Unit 6: Day 4

Mateo 26:1–30

Pasiuna

Duha ka adlaw sa wala pa ang Pagpalabay, si Judas nakigkunsabo sa mga lider nga Judeo kinsa mitinguha sa pagpatay ni Jesus. Sa gabii sa Pagpalabay, gipasiugdahan ni Jesus ang sakrament.

Mateo 26:1–16

Nakigkunsabo si Judas sa mga lider nga Judeo kinsa nagtinguha sa pagpatay ni Jesus

Nakakita ka ba og sine o nakabasa og istorya diin ang usa ka tawo gibudhian? Ngano nga gibudhian kana nga tawo? Unsay imong bation kon ang usa ka suod nga higala mobudhi kanimo? Samtang imong basahon ang katapusang mga oras sa kinabuhi ni Jesukristo, hinumdumi nga Siya gibudhian sa usa ka suod nga higala.

Alang sa karaang mga Israelita, ang semana sa Pagpalabay maoy usa sa labing importante nga mga semana sa tuig. “Ang Pasko sa Pagpalabay gihimo [sa panahon ni Moises] aron sa pagtabang sa mga kabataan sa Israel sa paghinumdom sa panahon nga ang tiglaglag nga anghel milabay sa ilang mga balay ug nagluwas kanila gikan sa mga Ehiptohanon [tan-awa sa Exodo 12:21–28; 13:14–15].” Isip kabahin sa Pagpalabay, ang mga Israelitas misakripisyop og nati nga karnero ug gisablig ang dugo niini ibabaw sa mga haligi sa ilang pultahan. “Ang walay buling nga mga kordero, kansang dugo gigamit ingon nga usa ka timailhan sa pagluwas sa karaang Israel, mao ang usa ka simbolo ni Jesukristo, ang Kordero sa Dios, kansang sakripisyo mitubos sa tanang katawhan” (Giya ngadto sa mga Kasulatan, “Pagpalabay,” scriptures.lds.org).

Basaha ang Mateo 26:1-2, mangita sa unsay gisulti ni Jesukristo nga mahitabo human sa Pagpalabay.

Sunod, basaha ang Mateo 26:3–5, nga mangita kon kinsa ang naghimo og plano sa pagpatay ni Jesus niana nga panahon.

Ngano nga ang mga escriba ug ang mga sacerdote nga punoan mihukom sa paghulat hangtud mahuman ang Pagpalabay sa pagpatay ni Jesus?

Diha sa Mateo 26:6–13 atong mabasa nga samtang si Jesus didto sa Betania, usa ka babaye miduol Kaniya ug mibu-bu Kaniya og mahal kaayong pahumot aron sa pag-ila sa Iyang umaabot nga kamatayon ug paglubong. Pipila sa Iyang mga disipulo, lakip si Judas, usa sa Napulog Duha ka mga Apostoles ug ang tigtipig sa panudlanan sa kwarta sa grupo, nagmulo nga ang pahumot unta gibaligya sa pagtabang sa kabus. Bisan pa niana, si Judas sa tinud-anay wala mabalaka alang sa mga kabus apan usa ka tulisan kinsa gusto sa kwarta alang sa iyang kaugalingon (tan-awa sa Juan 12:4–6).

Basaha ang Mateo 26:14–16, nga mangita sa unsay gibuhat ni Judas human siya gibadlong sa Manluluwas tungod sa pagmulo.

Tan-awa kon pilay nadawat ni Judas isip bayad sa pagbudhi kang Jesus. “Sumala sa balaod ni Moises, katloan ka siclo nga salapi ang ibayad ngadto sa tag-iya alang sa kamatayon sa usa ka ulipon (tan-awa sa Exodo 21:32). … Ang presyo sa pagbudhi nagpakita sa ubos nga pagtan-aw ni Judas ug sa mga sacerdote nga punoan sa Manluluwas” (New Testament Student Manual [Manwal sa Church Educational System, 2014], 81). Kini nagtuman usab og panagna sa Daang Tugon sa pagbudhi sa Manluluwas (tan-awa sa Zacarias 11:12).

Mateo 26:17–25

Si Jesus ug ang Iyang mga disipulo nangaon sa pagkaon sa Pagpalabay

Paghunahuna mahitungod sa katapusang higayon nga ikaw nanamin. Unsa ang pipila ka mga paagi ang salamin makatabang kanato?

Basaha ang mosunod nga pamahayag ni Presidente Dieter F. Uchtdorf sa Unang Kapangulohan, nga mangita ug magmarka sa nganong importante nga makita ang atong mga kaugalingon og klaro, sama sa pagtan-aw sa Dios kanato:

“Walay usa kanato ganahan nga moangkon kon mitipas na kita gikan sa hustong dalan. Kasagaran atong likayan ang pagtan-aw og maayo sa atong mga kalag ug pag-atubang sa atong mga kahuyang, limitasyon, ug mga kahadlok. Agi og sangputanan, kon moaninaw na kita sa atong kinabuhi, kita motan-aw basi sa atong personal nga mga opinyon, sa ikapangatarungan, ug mga istorya nga atong isulti sa atong kaugalingon aron makarason sa dili takus nga mga hunahuna ug mga lihok.

“Apan ang klarong pagtan-aw sa atong mga kaugalingon mahinungdanon sa atong espirituhanong paglambo ug kaayohan. Kon ang atong mga kahuyang ug mga kasaypanan magpabiling masalipdan sa kangitngit, nan ang matubsanong gahum sa Manluluwas dili makaayo niini ug dili makahimo niini og mga kalig-on. …

“Busa unsaon nato paggamit ang putli nga mga kamatuoran sa Dios sa pag-aninaw sa atong mga kalag ug tan-awon ang atong kaugalingon sama sa Iyang pagtan-aw kanato?

“Mosugyot ako nga ang balaang mga kasulatan ug ang mga pakigpulong nga gihatag diha sa kinatibuk-ang komperensya naghatag og mga baruganan nga magamit nato sa pag-eksamin sa atong kaugalingong” (“Ako ba, Ginoo?” Ensign o Liahona, Nob. 2014, 58).

Ikonsiderar kon sa unsang paagi ang mga kasulatan ug mga pakigpulong nga gihatag diha sa kinatibuk-ang komperensya nga mahisama unta sa usa ka salamin nga motabang kanato sa pagtan-aw og mga paagi nga atong gikinahanglan nga mapalambo ang atong mga kinabuhi.

Samtang ikaw magtuon sa Mateo 26:17–25, pangita og baruganan nga makatabang kanimo sa pag-ila sa imong mga kahuyang aron ikaw makahimo sa pagbuntog kanila.

Diha sa Mateo 26:17–19 atong mabasa nga si Jesus misulti sa Iyang mga disipulo sa pagpangita og lawak didto sa Jeruslem alang sa pangaon sa Pagpalabay.

Basaha ang Mateo 26:20–21, nga mangita sa unsay gisulti ni Jesus sa Iyang mga Apostoles sa panahon sa pangaon sa Pagpalabay.

Kon ikaw didto pa, unsa kaha ang imong mahunahuna human si Jesus misulti niini?

Basaha ang Mateo 26:22, nga mangita sa pangutana nga gipangutana sa mga Apostoles kang Jesus.

Unsay gitudlo sa pangutana “Ako ba, Ginoo?” diha kaninyo mahitungod sa napulog usa ka matinud-anong mga Apostoles?

Usa ka baruganan nga atong makat-unan gikan niini nga istorya mao nga sa dihang ang mga disipulo ni Jesukristo nakadungog sa pulong sa Ginoo, ilang gi-eksamin ang ilang kaugalingong mga kinabuhi sa pagtan-aw kon sa unsa nga paagi kini magamit ngadto kanila.

Si Presidente Uchtdorf miingon sa mosunod mahitungod niini nga istorya:

“Ang mga disipulo wala magduda sa kamatuoran sa unsay [Jesus] gisulti. Ni sila milingi sa palibut, mitudlo sa lain, ug nangutana, ‘Siya ba?’ …

“Naghunahuna ako kon unsa kahay buhaton sa matag usa kanato kon kita ang gipangutana niana nga pangutana sa Manluluwas. Motan-aw kaha kita sa naglibut kanato ug moingon sa atong mga kasingkasing, ‘Si Brother Johnson siguro iyang gipasabut. Dugay na akong nagduda niya,’ o ‘Maayo kay ania dinhi si Brother Brown. Kinahanglan gayud siya nga makadungog niini nga mensahe’? O kita kaha, sama niadtong mga disipulo sa karaan, motan-aw sa kaugalingon ug mangutana nianang lawom nga pangutana: ‘Ako ba?’” (“Ako ba, Ginoo” 56).

Natintal ka na ba sukad sa pagbale-wala sa mga pulong sa Ginoo ug nagtuo nga kini alang sa laing tawo? Basaha ang mosunod nga pahayag, mangita sa unsay gidapit ni Presidente Uchtdorf kanato nga buhaton kon atong madungog ang mga pulong sa Ginoo:

“Niining yano nga mga pulong, ‘Ako ba, Ginoo’ anaa ang sinugdanan sa kaalam ug ang dalan sa personal nga pagkakabig ug mahangturong kausaban. …

“Ihiklin nato ang atong garbo, motan-aw lapas sa atong panghambog, ug sa kamapainubsanon mangutana, ‘Ako ba, Ginoo?’

“Ug kon mahitabo nga ang tubag sa Ginoo moingon ‘Oo, akong anak, adunay mga butang nga kinahanglan nimong ayohon, butang nga Ako makatabang kanimo nga mabuntog,’ ako nag-ampo nga atong dawaton kini nga tubag, mapainubsanong moangkon sa atong mga sala ug mga kasaypanan, ug dayon mag-usab sa atong binuhatan pinaagi nga mag mas minaayo” (“Ako ba, Ginoo?” 56, 58).

1. Diha sa imong scripture study journal, pagsulat mahitungod sa usa ka higayon nga ikaw napanalanginan pinaagi sa paggamit sa mga pulong sa Ginoo diha sa imong kinabuhi. Dayon pagsulat og piho nga tumong kalabut sa unsay imong buhaton nga mas mamaayo ang pag-eksamin sa imong kaugalingong kinabuhi sa panahon nga ikaw makadungog o makabasa og mga pulong sa Ginoo.

Basaha ang Mateo 26:23–25, nga mangita sa tubag sa Manluluwas ngadto sa pangutana sa mga Apostoles. Human dayon giila ni Jesus si Judas nga maoy mobudhi Kaniya, mibiya si Judas (tan-awa sa Juan 13:30).

Mateo 26:26–30

Gipasiugda ni Jesukristo ang sakrament sa panahon sa Pagpalabay

Human mikaon ang Manluluwas sa pagkaon sa Pagpalabay uban sa Iyang mga Apostoles, gipasiugda Niya ang ordinansa sa sakrament.

Pamalandungi ang imong mga tubag sa mosunod nga mga pangutana: Sa imong katapusang pag-ambit sa sacrament, unsay imong gibuhat? Unsa imong gihunahuna? Unsay imong gibati?

Basaha ang Mateo 26:26–29, nga mangita sa unsay gibuhat sa Ginoo sa pan ug sa mga sulod sa kopa.

Pinaagi niini nga mga bersikulo atong nakat-unan nga ang mga simbolo sa sakrament nagrepresentar sa lawas ug dugo ni Jesukristo, nga Iyang gisakripisyo alang kanato.

Ang Hubad ni Joseph Smith naghatag og dugang nga panan-aw sa Mateo 26:26–28. Basaha ang Hubad ni Joseph Smith, Mateo 26:22, 24–25 (diha sa Giya sa mga Kasulatan).

Pangitaa ang dinasig nga mga kausaban nga gihimo. Sa unsa nga paagi kini nagtabang kanato sa pagsabut og importante nga katuyoan sa sakrament?

Pinaagi niining dinasig nga mga kausaban atong nakat-unan nga gipasiugda ni Jesukristo ang sakrament alang kanato nga mahimundom Kaniya ug sa Iyang Pag-ula alang sa atong mga sala.

Kon mahimo, tan-awa ang video “Always Remember Him” (5:28) aron sa pagsabot pa sa katuyoan ug sa importansya sa sakrament. Niini nga video si Elder Jeffrey R. Holland sa Korum sa Napulog Duha ka mga Apostoles nagpasabut nga ang katuyoan sa sakrament mao ang paghinumdom ni Jesukristo ug sa Iyang maulaon nga sakripisyo. Kini nga video anaa sa LDS.org.

2. Tubaga ang mosunod nga mga pangutana diha sa imong scripture study journal:

   1. Sa unsa nga paagi nga ang pagpaninguha og hinumdom sa Manluluwas ug sa Iyang Pag-ula nakaapekto sa imong mga pagbati ug mga kasinatian samtang nag-ambit sa sakrament?

   2. Unsa ang pipila ka mga butang nga makapalinga kanato sa panahon sa pagpahigayon sa sakrament?

   3. Sa unsang paagi nga ang paglikay niini nga mga palinga sa panahon sa serbisyo sa sakrament nagtabang kanato sa pagbaton og mas espirituhanong kasinatian?

   4. Unsa ang pipila ka mga butang nga imong mahimo nga makatabang kanimo nga makatutok ngadto sa Manluluwas ug sa kahulugan niini nga ordinansa sa panahon sa serbisyo sa sakrament ug mahinumdom Kaniya sa tibuok semana?

Sumala sa Mateo 26:27–28, unsay gitugot sa pagpaagas sa dugo ni Kristo nga madawat nato samtang kita nag-ambit sa sakrament?

Ang pagkaon lamang sa pan ug pag-inom sa tubig sa panahon sa sakrament dili kalit nga makapahimo kanato sa pagdawat og kapasayloan sa atong mga sala. Kinahanglan gayud nga kita mogamit og hugot nga pagtuo diha ni Jesukristo, maghinulsol, ug moambit sa sakrament uban ang tinuod nga katuyoan pinaagi sa paghinumdom Kaniya kanunay ug maninguha sa pagsunod sa Iyang mga sugo. Pinaagi sa takus nga pag-ambit sa sakrament, atong gibag-o ang atong mga pakigsaad sa bunyag.

Ikonsiderar ang pagsulat sa mosunod nga baruganan diha sa margin sa imong mga kasulatan: Kon kita maghinulsol ug moambit sa sakrament uban ang tinuod nga katuyoan, makadawat kita og kapasayloan sa atong mga sala.

3. Diha sa imong scripture study journal, isulat kon unsaon nimo paggamit ang mga kamatuoran kalabut sa sakrament nga imong nailhan dinhi sa Mateo 26:26–30.

Basaha pag-usab ang Mateo 26:29, nga mangita kon kanus-a ang Manluluwas miingon nga Siya sunod moambit sa sakrament.

“Ingon nga na-rekord diha sa Mateo 26:29, ang Manluluwas misulti sa Iyang mga disipulo nga Siya dili na moinom pag-usab sa bunga sa parras hangtud Siya moinom niini uban kanila didto sa gingharian sa Iyang Amahan. Busa, ang sakrament wala lamang magsimbolo sa Pag-ula sa Manluluwas apan usab nagpaabut sa panahon nga Siya mobalik nganhi sa yuta diha sa himaya (tan-awa sa 1 Mga Taga-Corinto 11:26).

“Sa ulahing mga adlaw, gipadayag sa Ginoo ngadto ni Joseph Smith ang detalye sa umaabut nga okasyon nga Siya moinom sa bunga sa parras dinhi sa yuta. Ingon nga na-rekord diha sa Doktrina ug mga Pakigsaad 27, mipadayag ang Ginoo nga Siya moambit sa sakrament pag-usab dinhi sa yuta uban sa Iyang mga sumusunod, lakip ang daghang karaang mga propeta, sama ni Moroni, Elias, Juan Bautista, Elijah, Abraham, Isaac, Jacob, Jose kinsa gibligya ngadto sa Ehipto, Pedro, Santiago ug, Juan, ‘ug usab uban ni Miguel, o Adan, ang amahan sa tanan’ (tan-awa sa D&P 27:4–14). Ang mga sumusunod sa Ginoo naglakip sa ‘tanan kinsa ang akong Amahan mihatag kanako pinaagi sa kalibutan’ (D&P 27:14). Kini nagpasabut nga kon kita magpabilin nga tinuod ug matinud-anon ngadto sa mga pakigsaad nga atong gihimo ug molahutay ngadto sa katapusan, kita mahimong usa niadtong kinsa moambit sa mga simbolo sa sakrament uban sa Manluluwas niining umaabut nga panahon” (New Testament Student Manual, 83–84).

4. Isulat ang mosunod diha ubos sa mga assignment karong adlawa sa imong scripture study journal:

   Akong natun-an ang Mateo 26:1–30 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: