Ko e hā ʻoku mahuʻinga ai ke muimui ki he faleʻi ʻoku fai ʻe he kau taki lakanga fakataulaʻeikí?

ʻOku maʻu ʻe he kau taki lakanga fakataulaʻeikí ha fakahinohino fakalaumālie mei he Laumālie Māʻoniʻoní ke faleʻi ʻa kinautolu ʻoku ui ke takí. ʻE tokoni ʻetau feinga ke fakafanongo mo muimui ki he faleʻi ʻoku fai ʻe hotau kau taki lakanga fakataulaʻeikí ke maluʻi kitautolu mei he ngaahi fakatuʻutāmaki fakalaumālie mo fakatuʻasinó, pea ʻe tokoni ia ke tau fai ai ha ngaahi fili fakapotopoto.

Teuteuʻi fakalaumālie koe

Kuo tāpuekina fēfē koe ʻe he muimui he faleʻi ʻa e kau taki lakanga fakataulaʻeikí ʻi hoʻo moʻui fakafoʻituituí? ʻI ho ngaahi uiuiʻí? ʻI ho fāmilí?

Ko e hā ha ngaahi faingamālie ʻoku maʻu ʻe he toʻu tupú ke fekumi ki ha faleʻi mei he lakanga fakataulaʻeikí? Te ke faleʻi fēfē ʻa e toʻu tupú ke nau muimui ki he faleʻi ʻa e kau taki lakanga fakataulaʻeikí, kau ai mo e kau taki fakauōtí mo e fakasiteikí?

Fakaʻaongaʻi ʻa e ngaahi maʻuʻanga tokoni ʻi laló ke mahino ai kiate koe ʻa e ʻuhinga ʻoku mahuʻinga ai ke muimui he faleʻi ʻa e kau taki lakanga fakataulaʻeikí. Hili iá, pea fakakaukauʻi e founga ʻe lava ai ʻa e ngaahi ʻekitivitī he toenga ʻo e fokotuʻutuʻu ko ʻení ʻo tokoni ʻi hoʻo palani ha ngaahi founga ke fakakau ai ʻa e toʻu tupú ʻi he akó. ʻE tokoni ʻa e ngaahimeʻa kuó ke aʻusia ʻi hoʻo muimui ki he faleʻí ke ke akoʻi lelei ʻeni.

ʻEfesō 4:11–14 (Ngaahi tāpuaki ʻoku maʻu mei he kau taki ʻo e Siasí)

T&F 1:38; T&F 21:4–5 (ʻOku folofola ʻa e ʻEikí ʻo fou Heʻene kau tamaioʻeikí)

T&F 124:45–46 (Fakafanongo ki he kau tamaioʻeiki ʻa e ʻEikí)

Dallin H. Oaks, “Ongo Founga ʻo e Fetuʻutakí,” Ensign pe Liahona, Nōvema 2010, 83–86.

Ko e faiako ‘i he founga ‘a e Fakamo‘uí

Naʻe faʻa vahevahe ʻe he Fakamoʻuí ha ngaahi talanoa, ngaahi tala-fakatātā, pea mo ha ngaahi sīpinga moʻoni he moʻuí ke fakatātaaʻi ʻaki ʻa e tokāteliné mo e ngaahi tefitoʻi moʻoní. Ko e hā ha ngaahi talanoa fekauʻaki mo e kau taki ko ʻení te ke lava ʻo vahevahe mo e toʻu tupú?

Fai hano fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fai hano fakafehokotaki ʻe he toʻu tupú ʻa e ngaahi meʻa ʻoku nau ako ʻi ha ngaahi feituʻu kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe meʻa ne nau aʻusia mo honau kaungāmeʻá). Te ke tokoniʻi fēfē kinautolu ke nau vakai ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi ʻa e kau talavou ʻi he kalasí ke nau akoʻi ki he kau finemuí ha meʻa ne nau ako fekauʻaki mo e lakanga fakataulaʻeikí ʻi he ngaahi kōlomu ʻo e Lakanga Taulaʻeiki Faka-ʻĒloné. Hili ia pea fakaafeʻi ʻa e kau finemuí ke nau akoʻi ʻa e meʻa ne nau ako fekauʻaki mo e lakanga fakataulaʻeikí ʻi heʻenau kalasí.
Fakaafeʻi ʻa e toʻu tupú ke nau ʻai ha lisi ʻo e ngaahi faleʻi ne nau maʻu kimuí ni mai mei he kau taki lakanga fakataulaʻeiki fakafeituʻú (hangē ko e pīsopé pe palesiteni fakasiteikí). Ko e hā ha ngaahi tāpuaki kuo nau maʻu ʻi he muimui ki he faleʻi ko ʻení? Ko e taimi te ke ongoʻi ai ʻoku ueʻi fakalaumālie koe ʻi he lēsoní, fakamoʻoniʻi ʻa e ngaahi tāpuaki ʻoku maʻu mei he muimui ki he kau taki lakanga fakataulaʻeikí.

Ako fakataha

ʻE tokoni ʻa e ngaahi ʻekitivitī takitaha ʻi laló ke mahino ki he toʻu tupú hono mahuʻinga ʻo e muimui ki he kau taki lakanga fakataulaʻeikí. Muimui ʻi he ueʻi ʻa e Laumālié, fili ha ʻekitivitī ʻe taha pe lahi ange ʻe ʻaonga taha taha ki hoʻo kalasí:

Kole ki he toʻu tupú ke nau vahevahe ha ngaahi sīpinga mei he folofolá, ʻo ha taha naʻe feinga mo muimui ʻi he faleʻi ʻa ha taki lakanga fakataulaʻeiki (hangē ko ia ʻi he 2 Ngaahi Tuʻi 5:1–14, Mōsaia 28:1–8, pe ʻAlamā 16:5–8). Fakaafeʻi ʻa e toʻu tupú ke nau aleaʻi e meʻa ne nau ako mei he ngaahi sīpinga ko ʻení kau ki hono tali ʻo e faleʻí. Naʻe maʻu fēfē ʻe he kau taki ʻi he ngaahi talanoa ko ʻení ʻa e fakahinohino fakalaumālie ke tataki kinautolu ne nau tokoniʻí? Fakaafeʻi ʻa e toʻu tupú ke nau vahevahe ha ngaahi meʻa ne nau aʻusia naʻa nau fakamālohia ʻenau fakamoʻoni ʻoku tataki fakalaumālie hotau kau taki lakanga fakataulaʻeikí.
Fakaafeʻi ʻa e toʻu tupú ke nau lau ʻa e ʻEfesō 4:11–14 mo e Tokāteline mo e Ngaahi Fuakava 1:38; 21:4–5; 124:45–46 pea tali ʻa e fehuʻi ko ʻení: Ko e hā ʻoku mahuʻinga ai ke muimui he faleʻi ʻa e kau taki lakanga fakataulaʻeikí? Kole ki he toʻu tupú ke nau vahevahe ha ngaahi meʻa ne nau aʻusia ʻa ia ne nau muimui ai he faleʻi ʻa ha taki lakanga fakataulaʻeiki pea tāpuekina kinautolu.
Tufa e tatau ʻo e lea ʻa ʻEletā Tāleni H. ʻOakesi ko e “Ongo Founga ʻo e Fetuʻutakí.” Kole ki ha vaheua ʻe taha ʻo e kalasí ke nau lau ʻa e konga I ʻo e, “Founga Fakatāutahá” pea ngāue fakataha ke tā ha saati ʻokú ne fakafofongaʻi ʻa e meʻa ʻoku akoʻi ʻe ʻEletā ʻOakesí. Kole ki he vaheua ʻe tahá ʻo e kalasí ke nau fai ʻa e meʻa tatau mo e konga II, “Ko e Founga ʻo e Lakanga Fakataulaʻeikí.” Ka hili ha fevahevaheʻaki ʻe he ongo kulupú ʻenau sātí, lau fakataha ʻa e konga III, “Ko Hono Fakatou Fie maʻu ʻo e Ongo Foungá,” pea fehuʻi ki he toʻu tupú pe kuo fēfē hano tāpuakiʻi kinautolu mo honau fāmilí ʻe he fakahā fakafoʻituituí pea mo e fakahā ʻoku fou mai he kau taki lakanga fakataulaʻeikí.

Kole ki he toʻu tupú ke nau vahevahe ʻa e meʻa ne nau ako he ʻaho ní. ʻOku mahino nai kiate kinautolu ʻa e ʻuhinga ʻoku mahuʻinga ai ke muimui he faleʻi ʻa e kau taki lakanga fakataulaʻeikí? Ko e hā haʻanau ongo pe fakakaukau? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tefito ko ʻení?

Tokoni fakafaiako

“ʻOku hanga ʻe he kau faiako ʻoku lahi ange honau taimi akonakí mo ʻenau tali e fehuʻi kotoa peé, ʻo ʻai ke loto siʻi e kau akó mei he kau mai ki he kalasí” (ʻOku ʻIkai ha Ui ʻe Mahuʻinga Ange ʻi he Faiakó [1999], 71).

Fakaafeʻi ke ngāue

Ko e hā ne ako ʻe he toʻu tupú ʻi he ʻahó ni fekauʻaki mo e feinga ke maʻu ha faleʻi mei he kau taki lakanga fakataulaʻeikí? Fakaafeʻi kinautolu ke nau hiki ʻi heʻenau tohinoá ʻa e faleʻi ʻoku nau maʻú pea mo e ngaahi tāpuaki ʻoku nau maʻu ʻi heʻenau muimui ki aí.