Unit 11: Day 1
Lucas 10:38–12:59
Pasiuna
Gitudloan sa Manluluwas si Maria ug si Marta diha sa panimalay ni Marta. Sa kaulahian, Siya mitudlo og daghang kamatuoran ngadto sa Iyang mga tinun-an mahitungod sa pag-ampo ug mipasidaan batok sa pagpakaaron-ingnon ug pagkamasinahon.
Lucas 10:38–42
Si Jesus nagtudlo ni Maria ug ni Marta
-
Sa imong scripture study journal, paglista og daghang pagpili nga imong nahimo kagahapon kutob sa imong mahimo sulod sa usa ka minuto. Kon ikaw nahuman na , tan-awa ang tibuok lista, ug markahi ang uban nga mga maayong pagpili nga imong nahimo. Unsa ang uban nga mga sitwasyon diin kita tingali modesisyon tali sa duha ka maayong mga pagpili?
Samtang ikaw magtuon sa Lucas 10:38–42, pangita og usa ka baruganan nga gitudlo sa Manluluwas nga makagiya kanimo sa imong mga desisyon—ilabi na kon ikaw kinahanglan gayud nga modesisyon tali sa daghang maayo nga mga pagpili.
Samtang didto Siya sa Judea, si Jesus mibiyahe ngadto sa Betania, usa ka mubong gilay-on gikan sa Jerusalem, ug mibisita sa panimalay ni Marta, Maria, ug Lazaro.
Basaha ang Lucas 10:38–40, nga mangita sa unsay gipili sa matag usa nila ni Maria ug Marta nga gibuhat samtang ang Manluluwas diha sa panimalay.
Sa panahon ni Jesus, ang maayong pag-abi-abi importante kaayo. Si Marta naningkamot sa pagbuhat sa unsay naandan nga gipaabut kaniya isip usa ka babaye sa panimalay nga tig-abi-abi. Nagtumong siya sa temporal, o pisikal, nga mga kabalaka sama sa pag-andam ug pagsilbi sa pagkaon.
Hinumdumi sa Lucas 10:40 nga gibati ni Marta nga “nagkalibuglibog,” o nabug-atan, ug gusto niya nga si Maria motabang niya.
Basaha ang Lucas 10:41–42, nga mangita sa tubag sa Manluluwas ngadto ni Marta.
Unsa kahay ipasabut sa Manluluwas sa dihang Siya miingon, “usa ra gayud ka butang ang kinahanglanon; ug hingpilian ni Maria ang maayong bahin” (Lucas 10:42)?
Si Elder Dallin H. Oaks sa Korum sa Napulog Duha ka mga Apostoles mipasabut: “Dalaygon si Marta nga ‘nagmatngon ug nabalaka sa daghang mga butang’ [Lucas 10:41], apan ang pagkat-on sa ebanghelyo gikan sa Labing Maayong Magtutudlo mas labaw nga ‘kinahanglanon’” (“Maayo, Mas Maayo, Labing Maayo,” Ensign o Liahona, Nob. 2007, 104).
Sa dihang ang Manluluwas miingon nga ang “maayong bahin” nga gipili ni Maria “dili makuha gikan kaniya” (Lucas 10:42), mahimo tingali nga Siya nagpasabut nga pinaagi sa pagpili sa pagpaminaw sa Manluluwas kay sa pagpili nga motumong sa temporal, o kalibutanon, nga mga kabalaka, si Maria nakadawat og espirituhanon nga mga panalangin, nga hangtud sa kahangturan.
Usa ka baruganan nga atong makat-unan gikan sa mga pulong sa Manluluwas ngadto ni Marta mao nga kon kita mopili sa paggahin sa atong mga kaugalingon ngadto sa espirituhanong mga butang kay sa temporal nga mga kabalaka, niana kita makadawat og malungtaron nga mga panalangin.
Diha sa luna nga gihatag, isulat ang pipila ka mga ehemplo sa mga sitwasyon diin ang usa ka tawo malagmit mopili sa paggahin sa iyang kaugalingon ngadto sa espirituhanon nga mga butang kay sa uban nga maayo apan menos ka importante nga mga isyu, mga kabalaka, o mga kalihokan:
Si Elder Oaks usab mitudlo:
“Samtang atong ikonsiderar ang lainlaing mga kapilian, kinahanglan atong hinumduman nga kini dili igo nga ang usa ka butang maayo. Ang ubang kapilian mas maayo, ug ang uban pa gayud labing maayo. …
“Ikonsiderar giunsa nato paggamit ang atong oras diha sa mga pagpili nga atong gihimo sa pagtan-aw og telebisyon, pagdula og mga video games, pagsurf sa Internet, o sa pagbasa og mga basahon o mga magasin. … Dayag nga kini maayo nga motan-aw og nindot nga salida o sa pagkuha og makalingaw nga impormasyon. Apan dili tanan niana nga matang takus sa bahin sa atong kinabuhi nga atong gihatag sa pagkuha niini. Ang ubang mga butang mas maayo, ug ang uban labing maayo. Sa dihang ang Ginoo misulti kanato sa pagpangita og kahibalo, Siya miingon, ‘Pangitaa ninyo gikan sa labing maayo nga mga basahon ang mga pulong sa kaalam’ (D&P 88:118; emphasis gidugang). …
“Pipila sa mga paggamit sa indibidwal ug pamilya nga oras mas maayo, ug ang uban labing maayo. Kinahanglan atong ipalabay ang ubang maayo nga mga butang aron sa pagpili sa uban nga mas maayo o labing maayo tungod kay kini nagpalambo og hugot nga pagtuo diha ni Ginoong Jesukristo ug naglig-on sa atong mga pamilya” (“Maayo, Mas Maayo, Labing Maayo,” 104–5, 107).
-
-
Isulat ang usa ka paagi nga ikaw napanalanginan tungod sa pagbutang og una sa mga butang nga espirituhanon kay sa temporal nga mga kabalaka.
-
Pagpili salabing menos og usa ka espiritunahon nga butang nga gusto nimong mas tutokan pa, ug pagsulat og usa ka tumong kalabut sa unsay imong buhaton sa paghimo niining espirituhanon nga butang nga mas taas og prayoridad diha sa imong kinabuhi.
-
Lucas 11
Si Jesus mitudlo sa Iyang mga tinun-an mahitungod sa pag-ampo
Paghunahuna nga kunohay ikaw usa ka full-time nga misyonaryo ug nga ikaw nagtudlo sa usa ka investigator kinsa nag-ampo og kadaghan ug mibati nga daw wala mitubag ang Langitnong Amahan. Ang investigator naghunahuna kon siya mopadayon ba sa pag-ampo. Unsay imong isulti aron matabangan kining tawhana?
Samtang ikaw magtuon sa Lucas 11, pangita sa mga kamatuoran nga makatabang sa usa ka tawo kinsa mibati nga ang Dios wala mitubag sa iyang mga pag-ampo.
Sumala sa Lucas 11:1–4, human sa pagpaminaw sa Manluluwas nga nag-ampo, usa sa Iyang mga tinun-an nangutana kon Siya motudlo ba kanila kon sa unsa nga paagi mag-ampo, ug ang Manluluwas mibuhat sa ingon. Ang Ginoo dayon migamit og mga pagkasusama sa pagtudlo og dugang nga mga kamatuoran mahitungod sa pag-ampo. Hinumdumi nga diha sa Hubad ni Joseph Smith sa Lucas 11:4 kini mabasa, “Ug ayaw kami itugyan ngadto sa panulay; apan luwasa kami gikan sa mga dautan” (Hubad ni Joseph Smith, Lucas 11:4 ; mga italic gidugang). Ang Langitnong Amahan dili gayud mogiya ni bisan kinsa sa Iyang mga anak ngadto sa tintasyon.
Tun-i ang Lucas 11:5–13, nga mangita sa unsay gitudlo sa Manluluwas mahitungod sa pag-ampo.
Ang Hubad ni Joseph Smith naghatag og dugang nga panlantaw ngadto sa pagtulun-an sa Manluluwas kabahin sa pag-ampo. Atong makat-unan nga sa wala pa siya mohatag og sanglitanan nga nagsugod sa Lucas 11:5, “siya miingon kanila, Ang inyong Langitnong Amahan dili mopakyas sa paghatag nganha kaninyo bisan unsay inyong pangayoon diha kaniya. Ug siya namulong og sambingay, nag-ingon …” (Hubad ni Joseph Smith, Lucas 11:5). Ato usab makat-unan ang mahitungod sa “maayong mga gasa” nga Iyang gipamulong: “Busa kon kamo, bisan sa inyong pagkadautan, mahibalo man ganing mohatag ug mga maayong gasa ngadto sa inyong mga anak, unsa pa gayud ka labaw pa ang langitnong Amahan nga mohatag sa Espiritu Santo ngadto sa mga nagapangayo kaniya” (Hubad ni Joseph Smith, Lucas 11:14).
Sumala sa Lucas 11:8, ngano nga ang ikaduha nga higala mipasidungog sa gihangyo nga pan sa unang higala? (Ang pulong pagsigisigi dinhi niini nga bersikulo nagpasabut sa paglahutay sa tawo og hangyo diha kaniya, bisan og ang iyang higala mibalibad sa una sa iyang gihangyo.)
Pinaagi sa Iyang mga pag-agid-agid sa Lucas 11:5–13, ang Manluluwas mitudlo nga kon kita, ingon nga dili hingpit, andam nga mohatag sa mga hangyo niadtong atong gihigugma ug giamuma, “unsa pa kaha ang [atong] langitnong Amahan nga labaw pang mohatag … ngadto kanila nga mangayo kaniya” (Lucas 11:13).
Unsa ang katuyoan sa pag-ampo? “Ang pag-ampo mao ang lihok diin ang kabubut-on sa Amahan ug ang kabubut-on sa anak nagkasinabtanay sa usag usa. Ang tumong sa pag-ampo dili ang pag-usab sa kabubut-on sa Dios, apan ang pagsiguro sa atong kaugalingon ug sa uban sa mga panalangin nga andam nang ihatag sa Dios apan sa kondisyon nga kita mangayo niini. Ang mga panalangin nagkinahanglan ug pipila ka buhat o paningkamot sa atong bahin sa dili pa nato kini maangkon. Ang pag-ampo maoy usa ka matang sa buhat ug maoy gitudlo nga paagi alang sa pag-angkon sa kinatas-an sa tanang mga panalangin” (Bible Dictionary, “Pag-ampo”).
Gikan sa unsay imong nakat-unan gikan sa Lucas 11:5–13, kompletoha ang mosunod nga baruganan: Kon kita mag-ampo ug molahutay sa pagtinguha sa mga panalangin sa Langitnong Amahan diha sa panahon sa panginahanglan, niana Siya mohimo, diha sa Iyang tukma nga panahon, ug sa Iyang kaugalingong pamaagi, .
Sa pagsabut niini nga baruganan kita kinahanglan usab motimaan nga dili tanang panalangin gikan sa Langitnong Amahan moabut sa mga paagi nga atong gipaabut, gitinguha, o mailhan dihadiha dayon.
-
Ang Lucas 11:14–54 naglangkob sa istorya ni Jesus sa pagpapahawa sa yawa gikan sa usa ka lalaki, nagpahimatngon sa mga katawhan sa pagpamati sa pulong sa Dios, ug nagpanton sa mga Pariseo ug mga escriba tungod sa ilang espirituhanong pagkawalay kahibalo ug kadautan.
Lucas 12
Ang Manluluwas mipasidaan batok sa pagpakaaron-ingnon ug pagkamasinahon
Ikonsiderar ang mosunod nga mga pangutana: Aduna ka bay usa ka butang nga sukad nagustuhan og maayo nga ikaw naghunahuna mahitungod niini sa tanang panahon? Unsay negatibong mga epekto ngari kanato sa hilabihan nga pagtinguha sa usa ka butang?
Atong mabasa sa Lucas 12:1–13 nga “nagkatigum ang linibo sa mga panon sa katawhan” (Lucas 12:1), si Jesus mitudlo sa Iyang mga tinun-an sa pagbantay sa pagpakaaron-ingnon. Siya mitudlo kanila nga ang tanang gitago nga mga butang usa ka adlaw niana mabutyag ug nga ang Dios nahibalo ug nagbantay sa Iyang mga anak. Namulong usab Siya mahitungod sa panginahanglan alang sa Iyang mga tinun-an sa pag-ila sa Iyang pangalan atubangan sa mga tawo ug mahitungod sa sala sa pagpasipala. Usa ka lalaki dayon mihangyo sa Manluluwas kon mahimo ba Siya nga makigsulti sa igsoon nga lalaki sa tawo ug moawhag sa igsoong lalaki sa pagbahin sa kabilin uban kaniya.
Basaha ang Lucas 12:14–15, nga mangita sa tubag sa Manluluwas ngadto niini nga hangyo.
Unsa nga pasidaan ang Iyang gihatag ngadto sa katawhan?
Ang pagkamasinahon nagpasabut sa naghingapin nga tinguha sa usa ka butang. Gikan sa tambag sa Ginoo atong makat-unan ang mosunod nga kamatuoran: Ang Ginoo nagmando kanato nga dili masina sa kalibutanong mga butang. Siya mitudlo nga adunay mas daghan pa sa kinabuhi kay sa pisikal nga mga butang nga atong maangkon ug nga ang bili sa usa ka tawo wala mag-agad sa kadaghan sa iyang mga kabtangan.
Human ang Manluluwas mipasaidaan sa Iyang mga tinun-an sa paglikay sa kasina, mihatag Siya og usa ka sambingay sa pagpakita sa kaimportante niini nga sugo. Basaha ang Lucas 12:16–19, nga mangita sa gidaghanon nga ang lalaki sa sambingay migamit sa mga pulong ako ug akong. Mahimo nimong markahan ang matag higayon.
Unsa ang gitudlo niining kanunay nga paggamit sa tawo sa ako ug akong mahitungod sa iyang mga kabalaka?
Sa unsa nga mga paagi nga tingali kita matintal nga mahisama niini nga tawo?
Basaha ang Lucas 12:20–21, nga mangita sa unsay gisulti sa Dios agig tubag sa kahakog ug sa pagkamasinahon sa tawo.
Ikonsiderar ang pagsulat o pagtimaan diha sa imong kasulatan ang mosunod nga mga pamahayag ni Elder M. Russell Ballard sa Korum sa Napulog Duha ka mga Apostoles: “Unsa ang pinakamahinungdanon mao ang molungtad og dugay” (“Ang Pinakamahinungdanon Mao ang Molungtad og Dugay,” Ensign o Liahona, Nob. 2005, 44).
Kon ang adunahang tawo diha sa sambingay nasayud nga mamatay siya nianang gabhiona ug dili makadala sa iyang mga kabtangan uban kaniya, unsa sa imong hunahuna ang iyang buhaton nga lahi sa adlaw nga dili pa ang iyang kamatayon? Ikonsiderar kon sa unsa nga paagi ang mando nga dili masina sa kalibutanong mga kabtangan mahimong magamit nganha kanimo.
Atong mabasa sa Lucas 12:22–30 nga ang Ginoo mihatag og gibug-aton nga ang Iyang mga tinun-an dili magkinahanglan nga mabalaka kaayo sa ilang temporal nga mga panginahanglan. Kini nga panudlo nahatag ngadto sa mga Apostoles ug niadtong kinsa natawag sa pagserbisyo og full time isip mga misyonaryo. Basaha ang Lucas 12:31–32, nga mangita sa unsay gitudlo sa Manluluwas sa Iyang mga disipulo ang pagtinguha kay sa paghatag og gibug-aton sa ilang kaugalingon nga mga panginahanglan ug mga tinguha (tan-awa usab sa Jacob 2:18–19).
Diha sa Hubad ni Joseph Smith sa Lucas 12:31, atong makat-unan nga ang Ginoo misugo sa Iyang mga tinun-an, “Apan mao hinooy pangitaa ninyo ang iyang gingharianan sa Dios” (Hubad ni Joseph Smith, Lucas 12:34; mga italic gidugang). Ang “gingharian sa Dios” nagpasabut ngadto sa Simbahan ni Jesukristo. “Ang katuyoan sa Simbahan mao ang pag-andam sa mga miyembro niini sa pagpuyo sa celestial nga gingharian o sa gingharian sa langit” (Giya ngadto sa mga Kasulatan, “Gingharian sa Dios o Gingharian sa Langit,” scriptures.lds.org). Ang Manluluwas misaad sa Iyang mga Apostoles ug mga misyonaryo nga kon sila magtinguha sa pagpahinabo sa gingharian sa Dios, Siya motabang sa paghatag alang sa ilang mga panginahanglan ug mohatag kanila og usa ka dapit diha sa Iyang gingharian.
-
Palandonga ang pipila ka mga paagi nga ikaw makatinguha sa pagpahinabo sa gingharian sa Dios. (Samtang ikaw mamalandong niini, hinumdumi ang baruganan nga giila sa unahan niini nga leksyon mahitungod sa paghalad sa imong kaugalingon ngadto sa espirituhanong mga butang kay sa temporal nga mga kabalaka.)
Atong mabasa sa Lucas 12:35–59 nga ang Manluluwas mitudlo sa Iyang mga tinun-an sa pagpangadam alang sa Iyang Ikaduhang Pag-anhi. Siya mitabang kanila sa pagsabut nga “ang matag-usa nga gikahatagan ug daghan, pagapangayoan ug daghan” (Lucas 12:48), ug Iyang gipasabut nga ang Iyang ebanghelyo mohimo og dako kaayo nga pagkabahin sa mga tawo.
-
Akong natun-an ang Lucas 10:38–12:59 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: