ʻOku tokoniʻi fēfē au ʻe he ʻapasiá ke u maʻu ai ʻa e fakahaá?

Ko e taimi ʻoku tau ʻapasia aí, ʻoku tau fakahaaʻi ai ʻetau ʻofa ki he ʻOtuá mo tau malava lelei ange ai ke maʻu e fakahā fakatāutaha. ʻOku hanga ʻe he loto ʻapasiá ʻo ʻai ke tau ongoʻi ngofua ange ʻa e kihiʻi leʻo siʻi mo vanavanaiki ʻo e Laumālié. Kapau te tau ʻapasia ki he ngaahi meʻa toputapú, ʻe falala mai e Tamai Hēvaní kiate kitautolu mo fakahā mai ha ngaahi moʻoni kehe.

Teuteuʻi fakalaumālie koe

Ko e hā e ʻuhinga kiate koe ʻa e ʻapasiá? Kuo tokoniʻi fēfē koe ʻe he ʻapasiá ke ke ongoʻi ʻa e Laumālié? Ko e hā ha ngaahi aʻusia te ke lava ʻo vahevahe mo e toʻu tupú?

Ko e hā ʻa e ʻuhinga ʻo e ʻapasiá ki he toʻu tupu ʻi hoʻo kalasí? Te ke tokoniʻi fēfē kinautolu ke nau fakafehokotaki ʻa e ʻapasiá mo e fakahaá?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā kuó ke maʻu ʻe lava ʻo tokoni ki he toʻu tupú ke nau fakatupulaki ha ongoʻi ʻapasia?

1 Ngaahi Tuʻi 19:12; 3 Nīfai 11:1–7 (ʻOku fetuʻutaki ʻa e ʻOtuá ʻi he kihiʻi leʻo siʻi mo vanavanaiki)

Saame 46:10 (“Mou longo pē pea ʻilo ko au ko e ʻOtuá”)

T&F 63:64; 84:54–57 (ʻApasia ki he ngaahi meʻa ʻoku toputapú)

Paul B. Pieper, “Ke Tauhi ke Toputapu,” Ensign pe Liahona, Mē 2012, 109–11

“ʻApasiá,” Tuʻu Maʻu ʻi he Tuí (2003), 217

“Fakahaá,” Tuʻu Maʻu ʻi he Tuí (2003), 21–26

Ko e faiako ‘i he founga ‘a e Fakamo‘uí

Naʻe hoko ʻa e Fakamoʻuí ʻi he tūkunga kotoa pē ko ha faʻifaʻitakiʻanga mo ha fai-fakahinohino ki Heʻene kau ākongá. Naʻá Ne teuteuʻi Ia ke faiako ʻaki Haʻane tuku ha taimi ke Ne toko taha ai ke lotu mo ʻaukai. Vahevahe mo e toʻu tupú ʻa e founga ʻoku tokoni ai ʻa e ʻapasiá ʻi hoʻo teuteu ke maʻu ha fakahā fakatāutahá. Te ke poupouʻi fēfē ʻa e toʻu tupú ke nau fakahaaʻi ha fakaʻapaʻapa ki he ngaahi meʻa ʻoku toputapú?

Fai hano fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fai hano fakafehokotaki ʻe he toʻu tupú ʻa e ngaahi meʻa ʻoku nau ako ʻi he ngaahi feituʻu kehekehé (hangē ko e ako fakatāutahá, seminelí, ngaahi kalasi kehe ʻa e Siasí, pe ngaahi meʻa ne hoko kiate kinautolu mo honau kaungāmeʻá). Te ke tokoniʻi fēfē kinautolu ke nau vakai ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu ʻa e ngaahi fakakaukau ʻi laló:

Fakaafeʻi e toʻu tupú ke nau vahevahe ha faʻahinga fehuʻi ʻoku nau maʻu fekauʻaki mo e ngaahi meʻa ne nau ako ʻi he ngaahi kalasi kehé.
Hiki ʻi he palakopoé, “Ko e ʻapasiá ko e __________.” Kole ki ha kau mēmipa ʻo e kalasí ke nau ō mai ki he palakipoé ʻo hiki ʻenau fakaʻuhingaʻi ʻo e ʻapasiá. Fakaafeʻi e toʻu tupú ke nau tānaki atu ki he ngaahi fakaʻuhinga ko ʻení ʻi he taimi te nau ako ai ki he ʻapasiá he lēsoni ʻo e ʻaho ní.

Ako fakataha

ʻE tokoni e ngaahi ʻekitivitī takitaha ʻi laló ke mahino ki he toʻu tupú ʻa e fekauʻaki ʻa e ʻapasiá mo e fakahaá. Muimui ʻi he fakahinohino ʻa e Laumālié, fili ha ʻekitivitī ʻe taha pe lahi ange ʻe ʻaonga taha ki hoʻo kalasí:

Kole ki he toʻu tupú ke nau lau ʻa e “ʻApasiá” ʻi he Tuʻu Maʻu ʻi he Tuí pe ko ha ngaahi konga ʻo e lea ʻa ʻEletā Paula B. Paipā (Paul B. Pieper) “Ke Tauhi ke Toputapu,” ʻo kumi ʻa e ngaahi tali ki he fehuʻi “ʻOku tokoniʻi fēfē au ʻe he ʻapasiá ke u maʻu ai ʻa e fakahaá?” Fakaafeʻi e toʻu tupú ke nau vahevahe ʻa e meʻa ne nau maʻú. Ko e hā ʻoku ongoʻi ʻe he toʻu tupú te nau lava ʻo fai ke ʻapasia lahi ange aí?
Vahevahe e kalasí ki ha fanga kiʻi kulupu iiki, pea kole ki he kulupu takitaha ke nau ako fakataha ha potufolofola ʻe taha pe ua ʻoku fokotuʻu atu ʻi he fokotuʻutuʻu ko ʻení. Fakaafeʻi ʻa e ngaahi kulupú ke nau aleaʻi e meʻa ʻoku nau ilo mei he ngaahi potufolofola ko ʻení ki he fekauʻaki ʻa e ʻapasiá mo e fakahaá. Kole ki he kulupu takitaha ke nau vahevahe mo e toenga ʻo e kalasí e meʻa ʻoku nau ʻiló.
Fakaafeʻi e toʻu tupú ke nau fakatotolo ʻi he lea ʻa Palesiteni Poiti K. Pēká “ʻOku Fakaafeʻi ʻe he ʻApasiá ʻa e Fakahaá ” mo kumi e ngaahi meʻa ʻoku totonu ke tau fai ke fakaafeʻi ai ʻa e fakahaá ʻi he ngaahi fakatahaʻanga hotau Siasí. Kole ange ke nau vahevahe e meʻa ʻoku nau ʻiló pea mo fokotuʻu ha ngaahi founga ke fakaʻaongaʻi ai ʻa e faleʻi ʻa Palesiteni Peeka fekauʻaki mo e ʻapasiá ʻi ha ngaahi tūkunga kehe pe ngaahi meʻa toputapu (hangē ko e temipalé, ngaahi folofolá, mo e ngaahi alā meʻa pehē).

Kole ki he toʻu tupú ke nau vahevahe e meʻa ne nau ako ʻi he ʻaho ní. ʻOku mahino nai kiate kinautolu e founga ʻoku fekauʻaki ai e ʻapasiá mo e fakahaá? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tefito ko ʻení?

Tokoni fakafaiako

“ʻI he taimi ʻoku tau fakataha ai ke ako ki he ngaahi tokāteline ʻo e ongoongoleleí, ʻoku totonu ke fai ia ʻi he laumālie ʻo e loto ʻapasia. ... ʻOku taau pē ʻa e taʻe-ʻapasiá mo e ngaahi taumuʻa ʻa e filí ʻaki ʻene fakafeʻātungiaʻi e ngaahi founga pelepelengesi ki he maʻu fakahā ʻi he ʻatamaí mo e laumālié fakatouʻosi. ... ʻOku hanga ʻe he loto ʻapasiá ʻo fakaafeʻi mai e fakahaá” (Boyd K. Packer, ʻi he ʻOku ʻIkai ha Ui ʻe Mahuʻinga Ange ʻi he Faiakó [2000], 93).

Fakaafeʻi ke ngāue

Fehuʻi ki he toʻu tupú pe ko e hā kuo nau ako he ʻahó ni fekauʻaki mo e mahuʻinga ʻo e ʻapasiá ki hono maʻu ʻo e fakahaá. ʻE lava fēfē ke nau liliu honau ʻulungāngá pe ko honau ʻātakaí kae lava ʻo maʻu lelei ange ʻa e fakahā fakatāutahá?