Te u lava fēfē ke moʻui fakafalala fakalaumālie pē kiate au?

ʻOku fie maʻu e moʻui fakafalala fakalaumālie pē kiate kitá ki heʻetau lelei taʻengatá. ʻI he taimi ʻoku tau moʻui fakafalala fakalaumālie ai pē kiate kitautolú, ʻoku ʻikai ke toe fakafalala leva ʻetau fakamoʻoní ʻi he fakamoʻoni ʻa e niʻihi kehé. ʻOku tau feinga ke maʻu ʻetau ngaahi aʻusia fakalaumālié ʻi he lotu fakaʻahó, ako e folofolá, mo hono fakaʻaongaʻi e tui kia Sīsū Kalaisí. ʻOku tau fakafalala ki heʻetau Tamai Hēvaní ki heʻene tokoní ke fakaleleiʻi ʻetau ngaahi palopalema faingataʻá. ʻOku tau toe lava foki ke fakamālohia e niʻihi kehé ʻi he ngaahi taimi ʻo ʻenau fie maʻu fakalaumālié.

Teuteuʻi fakalaumālie koe

Ko e hā ha meʻa kuó ke fai ke ke moʻui fakafalala fakalaumālie ange ai kiate koe pē? Kuo tāpuekina fēfē koe ʻi hoʻo moʻui fakafalala fakalaumālie pē kiate koé?

Ko e hā ʻe lava ke fai ʻe he toʻu tupú ke fakatupulaki ai ha moʻui fakafalala fakalaumālie pē kiate kinautolú? ʻE kaunga lelei fēfē ki he toʻu tupú ʻenau moʻui fakafalala fakalaumālie lahi ange kiate kinautolú?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā ha meʻa ʻe tokoni ke mahino ki he toʻu tupú e mahuʻinga ʻo e moʻui fakafalala fakalaumālie pē kiate kinautolú?

Mātiu 25:1–13 (Ko e talanoa fakatātā ʻo e kau taupoʻou ʻe toko hongofulú)

Molomona 9:27 (ʻOku totonu ke tau ngāueʻi hotau fakamoʻuí)

Molonai 10:3–5 (ʻE lava ke tau ʻiloʻi e moʻoní maʻatautolu)

T&F 58:26–28 (ʻOku tau fakafofongaʻi pē kitautolu ke ʻomi ai e māʻoniʻoní)

T&F 130:18–19 (ʻOku tokoni kiate kitautolu e faivelengá mo e talangofuá ke tau maʻu ai e ʻiló mo e potó)

Dean M. Davies, “Ko e Ngaahi Tāpuaki ʻo e Mōihuú,”EnsignpeLiahona,Nōvema. 2016, 93–95

Dieter F. Uchtdorf, “Ko e Mālohi ʻo ha Fakamoʻoni Fakatāutahá,” Ensign pe Liahona, Nov. 2006, 37–39

Jörg Klebingat, “Hū ki he ʻAfioʻanga ʻo e ʻOtuá ʻi he Loto-Falala,” Ensign pe Liahona, Nōvema. 2014, 34-37.

David A. Bednar, “Ului ki he ʻEikí,” Ensign pe Liahona, Nōvema 2012, 106–9

Vitiō: “Ko Kinautolu ʻOku Potó”; vakai foki, Doctrine and Covenants and Church History Visual Resource DVDs

ʻAi ke fakafehokotaki

Lolotonga e ngaahi fuofua miniti ʻo e kalasi kotoa pē, tokoni ke fakafehokotaki ʻe he toʻu tupú ʻa e ngaahi meʻa ʻoku nau ako ʻi he ngaahi tūkunga kehekehe (hangē ko e ako fakatāutahá, seminelí, ngaahi kalasi kehe ʻa e Siasí, pe meʻa ne nau aʻusia mo honau kaungāmeʻá). Ko e hā ha founga te ke lava ʻo tokoni ai ke nau mamata ki hono mahuʻinga ʻo e ongoongoleleí ʻi he moʻui fakaʻahó? ʻE ala tokoni atu e ngaahi fakakaukau ʻi laló:

Fakaafeʻi e toʻu tupú ke nau vahevahe ha faʻahinga meʻa ne nau toki fai ke fakaʻaongaʻi ai e meʻa ʻoku nau ako ʻi he Lautohi Faka-Sāpaté ki heʻenau ako fakatāutaha ʻo e ongoongoleleí.
Kole ki ha mēmipa ʻo e kalasí ke ne lau e palakalafi he kamataʻanga ʻo e lēsoní, mo poupouʻi e toenga ʻo e kalasí ke nau fanongo ki he ngaahi tali ki he fehuʻi “Ko e hā ʻa e moʻui fakafalala fakalaumālie pē kiate kitá?” ʻOange ha ngaahi miniti siʻi ki he kau mēmipa ʻo e kalasí ke nau tohi ʻenau tali ki he fehuʻí, pea fakaʻatā e kau mēmipa ʻo e kalasí ke nau vahevahe ʻenau talí.

Ako fakataha

ʻE lava ke tokoni e ngaahi ʻekitivitī takitaha ʻi laló ki he toʻu tupú ke nau ako ki he founga te nau moʻui fakafalala fakalaumālie lahi ange ai kiate kinautolú. Muimui ki he fakahinohino ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga ki hoʻo kalasí:

Kole ki he to‘u tupú pe ko e hā ʻenau fakakaukau ki he ʻuhinga ʻo e mōihū ki he ʻOtuá, pea hiki ʻenau ngaahi talí ʻi he palakipoé. Ko e hā ha ngaahi a‘usia fakalaumālie kuo nau maʻu ʻi he mōihū ʻi he ngaahi founga ko ‘eni? Fakaafe‘i e toʻu tupú ke nau fekumi ‘i he lea ʻa Pīsope Dean M. Davies “Ko e Ngaahi Tāpuaki ʻo e Mōihuú,” ʻo fekumi ki he ‘uhinga ʻo e mōihū mo‘oni ki he ‘Otuá pea mo e ngaahi tapuaki ʻoku tau ma‘u ʻi he‘etau mōihuú. ‘E tokoni fēfē kiate kitautolu ʻa e ngaahi tāpuaki ʻoku maʻu mei he mōihuú, ke tau hoko ʻo fakafalala fakalaumālie pē kiate kitautolu?
Fili e ngaahi fehuʻi mei he ʻuluaki palakalafi ʻo e lea ʻa ʻEletā Jörg Klebingat ko e “Hū ki he ʻAfioʻanga ʻo e ʻOtuá ʻi he Loto-Falala,” pea fakaafeʻi ʻa e toʻu tupú ke tali fakataautaha e ngaahi fehuʻí. Kole ki he toʻu tupu takitaha ke ako ha taha ʻo e ngaahi fokotuʻu ʻe ono ʻa ʻEletā Klebingat pea fakamatala ki he toenga ʻo e kalasí e founga ʻe lava tokoniʻi ai kinautolu ke nau moʻui fakafalala fakalaumālie lahi ange ai kiate kinautolú.
Fakaafeʻi e toʻu tupu takitaha ke ne lau ha taha ʻo e ngaahi potufolofola ʻoku ʻoatu ʻi he fokotuʻutuʻu ko ʻení. Hili hano ʻoange ha taimi ki he toʻu tupú ke nau lau ai e ngaahi vēsí, vahevahe tautau toko ua kinautolu pea fakaafeʻi ke nau feʻinitaviuʻaki, pea ʻeke ha ngaahi fehuʻi hangē ko ʻení: Ko e hā e lau e potu folofola naʻá ke laú? Ko e hā e meʻa naʻá ke ako kau ki he moʻui fakafalala fakalaumālie pē kiate kitá mei he ngaahi veesi ko ʻení? Ko e hā ha meʻa ʻoku ueʻi koe ke ke fai koeʻuhí ko e meʻa naʻá ke laú? ʻOange ki he toʻu tupú ha faingamālie ke nau ʻinitaviu ai e niʻihi kehe ʻi he kalasí.
Kole ki he toʻu tupú ke lau e konga ʻoku pehē “ʻOku tau Maʻu Fēfē ha Fakamoʻoní?” mei he lea ʻa Palesiteni Tieta F. ʻUkitofá “Ko e Mālohi ʻo ha Fakamoʻoni Fakatāutahá.” Ko e hā ʻoku mahuʻinga ai ke tau takitaha maʻu ʻene fakamoʻoni? Fakaafeʻi e toʻu tupú ke nau vahevahe e founga ne nau maʻu ai ʻenau ngaahi fakamoʻoni ki he moʻoni ʻo e ongoongoleleí. Fakamoʻoni ki he ngaahi tāpuaki ʻokú ke maʻu koeʻuhí ko hoʻo maʻu hoʻo fakamoʻoni pē ʻaʻaú. Te ke lava ʻo vahevahe e lea ko ʻeni meia Palesiteni Tōmasi S. Monisoní ke hoko ko ha konga ʻo e fealeaʻaki ko ʻení: “Kuo pau ke tau maʻu haʻatau fakamoʻoni pē ʻatautolu kae lava ke tau toʻa mo kātekina e ngaahi mālohi kotoa ʻokú ne fefūsiaki holo kitautolú pe ko e fanga kiʻi leʻo ʻoku nau feinga ke tohoakiʻi kitautolu ki he feituʻu halá. Tatau ai pē pe ʻokú ke taʻu 12 pe 112—pe ʻi he vahaʻa ʻo e ongo taʻu ko iá—te ke lava ʻo ʻiloʻi ʻiate koe pē ʻa hono moʻoni ʻo e ongoongolelei ʻo Sīsū Kalaisí” (“Pole ke Tuʻu Tokotaha,” Ensign pe Liahona, Nōvema 2011, 62). Ko e hā ha ngaahi meʻa kehe ʻe lava ke fai ʻe he toʻu tupú ke nau moʻui fakafalala fakalaumālie ai pē kiate kinautolu?
Fakaafeʻi e toʻu tupú ke nau lau e Mātiu 25:1–13, pe fakaʻaliʻali ʻa e vitiō “Ko Kinautolu ʻOku Potó.” Ko e hā ʻoku ako ʻe he toʻu tupú kau ki he moʻui fakafalala fakalaumālie pē kiate kinautolú mei he talanoa fakatātā ko ʻení? Fakaafeʻi e toʻu tupú ke nau lau e konga ʻoku ui ko e “Fakamoʻoní, Uluí, mo e Talanoa Fakatātā ʻo e Kau Taupoʻou ʻe Toko Hongofulú” mei he lea ʻa ʻEletā David A. Bednar ko e “Ului ki he ʻEikí” ko ha konga ʻo e fealeaʻaki ko ʻení. Ko e hā ha meʻa ʻe lava ke fai ʻe he toʻu tupú ke fakalahi ai e lolo ʻi heʻenau māmá?

Kole ki he toʻu tupú ke nau vahevahe ʻa e meʻa naʻa nau ako he ʻaho ní. ʻOku mahino nai kiate kinautolu e founga ke nau moʻui fakafalala fakalaumālie pē kiate kinautolú? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ki he tefito ko ʻení?

Ngaahi taukei ako ʻo e ongoongoleleí

Fakamatala fakanounou. ʻI he ʻuluaki ʻekitivitī he konga ko ʻení, ʻoku fakaafeʻi e toʻu tupú ke nau tohi ha fakamatala fakanounou ʻo e meʻa ne nau lau mei ha lea ʻo e konifelenisi lahi. ʻE tokoni ʻeni ke fakapapauʻi ʻoku mahino kiate kinautolu e pōpoaki ʻo e leá. ʻOku toe fakaafeʻi kinautolu ke nau fakaʻaongaʻi e pōpoakí ʻi heʻenau moʻuí; te nau lava ʻo fai ʻeni ʻaki haʻanau fai ha ngaahi fehuʻi peheni “Ko e hā e meʻa ʻoku finangalo e ʻEikí ke u ako mei he lea ko ʻení?” Poupouʻi e toʻu tupú ke nau fai ʻeni he taimi kotoa pē te nau ako ai ha lea ʻo ha konifelenisi.

Fakaafeʻi ke ngāue

ʻEke ki he toʻu tupú pe ko e hā ha meʻa kuo ueʻi kinautolu ke fai, koeʻuhí ko e meʻa ne nau ako he ʻaho ní. Poupouʻi kinautolu ke nau ngāueʻi ʻa e ngaahi ongo ko ʻení. Fakakaukauʻi ha ngaahi founga te ke muimuiʻi ai.