Te u kau lelei fēfē atu ʻi he ngaahi fakataha alēlea ʻi he Siasí?
ʻOku puleʻi ʻa e Siasi ʻo e ʻEikí ʻo fou ʻi he ngaahi fakataha alēleá. ʻOku fealēleaʻaki fakataha ʻa e kau takí ʻi he fakahinohino ʻa e taki lakanga fakataulaʻeikí, ke ʻaonga ki he fakafoʻituituí, fāmilí, mo e Siasí. ʻOku fakaafeʻi ʻe he ngaahi fakataha alēlea leleí ke kau kakato ʻa e kau mēmipa kotoa ʻo e fakataha alēleá, ʻi heʻenau feinga ke taha pea mo tataki ʻe he Laumālie Māʻoniʻoní ke langa ʻa e puleʻanga ʻo e ʻOtuá. ʻE lava ke tokoni kiate kitautolu hono ako ke ʻilo ʻa e founga ʻoku maʻu ai ʻa e fakahaá ʻi he ngaahi fakataha alēleá ke tau kau lelei atu ʻi he ngaahi fakataha alēleá, kau ai mo e ngaahi fakataha fakapalesitenisií, fakataha kōmiti toʻu tupu ʻa e kau pīsopelikí, pea mo e ngaahi fakataha alēlea fakafāmilí.
Teuteuʻi fakalaumālie koe
Ko e fē ha taimi naʻáke kau atu ai ki ha fakataha alēlea? Ko e hā ha ngaahi aʻusia kuo nau tokoniʻi koe ke mahino hono mahuʻinga ʻo e ngaahi fakataha alēleá ʻi he ngāue ʻa e ʻEikí?
Ko e hā ha ngaahi fakataha alēlea kuo kau ki ai ʻa e toʻu tupú (hangē ko ʻení, kau palesitenisī fakakalasí mo fakakōlomú mo e kōmiti toʻu tupu ʻa e kau pīsopelikí)? Ko e hā ʻa e lahi e mahino ʻa e toʻu tupú ki he ngaahi taumuʻa ʻo e ngaahi fakataha alēleá?
Fakaʻaongaʻi ʻa e ngaahi maʻuʻanga tokoni ʻi laló ke mahino kiate koe ʻa e ngaahi tefitoʻi moʻoni ʻo e ngaahi fakataha alēlea lelei ʻi he Siasí. Hili ia pea fakakaukauʻi ha founga ʻe lava ke tokoni atu ai ʻa e ngaahi ʻekitivitī he toenga ʻo e fokotuʻutuʻu ko ʻení ke palani ha ngaahi founga ke fakakau ʻa e toʻu tupú ʻi he akó. ʻE tokoni ʻa e ngaahi meʻa kuó ke aʻusia ʻi he ngaahi fakataha alēleá ke ke akoʻi lelei ʻeni.
Mātiu 18:20 (ʻE ʻafio ʻa e ʻEikí ʻi he lotolotonga ʻo kinautolu ʻoku fakataha ʻi Hono huafá)
Molonai 6:4–5 (ʻOku faʻa fakataha ʻa e kāingalotu ʻo e Siasí ke aleaʻi ʻa e uelofea ʻo e ngaahi laumālié)
T&F 38:27 (Kuo fekauʻi kitautolu ke tau uouangataha)
T&F 88:122 (ʻOku hoko ʻa e fakamāmaʻí ʻi he hili hono maʻu ʻe he taha kotoa ha faingamālie ke lea mo fanongó)
Henry B. Eyring, “Ko e Ako ʻi he Lakanga Fakataulaʻeikí,” Ensign pe Liahona, Mē 2011, 62–65.
Dieter F. Uchtdorf, “Ko Hono Fakahoko ʻo e Ngaahi Moʻoni ʻo e Ongoongolelei ʻo Sīsū Kalaisí” fakataha ako fakatakimuʻa fakaemāmani lahi, Fēpueli 2012
Vitiō: “Participate in Councils”
Ko e faiako ‘i he founga ‘a e Fakamo‘uí
Naʻe foaki ʻe he Fakamoʻuí kiate kinautolu naʻá Ne akoʻí ha ngaahi faingamālie ke nau fai ʻenau ngaahi fehuʻí mo vahevahe ʻenau ngaahi ʻiló (vakai, Luke 10:25–37). Naʻá Ne tali ʻenau ngaahi fehuʻí mo fakafanongo ki he ngaahi meʻa ne nau aʻusiá. Te ke poupouʻi fēfē ʻa e toʻu tupú ke nau fai ha ngaahi fehuʻi mo vahevahe ʻenau ʻiló?
Fai hano fakafehokotaki
Lolotonga e ngaahi fuofua miniti ʻo e kalasi kotoa pē, tokoni ke fai hano fakafehokotaki ʻe he toʻu tupú ʻa e ngaahi meʻa ʻoku nau ako ʻi ha ngaahi feituʻu kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe meʻa ne nau aʻusia mo honau kaungāmeʻá). Te ke tokoniʻi fēfē kinautolu ke nau vakai ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:
-
Kole ki he toʻu tupú ke nau vahevahe ha meʻa ne nau aʻusia ne nau ako ai ha faʻahinga meʻa fekauʻaki mo e ongoongoleleí ʻi ha founga mahuʻingamālie. Te nau lava ʻo fakakau ai ha ngaahi aʻusia mei he lotú, seminelí, efiafi fakafāmili ʻi ʻapí, ako fakafoʻituitui ʻo e folofolá, pe moʻui fakaʻahó.
-
Fakaafeʻi ʻa e toʻu tupú ke nau vahevahe ha ngaahi meʻa ne nau aʻusia ʻi haʻanau kau atu ki hangaahi fakataha alēlea ʻi he Siasí, hangē ko ha kalasi pe kau palesitenisī fakakōlomú pe ngaahi fakataha ʻa e kōmiti toʻu tupu ʻa e kau pīsopelikí. Ko e hā ne nau fai ke teuteu ki he fakatahá? Ko e hā ne nau fai ke nau kau atu ki aí? Naʻe tokoni fēfē ʻa e fakataha alēleá ke fakahoko ʻa e ngāue ʻa e ʻEikí?
Ako fakataha
ʻE tokoni ʻa e ngaahi ʻekitivitī takitaha ʻi laló ke mahino ki he toʻu tupú ʻa e ngaahi tefitoʻi moʻoni ʻo e ngaahi fakataha alēlea lelei ʻi he Siasí. Muimui ʻi he fakahinohino Laumālie Māʻoniʻoní ʻo fili ha taha pe toe lahi ange ʻe ngāue lelei taha ki hoʻo kalasí. Tuku ha taimi ki he toʻu tupú ke nau kau ai ʻi he sīpinga ʻo e fakataha alēlea ʻoku ʻi he ngataʻanga ʻo e konga ko ʻení.
-
Hiki ʻi he palakipoé ʻa e ngaahi fakamoʻoni fakafolofola ʻoku fokotuʻu atu ʻi he fokotuʻutuʻu ko ʻení. Kole ki he kau mēmipa takitaha ʻo e kalasí ke nau fili ha potufolofola ke ako pea fakakaukau ki he ʻuhinga ʻoku fakaʻaongaʻi ai ʻe he ʻEikí ʻa e fakataha alēleá ke fakahoko ʻaki ʻEne ngāué. Ko e hā he ʻikai lelei fēfē ai kapau ʻe fai ʻa e ngaahi tuʻutuʻuní kotoa ʻe ha toko taha pē kae ʻikai fealēleaʻaki mo ha niʻihi kehe? ʻE fakaʻaongaʻi fēfē ʻe he toʻu tupú ʻa e ngaahi tefitoʻi moʻoni ko ʻení ʻi heʻenau feohi mo honau fāmilí?
-
Vahevahe ʻa e lea ʻa Palesiteni Tietā F. ʻUkitofa ko e “Ko Hono Fakahoko ʻo e Ngaahi Moʻoni ʻo e Ongoongolelei ʻo Sīsū Kalaisí” ki ha ngaahi konga, pea tufa ki he toʻu tupu takitaha ha konga ke ne lau. Kole ki he toʻu tupú ke nau hiki ha fehuʻi fekauʻaki mo e kau ʻi he ngaahi fakataha alēleá ʻe lava ke tali heʻenau kongá. Fakaafeʻi kinautolu ke fakafetongi ʻenau ngaahi fehuʻí pea mo e ngaahi konga ʻo e leá mo ha mēmipa kehe ʻo e kalasí pea kumi nau kumi e ngaahi tali ki he fehuʻi takitaha ʻa e mēmipa ko iá. Ko e hā ʻoku nau ako meia Palesiteni ʻUkitofa te nau lava ʻo fakaʻaongaʻi ʻi heʻenau kau ʻi he ngaahi fakataha alēlea fakafāmilí pe fakataha alēlea ʻa e Siasí?
-
Huluʻi ʻa e vitiō “Participate in Councils.”Fakaafeʻi ʻa e toʻu tupú ke nau kumi ʻa e ngaahi meʻa mahuʻinga ʻo e fakataha alēlea leleí pea hiki kinautolu (ʻe ala kau ʻi he ngaahi sīpingá ʻa e muimui ʻi he Laumālié, fefakafanongoʻakí, pea mo hono vahe mo tali e ngaahi ngāue ke faí). Fakaafeʻi kinautolu ke nau vahevahe ha ngaahi aʻusia ne nau mamata ai ʻi hono ngāue ʻaki e ngaahi tefitoʻi moʻoni ko ʻení ʻi ha fakataha alēlea pe ʻi ha toe ngaahi tūkunga kehe.
4:42 -
Fakaafeʻi ha niʻihi ʻo e toʻu tupú ke nau lau e ngaahi aʻusia ʻa Palesiteni Henelī B. ʻAealingi ʻi heʻene kei siʻí, ʻi he kōlomu ʻo e kau taulaʻeikí (ʻi heʻene lea ko e “Ko e Ako ʻi he Lakanga Fakataulaʻeikí”), pea fakaafeʻi ha niʻihi kehe ke nau lau ʻene hoko ko e pīsope he ʻosi e taʻu e 20 mei aí (ʻi he lea tatau pē). Kole ange ke nau toe fefakamatalaʻi ʻa e ongo talanoa tatau pē ʻiate kinautolu. Ko e hā ʻoku nau ako mei he ongo talanoá ni kau ki he ngaahi fakataha alēleá? Ko e hā ʻokú ne ʻai ʻa e ngaahi fakataha alēlea peheé ke hoko ko ha founga lelei ke fai ai e ngāue ʻa e ʻEikí? Ko e hā ha ngaahi faingamālie ʻoku maʻu ʻe he toʻu tupú ke nau fealēleaʻaki fakataha ai?
ʻOku ʻoatu ʻe he ʻekitivitī ko ʻení ki he toʻu tupú ha faingamālie ke nau aʻusia ai ʻa e kau ʻi ha fakataha alēleá. ʻE fakalahi ʻe he meʻá ni ʻa e mahino ʻoku nau maʻú pea mo teuteuʻi kinautolu ke ngāue ʻaki ʻa e meʻa kuo nau akó ʻi tuʻa mei he kalasí.
-
Ka hili hano fakakakato ha taha ʻo e ngaahi ʻekitivitī ʻi ʻolungá, fakaafeʻi ʻa e toʻu tupú ke nau fakaʻaongaʻi ʻa e ngaahi tefitoʻi moʻoni ne nau akó ʻaki haʻanau fakatātaaʻi ʻa e founga kau ʻi ha fakataha alēleá. Vahe ki he mēmipa takitaha ʻo e kalasí ha fatongia ke ne fakatātaaʻi, pea kole ange ke nau fili ha tefito te nau lava ʻo aleaʻí, hangē ko e founga ke tokoniʻi ai ha kāingalotu ʻo e uōtí ke mahino hono mahuʻinga ʻo e ʻapasiá pe teunga tāú.
Kole ki he toʻu tupú ke nau vahevahe ʻa e meʻa ne nau ako he ʻaho ní. ʻOku mahino nai kiate kinautolu ʻa e founga ke kau lelei ai ʻi he ngaahi fakataha alēlea ʻi he Siasí? Ko e hā ha ngaahi ongo pe ngaahi fakakaukau ʻoku nau maʻu? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tefito ko ʻení?
Tokoni fakafaiako
“ʻE tokoni hono hiki e ngaahi fehuʻí ʻi he palakipoé kimuʻa pea toki kamata e kalasí ke kamata fakakaukau e kau akó ki he ngaahi taumuʻá ʻoku teʻeki ai kamata e lēsoní” (ʻOku ʻIkai ha Ui ʻe Mahuʻinga Ange ʻi he Faiakó, 109).
Fakaafeʻi ke ngāue
Fakaafeʻi ʻa e toʻu tupú ke nau fakaʻaongaʻi ʻa e meʻa ne nau ako mo akoako fakahoko ʻi he ʻaho ní ʻi heʻenau kau atu ʻi he ngaahi fakataha alēleá (fekauʻaki mo honau ngaahi uiuiʻí, honau fāmilí, pe ʻi honau fatongia fakataki ʻi he seminelí). ʻI he kamataʻanga ʻo e kalasi hono hokó, fakaafeʻi ha niʻihi tokosiʻi ke nau vahevahe e ngaahi meʻa ne nau aʻusiá.