Fēpueli: Ko e Palani ʻo e Fakamoʻuí

ʻE tokoni e ngaahi fokotuʻutuʻu he ʻiuniti ko ʻení ke mahino ki he toʻu tupú e mahuʻinga ʻo e akó mo e akoʻí ʻi he palani ʻo e fakamoʻuí. Naʻe ako ʻaki ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá “ko e ako ʻi he tuí pea mei he ngaahi taukeí, ko ha ongo tefitoʻi konga ia ʻo e palani ʻo e fiefia ʻa e Tamaí” (“Fekumi ki he ʻIló ʻi he Tui,” Liahona, Sepi. 2007, 19). Te ke maʻu ʻa e faingamālie ke tokoniʻi e toʻu tupú ke nau maʻu ha ngaahi fakamoʻoni mālohi ange ki he palani ʻo e fakamoʻuí mo loto falala ange ki heʻenau malava ke akoʻi ia ki he niʻihi kehé. Poupouʻi kinautolu ke fai ha ngaahi fehuʻi kau ki he meʻa ʻoku nau lolotonga akó, feinga ke ako lahi ange, pea ke akoʻi ki he niʻihi kehé e meʻa ʻoku nau ʻiló.

Ngaahi fokotuʻutuʻu ke fili mei ai he māhina ní:

• Ko e hā ʻoku hoko ai e akó ko ha konga mahuʻinga ʻo e palani ʻa e Tamai Hēvaní?

• Ko e hā ʻoku mahuʻinga ai hono akoʻi ʻo e ongoongoleleí ʻi he palani ʻo e fakamoʻuí?

• Ko e hā e fatongia ʻo e tauʻatāina ke filí ʻi hono ako ʻo e ongoongoleleí?

• Te u lava fēfē ʻo tokoniʻi e niʻihi kehé ke nau kau mai ki he akó?

• Te u lava fēfē ʻo fakaʻaongaʻi e mūsika ʻa e Siasí ke ako ki he palani ʻo e fakamoʻuí?

• Te u tokoni fēfē ke mahino ki he niʻihi kehé ke mahino e tokāteline ʻo Kalaisí?