Unit 30: Day 4

Judas

Pasiuna

Si Judas nag-awhag sa mga miyembro sa Simbahan nga “makigbisog kamo sa pagpanalipod sa tinuohan” (Judas 1:3) batok sa mini nga mga magtutudlo. Iyang gihulagway ang mini nga mga magtutudlo ug mitambag sa mga Santos sa pagtukod sa ilang mga kinabuhi diha sa ebanghelyo ni Jesukristo.

Judas 1:1–19

Si Judas miawhag sa mga miyembro sa Simbahan nga makigbisog sa pagpanalipod sa tinuohan batok sa mini nga mga magtutudlo

1. Sa imong scripture study journal, paglista og pipila ka lain-laing mga paagi nga makatubag ka sa matag usa sa mosunod nga mga sitwasyon:

   1. Sa usa ka social media site, usa ka higala nagbutang og pamahayag nga nanaway sa posisyon sa Simbahan kabahin sa kaminyoon sa sama og sekso.

   2. Usa ka silingan nakahibalo nga miyembro ka sa Simbahan. Gisultihan ka niya nga nakabasa siya sa Basahon ni Mormon ug mibati nga kini makapadasig nga literatura apan dili pulong sa Dios.

   3. Atol sa usa ka diskusyon sa klase diha sa eskwelahan, usa ka kaedad nakiglalis nga ang pagtan-aw og pornograpiya dili makadaut ug dili angay nga pugngan.

Ang sulat ni Judas ngadto sa matinud-anong mga Kristiyano miabut sa panahon nga ang mga miyembro sa Simbahan nag-atubang og mapintas nga oposisyon. Basaha ang Judas 1:3–4, nga mangita kon unsay giawhag ni Judas nga buhaton sa mga miyembro sa Simbahan tungod sa oposisyon.

Timan-i nga si Judas miawhag sa mga Santos nga “makigbisog … sa pagpanalipod sa tinuohan” (bersikulo 3). Kini nagpasabut nga sila maisugong manalipod, motudlo, ug mopamatuod sa ebanghelyo. Ang “mga tawong dili diosnon” (bersikulo 4) nga dunay dautang mga katuyoan hinay-hinay nga miapil sa Simbahan. Kini nga mga miyembro sa Simbahan mipasiugda og dautan, imoral nga mga binuhatan pinaagi sa pagtudlo nga ang doktrina sa grasya nagtugot og hingpit nga kagawasan sa pagpakasala tungod kay ang Dios maloloy-on nga mopasaylo. Gisalikway usab nila ang piho nga mga kamatuoran mahitungod sa Langitnong Amahan ug ni Jesukristo.

Usa ka kamatuoran nga atong makat-unan gikan sa instruksyon ni Judas mao nga ang mga disipulo ni Jesukristo kinahanglang makigbisog sa pagpanalipod sa ebanghelyo ni Jesukristo batok sa sayop nga mga pagtulun-an ug dautan nga mga binuhatan.

Ang pagpanalipod sa ebanghelyo wala magpasabut nga duna kitay mabingkilon nga mga pagbati. Kinahanglan nga magmabination ug magmaisugon kita apan dili mapugsanon samtang manalipod ug mopamatuod kita sa kamatuoran (tan-awa sa Alma 38:12; 3 Nephi 11:29). Ang epektibong pagpanalipod sa ebanghelyo—pagdepensa, pagtudlo, ug pagpamatuod—nagpasabut usab nga kinahanglan kitang mahibalo kon unsa ang sakto nga mga doktrina ug mga baruganan sa ebanghelyo.

2. Tubaga ang mosunod nga mga pangutana diha sa imong scripture study journal:

   1. Unsaon nato sa pagpanalipod sa ebanghelyo nga dili mabingkilon?

   2. Hinumdumi ang mga sitwasyon nga gipresentar diha sa assignment 1. Niini ug sa susama nga mga sitwasyon, unsa ang pipila ka mga paagi nga makapanalipod kita sa ebanghelyo batok sa sayop nga mga pagtulun-an ug dautan nga mga binuhatan?

Si Elder Neil L. Andersen sa Korum sa Napulog Duha ka mga Apostoles mipakigbahin og usa ka istorya kabahin sa usa ka batan-ong babaye nga nanalipod sa ebanghelyo:

“Bag-ohay lang, nakig-istorya ko sa usa ka Laurel gikan sa Estados Unidos. Mokutlo ko gikan sa iyang email:

“‘Niining milabayng tuig pipila sa akong mga higala sa Facebook misugod na og pang-post sa ilang opinyon bahin sa kaminyoon. Daghan ang mipabor sa kaminyoon sa managsama og sekso, ug pipila sa LDS nga mga kabatan-onan ‘mi-like’ sa mga gi-post. Wala ko mokomentaryo.

“‘Nakahukom ko nga akong ipahayag ang akong pagtuo bahin sa tradisyonal nga kaminyoon sa mahunahunaong paagi.

“‘Gamit ang akong profile picture, gidugang nako ang caption nga “Mituo ako sa kaminyoon tali sa usa ka lalaki ug usa ka babaye.” Ingon og diha-diha dayon nakadawat ko og mga mensahe. “Hakog ka.” “Mahukmanon ka.” Ang usa mitandi kanako sa usa ka tigpanag-iya og ulipon. Ug nadawat nako kini nga post gikan sa suod nga higala nga lig-ong miyembro sa Simbahan: ‘Kinahanglan mouyon-uyon ka sa dagan sa panahon. Ang mga butang nag-usab-usab ug busa kinahanglang usbon nimo ang kinaraang hunahuna.”

“‘Wala ko makiglalis,’ siya miingon, ‘apan wala nako tangtanga ang akong pamahayag.’

“Siya mitapos: ‘Usahay, sama sa giingon ni Presidente Monson, ‘Kamo kinahanglan nga mobarug nga mag-inusara.” Unta isip mga kabatan-onan, kita maghiusang mobarug nga matinuoron sa Dios ug sa mga pagtulun-an sa Iyang buhi nga mga propeta’” (“Espirituhanong mga Alimpulos,” Ensign o Liahona, Mayo 2014, 19–20).

Paghunahuna og panahon nga ikaw o imong kaila nanalipod sa ebanghelyo ni Jesukristo. Ikonsiderar kon unsa pay imong mahimo sa pagpanalipod ug pagbarug alang sa kamatuoran. Pasalig nga mosunod sa bisan unsa nga mga aghat nga imong madawat.

Diha sa Judas 1:5–7 gikumpara ni Judas ang masinupakong mga miyembro sa Simbahan ngadto sa mga dili matinud-anon tali sa karaan nga mga Israelite kinsa gigiyahan pagawas sa yuta sa Ehipto; niadtong misupak batok sa Dios sa “ilang nahimutangan” (Judas 1:6; tan-awa usab sa Abraham 3:22–26), o sa kinabuhi sa wala pa dinhi sa yuta; ug sa dautang mga tawo diha ug libut sa Sodoma ug Gomorra kinsa gilaglag.

Sumala sa narekord diha sa Judas 1:8–16, si Judas mihulagway sa daghang mga kinaiya nga makatabang sa mga miyembro sa Simbahan sa pag-ila niadtong nagpakatap og dautan nga mga pilosopiya ug binuhatan diha sa Simbahan. Sama pananglit, gihulagway niya sila nga “mga panganod nga walay dalang ulan, nga ginataral sa hangin” ug “larag nga mga kahoy nga walay mga bunga” (Judas 1:12). Sa unsang paagi ang mini nga mga magtutudlo sama sa mga panganod nga walay dalang ulan ug mga kahoy nga walay bunga?

Si Judas tingali naghisgut kabahin sa impormasyon nga makita diha sa apokripa nga mga basahon nga Assumption of Moses ug Book of Enoch sa iyang sulat. Ang Assumption of Moses naghulagway ni “Miguel ang manolunda nga punoan … [n]akiglantugi batok sa yawa … [mahitungod] sa lawas ni Moises” (Judas 1:9). Ang basahon nagsaysay kon sa unsang paagi si Miguel midaug sa katapusan, ug si Moises nabalhin sa pagkahimaya sa katapusan sa iyang kinabuhi (tan-awa sa Alma 45:19). Ang Basahon ni Enoch naglakip og usa ka panagna gikan ni Enoch mahitungod sa Ikaduhang Pag-anhi (tan-awa sa Judas 1:14–15). Ang Ginoo mipadayag nga husto ang daghang mga butang nga nalakip sa apokripa nga mga basahon, ug kadtong malamdagan sa Espiritu makabenepisyo sa pagbasa niini. Hinoon, pipila sa mga basahon naglakip og mga pagdugang nga nakadaut sa orihinal nga teksto (tan-awa sa D&P 91). (Alang sa dugang nga impormasyon mahitungod sa Apokripa, tan-awa sa Giya ngadto sa mga Kasulatan, scriptures.lds.org, “Apokripa.”)

Basaha ang Judas 1:8, 10, 14–19, nga mangita sa dugang nga mga kinaiya sa mini nga mga magtutudlo. Mahimo nimong markahan o timan-an ang unsay imong makit-an. Sa kauban nga tsart, sulati ang mga blanko base sa unsay imong nakat-unan sa mga bersikulo. Pipila sa mga pamahayag diha sa tsart gihatag aron sa pagtabang kanimo nga masabtan ang mga sinulat ni Judas. (Timan-i nga “sa ulahing panahon” [bersikulo 18] nagpasabut sa panahon nga gipuy-an ni Judas ingon man usab sa katapusang mga adlaw diin kita nagpuyo.)

Mga Kinaiya sa Mini nga mga Magtutudlo

Nanaghugawhugaw sa ilang mga lawas diha sa imoralidad (bersikulo 8) Nanagsalikway sa kagamhanan ug ____________________ sa mga halangdon, o mga lider sa Simbahan (bersikulo 8) Nagapasipala sa bisan unsang butang nga dili nila ____________________ (bersikulo 10) Naglaglag sa ilang mga kaugalingon pinaagi sa pagpakabuhi sumala sa ilang gihuptan nga kalibutanong kahibalo (bersikulo 10) Naglihok sa dili diosnon nga mga paagi (bersikulo 15) Namulong og mapait nga mga butang batok (bersikulo 15) Nagbagulbol ug nagmulo (bersikulo 16)

Nagsunod ug nanaggawi uyon sa ilang (bersikulo 16) Nanghambug (bersikulo 16) Nagpahayag og pagdayeg sa uban alang sa personal nga bintaha (bersikulo 16) ____________________ sa Simbahan sa Ginoo ug sa mga sumbanan niini (bersikulo 18) Mopalayo sa ilang kaugalingon gikan sa mga tumutuo (bersikulo 19) Naghunahuna ug naglihok sa mahilayon [kalibutanon] nga mga paagi (bersikulo 19) Wala magabaton sa ____________________ (bersikulo 19)

Nganong importante man nga mailhan ang mga kinaiya sa mini nga mga magtutudlo?

Dili tanan nga adunay usa o sobra pa niini nga mga kinaiya sa usa ka mini nga magtutudlo. Wala usab magpasabut nga ang matag usa nga nagtudlo og butang nga dili husto usa na ka mini nga magtutudlo. Tingali inosente silang nasayop sa ilang pagsabut sa usa ka hilisgutan. Hinoon, ang pagkaila niini nga mga kinaiya makatabang nato nga makaila sa mini nga mga magtutudlo kansang tuyo mao ang pagpahuyang sa pagtuo ug pagkamasulundon sa uban pinaagi sa paglimbong kanila ug pagpasiugda og kadautan.

Sa Judas 1:17, timan-i nga si Judas mipahinumdom sa mga Santos nga ang mga Apostoles sa Ginoo mipasidaan sa mga miyembro sa Simbahan kabahin sa mini nga mga magtutudlo. Gikan niini nga bersikulo atong makat-unan nga ang mga apostoles ug mga propeta nagpasidaan kanato ug nagtabang kanato nga makaila niadtong nagtinguha sa pagpahuyang sa atong hugot nga pagtuo ug pagkamasulundon.

Ang mga propeta ug mga apostoles karon padayon nga nagpasidaan kanato mahitungod sa mini nga mga magtutudlo.

Si Elder M. Russell Ballard sa Korum sa Napulog Duha ka mga Apostoles miingon: “Isip mga Apostoles ni Ginoong Jesukristo, among katungdanan nga mahimong magbalantay diha sa tore, magpasidaan sa mga miyembro sa Simbahan nga magbantay sa mini nga mga propeta ug mini nga mga magtutudlo kinsa naghulat aron sa paglaang ug pagguba sa hugot nga pagtuo ug pagpamatuod. Karon kami mopahimangno kaninyo nga adunay mitumaw nga mini nga mga propeta ug mini nga mga magtutudlo; ug kon kita dili magbantay, bisan kadtong lakip sa matinud-anong mga miyembro sa Ang Simbahan ni Jesukirsto sa mga Santos sa Ulahing mga Adlaw ang mabiktima sa ilang pagpanglingla” (“Beware of False Prophets and False Teachers,” Ensign, Nob. 1999, 62).

Unsa ang pipila ka mini nga mga magtutudlo o sayop nga pagtulun-an nga gipasidaan sa modernong mga propeta ug mga apostoles?

Naghunahuna sa unsay imong nakat-unan gikan sa sulat ni Judas, nganong importante man nga tun-an ang mga pulong sa mga apostoles ug mga propeta?

Judas 1:20–25

Si Judas nagtambag sa mga Santos sa pagtukod sa ilang kinabuhi diha sa ebanghelyo ni Jesukristo ug sa pagtabang sa pagluwas sa uban

Basaha ang Judas 1:20–21, nga mangita kon unsay gitambag ni Judas nga buhaton sa mga Santos aron magpabilin nga matinud-anon sa tinuohan. Ang mga pulong nga “pag-ampo kamo diha sa Espiritu Santo” sa bersikulo 20 nagpasabut sa pag-ampo uban sa tabang sa inspirasyon gikan sa Espiritu Santo.

Gamita ang mga kamatuoran nga imong nakat-unan niini nga mga bersikulo aron sa pagkompleto sa mosunod nga kamatuoran: Makapabilin kita nga matinud-anon sa tinuohan pinaagi sa .

3. Tubaga ang mosunod nga mga pangutana diha sa imong scripture study journal:

   1. Nganong ang pagpabiling matinud-anon sa tinuohan takus sa bisan unsa nga pagpaningkamot?

   2. Sa unsang paagi ang pagsunod sa tambag ni Judas nakatabang kanimo o sa uban nga imong kaila nga magpabilin nga matinud-anon sa tinuohan?

4. Sa laing piraso nga papel, pagsulat og usa ka paagi nga mahimo ka nga molambo sa pagsunod sa tambag ni Judas, ug ibutang ang papel diin permi nimo kining makita isip pahinumdom sa paggamit sa unsay imong gisulat. Kon imo na kining mabuhat, isulat ang Nakompleto diha sa imong scripture study journal.

Sumala sa narekord diha sa Judas 1:22–25, si Judas mitambag sa matinud-anong mga miyembro sa Simbahan sa pagtabang sa uban kinsa espirituhanong nanlimbasug, posible tungod sa impluwensya sa mini nga mga magtutudlo. Siya usab mihatag og pagdayeg ngadto sa Dios.

5. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Judas ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: