2 Mga Taga-Corinto 8–9

Pasiuna

Si Apostol Pablo misulat ngadto sa mga Santos sa Corinto, nagpasabut nga ang mga miyembro sa Simbahan sa Macedonia mihatag og ubay-ubay ngadto sa mga nanginahanglan. Siya miawhag sa mga Santos nga taga-Corinto sa pagsunod usab sa ehemplo sa Manluluwas pinaagi sa paghatag ngadto sa mga kabus. Si Pablo mitudlo kabahin sa mga panalangin nga moabut ngadto niadtong malipayong mohatag sa mga kabus.

2 Mga Taga-Corinto 8

Si Pablo nagtambag sa mga Santos sa pag-atiman sa mga kabus

Basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, ug ikonsiderar unsa nga pulong ang nawala nga makahimo niini nga sakto nga pamahayag: “Sa tibuok kasaysayan, ang ____________________ usa sa kinadak-ang hagit sa tawhanong kaliwat. Tataw nga ang pag-antus kasagaran sa pisikal, apan ang espiritwal ug emosyonal nga kadaut nga dala niini tingali mas grabe pa” (“Dili Ba Kitang Tanan Makililimos?” Ensign o Liahona, Nob. 2014, 40.

Isulat ang pulong nga kakabus diha sa linya, ug basaha pag-usab ang pamahayag ni Elder Holland, mokonsiderar kon unsa ang kahulugan niini.

Ang kakabus mao ang kahimtang sa walay igong gikinahanglan nga mga kapanguhaan, nga naglakip sa kwarta, mga kabtangan, o mga pamaagi sa pagsuporta. Ngano nga ang kakabus ingon man ka lisud nga hagit?

Paghunahuna og mga indibidwal nga imong kaila nga tingali nagkinahanglan og tabang sa bisan unsa nga matang, lakip sa pisikal, emosyonal, sosyal, o espirituhanon nga tabang. Samtang magtuon ka sa 2 Mga Taga-Corinto 8–9, pangita og mga kamatuoran nga makatabang kanimo sa pagsabut ug pagtuman sa imong tahas sa pagtabang sa uban nga nanginahanglan.

Sa 2 Mga Taga-Corinto 8:1–8 si Apostol Pablo misulti sa mga Santos nga taga-Corinto nga ang mga miyembro sa Simbahan sa Macedonia mihatag og ubay-ubay aron sa pagtabang sa mga kabus sa ilang temporal nga mga panginahanglan (tan-awa sa Mga Mapa nga Kalabut sa Biblia, nu. 13, “Ang Misyonaryo nga mga Panaw ni Apostol Pablo”). Siya mipasabut nga ang mga miyembro sa Macedonia mibuhat niini tungod kay gusto nila nga mobuhat sa kabubut-on sa Dios. Si Pablo miawhag sa mga Santos sa Corinto sa pagsunod niini nga ehemplo sa pagsangkap sa mga panginahanglan sa uban gumikan sa sinsero nga gugma.

Pagdrowing og usa ka pinatindog nga linya sa tunga sa usa ka blanko nga pahina sa imong scripture study journal, nga magmugna og duha ka kolum. Isulat ang pulong nga Dato sa ibabaw sa usa ka kolum, ug isulat ang pulong nga Kabus sa ibabaw sa ikaduha nga kolum.

Basaha ang 2 mga taga-Corinto 8:9, nga mangita kon unsay gisulti ni Pablo nga gibuhat ni Jesus alang sa mga Santos. Dayon tubaga ang mosunod nga mga pangutana, ilista ang imong mga tubag diha sa imong scripture study journal ubos sa mga pulong nga Dato ug Kabus.
1. Sa unsang mga paagi nga si Jesukristo dato didto sa kinabuhi nga wala pa dinhi sa yuta?
2. Sa unsang mga paagi nga Siya mahimong makonsiderar nga pobre sa panahon sa Iyang kinabuhi sa pagkamortal?
3. Unsa kaha ang gipasabut sa bersikulo 9 nga kita “pinaagi sa kakabus [sa Manluluwas] mahimong dato”?

Ikonsiderar nga bisan sa wala pa matawo si Jesukristo, sakop na Siya sa Dios nga Kapangulohan, ug Siya nagbarug tupad sa Langitnong Amahan diha sa awtoridad, gahum, ug himaya. Tungod kay si Jesukristo mipakig-angay, o nagpainubsanon ug mipaubos sa iyang Kaugalingon, gikan sa Iyang trono sa kinabuhi nga wala pa dinhi sa yuta ug mianhi sa yuta aron sa pagpangalagad, mihimo og ehemplo, ug mipahigayon sa Pag-ula, kita makaangkon sa mga katigayunan sa kinabuhing dayon (tan-awa sa 1 Nephi 11:26–28).

Mga usa ka tuig na ang milabay, ang mga Santos nga taga-Corinto mipasalig nga mangolekta og mga butang alang sa kabus nga mga Santos sa Jerusalem. Basaha ang 2 Mga Taga-Corinto 8:10–11, nga mangita kon unsay gitambag ni Pablo nga buhaton sa mga Santos niana nga panahon. Ang mga pulong nga “sa pagbuhat” ug “pagbuhat niini” nagpasabut sa tambag ni Pablo nga tumanon sa mga Santos ang ilang miagi nga pasalig sa paghatag kutob sa ilang mahimo ngadto sa mga kabus nga mga Santos, sama nga ang Manluluwas mihatag kanila og mahangturon nga mga katigayunan.

Usa ka baruganan nga atong makat-unan mao nga samtang makasabut kita sa tanan nga gihatag sa Manluluwas kanato, mas andam kita nga mohatag sa atong mga butang ngadto sa uban.

Hunahunaa kon sa unsang paagi ang pag-ila sa kaabunda sa mga gasa sa Manluluwas ngari kanato makadasig nato sa paghatag niadtong nanginahanglan.

Tubaga ang mosunod nga pangutana diha sa imong scripture study journal: Unsang piho nga mga gasa ang gihatag sa Manluluwas kanimo, ug sa unsang paagi kini nakadasig kanimo sa paghatag ngadto sa uban?

Basaha ang 2 Mga Taga-Corinto 8:12–15, nga mangita og laing kamatuoran nga gitudlo ni Pablo sa mga katawhan kabahin sa kaimportante sa pagsuporta sa usag usa sa temporal nga mga paagi.

Usa ka kamatuoran nga atong makat-unan gikan sa 2 Mga Taga-Corinto 8:12–13 mao nga ang Dios gusto nga kita andam nga mohatag bisan kon kita walay bisan unsa nga mahatag.

Aron mas makasabut niini nga kamatuoran, basaha ang mosunod nga pamahayag ni Elder Holland, ug dayon ikonsiderar ang mosunod nga mga pangutana: “Dato o kabus, kinahanglang atong ‘mahimo kutob sa atong mahimo’ kon ang uban nanginahanglan” (“Dili Ba Kitang Tanan Makililimos?” 41).

Unsay atong mabuhat alang sa uban kon kita walay bisan unsa nga pisikal nga mahatag kanila?
Nganong kinahanglan nga atong buhaton ang tanan nga atong mahimo alang sa uban?
Sumala sa 2 Mga Taga-Corinto 8:14–15, kinsa ang makabenepsiyo kon ang tanan nga mga Santos makanunayon nga mohatag sa ilang kaabunda?

Pamalandungi ang pipila ka mga paagi diin ang tanan makabenepisyo kon kitang tanan andam nga mohatag.

Basaha ang mosunod nga pamahayag ni Elder Holland, nga mangita kon sa unsang paagi ang Ginoo makatabang kanato nga mapuangurong moresponde ngadto sa mga kabus: “Wala gyud ko masayud unsaon sa matag usa ninyo ang pagtuman sa inyong obligasyon ngadto sa dili o wala makatabang kanunay sa ilang mga kaugalingon. Apan nasayud ko nga nahibalo ang Dios, ug Siya motabang ug mogiya kaninyo sa inyong manggiloy-ong mga buhat sa pagkadisipulo kon mahunahunaon ug mainampoon ug mangita kamo og paagi sa pagsunod sa sugo nga balik-balik Niyang gihatag kanato” (“Dili Ba Kitang Tanan Makililimos?” 41).

Timan-i nga si Elder Holland miingon nga kita kinahanglan nga “mahunahunaon ug mainampoon ug mangita … og paagi” aron sa pagtabang sa mga kabus ug timawa. Ang mga halad sa puasa, mga proyekto sa lokal nga pagserbisyo, ug humanitarian nga mga oportunidad maoy pipila lang ka mga paagi nga giestablisar sa Simbahan aron makatabang kita sa pagtubag sa mga panginahanglan sa mga kabus. Makahunahuna ka ba og laing mga paagi nga ato kining mabuhat?

Sa imong scripture study journal, pagsulat kabahin sa usa ka higayon nga mitabang ka og tawo nga nanginahanglan ug unsay imong gibati isip resulta. Mahimo ka usab nga mosulat og usa ka butang nga plano nimong buhaton base sa gitudlo ni Pablo kabahin sa paghatag ngadto sa mga kabus ug timawa.

Sama sa narekord sa 2 Mga Taga-Corinto 8:16–24, si Pablo namulong ngadto sa mga Santos nga taga-Corinto kabahin ni Tito ug duha ka lain nga mga kaigsoonan nga gipadala aron sa pagkolekta sa mga amot sa kalooy alang sa mga Santos sa Jerusalem. Si Pablo namulong kabahin sa iyang pagsalig diha sa mga Santos nga taga-Corinto ug mipasabut nga ang ilang paghatag og ubay-ubay maoy ebidensya sa ilang gugma alang sa uban.

2 Mga Taga-Corinto 9

Si Pablo nagtudlo kabahin sa mga panalangin sa pagkasinsero nga tighatag

Si Pablo mipadayon sa pagdayeg sa mga Santos nga taga-Corinto (tan-awa sa 2 Mga Taga-Corinto 9:1–5). Iya silang giingnan nga iyang gipadala si Tito ug ang uban aron sa pagsiguro sa ilang kaandam sa pagpanghatag ngadto sa mga kabus.

Hunahunaa kon nakasulay ka ba sukad nga mihatag og usa ka butang sa usa ka tawo o adunay gibuhat alang sa usa ka tawo sa paagi nga nagbagulbol, o kontra gusto. Nganong lisud man usahay nga magmalipayon sa paghatag sa imong panahon, kwarta, o uban pang mga kapanguhaan aron sa pagtabang sa uban?

Basaha ang 2 Mga Taga-Corinto 9:6–7, nga mangita sa pagkumparar nga gigamit ni Pablo aron sa pagtudlo sa mga miyembro sa Simbahan sa Corinto mahitungod sa kinabubut-on nga paghatag.

Ang pagpugas nagpasabut sa pagtanom og mga binhi. Kinsa ang mga magpupugas niini nga pagkumparar?

Ikonsiderar kon sa unsang paagi ang paghatag ngadto sa uban susama sa pagpugas og mga binhi sa umahan. Unsay mahitabo kon diyutay lang ang atong ipugas? Unsay mahitabo kon daghan ang atong ipugas?

Sumala sa 2 Mga Taga-Corinto 9:7, unsang paagi nga ang Ginoo naglaum kanato sa pagpugas, o paghatag?

Gikan sa 2 Mga Taga-Corinto 9:6–7 atong makat-unan ang mosunod nga kamatuoran: Kon kita mohatag ngadto sa nanginahanglan uban sa malipayon nga kasingkasing, ang Dios mopanalangin kanato nga madagayaon.

Sa unsang paagi nga ang atong paghatag uban sa malipayon nga kinaiya ngadto sa uban moresulta sa atong pagdawat nga mas abunda?

Basaha ang 2 Mga Taga-Corinto 9:8–10, nga mangita sa mga panalangin nga gisulti ni Pablo nga moabut ngadto sa mga Santos kon sila mohatag uban sa malipayon nga kasingkasing. Markahi o timan-i diha sa imong mga kasulatan ang mga pulong nga gigamit ni Pablo sa paghulagway unsaon sa pagpanalangin sa Ginoo niadtong mohatag uban sa malipayon nga kasingkasing.

Timan-i nga ang mga pulong nga gigamit ni Pablo sa paghulagway sa mga panalangin sa Ginoo nagsugyot nga atong madawat ang grasya sa Ginoo, nga naglakip sa temporal nga mga panalangin nga igo sa atong mga panginahanglan.

Sumala sa 2 Mga Taga-Corinto 9:10, kinsa ang “nagahatag sa binhi ngadto sa magpupugas”? Sa unsang paagi ang paghinumdom kon asa nagagikan ang mga binhi makatabang kanato nga mohatag sa malipayon nga paagi?

Basaha ang 2 Mga Taga-Corinto 9:11–15, nga mangita kon unsay gitudlo ni Pablo kabahin niadto nga mga Santos kinsa mohatag ug modawat sa malipayong paagi.

Tubaga ang mosunod nga pangutana diha sa imong scripture study journal: Sumala sa 2 Mga Taga-Corinto 9:11–15, unsay pagbati ngadto sa Dios niadtong kinabubut-ong naghatag sa ilang kabtangan ug kadtong modawat sa kabtangan sa uban? (Ikonsiderar ang pagmarka o pagtimaan sa bisan unsang mga pulong sa pagpasalamat nga makita niini nga mga bersikulo.)

Ikonsiderar ang pagsulat sa mosunod nga kamatuoran duol sa 2 Mga Taga-Corinto 9:11–15 sa imong mga kasulatan: Ang pag-ila sa pagkamanggihatagon sa Dios sa pagpanalangin kanato makatabang kanato nga mobati og pasalamat ngadto Kaniya.

Tubaga ang mosunod nga pangutana diha sa imong scripture study journal: Kanus-a ka mibati og pasalamat ngadto sa Dios human makaila sa mga panalangin nga Iyang gipadala kanimo tungod sa pagserbisyo ug paghatag ngadto sa uban sa malipayon nga paagi? (Ikonsiderar ang pagdugang sa imong pagpamatuod sa mga baruganan ug mga kamatuoran nga makita sa 2 Mga Taga-Corinto 8–9.)

Aron sa pagtabang kanimo sa paggamit niini nga leksyon, pagkonsiderar og mga paagi nga makatabang ka sa usa ka tawo nga nanginahanglan karong semanaha (tingali usa ka tawo sa imong pamilya). Paghimo og piho nga tumong sa pagtabang niana nga tawo, ug isulat kini sa usa ka piraso nga papel.

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang 2 Mga Taga-Corinto 8–9 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: