban naghisgot sa paghunong sa pagkupot kaniya o paggunit kaniya, nagpasabut nga si Maria nagkupot na kaniya. Adunay balido nga rason sa pagtuo nga ang gipasabut sa Nabanhaw nga Ginoo ngadto ni Maria ingon niini: ‘Ikaw dili na makahawid kanako dinhi, kay mosaka na ako ngadto sa akong Amahan’” (The Mortal Messiah: From Bethlehem to Calvary, 4 vols. [1979–81], 4:264).

Ang nabanhaw nga si Jesus nagpakita ngadto ni Maria Magdalena.

Sumala sa Juan 20:17, unsa pa man ang gisugo ni Jesus nga buhaton ni Maria?

2. Padayon sa paghanduraw nga usa ka ka news reporter atol niini nga mga panghitabo. Sa imong scripture study journal, pagsulat og news report nga daw nakainterbyu ka ni Maria Magdalena. Mahimo ka nga mosulat mahitungod sa iyang saksi sa nabanhaw nga Ginoo ug sa iyang mga tubag sa mosunod nga mga pangutana: Unsay imong gihunahuna sa dihang imong nakita nga walay sulod ang lubnganan? Unsay sunod nimong gibuhat? Kanus-a ka nakaamgo nga si Jesukristo buhi pa? Sa imong report, isulat kon motuo ba ka sa istorya ni Maria ug ngano.

Hinumdumi nga pipila sa mga disipulo naglisud sa pagtuo sa saksi ni Maria (tan-awa sa Marcos 16:11). Basaha ang Juan 20:19–20, nga mangita kon unsay nahitabo nianang gabhiuna.

Gikan niini nga istorya atong nakat-unan nga si Jesukristo mibuntog sa kamatayon pinaagi sa Iyang Pagkabanhaw.

Sumala sa Juan 20:20, unsay gibati sa mga disipulo sa dihang ilang nakita ang nabanhaw nga Ginoo?

Si Elder Joseph B. Wirthlin mipasabut nganong “ang kawalay paglaum nianang [mangitngit nga Biyernes] wala magdugay”:

“Ang pagkawalay paglaum wala magdugay tungod kay pagka Dominggo, ang nabanhaw nga Ginoo mibugto sa higut sa kamatayon. Mibangon Siya gikan sa lubnganan ug mipakita sa mahimayaong kadaugan isip Manluluwas sa katawhan. …

“Matag usa kanato adunay atong kaugalingon nga Biyernes—kadtong mga adlaw nga ang kalibutan mismo ingon og nabungkag ug ang mga tipak sa atong kalibutan nagkatag libot kanato nga piniraso. Tanan kita makasinati niadtong nangabuak nga panahon diin maora og dili na mauli pa. Tanan kita adunay mga Biyernes.

“Apan akong ipamatuod kaninyo sa pangalan sa Usa kinsa mibuntog sa kamatayon—ang Dominggo moabut. Diha sa kangiub sa atong kasub-anan, ang Dominggo moabut.

“Bisan unsa man kita ka walay paglaum, bisan unsa ang kasub-anan, ang Dominggo moabut. Dinhi niining kinabuhia o sa sunod, ang Dominggo moabut” (“Ang Dominggo Moabut,”  30).

3. Tubaga ang mosunod nga mga pangutana diha sa imong scripture study journal:

   1. Sa unsang paagi ang pagkahibalo nga si Jesukristo nabanhaw makatabang kanato samtang nagsubo kita sa kamatayon sa usa ka tawo nga atong gimahal?

   2. Sa unsang paagi ang saad sa Pagkabanhaw makatabang kanato panahon sa ubang lisud nga mga kasinatian sa kinabuhi?

Ang Juan 20:21–23 nagrekord nga human mipakita si Jesus ngadto sa Iyang mga disipulo sa mga samad sa Iyang mga kamot ug kilid, Siya misugo kanila sa pagbuhat sa Iyang buhat. Siya miingon ngadto kanila, “Dawata ninyo ang Espiritu Santo” (Juan 20:22), nga mahimong nagpasabut nga Siya mipanalangin kanila sa pagdawat sa gasa sa Espiritu Santo, apan dili nila hingpit nga matagamtam ang mga panalangin niana hangtud sa kaulahian. Mitudlo usab siya mahitungod sa ilang responsibilidad sa pagtabang sa uban nga makadawat sa kapasayloan sa ilang mga sala.

Basaha ang Juan 20:24–25, nga mangita sa ngalan sa Apostol kinsa wala nianang sagrado nga okasyon.

Tan-awa sa bersikulo 25 unsay gisulti ni Tomas nga iyang gikinahanglan aron motuo. Ngano kaha nga lisud alang kaniya ang pagtuo nga nabanhaw si Jesus?

Ang konsepto sa pagkabanhaw lisud nga masabtan alang sa kadaghanan o sa tanan nga mga disipulo panahon sa mortal nga kinabuhi ni Jesus. Sama sa ubang mga disipulo, si Tomas wala pa gihapon makasabut unsa ang pagkabanhaw, ug siya nangita og usa ka pisikal nga saksi.

Basaha ang Juan 20:26–29, nga mangita kon unsay nasinati ni Tomas paglabay sa walo ka adlaw.

Timan-i nga si Jesus midapit ni Tomas nga “ayaw na nianang pagkadili matinuohon, hinonoa magmatinuohon ka” (Juan 20:27). Gikan sa kasinatian ni Tomas atong nakat-unan nga kita mapanalanginan kon mopili kita sa pagtuo kang Jesukristo bisan kon kita dili makakita Kaniya.

Si Elder Gerrit W. Gong sa Seventy mitudlo:

“Ang pagtuo usa ka pagpili. …

“Kon mopili kita nga motuo, kita makasabut ug makakita sa mga butang sa lahi nga paagi. Kon kita makakita ug magpakabuhi niana nga paagi, kita magmalipayon sa paagi nga ang ebanghelyo lang ang makahatag” (“Choose Goodness and Joy,” New Era, Ago. 2011, 44).

4. Tubaga ang mosunod nga mga pangutana diha sa imong scripture study journal:

   1. Nganong mopili ka sa pagtuo kang Jesukristo bisan kon wala nimo Siya makita sa imong mortal nga mga mata?

   2. Unsay atong mabuhat aron sa pagpakita nga kita mipili sa pagtuo kang Jesukristo?

   3. Sa unsang paagi ka napanalanginan tungod sa pagpili nga motuo kang Jesukristo?

Basaha ang Juan 20:30–31, nga mangita kon nganong girekord ni Juan kini nga mga panghitabo.

Gikan niini nga mga bersikulo, atong nakat-unan ang mosunod nga mga kamatuoran: Ang mga apostoles ug mga propeta nagpamatuod ni Jesukristo aron kita motuo nga Siya mao ang Anak sa Dios. Pinaagi sa pagpili nga motuo diha sa pagpamatuod ni Jesukristo nga gihatag sa mga apostoles ug mga propeta ug dayon sa pagsunod nga matinud-anon niana nga pagpamatuod, makadawat kita og kinabuhing dayon.

5. Pagsulat og dili mominos duha ka mga paragraph nga nagtubag sa mosunod nga pangutana sa imong scripture study journal: Sa tanan nga gisulat diha sa mga Ebanghelyo ni Mateo, Marcos, Lucas, ug Juan, unsa nga istorya, panghitabo, o pagtulun-an gikan sa mortal nga pangalagad sa Manluluwas nga nakatabang kanimo sa pagtuo nga si Jesukristo mao ang Anak sa Dios? Ngano man? Pangandam sa pagpakigbahin sa unsay imong nasulat diha sa inyong klase.

Juan 21:1–17

Ang nabanhaw nga Ginoo nagpakita ngadto sa uban sa Iyang mga disipulo sa Dagat sa Tiberias

Ang Juan 21:1–17 nagrekord nga ang nabanhaw nga Ginoo mipakita pag-usab ngadto sa pipila sa Iyang mga disipulo samtang sila nangisda. Sa pagkakita nila kang Jesus, sila daling mibalik ngadto sa baybayon, ug sila nangaon sa isda ug pan uban Kaniya. Atol sa ilang pagpangaon si Jesus midapit ni Pedro sa pagpakita sa iyang gugma alang Kaniya pinaagi sa pagbiya sa iyang kinabuhi isip usa ka mangingisda ug pagserbisyo sa mga katawhan sa Ginoo.

Juan 21:18–25

Si Jesus nanagna sa pagkamartir ni Pedro ug sa pagkabalhin sa pagkahimaya ni Juan

Diha sa Juan 21:18–19 atong mabasa nga si Jesus nanagna nga sa pagkatigulang na ni Pedro iya nga “pagatuy-uron ang [iyang] mga kamot” (Juan 21:18) ug pagadad-on sa dapit nga dili niya gusto nga moadto. Sagad nga gituohan nga si Pedro namatay pinaagi sa paglansang sa krus. Hinoon, giingon nga si Pedro mihangyo nga ituwad siya sa paglansang sa krus tungod kay mapaubsanon siyang mikonsiderar sa iyang kaugalingon nga dili takus nga mamatay sa sama nga paagi sa Manluluwas (tan-awa sa Joseph Fielding Smith, Doctrines of Salvation, comp. Bruce R. McConkie, 3 vols. [1954–56], 3:151–52).

Human makadungog kabahin niini nga panagna, si Pedro nangutana kon unsa ang mahitabo ngadto ni Apostol Juan, o si Juan ang Hinigugma (tan-awa sa Juan 21:20–21). Basaha ang Juan 21:22–23, nga mangita kon giunsa pagtubag sa Manluluwas si Pedro.

Ang pulong nga magapabilin diha sa bersikulo 22 nagpasabut nga magpabiling buhi dinhi sa yuta. Sa ingon, si Juan magpabilin sa yuta isip usa ka nabalhin sa pagkahimaya nga binuhat hangtud sa Ikaduhang Pag-anhi ni Jesukristo. Ang nabalhin sa pagkahimaya nga mga binuhat mao ang “mga tawo kinsa giusab aron dili makasinati og sakit o kamatayon hangtud sa ilang pagkabanhaw ngadto sa pagka-imortal” (Giya ngadto sa mga Kasulatan, “Nabalhin sa Pagkahimaya nga mga Binuhat,” scriptures.lds.org).

Sumala sa Juan 21:22, unsay gusto ni Jesus nga tutokan ni Pedro kay sa manumbaling sa unsay mahitabo ni Juan?

Basaha ang Juan 21:24–25, nga mangita kon unsay gusto ni Juan nga mahibaloan sa tanan sa iyang pagtapos sa iyang rekord.

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Juan 20–21 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: