Ko e hā ‘oku mahuʻinga ai ke akoʻi ‘a e tokāteline haohaoá?

Naʻe kamata ke fakafalala pē ‘a e kakaí ‘i he ngaahi taʻu hili ‘a e pekia ‘a e ‘uluaki Kau ‘Aposetolo ‘e Toko Hongofulu Mā Uá, ki honau potó ke fakaʻuhingaʻi ‘aki e ngaahi folofolá. Ko hono olá ko hono akoʻi ‘o e ngaahi tokāteline halá pea Hē ai e Siasí mei he Moʻoní. ‘Oku ‘i ai hotau fatongia ‘i heʻetau hoko ko e kau faiako ‘o e ongoongoleleí, ke tau akoʻi ‘a e ngaahi moʻoni ‘o e ongoongolelei kuo toe fakafoki maí ‘i honau tuʻunga haohaoá, koeʻuhí ke ‘oua naʻa tau taki halaʻi ha taha. Ko e taimi ko ia ‘oku mahino ai ‘a e tokāteline moʻoní kiate kinautolu ‘oku faiakó, ‘oku ueʻi hake ai honau lotó, pea ‘oku nau liliu ‘enau ngaahi fakakaukaú mo honau ‘ulungāngá (vakai, Poiti K. Peeka, “ʻOua ‘e Manavahē,” EnsignpeLiahona, Mē 2004, 79).

Teuteuʻi fakalaumālie koe

‘Oku anga fēfē hano fakapapauʻi ‘e koe ko e faiakó, ‘okú ke akoʻi ‘a e tokāteline haohaoá? Ko e fē e taimi naʻá ke ongoʻi ai e mālohi ‘oku maʻu ‘i hono akoʻi ‘o e tokāteline haohaoá?

‘Oku ‘iloʻi nai ‘e he toʻu tupu ‘okú ke akoʻí e mālohi ‘o e tokāteline haohaoá? Te ke lava fēfē ‘o tokoniʻi kinautolu ke nau ongoʻi ha loto-falala lahi ange ki heʻenau malava ke akoʻi ‘a e tokāteline haohaoá?

Ako ‘a e ngaahi potufolofola mo e ngaahi maʻuʻanga tokoni ‘i laló. Ko e hā ha meʻa ‘okú ke ongoʻi ke vahevahe mo e toʻu tupú?

Luke 24:32; Siosefa Sāmita —Hisitōlia 1:11–12 (ʻOku ueʻi hake ‘a e lotó ‘e he faiako mei he ngaahi folofolá)

2 Tīmote 4:3–4 (‘Oku kikiteʻi ‘e Paula hono akoʻi ‘o e ngaahi tokāteline halá)

Mōsaia 18:19 (Ko e ngaahi folofolá mo e lea ‘a e kau palōfitá ʻa e tupuʻanga ‘o e tokāteline haohaoá)

Alamā 4:19; 31:5 (‘Oku mālohi lahi ‘a e folofola ‘a e ‘Otuá)

Molonai 10:5 (ʻOku fakamoʻoniʻi ‘e he Laumālie Māʻoniʻoní ‘a e moʻoní)

D. Tooti Kilisitofāsoni, “Ko e Tokāteline ‘a Kalaisí,” Ensign pe Liahona, Mē 2012, 86–90

Faiako ‘i he founga ‘a e Fakamo‘uí

Naʻe ngāue ʻaki ‘e he Fakamoʻuí ‘a e folofolá ke akoʻi mo fakamoʻoniʻi Hono misioná. Naʻá Ne toutou fakamamafaʻi mo akoʻi ‘a e tokāteline haohaoá. ‘E anga fēfē haʻo tokoniʻi ‘a e toʻu tupú ke nau ngāue ʻaki ‘a e folofolá ke ‘iloʻi mo akoʻi ‘a e tokāteline haohaoá ki he kakai kehé?

Fai hano fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fakafehokotaki ʻe he toʻu tupú ʻa e meʻa ʻoku nau ako ʻi he ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí pe meʻa ne hoko kiate kinautolu mo honau kaungāmeʻá). Ko e hā ha founga te ke lava ʻo tokoni ai ke nau vakai ki hono mahuʻinga ʻo e ongoongoleleí ‘i he moʻui fakaʻahó? ʻE ala tokoni atu e ngaahi fakakaukau ʻi laló:

Kole ki he toʻu tupú ke nau vahevahe ha meʻa naʻa nau aʻusia ‘a ia naʻa nau ongoʻi ai ‘a e Laumālié lolotonga haʻanau akoʻi ‘a e ongoongoleleí ki ha taha.
‘Omi ha ipu vai maʻa mo ha ipu vai ‘uli ki he kalasí. Fokotuʻu ange ‘oku fakafofongaʻi ‘e he vaí ‘a e ongoongolelei ‘oku tau akoʻi ki he kakai kehé. Kapau ‘oku fakafofongaʻi ‘e he vai maʻá ‘a e ongoongolelei haohaoá, ko e hā leva ha meʻa ‘e fakafofongaʻi ‘e he vai ‘ulí? Ko e hā nai ha ngaahi meʻa te nau lava ‘o ‘uliʻi ‘a e tokāteline haohaoa ‘o e ongoongoleleí? ‘Oku tokoniʻi fēfē ‘e he talanoa ko ‘ení ‘a e toʻu tupú ke mahino kiate kinautolu ‘a e mahuʻinga ‘o hono akoʻi ‘o e tokāteline haohaoá?

Ako fakataha

‘E lava ‘e he ngaahi ‘ekitivitī takitaha ‘i laló ‘o tokoniʻi ‘a e toʻu tupú ke nau ako ki hono mahuʻinga ‘o hono akoʻi ‘o e tokāteline haohaoá. Muimui ki he fakahinohino ‘a e Laumālié, fili ha ‘ekitivitī ‘e taha pe lahi ange ‘e ‘aonga taha ki hoʻo kalasí:

Kole ki he toʻu tupú ke nau hiki ha lisi ‘o e ngaahi founga ‘oku feinga ai ‘a e māmaní ke liliu ‘a e ‘ulungaanga ‘o e kakaí. Kole ange kiate kinautolu ke nau lau ‘a eʻAlamā 4:19pea31:5, nau kumi ki he founga ʻoku takiekina ai ʻe he ʻEikí e kakai kehé. Hili ʻenau fakamatala ki he meʻa naʻa nau ‘iló, fakaafeʻi ke nau kumi ‘i he folofolá ki ha ngaahi sīpinga ‘o ha kakai naʻe liliu honau lotó koeʻuhí he naʻe akoʻi kiate kinautolu ‘a e tokāteline haohaoá. Kole ki he toʻu tupú ke nau vahevahe ha sīpinga ‘o e ngaahi tefitoʻi moʻoni ‘o e ongoongoleleí kuo nau ako ‘a ia naʻá ne takiekina ʻenau tōʻongá.
Tokoniʻi ‘a e toʻu tupú ke nau kumi ‘i he folofolá ki ha sīpinga ‘o ha kakai naʻa nau akoʻi e tokāteline halá (hangē ko Seialemí [vakai, Sēkope 7], Kolihola [vakai, ʻAlamā 30], pe ko e kau Sōlamí [vakai, ʻAlamā 31]). Ko e hā ha meʻa naʻe hoko ki he kakaí koeʻuhí ko ‘enau ngaahi akonakí? Ko e hā ha ngaahi tokāteline naʻe ako‘i ‘e he kau tamaioʻeiki ‘a e ‘Eikí ke tali ʻaki iá? Ko e hā ha ngaahi akonaki hala tatau kuo fehangahangai mo e toʻu tupú ‘i he māmaní he ‘ahó ni? ‘E anga fēfē nai ha tali ki ai ʻa e toʻu tupú pea nau akoʻi ‘a e tokāteline haohaoá?
Fakaafeʻi ‘a e toʻu tupú ke nau lau ‘a e 2 Tīmote 3:2–4mo e2 Nīfai 9:28–29. Kuo fakahoko fēfē ʻa e ngaahi potufolofola ko ‘ení ‘i hotau ‘ahó? Ko e hā ha ngaahi ola ‘o e tokāteline halá ‘oku tau sio ai ʻi hotau māmaní? (ki ha ngaahi sīpinga ʻe niʻihi, vakai, 2 Tīmote 3:1–5). Ko e hā ha ngaahi tefitoʻi moʻoni ‘o e ongoongolelei kuo toe fakafoki maí ‘e ala tokoni ki hono ikunaʻi ‘o e ngaahi ola ko ‘ení?

Kole ki he toʻu tupú ke nau fakamatala ki ha meʻa naʻa nau ako ‘i he ‘aho ní. ‘Oku mahino nai kiate kinautolu ‘a e mahuʻinga ‘o hono akoʻi ‘o e tokāteline haohaoá? Ko e hā haʻanau ongo pe fakakaukau? ‘Oku ‘i ai nai haʻanau toe ngaahi fehuʻi kehe? ‘E ‘aonga nai tuku ha taimi lahi ange ke ako ki he kaveinga ko ‘ení?

Tokoni fakafaiako

“ʻOku totonu ke ‘oua te tau lea fakamahamahalo ‘aki ha ngaahi lea ‘a ha kau taki ‘o e Siasí taʻe te tau tomuʻa fakapapauʻi e feituʻu ‘oku maʻu ai ‘a e ngaahi lea ko iá. ‘I he taimi ‘oku tau lea ‘aki ai ‘a e ngaahi potufolofolá, ‘oku totonu ke tau fakapapauʻi ʻoku tatau ‘etau fakaʻaongaʻí pe lea ʻaki kinautolú mo ‘enau tuʻu totonu he folofolá” (ʻOku ‘Ikai ha Ui ‘e Mahuʻinga Ange ‘i he Faiakó [2000], 58).

Fakaafeʻi ke ngāue

Fakaafeʻi ‘a e toʻu tupú ke nau fakakaukau ki ha faingamālie te nau maʻu ke faiako aí. Fakalotolahiʻi ke nau fakakaukau ki ha meʻa te nau fai ke fakapapauʻi te nau akoʻi ‘a e tokāteline haohaoá.