Unit 12: Day 3

Lucas 23–24

Pasiuna

Ang Manluluwas unang gitaral nilang Pontio Pilato ug Herodes Antipas. Ni usa niini nga mga tawo nakakaplag sa Manluluwas nga sad-an sa mga krimen nga gipasangil sa mga Judeo kaniya, apan si Pilato, hinoon, mitugyan Kaniya aron ipalansang sa krus. Si Jesus mipasaylo sa mga sundalo nga Romano kinsa milansang Kaniya sa krus ug namulong og kasigurohan mahitungod sa kinabuhi human sa kamatayon ngadto sa usa ka kawatan kinsa gilansang usab sa krus. Human namatay si Jesus, ang Iyang lawas gipahimutang sa usa ka lubnganan ni Jose nga taga-Arimatea. Sa ikatulo ka adlaw human sa kamatayon ni Jesukristo, ang mga anghel nga diha sa lubnganan mipahibalo sa Iyang Pagkabanhaw ngadto sa usa ka pundok sa mga babaye. Wala madugay si Jesus mipakita ngadto sa Iyang mga Apostoles ug sa uban, gipakita ngadto kanila ang Iyang nabanhaw nga lawas, ug misugo kanila sa pagsangyaw og paghinulsol ug mahimong mga saksi nganha Kaniya.

Lucas 23

Ang Manluluwas gitaral diha sa atubangan ni Pilato ug Herodes ug gilansang sa krus taliwala sa duha ka mga kawatan.

Paghunahuna mahitungod og panahon sa dihang ang usa ka tawo midaugdaog kanimo. Giunsa nimo pagtubag kana nga sitwasyon?

Samtang ikaw magtuon sa Lucas 23, pangita og kamatuoran nga motabang kanimo nga makasabut kon unsaon nato sa pagtubag kon atong bation nga kita gidaugdaog sa uban.

Hinumdumi nga human si Jesus nag-antus sa Getsemani, ang mga sacerdoteng punuon midakop Kaniya ug gihukman Siya nga mamatay. Dayon ilaha Siyang gidala ngadto ni Pontio Pilato, usa ka magmamando nga Romano sa teritoryo sa Judea, ug mibungat nga iyang ibutang si Jesus sa kamatayon. Si Pilato walay nakitang bisan unsa nga kasaypanan ni Jesus. Gipadala niya si Jesus aron pagahukman ni Herodes Antipas, kinsa mipatay ni Juan Bautista ug kinsa namuno sa mga teritoryo sa Galilea ug Pera ubos sa awtoridad sa Romano. Si Herodes walay nakita usab nga kasaypanan ni Jesus, busa si Pilato misulti ngadto sa mga katawhan nga iyang silutan si Jesus ug buhian Siya. Misinggit ang mga katawhan nga buhian ni Pilato si Barabas, usa ka mamumuno, ipuli ug mibungat nga ipalansang si Jesus. Gibuhian ni Pilato si Barabas ug gitugyan si Jesus nga ipalansang sa krus (tan-awa sa Lucas 23:1–25).

Basaha ang Lucas 23:32–34 ug ang Hubad ni Joseph Smith, Lucas 23:35 ), nga mangita sa unsay giampo sa Manluluwas samtang gilansang Siya sa krus. Mahimo nimong markahan ang Iyang pag-ampo diha sa imong mga kasulatan.

1. Tubaga ang mosunod nga mga pangutana diha sa imong scripture study journal:

   1. Ngano nga dalaygon man kaayo ang pag-ampo sa Manluluwas niadtong tungura?

   2. Unsa nga baruganan ang atong makat-unan gikan sa ehemplo sa Manluluwas mahitungod sa unsa nga paagi kita motubag kon ang uban modaugdaog kanato? (Tubaga kini nga pangutana pinaagi sa pagkompleto sa mosunod nga pamahayag sa baruganan: Makasunod kita sa ehemplo ni Jesukristo pinaagi sa pagpili sa .)

Ang pagpasaylo sa uban wala magpasabut nga atong pasayloon ang usa ka tawo gikan sa pagka may tulubagon sa iyang nabuhat. Wala gihapon kini nagpasabut nga kinahanglan nga ibutang nato ang atong mga kaugalingon sa mga sitwasyon diin ang mga tawo makapadayon sa pagdaugdaog kanato. Hinoon, ang pagpasaylo nagpasabut sa pagtratar uban sa gugma niadtong mga midaugdaog kanato ug sa dili paghambin og kasuko o kayugot ngadto kanila (tan-awa sa Giya ngadto sa mga Kasulatan, “Pasaylo,” scriptures.lds.org).

Ikonsiderar kon aduna bay usa ka tawo kinsa kinahanglan nimo nga pasayloon. May higayon nga kini mahimong lisud ang pagpasaylo sa uban. Basaha ang mosunod nga pahayag ni Presidente Gordon B. Hinckley, nga mangita sa unsay imong mabuhat kon ikaw nanlimbasog sa pagpasaylo sa usa ka tawo:

“Ako nangamuyo uban kaninyo sa paghangyo sa Ginoo alang sa kalig-on nga magpasaylo. … Mahimong dili kini sayon, ug mahimong dili kini madali. Apan kon kamo kinasingkasing nga magtinguha niini, moabut kini. … Adunay kalinaw nga mosulod sa inyong kinasingkasing nga dili maangkon sa laing paagi. Kana nga kalinaw mao ang Iyang kalinaw kinsa miingon:

“‘Kay kon mopasaylo kamo sa mga tawo sa ilang mga paglapas, pasayloon usab kamo sa inyong Langitnong Amahan :

“‘Apan kon dili man kamo mopasaylo sa mga tawo sa ilang mga paglapas, ang inyong Amahan dili usab mopasaylo sa inyong mga paglapas.’ (Mat. 6:14–15)” (“Of You It Is Required to Forgive,” Ensign, Hunyo 1991, 5).

2. Kompletoha ang mosunod nga mga assigment diha sa inyong scripture study journal:

   1. Tubaga ang mosunod nga pangutana: Sa unsa nga paagi nga ang pag-ampo alang sa kalig-on makatabang kanimo sa pagpasaylo sa usa ka tawo kinsa nagdaugdaog kanimo?

   2. Pagsulat mahitungod sa usa ka panahon sa dihang ikaw (o ang usa ka tawo nga imong kaila) mipasaylo og laing tawo. Hinumdumi nga dili mopakigbahin og bisan unsa nga personal kaayo.

Tinguhaa ang pagsunod sa ehemplo ni Jesukristo ug pasayloa kadtong kinsa midaugdaog kanimo. Pag-ampo alang sa kalig-on ug abilidad sa pagbuhat sa ingon. (Hinumdumi nga ang Ginoo nanghimaraut sa abusado nga kinaiya sa bisan unsa nga matang—pisikal, sekswal, sinultihan, o emosyonal. Ang pag-abusar o pagdaugdaog sa bisan unsa nga matang, lakip ang pagpanlupig, supak sa mga pagtulun-an ni Jesukristo. Ang mga biktima sa pag-abuso kinahanglan mapasaligan nga sila dili ang mabasol alang sa makadaut nga kinaiya sa uban. Dili sila kinahanglang mobati nga sad-an. Ang mga biktima sa pag-abuso kinahanglang magtinguha og tabang dihadiha dayon, sa kasagaran gikan sa ilang bishop o branch president.)

Sa Lucas 23:35–38 atong makat-unan nga ang mga magmamando nga Judeo ug ang mga kasundalohan nga Romano mibiaybiay sa Manluluwas samtang nagbitay Siya sa Krus. Basaha ang Lucas 23:39–43, nga mangita kon giunsa sa pagtratar sa duha ka mga kawatan nga gibitay usab diha sa isig ka kilid nga bahin sa Manluluwas. Mahimo nimong markahan ang mga pulong nga makahuluganon diha kanimo.

Basaha ang mosunod nga pahayag, nga mangita kon unsay gipasabut sa dihang ang Manluluwas misulti sa usa sa mga kawatan nga siya makauban Kaniya sa paraiso.

“Sa mga kasulatan, ang pulong paraiso gigamit sa lainlaing mga paagi. Una, kini naghulagway og usa ka dapit sa kalinaw ug kalipay diha sa kalibutan sa espiritu human niini nga kinabuhi, gigahin alang niadtong kinsa nabunyagan ug nagpabilin nga matinud-anon (tan-awa sa Alma 40:12; Moroni 10:34). …

“Ang ikaduhang gamit sa pulong paraiso makita sa asoy ni Lucas kabahin sa Paglansang sa Krus sa Manluluwas. … Si Propeta nga si Joseph Smith mipasabut nga … ang Ginoo sa tinuod lang miingon nga ang kawatan makauban Niya didto sa kalibutan sa mga espiritu” (Matinud-anon ngadto sa Pagtuo: A Gospel Reference [2004], 111; tan-awa usab sa History of the Church, 5:424–25).

Gikan sa mga pulong sa Manluluwas ngadto sa kawatan narekord sa Lucas 23:43, atong makat-unan nga ang mga espiritu sa tanang tawo mosulod sa kalibutan sa mga espiritu sa panahon sa ilang kamatayon.

Sa Doktrina ug mga Pakigsaad 138 atong makat-unan nga sa dihang ang Manluluwas namatay, ang Iyang espiritu misulod sa kalibutan sa mga espiritu. Hinoon, wala Siya mobisita sa mga dautan, nga kabahin usab sa kalibutan sa espiritu nga gitawag og bilangguan sa mga espiritu. Basaha ang Doktrina ug mga Pakigsaad 138:29–32, nga mangita sa unsay gibuhat sa Manluluwas didto sa kalibutan sa mga espiritu ug unsay lagmit nahitabo sa kawatan human siya namatay ug miadto sa kalibutan sa espiritu. Mahimo nimong isulat ang cross-reference D&P 138:29–32 sunod sa Lucas 23:43 sa imong mga kasulatan.

Paghimo og mga Cross-Reference

Ang sa ka cross-reference maoy usa ka pakisayran sa kasulatan nga makahatag og dugang nga panlantaw sa tudling nga imong gitun-an. Samtang ikaw nagtuon, makabinepisyo ka og dako pinaagi sa pagsulat sa mga cross-reference diha sa imong mga kasulatan kon imo nang makit-an ang mga bersikulo nga nagtabang nimo sa pagsabut og laing bersikulo sa kasulatan o usa ka hilisgutan sa kasulatan.

Bisan og ang ebanghelyo itudlo ngadto niini nga kawatan, dili niya madawat dayon ang kahimayaan didto sa gingharian sa Dios. Ang kawatan (ug ang uban nga namatay nga wala kahibalo sa ebanghelyo) nagkinahanglan sa paghinulsol ug sa pagdawat sa mga ordinansa sa templo nga gihimo alang kaniya (tan-awa sa Doktrina ug mga Pakigsaad 138:58–59).

AngLucas 23:44–56 nagsaysay nga ang Manluluwas namatay diha sa krus. Ang Iyang lawas giputos dayon og panapton nga lino ug gipahimutang sa lubnganan. Ang mga materyal nga may kalambigitan sa kamatayon sa Manluluwas nahistugan niini nga leksyon Mateo 27.

Lucas 24

Mipahibalo ang mga anghel nga si Jesukristo nabanhaw, ug si Jesus mipakita ngadto sa Iyang mga tinun-an

Hunahunaa nga ikaw usa ka misyonaryo, ug nahimamat nimo ang usa ka tawo nga miingon, “Daghan ko og tawo nga nahibaloan nga dili motuo ogkinabuhi human sa kamatayon. Ang uban kanila nag-ingon nga nagtuo sila ni Jesukristo apan wala nagtuo nga Siya nabanhaw nga may pisikal nga lawas. Sila miingon nga mipadayon Siya nga buhi isip usa lamang ka espiritu. Unsa ang imong pagtuo mahitungod sa Pagkabanhaw ni Jesukristo?”

Sa unsa nga paagi imong tubagon kini nga pangutana?

Basaha ang Lucas 24:1–4, nga mangita sa unsay nakaplagan sa mga babaye sa pag-abut didto sa lubnganan diin gipahimutang ang lawas ni Jesus.

Basaha ang Lucas 24:5–8, nga mangita sa unsay gisulti sa mga anghel ngadto sa mga babaye. Mahimo nimong markahan unsa ang imong nakat-unan.

Sa Lucas 24:9–10 atong makat-unan nga ang mga babaye mibiya sa lubnganan ug misulti sa mga tinun-an unsay ilang nakita ug nadunggan.

Basaha ang Lucas 24:11, nga mangita sa reaksyon sa mga Apostoles sa gipanulti sa mga babaye.

I-summarize kon sa unsa nga paagi mi-react ang mga Apostoles ngadto sa gipanulti sa mga babaye:

Human madungog ang balita sa mga babaye, si Pedro midagan ngadto sa lubnganan ug nakit-an ang panapton nga lino, apan ang lawas ni Jesus wala na (tan-awa sa Lucas 24:12).

Sa Lucas 24:13–32 atong makat-unan nga ang nabanhaw nga Manluluwas mipakita ngadto sa duha ka mga tinun-an diha sa dalan paingon sa Emaus. Ang duha ka mga wala makaila ni Jesus samtangnakigdungan Siya sa pagpanlakaw uban kanila ug mitudlo kanila gamit ang mga kasulatan tungod kay “ang ilang mga mata nahipugngan” (Lucas 24:16). Ang Manluluwas dili gusto kanila nga makaila dayon Kaniya.

Basaha ang Lucas 24:32, nga mangita kon sa unsa nga paagi ang mga pagtulun-an sa Manluluwas gikan sa mga kasulatan nakaapekto sa duha ka mga tinun-an. Ikonsiderar ang pagmarka unsay imong nakit-an.

Ang duha ka mga tinun-an mibalik dayon ngadto sa Jerusalem ug misaysay sa ilang kasinatian ngadto sa mga Apostoles ug sa uban nga mga tinun-an (tan-awa sa Lucas 24:33–35). Samtang nanagtabi sila, ang Manluluwas mipakita.

Basaha ang Lucas 24:36–39, nga mangita og ebidensya nga si Jesus sa tinuod nabanhaw ug adunay unod ug bukog. (Lucas 24:36–39 usa ka tudling sa scripture mastery. Mahimo nimong markahan kini sa lahi nga paagi aron sayon ra nimo kining matultolan.)

Unsa sa imong hunahuna ang imong bation kon ikaw didto sa dihang ang nabanhaw nga Kristo mipakita ngadto sa Iyang mga tinun-an?

Basaha ang Lucas 24:40–43, nga mangita og unsa pay laing gihimo ni Jesus aron sa pagpakita nga Siya adunay mahikap (o pisikal) nga nabanhaw nga lawas.

Gikan niini nga mga bersikulo atong makat-unan nga si Jesukristo usa ka nabanhaw nga binuhat nga adunay unod ug mga bukog nga lawas. Ang tanang nabanhaw nga mga lawas adunay nahimaya nga unod ug mga bukog.

Samtang ikaw magbasa sa mosunod nga mga pamahayag, badlisi nganong kini nga doktrina importante nga masabtan ug tuohan:

“Pinaagi sa Pag-ula ni Jesukristo, ang tanang katawhan mabanhaw—naluwas gikan sa pisikal nga kamatayon (tan-awa sa 1 Mga taga-Corinto 15:22). Ang Pagkabanhaw mao ang paghiusa sa espiritu uban sa lawas diha sa hingpit, walay kamatayon nga kahimtang, dili na ubos ngadto sa sakit o kamatayon (tan-awa sa Alma 11:42–45). …

“Ang pagsabut ug pagpamatuod sa pagkabanhaw makahatag kaninyo og paglaum ug panlantaw samtang nagsinati kamo sa mga hagit, pagsulay, ug pagkamadaugon sa kinabuhi. Makakaplag kamo og kahupay diha sa kasigurohan nga ang Manluluwas buhi ug nga pinaagi sa Iyang Pag-ula, ‘siya mibugto sa mga higot sa kamatayon, aron ang lubnganan walay kadaugan, ug aron ang kahapdos sa kamatayon kinahanglan lamyon diha sa mga paglaum sa himaya’ (Alma 22:14)” (Matinud-anon ngadto sa Pagtuo, 139–40).

Ang plano sa kaluwasan nagtudlo kanato nga ang Pagkapukan ni Adan ug Eva nagdala sa pisikal ug espirituhanon nga kamatayon. Dili unta kita mahimong makabalik ug makapuyo uban sa Langitnong Amahan gawas nga adunay usa ka Manunubos nga gihatag aron sa pagbuntog sa sala ug sa kamatayon. Ang Pag-ula ug ang Pagkabanhaw ni Jesukristo naghimo niining posible alang kanato sa pagbuntog sa mga epekto sa Pagkapukan.

3. Sa imong scripture study journal, ipasabut nganong ang doktrina sa Pagkabanhaw ni Jesus importanting masabtan ug tuohan ug nganong importante kini nganha kanimo.

Scripture Mastery—Lucas 24:36–39

4. Basaha pag-usab ang sitwasyon diin ikaw usa ka misyonaryo ug imong nahimamat ang usa ka tawo kinsa nangutana kanimo mahitungod sa Pagkabanhaw ni Kristo. Gamit ang unsay imong nakat-unan sa Lucas 24:36–39, pagsulat og tubag sa pangutana niini nga tawo diha sa imong scripture study journal.

5. Isulat ang mosunod diha sa ubos sa mga assignment karong adlawa sa imong scripture study journal:

   Akong natun-an ang Lucas 23–24 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: