Unit 31: Day 2
Pinadayag 4–5
Pasiuna
Sa usa ka panan-awon, si Apostol Juan nakakita og nahimaya nga mga binuhat nga nagsimba sa Langitnong Amahan samtang naglingkod Siya sa Iyang trono. Nakakita usab siya og usa ka basahon nga minarkahan [gisilyohan] og pito ka mga timri [silyo] ug sa Kordero, o si Jesukristo, kinsa takus nga moabli sa basahon.
Pinadayag 4
Si Juan nakakita og nahimaya nga mga binuhat nga nagsimba sa Langitnong Amahan
Hunahunaa nga anaa ka sa celestial nga gingharian. Unsay imong hunahuna sa celestial nga gingharian? Sama sa unsa kaha kini?
Sumala sa narekord diha sa Pinadayag 4–5, si Apostol Juan nakakita og usa ka panan-awon sa usa ka bahin sa celestial nga gingharian.
-
Basaha ang Pinadayag 4:1–8. Sa imong scripture study journal, pagdrowing og usa ka simpleng diagram sa unsay nakita ni Juan. Timan-i nga ang “nahisulod … sa espiritu” (bersikulo 2) nagpasabut nga maanaa sa kahimtang sa pagpadayag o makakita og panan-awon pinaagi sa Espiritu.
Sa Pinadayag 4:3 si Juan misulat nga ang pagtan-aw diha sa Langitnong Amahan “morag mutya nga haspe ug cornalina.” Si Elder Bruce R. McConkie sa Korum sa Napulog Duha ka mga Apostoles mipasabut:
“Sa paningkamot nga makarekord og alang sa mortal nga panabut sa kahalangdon, himaya ug katahum sa Makagagahum sa mga Makagagahum, gikumpara ni Juan ang iyang panagway ngadto sa mga mutya ug bililhong mga bato. Ang haspe nga gihisgutan gituohan sa mga komentarista nga diyamante. …
“… Unsaon sa mga propeta nga makakaplag og mga pulong nga igong mapadayag ngadto sa ilang kaubang mga mortal ang kaanindot ug talagsaon nga katahum nianang mahangturong kalibutan sa celestial nga gahum ug himaya? Sila namulong kabahin sa mga balangaw ug mga mutya, sa nagtuyok nga mga siga sa mga kalayo, sa nagbaga nga mga kalayo nga ang kilat mikidlap gikan niini; sila naghisgot sa mga dalugdog ug mga tingog, sa dahunog sa daghang katubigan, ug sa harianong pagpakita sa gahum ug katahum—ang tanan sa pagpaningkamot nga marekord sa mortal nga mga pulong kanang makita ug mahibaloan lamang pinaagi sa gahum sa Espiritu. (Ezeq. 1 ug 10; Isa. 6.) Apan pasalamatan nato ang Ginoo nga sila mihimo niana nga mga paningkamot aron kadtong wala makakita ug makadungog makaangkon og gamay nga kahibalo niadto nga mga butang nga nakatago sa luyo sa mga bintana sa langit” (Doctrinal New Testament Commentary, 3 vols. [1965–73], 3:464–66).
Ang modernong pagpadayag nagtabang kanato nga mas makasabut mahitungod sa unsay nakita ni Juan. Sama pananglit, ang Ginoo mihatag sa pinadayag nga narekord sa Doktrina ug mga Pakigsaad 77 human si Propeta Joseph Smith mihangyo Kaniya sa paghubad sa pipila ka mga simbolo ug mga hitabo nga narekord diha sa Pinadayag 1–11.
-
|
Unsa ang Nakita ni Juan |
Mga Cross-Reference |
Dugang nga Impormasyon |
|---|---|---|
|
Trono (Pinadayag 4:2–3) | ||
|
Baynte kuwatro ka mga anciano nga may mga purong-purong (Pinadayag 4:4) | ||
|
Pito ka Espiritu sa Dios (Pinadayag 4:5) |
Ang Joseph Smith Translation niini nga bersikulo nag-usab sa “pito ka Espiritu” ngadto sa “pito ka sulugoon.” | |
|
Dagat nga bildo (Pinadayag 4:6) | ||
|
Upat ka mga buhing binuhat (Pinadayag 4:6–7) | ||
|
Mga mata ug mga pako sa mga buhing binuhat (Pinadayag 4:8) | ||
Basaha ang Pinadayag 4:8–11, nga mangita kon unsay gisulti ug gibuhat niadtong nanag-alirong sa Langitnong Amahan.
Unsa kaha ang girepresentahan sa mga anciano nga nang-itsa sa ilang mga purong-purong sa atubangan sa trono sa Langitnong Amahan?
Usa ka baruganan nga atong makat-unan gikan niini nga mga bersikulo mao nga samtang moila kita sa kahalangdon sa Langitnong Amahan, magtinguha kita sa pagsimba ug pagdayeg Kaniya.
Paghunahuna kon unsay makatabang kanato sa pag-ila sa kahalangdon sa Langitnong Amahan.
Karong gabhiona, sa dili pa ka mag-ampo, ikonsiderar ang mahinungdanong plano sa kalipay ug sa unsang paagi nga ang Langitnong Amahan mipanalangin kanimo. Sa imong pag-ampo, hinumdumi ang pagpasalamat Kaniya sa piho sa tanan nga Iyang gipanalangin kanimo.
Pinadayag 5
Si Juan nakakita og usa ka basahon nga gisilyohan sa pito ka mga silyo ug sa Kordero, kinsa takus nga moabli niini
Basaha ang Pinadayag 5:1–4, nga mangita kon unsa ang nakita ni Juan sa kamot sa Langitnong Amahan.
Timan-i nga ang basahon, o scroll [linukot nga papel], nga nakita ni Juan gisilyohan sa pito ka mga silyo. Sa karaang panahon, ang importanting mga dokumento silyohan og mga silyo nga lapok o wax. Ang tag-iya lamang sa dokumento ug kadtong gitugutan sa tag-iya ang makabuak sa mga silyo ug makabasa sa teksto.
Basaha ang Doktrina ug mga Pakigsaad 77:6–7, nga mangita sa kahulugan sa basahon ug sa mga silyo.
Ang 7,000 ka tuig nga panahon sa “temporal nga kinabuhi” sa yuta (D&P 77:6) nagpasabut sa panahon sukad sa Pagkapukan ni Adan ug Eva. Wala kini magpasabut sa aktwal nga edad sa yuta, lakip ang mga panahon sa paglalang. Ang matag silyo nagrepresentar og 1,000 ka tuig nga panahon.
Sumala sa Pinadayag 5:2, unsa nga mga kwalipikasyon ang gikinahanglan sa usa ka tawo aron sa pag-abli sa basahon?
Timan-i nga si Juan mihilak sa dihang iyang nakita nga walay usa nga makaabli sa basahon. Tingali naghunahuna siya nga ang “kabubut-on, mga misteryo, ug … mga buhat” (Doktrina ug mga Pakigsaad 77: 6) kalabut sa kaluwasan sa Iyang mga anak dili mapadayag o mapahigayon. Unsay mahitabo sa mga anak sa Langitnong Amahan kon ang Iyang plano alang sa ilang kaluwasan dili gayud mapahigayon?
Basaha ang Pinadayag 5:5–7, nga mangita kon nganong gisultihan si Juan nga dili mohilak. Basaha usab ang Hubad ni Joseph Smith, Pinadayag 5:6 (sa Giya ngadto sa mga Kasulatan, scriptures.lds.org). Sa mga kasulatan, ang mga sungay kanunay maoy simbolo sa gahum o awtoridad; ang mga mata kanunay nagsimbolo sa kahayag ug kahibalo; ug ang numero dose nagsimbolo sa balaan nga pamunoan ug organisasyon, o sa priesthood.
Ang titulo nga “Kordero” (Pinadayag 5:6) nagpasabut sa tahas ni Jesukristo isip halad sa sakripisyo nga gihatag aron sa pagtubos sa mga anak sa Dios (tan-awa usab sa Isaias 53:7; 1 Mga Taga-Corinto 5:7; 1 Pedro 1:18–19). Ang mga pulong nga “usa ka Kordero nga nagtindog nga daw gipatay” (Pinadayag 5:6) nagpasabut sa Kordero nga nagpakita sa mga marka nga siya gipatay. Si Juan Bautista mipasabut sa Manluluwas isip “ang Kordero sa Dios” (Juan 1:29, 36).
Basaha ang Pinadayag 5:8–10, nga mangita kon giunsa pagdayeg sa mga binuhat nga naglibut sa trono sa Langitnong Amahan ang Kordero.
Base sa unsay nakita ug nadunggan ni Juan kabahin sa Kordero, atong nakat-unan nga si Jesukristo mao lamang ang bugtong tawo nga takus ug makahimo sa pagtubos kanato.
Ngano kaha nga si Jesukristo lamang ang bugtong tawo nga takus ug makahimo sa pagtubos kanato?
Sumala sa Pinadayag 5:10, kadtong gitubos ni Jesukristo nahimo nga mga hari ug mga pari, nga naglakip sa kababayen-an isip mga rayna ug kapariang mga babaye.
Basaha ang Pinadayag 5:11–14, nga mangita kon giunsa sa uban pag-apil sa pagsimba ug pagdayeg ni Jesukristo ug sa Langitnong Amahan.
Ang nahimaya nga mga binuhat ug ang tanang gilalang nakaila sa kamaayo sa Langitnong Amahan ug ni Jesukristo ug mibati og pasalamat sa tahas sa Kordero diha sa plano sa Langitnong Amahan. Busa, sila misimba ug midayeg sa Amahan ug sa Anak. Sa samang paagi, samtang kita moila ug mobati og pasalamat sa gibuhat sa Langitnong Amahan ug ni Jesukristo alang kanato, kita magtinguha sa pagsimba ug pagdayeg Kanila.
Si Elder Bruce R. McConkie mitudlo sa mosunod kabahin sa pagsimba: “Ang tinuod ug hingpit nga pagsimba naglakip sa pagsunod sa mga lakang sa Anak sa Dios; kini naglakip sa pagsunod sa mga sugo ug pagsunod sa kabubut-on sa Amahan hangtud niana nga matang nga kita mouswag gikan sa grasya ug dugang pa nga grasya hangtud nga kita mahimaya diha kang Kristo sama kaniya diha sa iyang Amahan. Kini mas labaw pa kay sa pag-ampo ug wali ug kanta. Kini mao ang pagpakabuhi ug pagbuhat ug pagsunod. Pagsunod kini sa kinabuhi sa talagsaong Ehemplo” (“How to Worship,” Ensign, Dis. 1971, 130).
-
-
Paglista og pipila ka rason nga ikaw mibati og pasalamat ug gugma ngadto sa Langitnong Amahan ug ni Jesukristo.
-
Sa unsang paagi ang mga butang nga imong gilista makaapekto sa imong tinguha sa pagsimba ug pagdayeg sa Langitnong Amahan ug ni Jesukristo?
-
Hunahunaa ang mosunod nga pangutana: Unsa pa ang imong mabuhat sa pagsimba sa Langitnong Amahan ug ni Jesukristo? Paghimo og plano, ug sunda ang mga pag-aghat nga imong madawat.
-
Akong natun-an ang Pinadayag 4–5 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: