Human sa Iyang bunyag, migahin si Jesus og 40 ka adlaw sa pagpuasa ug pakig-uban sa Langitnong Amahan didto sa kamingawan. Human niini nga kasinatian, ang yawa mitintal kang Jesus. Naggamit og kasulatan, gibuntog ni Jesus ang kada tintasyon. Miadto sa Galilea ang Manluluwas, diin Iyang gitawag si Pedro ug ang uban sa pagsunod Kaniya ug mipadayon sa pagtudlo, pagsangyaw, ug pagpang-ayo.
Lakaw ngadto sa usa ka duol nga bintana, ug sulod sa 30 ka segundo itumong ang imong atensyon diha sa usa ka piho nga butang sa gawas nga dili balhinon ang panan-aw. (Kon dili ka makahimo sa pagtan-aw sa gawas sa bintana, tutuki ang usa ka butang sa sulod.)
Diha bay usa ka butang nga nakapalinga kanimo gikan sa butang nga imong gitutukan? Unsa ang imong gihunahuna sulod sa 30 ka segundo?
Samtang kita magpabilin nga nakatutok sa pagsunod sa mga sugo sa Langitnong Amahan, ang mga palinga nga porma og mga tintasyon mosulay sa pagbitad palayo sa atong pagtutok ug mogiya kanato ngadto sa sala. Paghunahuna mahitungod sa mga paagi si Satanas nagtintal kanimo sa pagpakasala. Samtang imong tun-an ang Mateo 4, pangita og baruganan nga imong magamit sa pagtabang kanimo sa pagbuntog sa mga tintasyon.
Human sa Iyang bunyag, ang Manluluwas may kasinatian nga mitabang sa pag-andam Kaniya alang sa Iyang yutan-ong pangalagad. Basaha ang Mateo 4:1–2, gamit ang mga koreksyon gikan sa Joseph Smith Translation diha sa mga footnote alang sa mga bersikulo. Samtang imong basahon, pangitaa ang unsay nasinati ni Jesus didto sa kamingawan. (Timan-i nga niining kinatibuk-ang kahulugan, ang makig-uban nagpasabut og pagbaton og suod, espirituhanong inter-aksyon.)
Sa unsang paagi ang pagpuasa ug pakig-uban sa Langitnong Amahan nakatabang ni Jesus sa pag-andam alang sa Iyang yutan-ong pangalagad?
Imahe
Ang Pagtintal ni Jesus
Gibuntog ni Jesus ang mga pagtintal ni Satanas.
Ang Pagtintal ni Jesus, ni Carl Heinrich Bloch. Gigamit nga may pagtugot sa National History Museum sa Frederiksborg Castle sa Hillerød, Denmark. Ayaw kopyaha.
Ang mosunod nga tsart makatabang nimo sa pagkat-on mahitungod sa kasinatian ni Jesus sa dihang Siya gitintal sa yawa. Tun-i ang mga tudling sa kasulatan diha sa wala nga kolum sa tsart. Dayon isulat unsay gitintal ni Satanas nga ipabuhat ni Jesus ug ihulagway kon giunsa pagtubag ni Jesus ang tintasyon Samtang nagtuon ka, timan-i nga ang Hubad ni Joseph Smith nagkorihir sa mga pahayag diha sa Mateo 4:5, 8 aron sa pagpakita nga ang Espiritu, dili ang yawa, ang midala sa Manluluwas ngadto sa lainlaing mga dapit (tan-awa usab ang Joseph Smith Translation, Luke 4:5 ).
Tubaga ang mosunod nga pangutana diha sa imong scripture study journal: Unsay gihulagway niini nga istorya mahitungod sa mga paagi sa yawa sa pagtintal kanato sa pagpakasala?
Tan-awa ang pagkasusama sa tubag sa Manluluwas ngadto sa matag tintasyon. Ang mga kasulatan nga nahinumduman sa Manluluwas miklaro sa hustong lihok nga pagabuhaton alang sa kada tintasyon, ug iyang gigamit ang mga kamatuorang gitudlo niadto nga mga kasulatan. Ang mosunod maoy usa ka baruganan nga atong makat-unan gikan sa ehemplo sa Manluluwas: Kon atong hinumduman ug gamiton ang mga kamatuoran nga gitudlo diha sa mga kasulatan, kita makabuntog sa mga tintasyon sa yawa. Mahimo nga imong isulat kini nga baruganan diha sa margin sa imong mga kasulatan duol sa Mateo 4:3–11.
Maghunahuna mahitungod niini nga baruganan, nganong importante ang regular nga pagtuon sa mga kasulatan?
Imahe
Elder Richard G. Scott
Si Elder G. Scott sa Korum sa Napulog Duha ka mga Apostoles mihatag sa mosunod nga tambag mahitungod sa pagtuon ug sa pagmemorya og mga tudling sa kasulatan: “Pagmaalamon kon unsaon ninyo paggamit ang teknolohiya. Markahi ang importante nga mga kasulatan sa inyong device ug pakisayud og balik ngadto niini kanunay. Kon kamong mga batan-on moribyu og usa ka bersikulo sa kasulatan kanunay sama sa inyong pagpadala og mga mensahe sa text, makamemorya na unta kamo og gatusan ka mga tudling sa kasulatan. Kadto nga mga tudling mahimong gamhanang tinubdan sa inspirasyon ug giya sa Espiritu Santo sa panahon sa panginahanglan.” (“Alang sa Kalinaw Sa Panimalay,” Ensign o Liahona, Mayo 2013, 30).
Kompletuha ang mosunod nga kalihokan diha sa imong scripture study journal:
Paghimo og tulo ka kolum sa usa ka pahina nga papel. Diha sa unang kolum, isulat ang tulo ka mga sala nga ang mga kabatan-onan nga imong ka-edad mahimong matintal sa pagbuhat. Diha sa ikaduhang kolum, isulat ang paagi nga si Satanas maninguha sa pagdani og usa ka tawo sa paghimo sa kada sala nga imong gilista sa unang kolum. Dayon pangita og piho nga reference sa kasulatan nga nagtudlo og mga kamatuoran nga mahinumduman ug magamit sa usa ka tawo kon tintalon sa paghimo sa kada sala nga imong gilista, ug isulat ang reference sa kasulatan diha sa ikatulo nga kolum. (Ikonsiderar ang pagrefer ngadto sa mga scripture mastery passage, sama sa Genesis 39:9 o Doktrina ug mga Pakigsaad 10:5.)
Diha sa lain nga pahina, isulat ang kasulatan nga imong mahinumduman ug magamit sa sunod nga higayon nga ikaw matintal sa pagpakasala. Ikonsiderar ang pagmemorya sa kasulatan nga imong gipili.
Daghan ang mga panghitabo tali sa pagkahuman sa 40 ka adlaw nga ang Manluluwas didto sa kamingawan (Mateo 4:11) ug sa pagkabilanggo ni Juan Bautista (Mateo 4:12; tan-awa sa “Panag-uyon sa mga Ebanghelyo”).
Diha sa Mateo 4:12–15 atong nakat-unan nga human sa Iyang kasinatian didto sa kamingawan, miadto si Jesus sa Galilea ug mipuyo didto sa siyudad sa Capernaum. Gitiman-an ni Mateo nga ang pangalagad sa Manluluwas didto sa Galilea nagtuman sa panagna nga gihimo ni Isaias (tan-awa sa Isaias 9:1–2). Basaha ang Mateo 4:16, ug ikonsiderar ang pagmarka unsay gipanagna ni Isaias nga mahitabo.
Gikan niini nga panagna atong nakat-unan nga si Jesukristo nagdala og kahayag ngadto sa mga kinabuhi niadtong kinsa anaa sa kangitngit. Samtang imong ipadayon ang imong pagtuon sa Mateo ug sa ubang mga Ebanghelyo, pangitaa giunsa sa Manluluwas paghimo niini sa tibuok Niya nga pangalagad.
Ingon nga na-rekord diha sa Mateo 4:17, ang Manluluwas misugod sa Iyang pagsangyaw og paghinulsol agi og pagpangandam alang sa gingharian sa langit (Iyang Simbahan) nga gitukod taliwala sa katawhan.
Nagtawag si Jesus ni Pedro ug sa uban sa pagsunod Kaniya
Tan-awa ang hulagway sa Manluluwas nga nagtawag ni Pedro ug ni Andres, ug tan-awa unsay gibuhat ni Pedro ug ni Andres sa laya (pukot).
Imahe
Pagtawag sa mga Mangingisda
Samtang ang ubang mga tawo niana nga panahon tingali nagtan-aw ni Pedro ug ni Andres ingon og ordinaryong mga mangingisda, nakita ni Jesukristo ang ilang dako kaayo nga potensyal ug nahibalo kon unsay mahimo kanila. Paghunahuna og mga paagi nga kita sama ni Pedro ug ni Andres.
Samtang ikaw magpadayon sa pagtuon sa Mateo 4, pangitaa ang unsay atong kinahanglan gayud nga buhaton nga mahimo ang tanan nga gusto sa Ginoo kanato nga mahimo.
Basaha ang Mateo 4:18–22, mangita sa inter-aksyon tali sa Manluluwas ug sa pipila ka mga mangingisda.
Ibutang ang imong kaugalingon sa posisyon sa usa niini nga tawo. Hunahunaa ang mahitungod sa unsay imong isakripisyo sa pagsunod sa Manluluwas ug pagtabang sa Iyang buhat sa tibuok panahon. Ngano kaha nga kini lisud?
Tan-awa kon giunsa niini nga mga mangingisda—Pedro, Andres, Santiago, ug Juan—pagtubag sa pagdapit sa Manluluwas. Unsa sa ilang diha-diha dayon nga tubag ang gipakita mahitungod sa ilang kinaiya?
Pamalandungi kon nganong kini nga mga tawo makahimo og mas maayo sa ilang mga kinabuhi isip “mangingisdag tawo” kon ikumparar ngadto sa pagka-mangingisda.
Atong makat-unan ang mosunod nga baruganan gikan sa ehemplo niini nga mga tawo: Kon kita diha-diha dayon motubag ngadto sa mga pagdapit sa Manluluwas nga mosunod Kaniya, Siya makahimo pa og daghan sa atong mga kinabuhi kay sa kita makahimo sa atong kaugalingon.
Si Elder B. Wirthlin sa Korum sa Napulog Duha ka mga Apostoles mihatag og usa ka pangutana kalabut sa “mga laya” sa atong mga kinabuhi:
Imahe
Elder Joseph B. Wirthlin
“‘Kon ang Manluluwas motawag kaninyo karong adlawa, andam ba kamo sa pagbiya sa inyong mga laya ug mosunod Kaniya?’ …
“Ang mga laya adunay daghang mga gidak-on ug mga porma. Ang mga laya nga gibiyaan ni Pedro, Andres, ug Juan tinuod nga mga butang—mga himan nga nagtabang kanila nga makapangita og panginabuhi. …
“Ang mga laya sa kinatibuk-an gipasabut isip usa ka kagamitan sa pagdakop og usa ka butang. Sa mas limitado apan mas importante nga panabut, mahimong atong ipasabut ang laya isip bisan unsa nga butang nga modani o mopugong kanato sa pagsunod sa tawag ni Jesukristo, ang Anak sa buhing Dios.
“Ang mga laya nga gigamit dinhi mahimo nga atong mga trabaho, atong mga lingaw-lingaw, atong mga kalipay, ug, labaw sa tanan, atong mga tintasyon ug mga sala. Sa laktod, ang usa ka laya mahimo og bisan unsa nga butang nga mobitad kanato palayo gikan sa atong relasyon sa atong Langitnong Amahan o gikan sa Iyang gipahiuli nga Simbahan” (“Follow Me,” Ensign, Mayo 2002, 15).
Gibasi sa pagpasabut ni Elder Wirthlin sa “mga laya,” diha sa imong scripture study journal paghulagway og 3–4 ka mga ehemplo kon giunsa sa modernong mga laya pagpugong sa usa ka tawo sa atong panahon gikan sa diha-diha dayon nga pagtubag ngadto sa pagdapit sa Manluluwas sa pagsunod Kaniya.
Imahe
Presidente Ezra Taft Benson
Si Presidente Ezra Taft Benson mitudlo mahitungod sa mga panalangin nga mahimong moabut samtang kita nagsunod sa Manluluwas: “Ang mga lalaki ug mga babaye kinsa nagtugyan sa ilang mga kinabuhi ngadto sa Dios makadiskubre nga Siya makahimo og mas daghan pa sa ilang mga kinabuhi kay sa sila makahimo. Iyang paladman ang ilang mga kalipay, palapdon ang ilang panan-awon, paabtikon ang ilang mga hunahuna, palig-onon ang ilang mga kaugatan, bayawon ang ilang mga espiritu, pilopiloon ang ilang mga panalangin, dugangan ang ilang mga oportunidad, hupayon ang ilang mga kalag, padaghanon ang mga higala ug bubuan og kalinaw. Bisan kinsa ang mohatag sa ilang kinabuhi diha sa pagserbisyo sa Dios makakaplag og mahangturong kinabuhi” (“Jesus Christ—Gifts and Expectations,” Ensign, Des. 1988, 4).
Tubaga ang mosunod nga mga pangutana diha sa imong scripture study journal:
Kanus-a ka, o usa ka tawo nga imong kaila, nakasinati og susama nga mga panalangin tungod sa pagbiya sa kalibutanong mga kabalaka aron sa pagsunod sa Manluluwas?
Samtang imong ikonsiderar ang mga panalangin nga atong madawat pinaagi sa pagsunod sa Manluluwas, ngano sa imong hunahuna importante ang pagtubag diha-diha dayon sa Iyang mga pagdapit sa pagsunod Kaniya?
Ikonsiderar ang paghimo og tumong nga sa usa ka paagi ikaw mas makatubag ngadto sa mga pagdapit sa Manluluwas sa pagsunod Kaniya.
Si Jesus naglibut sa Galilea nga nagtudlo, nagsangyaw, ug nang-ayo
Basaha ang Mateo 4:23–25, ug ikonsiderar ang pagmarka sa mga lihok sa Manluluwas.
Sa tibuok nimong pagtuon sa mga Ebanghelyo, ikaw makakat-on mahitungod sa mga piho nga mga higayon sa Manluluwas sa iyang pagtudlo, pagsangyaw, ug pangpang-ayo sa panahon sa Iyang yutan-ong pagpangalagad.
Isulat ang mosunod diha ubos sa mga assignment karong adlawa sa imong scripture study journal:
Akong natun-an ang Mateo 4 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: