Santiago 4–5

Pasiuna

Gitambagan ni Apostol Santiago ang mga Santos nga batukan ang dautan, sa pagpaduol ngadto sa Dios, ug mapailubong molahutay sa mga kasakit samtang maghulat sa Ikaduhang Pag-anhi sa Manluluwas. Gitudlo niya nga ang masakiton kinahanglan nga “[motawag] sa mga anciano o elder sa simbahan” (Santiago 5:14) aron pangalagaran sila. Gitudlo usab ni Santiago ang mahitungod sa kaimportante sa pagtabang sa mga makasasala nga maghinulsol.

Santiago 4

Gitambagan ni Pablo ang mga Santos sa pagpaduol sa Dios ug batukan ang dautan

Paghunahuna og usa ka sakop sa pamilya o higala nga gibati nimo nga imong suod. Nganong gibati man nimo nga suod ka niining tawhana?

Nganong nasuod man nimo kining tawhana?

Karon ikonsiderar kon unsa kasuod ang imong pagbati ngadto sa Dios. Sa unsang paagi mapanalanginan ang imong kinabuhi pinaagi sa pagbaton og lig-ong relasyon sa Dios?

Samtang imong tun-an ang Santiago 4, pangita og mga kamatuoran nga makatabang nimo nga mapalig-on ang imong relasyon sa Dios.

Sigun sa narekord sa Santiago 4:1–3, gibadlong ni Santiago ang mga Santos sa ilang pagtugyan ngadto sa kalibutanong mga tinguha. Basaha ang Santiago 4:4, nga mangita sa matang sa pagkahigala nga gipasidaan ni Santiago sa mga Santos. Ang pulong nga pakig-away nagpasabut og pagdumot o kayugot.

Ang tambag ni Santiago sa bersikulo 4 wala magpasabut nga likayan gayud nato ang pagpakig-uban sa mga tawo nga dili miyembro sa Simbahan. Hinoon, kinahanglang likayan nato ang pagdawat ug pagsunod sa sayop nga mga pagtulun-an ug dili matarung nga mga tinguha, mga sumbanan, ug mga gipangbuhat sa kalibutan. Gitudlo ni Santiago nga ang pagkahigala sa kalibutan (pagkakalibutanon) maghimo nato nga kaaway sa Dios.

Basaha ang Santiago 4:6–8, nga mangita kon unsay gitambag ni Santiago nga buhaton sa mga Santos.

Base sa unsay imong nakat-unan gikan sa Santiago 4:8, kompletuha ang mosunod nga baruganan: Kon magpaduol kita sa Dios, . Ikonsiderar ang pagmarka sa mga pulong diha sa Santiago 4:8 nga nagtudlo niini nga baruganan. Kini nga baruganan gikumpirmar sa modernong pagpadayag (tan-awa sa D&P 88:63).

Sa imong scripture study journal, paghimo og lista kon unsay imong mahimo aron mapaduol sa Dios.

Usa ka paagi nga ikaw mapaduol sa Dios mao ang pagsunod sa tambag ni Pablo nga “hugasi ang inyong mga kamot” ug “putlia ang inyong [kasingkasing]” (Santiago 4:8). Sigun sa gigamit sa mga kasulatan, ang mga kamot makarepresentar sa atong mga buhat ug ang kasingkasing makarepresentar sa atong mga tinguha. Pamalandungi kon sa unsang paagi ang pagbaton og limpyong mga kamot ug putli nga kasingkasing makatabang nimo nga mas mapaduol sa Dios.

Basaha ang Santiago 4:9–12, 17, nga mangita sa dugang nga gitambag ni Santiago ngadto sa mga Santos aron matabangan sila nga mas maduol sa Dios. Ang mga pulong nga “ang inyong katawa himoa nga pagbangutan” diha sa bersikulo 9 nagpasabut sa pagbati og diosnong kasubo alang sa sala.

Sumala sa Santiago 4:17, unsa ang gitudlo ni Santiago nga mao ang sala?

Unsay atong makat-unan gikan sa Santiago 4:17 nga kon nahibalo kita unsaon sa paghimo og maayo apan pilion ang dili pagbuhat niini, kita nakasala. Ikonsiderar ang pagmarka sa mga pulong diha sa Santiago 4:17 nga nagtudlo niini nga kamatuoran.

Ngano kaha nga sala man ang pagkahibalo sa maayong mga butang nga angay natong buhaton apan pilion ang dili pagbuhat niini?

Si Presidente James E. Faust sa Unang Kapangulohan mipasabut niini nga kamatuoran. Ang pulong nga pagpasagad dinhi niini nga kinatibuk-ang kahulugan nagpasabut sa maayong mga buhat nga angay unta natong buhaton apan atong nataligam-an o wala mabuhat.

“Nahadlok ko nga pipila sa dagko natong mga sala mao ang sala sa pagpasagad. Dunay pipila ka mas bug-at nga mga butang sa balaod nga giingon sa Manluluwas nga dili nato angayang mapasagdan [tan-awa sa Mateo 23:23]. Kini mao ang pagkamanggihunahunaon, mapinanggaong mga buhat nga wala nato mahimo ug mibati kita nga sad-an gumikan kay nataligam-an kini.

“Sa gamay pa nga bata sa umahan atol sa naglagiting nga kainit sa summer, akong nahinumduman ang akong lola nga si Mary Finlinson nga nagluto sa among lamian nga pagkaon sa usa ka init nga sug-angan nga gigamitan og kahoy. Dihang ang kahon nga sudlanan og kahoy tupad sa sug-angan wala nay sulod, si Lola hilum nga … migawas aron sudlan kini sa nagtumpi nga kahoy nga cedar sa gawas, ug midala sa bug-at nga kahon balik sa sulod sa balay. Wala gyud ko magpakabana ug wala ko manumbaling sa panghitabo sa kusina, didto ra ko naglingkod ug gipasagdan ang akong pinalangga nga lola nga gipuno ang kahon. Naulaw ko sa akong kaugalingon ug gimahayan ang akong pagpasagad sa tibuok nakong kinabuhi. Nanghinaot ko nga ugma damlag makapangayo ko niya og pasaylo” (“The Weightier Matters of the Law: Judgment, Mercy, and Faith,” Ensign, Nob. 1997, 59).

Tubaga ang mosunod nga mga pangutana diha sa imong scripture study journal:
1. Unsa ang ubang mga example sa “sala sa pagpasagad” nga maoy makapugong nimo nga mas mapaduol sa Dios?
2. Unsa ang usa ka butang nga imong mahimo aron mas mapaduol ka sa Dios? Ipasalig ang pagsunod sa mga pag-aghat nga imong madawat nga maoy makatabang nga makompleto nimo kini nga tumong.

Santiago 5

Gitudloan ni Santiago ang mga Santos nga molahutay sa mapailubong paagi sa kasakit ug tudloan ang mga masakiton sa pagtawag og mga elder

Diha sa Santiago 5:1–6 atong mabasa nga gihukmang sad-an ni Apostol Santiago ang mga adunahan kinsa mipasagad sa paggamit sa ilang katigayunan ug milutos sa mga matarung. Iyang gipasidaan nga ang kaalautan ug ang paghukom naghulat kanila.

Basaha ang Santiago 5:7–11, nga mangita kon unsay gitudlo ni Santiago nga buhaton kon mag-atubang sila og mga kasakit samtang naghulat sa Ikaduhang Pag-anhi ni Jesukristo.

Kini nga mga bersikulo nagpakita sa relasyon tali sa mga pagsulay ug pagpailub ug kon sa unsang paagi ang mga matinud-anon, sama ni Job, misanong sa pag-antus ug mga kalisud. Tan-awa diha sa Santiago 5:10 kon si kinsang mga tawhana ang angayng tan-awon sa mga Santos nga himoong mga ehemplo kinsa mapailubong milahutay sa kasakit.

Paglista og pipila ka ehemplo gikan sa mga kasulatan sa mga propeta kinsa mapailubong milahutay sa kasakit:

Ikonsiderar kon unsa nga tambag ang imong ihatag ngadto sa usa ka higala kinsa miingon nga, “Ngil-ad ang akong gibati. Kapin sa semana na ko nga nasakit. Miadto ko og doktor ug nagtumar na og tambal, apan wala gihapon ko moarang-arang. Wala ko masayud unsa pay akong buhaton.”

Basaha ang Santiago 5:13–16, nga mangita kon unsay gitambag ni Santiago nga buhaton sa dunay mga sakit ug balatian.

Si Elder Dallin H. Oaks sa Korum sa Napulog Duha ka mga Apostoles mitudlo, “Kon ang mga elder nagdihog og tawo nga masakiton ug nagsilyo sa gidihog, nag-abli sila sa mga bintana sa langit aron ibu-bu sa Ginoo ang mga panalangin nga buot Niya alang sa tawo nga masakiton” (“Pag-ayo sa Masakiton,” Ensign o Liahona, Mayo 2010, 48).

Tan-awa og balik ang Santiago 5:15. Agig dugang sa gahum sa priesthood, unsa pa ang gisulti ni Santiago ang makaluwas o makaayo sa masakiton?

Usa ka kamatuoran nga atong makat-unan gikan sa Santiago 5:14–16 mao nga pinaagi sa pag-ampo nga inubanan og pagtuo ug sa gahum sa priesthood, ang masakiton mamaayo.

Gitudlo ni Elder Oaks ang mosunod mahitungod sa inubanan og pagtuo nga pag-ampo ug sa makaayo nga gahum sa priesthood:

“Samtang atong gamiton ang dili kadudahan nga gahum sa priesthood sa Dios ug samtang atong ibahandi ang iyang saad nga Siya maminaw ug motubag sa pag-ampo sa hugot nga pagtuo, kinahanglan nga kanunay natong hinumduman nga ang hugot nga pagtuo ug ang makaayo nga gahum sa priesthood dili makamugna og sangputanan nga sukwahi sa Iyang kabubut-on kansang priesthood Iyaha. …

“… Bisan ang mga sulugoon sa Ginoo, nga naggamit sa Iyang balaanong gahum sa usa ka kahimtang diin adunay igo nga pagtuo nga pagaayohon, dili makahatag og panalangin sa priesthood nga makapaayo sa tawo kon kana nga pag-ayo dili mao ang kabubut-on sa Ginoo.

“Isip mga anak sa Dios, nga nasayud sa Iyang dakong gugma ug sa Iyang dili masukod nga kahibalo kon unsay labing maayo alang sa atong mahangturon nga kaayohan, misalig kita Kaniya. Ang unang baruganan sa ebanghelyo mao ang hugot nga pagtuo diha ni Ginoong Jesukristo, ug ang pagtuo nangahulugan ug pagsalig. Akong gibati kana nga pagsalig sa usa ka pagpamulong nga gihatag sa akong ig-agaw panahon sa lubong sa usa ka batan-ong babaye kinsa namatay sa grabe nga sakit. Namulong siya niini nga mga pulong, nga sa sinugdanan mipahingangha kanako ug dayon milig-on kanako: ‘Nasayud ako nga kabubut-on kadto sa Ginoo nga siya mamatay. Siya adunay maayo kaayo nga medikal nga pag-atiman. Gihatagan siya og mga panalangin sa priesthood. Ang iyang pangalan gibutang sa prayer roll sa templo. Siya ang gihisgutan sa gatusan ka mga pag-ampo aron mahimsog og balik. Ug nasayud ako nga adunay igo nga hugot nga pagtuo niini nga pamilya nga mamaayo unta siya gawas kon kabubut-on sa Ginoo nga pagakuhaon siya niining higayuna.’ Akong gibati kanang sama nga pagsalig diha sa mga pulong sa amahan sa usa ka laing pinili nga batang babaye kansang kinabuhi gikuha tungod sa kanser sa iyang batan-on nga pangidaron. Siya mipahayag, ‘Ang hugot nga pagtuo sa among pamilya anaa kang Jesukristo, ug wala magdepende sa mga resulta.’ Kadto nga mga pagtulun-an tinuod gayud ngari kanako. Atong himoon kutob sa atong mahimo aron ayuhon ang usa ka minahal, ug dayon mosalig kita sa Ginoo alang sa resulta” (“Pag-ayo sa Masakiton,” 50).

Sa unsang paagi ang mga pagtulun-an ni Elder Oaks nakatabang nimo nga makasabut sa makaayo nga gahum sa priesthood? Ngano nga ang atong pagtuo ug mga pag-ampo nagkinahanglan nga mahiuyon sa kabubut-on sa Dios? (Tan-awa sa Giya ngadto sa mga Kasulatan, “Pag-ampo.”)

Hunahunaa nga usa sa imong mga higala o sakop sa pamilya nasakit. Diha sa imong scripture study journal, paghimo og sulat alang nianang tawhana nga magpasabut kon unsay imong nakat-unan mahitungod sa makaayo nga gahum sa priesthood. Siguroa ang pagpasabut nganong importante nga ang atong pagtuo kang Jesukristo dili mag-agad sa resulta sa panalangin sa priesthood. Ilakip ang bisan unsang mga ehemplo sa mga tawo nga imong nailhan kinsa napanalanginan pinaagi sa mga pag-ampo nga inubanan og pagtuo ug sa gahum sa priesthood.

Gikumpara usab ni Santiago ang pag-ayo sa masakiton ngadto sa pagpasaylo sa sala (tan-awa sa Santiago 5:16).

Si Elder Bruce R. McConkie sa Korum sa Napulog Duha ka mga Apostoles mitudlo nga ang pagpaubos ug ang pagtuo nga atong gikinahanglan aron mamaayo kita sa pisikal mao ra gihapon nga pagpaubos ug pagtuo nga atong gikinahanglan aron kita mapasaylo: “Adunay … sagradong mga okasyon diin ang mga tawo may kahigayunan nga mosalta sa espirituhanong gitas-on diin maangkon nila ang makatarunganong pagtugot sa Espiritu sa ilang kinaiya ug ang resulta napasaylo sa ilang mga sala. Ginganlan ni Santiago ang ordinansa sa pagpangalagad sa masakiton isip usa niini. … Ang tawo kinsa pinaagi sa pagtuo, debosyon, pagkamatarung, ug personal nga katakus, anaa sa posisyon nga mamaayo, anaa usab sa posisyon nga makabaton og makatarunganong pagtugot sa Espiritu alang sa kinabuhi, ug mapasaylo siya sa iyang mga sala, nga saksihan sa kamatuoran nga nadawat niya ang pakig-uban sa Espiritu, nga wala unta kaniya kon siya dili takus” (Mormon Doctrine, 2nd ed. [1966], 297–98).

Hinoon, wala kini magpasabut nga, ang tawo nga wala maayo dihang gihatagan siya og panalangin sa priesthood dili takus. Ang tanang panalangin ihatag sumala sa dakong panabut sa Dios, ug atong mabati ang Iyang gugma ug ang kalinaw sa Espiritu nga momatuod sa atong katakus.

Sigun sa narekord sa Santiago 5:17–20, nag-refer si Santiago kang propeta Elijah isip ehemplo sa tawo kinsa migamit sa gahum sa tinuorayng pag-ampo. Gitambagan usab niya ang mga Santos sa pagtabang sa mga makasasala nga maghinulsol. Timan-i diha sa Santiago 5:20 ang gisaad nga mga panalangin nga moabut para niadtong kinsa “[makapausab] sa makasasala gikan sa pagkahisalaag sa iyang dalan.”

Isulat ang mosunod sa ubos sa mga assignment karong adlawa diha sa imong scripture study journal:

Akong natun-an ang Santiago 4–5 ug nahuman kini nga leksyon sa (petsa).

Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: