ʻOku ʻuhinga ki he hā ʻa hono fai ʻo e fakamoʻoní?

Ko e fakamoʻoní ko ha fakamoʻoni fakalaumālie, ʻoku fai ʻe he Laumālie Māʻoniʻoní, ki he moʻoni ʻo e ongoongoleleí. Ko e taimi ʻoku tau fakamoʻoni aí, ʻoku tau fakahā ki he niʻihi kehé ʻa e meʻa ʻoku tau ʻilo ʻoku moʻoní ʻi he mālohi ʻo e Laumālié. Ko e fakavaʻe ʻo e fakamoʻoní ko hono ʻiloʻi ʻoku moʻui ʻa e Tamai Hēvaní mo ʻofa ʻiate kitautolu, ko Sīsū Kalaisi ʻa hotau Fakamoʻuí, kuo ʻosi fakafoki mai ʻEne ongoongoleleí ʻi he Palōfita ko Siosefa Sāmitá, pea ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e Siasi moʻoni ia ʻo e Fakamoʻuí.

Teuteuʻi fakalaumālie koe

Kuo tākiekina fēfē koe ʻe ha fakamoʻoni ʻa ha niʻihi kehe? Kuo fakamālohia fēfē koe ʻi hono fai hoʻo fakamoʻoní—ʻi he founga angamahení pe ʻi ha founga kehe? Ko e hā ha ngaahi aʻusia te ke lava ʻo vahevahe mo e toʻu tupú?

Ko e fē ha taimi naʻá ke siotonu ai hono fakahoko ʻe he toʻu tupú ʻenau fakamoʻoní—ʻi he angamahení pe ʻi ha toe founga kehe? Ko e hā ha ngaahi faingamālie te ke lava ʻo ʻoange ki he toʻu tupú ke nau fakamoʻoni ai?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā ha meʻa ʻe tokoni ke mahino ki he toʻu tupú ʻa e ʻuhinga hono fai ʻo e fakamoʻoní?

Mātiu 16:13–19; Mōsaia 3:17; ʻAlamā 5:45–48; 7:13; T&F 76:22–24 (Sīpinga ʻo e ngaahi fakamoʻoní ʻi he folofolá)

ʻAlamā 4:18–20 (Ko e mālohi ʻo hono fai ʻo e fakamoʻoní)

ʻAlamā 11:39–41; 12:1; 15:12 (Naʻe ʻi ai ha ivi mālohi ʻo e fakamoʻoni ʻa ʻAmulekí kia Sisolome)

Dallin H. Oaks, “Fakamoʻoní,” Ensign pe Liahona, Mē 2008, 26–29

“Toutou Fai Maʻu pē Hoʻo Fakamoʻoní,” Malangaʻaki ʻEku Ongoongoleleí (2004), 237–38

“Faʻa Fai Hoʻo Fakamoʻoní, ”Ko e Faiako ‘i he Founga ‘a e Fakamoʻuí (2016), 11

Vitiō: “Ko Ha Tangata ʻOku ʻIkai Pōtoʻi Lea,“Testimony of Thomas S. Monson”

Fai hano fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fai hano fakafehokotaki ʻe he toʻu tupú ʻa e ngaahi meʻa ʻoku nau ako ʻi he ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne hoko kiate kinautolu mo honau kaungāmeʻá). Te ke tokoniʻi fēfē kinautolu ke nau vakai ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu ʻa e ngaahi fakakaukau ʻi laló:

Fakafeʻi e toʻu tupú ke nau vahevahe ha aʻusia kimuí ni naʻá ne fakamālohia ʻenau fakamoʻoní.
Kole ki he toʻu tupú ke nau fakakaukau ʻoku nau fakaafeʻi hanau kaungāmeʻa ki he lotú ʻi ha Sāpate ʻaukai, pea ʻoku fakaafeʻi ʻe he pīsopé ʻa e kāingalotu ʻo e uōtí ke fai ʻenau fakamoʻoní. Ko e hā haʻanau tali kapau ʻe ʻeke ange ʻe honau kaungāmeʻá, “ʻOku ʻuhinga ki he hā hono fakahoko ʻo e fakamoʻoní?” Kapau ʻe fie maʻu, vakai ki he konga ʻoku ui ko e “Faʻa Fai Hoʻo Fakamoʻoní”ʻi he Ko e Faiako ʻi he Founga ʻa e Fakamoʻuí, peesi 11, pe ko e lea ʻa ʻEletā Dallin H. Oaks”Fakamoʻoni.“

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he toʻu tupú ʻa e ʻuhinga hono fai ʻo e fakamoʻoní. Muimui ʻi he ueʻi ʻa e Laumālié ʻo fili ha meʻa ʻe taha pe lahi ange ʻe tokoni lelei taha ki hoʻo kalasí:

Fakaafeʻi e toʻu tupú ke nau lau e konga ʻoku ui “Ko e Hā ʻa e Fakamoʻoni?” mei he lea ʻa Palesiteni Tietā F. ʻUkitofa “Ko e Mālohi ʻo e Fakamoʻoni Fakafoʻituituí.” Kole ki he toʻu tupú ke nau ʻai ha lisi pe ko e hā e fakamoʻoní pea mo e meʻa ʻoku ʻikai ko ha fakamoʻoní, ʻo fakatatau ki he meʻa ʻoku nau laú. Fakaafeʻi ke nau vahevahe ha aʻusia ʻa ia ne nau fanongo ai ki ha fakamoʻoni ʻa ha taha ʻi ha founga naʻá ne fakamālohia ai ʻenau tuí mo e fakamoʻoní.
Fakaafeʻi e toʻu tupú ke nau lau ʻa e konga II ʻo e lea ʻa ʻEletā Tālini H. ʻOakesi ko e “Fakamoʻoní,” ʻo kumi ʻa e ngaahi faitatau mo e ngaahi faikehekehe ʻi he fakamoʻoní mo e ngaahi ʻilo kehé. Ko e hā ʻe lava ʻo fai ʻe he toʻu tupú ke fakamālohia ai ʻenau ʻilo ki he moʻoni ʻo e ongoongoleleí?
Fakaafeʻi e toʻu tupú ke nau kumi ha ngaahi sīpinga ʻi he folofolá ʻo ha kakai ʻoku fai ʻenau fakamoʻoní (hangē ko ia ʻoku fokotuʻu atu ʻe he fokotuʻutuʻu ko ʻení). ʻI heʻenau vahevahe e meʻa ʻoku nau maʻú, poupouʻi ke nau aleaʻi e ngaahi founga kehekehe te nau lava ʻo fai ai ʻenau fakamoʻoní (kau ai e ngaahi founga angamahení mo ha ngaahi founga kehe). Sio he vitioó “Testimony of Thomas S. Monson.” Kole ki he toʻu tupú ke nau vahevahe fekauʻaki mo e meʻa ʻoku nau ako meia Palesiteni Monisoni kau ki he fakamoʻoní.
Fakaafeʻi e toʻu tupú ke nau lau ʻa e “Toutou Fai Maʻu pē Hoʻo Fakamoʻoní ” pea fakakakato ʻa e ʻekitivitī ako fakatāutaha ʻi he Malangaʻaki ʻEku Ongoongoleleí, peesi 237–38. Kole ange ke nau vahevahe ʻa ʻenau ngaahi ʻiló ki he kalasí. Te nau fakaʻaongaʻi fēfē ʻa e meʻa kuo nau akó ʻi heʻenau fakamoʻoni ka hokó (hangē ko ha houalotu ʻa e siasí pe pōtalanoa mo ha kaungāmeʻa)?
Huluʻi ʻa e vitiō “A Man without Eloquence.” Kole ki he toʻu tupú ke nau vahevahe ha meʻa ne nau aʻusia ʻa ia ne ongo ai kiate kinautolu ha fakamoʻoni ongo mo mahino-ngofua ʻa ha taha. Ko e hā ʻa e meʻa ʻi he fakamoʻoni ko iá naʻe ongo ki honau lotó?

Kole ki he toʻu tupú ke nau vahevahe e meʻa ne nau ako ʻi he ʻaho ní. ʻOku mahino nai kiate kinautolu ʻa e founga ke fai ai e fakamoʻoní? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tefito ko ʻení?

Tokoni fakafaiako

“ʻOku faʻa mālohi fau ʻa e fakamoʻoní ʻi he taimi ʻoku nounou, totonu, mo fakahangatonu aí” (ʻOku ʻIkai ha Ui ʻe Mahuʻinga Ange ʻi he Faiakó [2000], 47).

Fakaafeʻi ke ngāue

Fakaafeʻi e toʻu tupú ke nau kumi ha ngaahi faingamālie ke fakamoʻoni ai—ʻi he founga angamahení pe ʻi ha founga kehe pē—he lolotonga ʻo e uike ka hokó. Kole ange ke nau vahevahe ʻenau ngaahi aʻusiá ʻi ha kalasi he kahaʻú.

Poupouʻi e toʻu tupú ke hiki ʻenau ngaahi fakamoʻoní ʻi heʻenau tohinoá.